Afɔ mi yɛ Gomba yɛ Uganda. Ohiafoi fa yɛ jɛmɛ waa. Srawa hewalɛ, ni ji ilɛktrisiti bɛ maŋ lɛ mli, no hewɔ lɛ, kɛ́ eshɛ gbɛkɛ lɛ, wɔsuɔ kane ko ni akɛ kerozin woɔ mli.

 Mifɔlɔi lɛ, okwaafoi ji amɛ. Amɛfã kɛjɛ Rwanda kɛbahi Uganda. Amɛduɔ kɔfi kɛ akwadu, ni amɛkɛ akwadu feɔ dãa ko ni ehé gbɛ́i waa ni atsɛɔ lɛ waragi lɛ. Mifɔlɔi lɛ́ wuɔi, toi, kpolotoi, kɛ tsinai. He ni mijɛ kɛ bɔ ni atsɔse mi ahã lɛ hã mihe miye akɛ esa akɛ ŋa abo ewu toi be fɛɛ be, ni esaaa etsɔɔ esusumɔ yɛ nɔ ko nɔ ko he.

 Be ni miye afii 23 lɛ, mifã kɛtee Rwanda, ni mikɛ minanemɛi ni ji mitipɛŋfoi ni yɔɔ jɛmɛ lɛ yaa klab. No mli lɛ, mifɔɔ klab pɔtɛɛ ko yaa waa, hewɔ lɛ, klab lɛ nɔkwɛlɔi lɛ hã mi kaadi ni baahã manyɛ mabote mli be fɛɛ be ni aheee mi shika. Agbɛnɛ hu, minya sinii ni anɔɔ waa yɛ mli, kɛ nɔ ni afeɔ yiwalɛ nii yɛ mli lɛ akwɛmɔ he waa. Akutso mli ni mihi lɛ kɛ nibii ni mikɛjieɔ mihiɛtserɛ lɛ hã mibatsɔ yiwalɔ kɛ daatɔlɔ ni bɛ jeŋba.

 Yɛ afi 2000 lɛ, mikɛ oblayoo ko ni atsɛɔ lɛ Skolastique Kabagwira fee jɔle. Wɔfɔ bii etɛ. Akɛni be ni midaa lɛ mibale akɛ esa akɛ yei abo amɛwumɛi atoi yɛ nɔ fɛɛ nɔ mli, ni amɛkatsɔɔ amɛjwɛŋmɔ hewɔ lɛ, mikpa gbɛ akɛ kɛ́ ebaaŋa mi loo ebaabi mi nɔ ko lɛ, esa akɛ ekula shi. Agbɛnɛ hu, mikɛɛ nɔ fɛɛ nɔ ni wɔyɔɔ lɛ, mi minɔ ni, ni mi pɛ miyɔɔ hegbɛ akɛ mikɛfeɔ nɔ ni misumɔɔ. Bei pii kɛ́ mije kpo gbɛkɛ lɛ, mibaa shĩa maŋkɛ ŋmɛji etɛ ni mitɔ dãa. Kɛ́ mitswa shinaa lɛ ni Skolastique sɛɛ tsɛ dani ebagbele mi lɛ, miyiɔ lɛ.

 No mli lɛ, mitsuɔ nii mihãa mɔ ko sikuriti kɔmpane, ni nyɔmɔ ni awoɔ mi lɛ hi waa. Yɛ shĩa lɛ, Skolastique bɔ mɔdɛŋ ni ekɔne miyiŋ koni mafata ehe kɛya sɔlemɔ ni eyaa lɛ, kɛsusumɔ lɛ akɛ no baahã matsake. Shi misumɔɔɔ maya. Moŋ lɛ, mibaná suɔmɔ mihã yoo kroko. Misui gbohii kɛ yiwalɛ nifeemɔ lɛ hewɔ lɛ, Skolastique kɛ wɔbii etɛ lɛ shi kɛyahi efɔlɔi aŋɔɔ.

 Wɔnaanyo nuu onukpa ko kɛ mi wie mijeŋba lɛ he. Ewo mi ŋaa akɛ mihã Skolastique aku esɛɛ kɛba. Ewie akɛ bɔ ni mibii lɛ ahe yɔɔ fɛo lɛ hewɔ lɛ, esa akɛ amɛkɛ amɛpapa ahi shi. No hewɔ lɛ, yɛ afi 2005 lɛ, mikpa daanumɔ, mishi yoo hee lɛ, ni mihã Skolastique ku esɛɛ kɛba. Yɛ afi 2006 lɛ, wɔbote gbalashihilɛ mli. Shi no mli lɛ loloolo lɛ, miwaa miŋa yi, ni mifeɔ lɛ niseniianii.

 Yɛ afi 2008 lɛ, Yehowa Odasefonyo ko ni atsɛɔ lɛ Joël ba wɔshĩa lɛ, ni mibo sane ni ekɛmi bawie lɛ toi. Lɛ kɛ Yehowa Odasefonyo ko ni atsɛɔ lɛ Bonaventure lɛ fɔɔ mi saramɔ, ni kɛ́ amɛkɛ mi miigba Biblia mli sane lɛ, mikɛ amɛ taa saji anaa waa. Mibi saji babaoo, titri lɛ nɔ ni kɔɔ Kpojiemɔ wolo lɛ he. No mli lɛ, miibɔ mɔdɛŋ matsɔɔ Odasefoi lɛ akɛ, amɛtsɔɔmɔi lɛ ejaaa. Akɛ nɔkwɛmɔnɔ lɛ, mibi amɛ nɔ hewɔ ni amɛkɛɔ akɛ “asafoku babaoo” ni atsĩ tã yɛ Kpojiemɔ 7:9 lɛ baahi shikpɔŋ lɛ nɔ, be mli ni nakai kuku lɛ kɛɛ, amɛdamɔ “[Nyɔŋmɔ] maŋtsɛ sɛi lɛ hiɛ kɛ Gwantɛŋbi [Yesu Kristo] lɛ hiɛ” lɛ. Joël to etsui shi ni ehã saji ni mibibii lɛ ahetoo. Akɛ nɔkwɛmɔnɔ lɛ, etsɔɔ mi Yesaia 66:1 lɛ, he ni Nyɔŋmɔ tsɛ shikpɔŋ lɛ akɛ ‘enajiashi sɛi’ lɛ. No hewɔ lɛ, ekã shi faŋŋ akɛ, he ni asafoku babaoo lɛ damɔ yɛ Nyɔŋmɔ maŋtsɛsɛi lɛ hiɛ ji shikpɔŋ lɛ nɔ. Ni ehã mikane Lala 37:29 lɛ ni kɛɔ akɛ, jalɔi lɛ baahi shikpɔŋ lɛ nɔ kɛya naanɔ lɛ.

 Naagbee mli aahu lɛ, mikpɛlɛ ni ekɛ mi akase Biblia lɛ. No hewɔ lɛ, Bonaventure kɛ mi kɛ Skolastique fɛɛ kase Biblia lɛ. Be ni miyaa hiɛ yɛ mi-Biblia kasemɔ lɛ mli lɛ, mibanu he waa akɛ esa akɛ mafee tsakemɔi yɛ mishihilɛ mli. Mibale bɔ ni esa akɛ majie bulɛ kpo matsɔɔ miŋa. Bianɛ lɛ, mikpaaa gbɛ akɛ kɛ́ ebaaŋa mi loo ebaabi mi nɔ ko lɛ ekula shi, ni mikɛɛɛ hu akɛ nibii fɛɛ ni wɔyɔɔ lɛ, mikome too minɔ ni. Agbɛnɛ hu, mikpa sini ni yiwalɛ nifeemɔi yɔɔ mli lɛ akwɛmɔ. Mináaa tsakemɔi nɛɛ afeemɔ mlɛo kwraa, ni ehe bahia ni maye mihe nɔ ni maba mihe shi.

 Afii fioo komɛi ni ho lɛ, mihã mibinuu onukpa ni atsɛɔ lɛ Christian lɛ yahi wɔwekumɛi lɛ aŋɔɔ yɛ Uganda. Shi be ni mikane 5 Mose 6:4-7 lɛ, mibayɔse akɛ, eji mi kɛ miŋa sɔ̃ akɛ wɔkwɛ wɔbii lɛ, ni wɔtsɔɔ amɛ nɔ ni Nyɔŋmɔ taoɔ yɛ amɛdɛŋ. Be ni wɔhã wɔbi lɛ ku esɛɛ kɛbahi wɔŋɔɔ lɛ, wɔ kɛ lɛ fɛɛ ná miishɛɛ!

 Mibale akɛ Yehowa ji Nyɔŋmɔ ni naa mɔbɔ, ni miheɔ miyeɔ akɛ, ekɛ gbɛ gbonyo ni mikɔ be ko ni eho lɛ kɛ misui gbohii lɛ fɛɛ eke mi. Eŋɔɔ minaa waa akɛ Skolastique hu kpɛlɛ ni akɛ lɛ akase Biblia lɛ. Wɔjɔɔ wɔwala nɔ wɔhã Yehowa, ni abaptisi wɔyi enyɔ lɛ fɛɛ yɛ December 4, 2010. Amrɔ nɛɛ wɔheɔ wɔhe wɔyeɔ, ni wɔmiiná Biblia shishitoo mlai ni wɔkɛtsuɔ nii yɛ wɔweku lɛ mli lɛ he sɛɛ waa. Eŋɔɔ miŋa naa waa akɛ bianɛ lɛ, kɛ́ mikpa nitsumɔ nɔŋŋ lɛ, mibaa shĩa tɛ̃ɛ. Kɛfata he lɛ, eŋɔɔ enaa akɛ mikɛ lɛ yeɔ yɛ mlihilɛ kɛ bulɛ mli, mitsi mihe kɛje dãa he, ni mijeee yiwalɔ dɔŋŋ. Yɛ afi 2015 lɛ, awo mi asafoŋ onukpa koni maye mabua wɔsafo lɛ. Abaptisi wɔbii enumɔ lɛ ateŋ mɛi etɛ.

 Be ni Yehowa Odasefoi lɛ kɛ mi bɔi Biblia lɛ kasemɔ lɛ, mibiɔ amɛ saji koni manu nɔ ni amɛkɛɔ mi lɛ shishi dani mikpɛlɛɔ nɔ. Shi mihiɛ sɔ bɔ ni amɛjɛ Biblia lɛ mli amɛhã misanebimɔi lɛ ahetoo lɛ waa. Mi kɛ Skolastique fɛɛ bayɔse akɛ, esa akɛ mɛi ni kɛɛ amɛmiisɔmɔ anɔkwa Nyɔŋmɔ lɛ ahi shi yɛ eshishitoo mlai lɛ anaa, jeee bɔ ni amɛ amɛsumɔɔ ni amɛhi shi. Miida Yehowa shi akɛ ehã naanyobɔɔ kpakpa ebakã mi kɛ lɛ kɛ mɛi krokomɛi ni kɛ anɔkwayeli miisɔmɔ lɛ lɛ ateŋ. Kɛ́ misusu bɔ ni mihi shi tsutsu lɛ kɛ bɔ ni mihiɔ shi bianɛ lɛ he lɛ, ehãa mináa nɔmimaa akɛ Nyɔŋmɔ baanyɛ aye abua mɔ fɛɛ mɔ ni hiɛ tsui kpakpa lɛ koni enyɛ efee tsakemɔi ni sa ní enyɛ esa ehiɛ.