Miye mɔ ni mikɛpraktisiɔ lɛ awui bɔ ni mikpaaa gbɛ akɛ ebaapila waa nakai. Mijeee gbɛ ni mishi egugɔ ŋtia. Mishwa mihe waa aahu akɛ mibi mihe akɛ, ‘Ani esa akɛ maya nɔ manɔ karat?’ Mɛni hewɔ naagba ni ba nɛɛ hã mibi mihe kɛji esa akɛ maya nɔ manɔ karat ni misumɔɔ waa, ni mikɛ afii babaoo ekase lɛ? Klɛŋklɛŋ lɛ hã matsɔɔ bo bɔ ni fee ni mikɛ mihe yawo karatnɔmɔ mli.

 Atsɔse mi yɛ weku ko ni yɔɔ miishɛɛ mli, yɛ he ko ni bɛŋkɛ Bufalo yɛ New York ni yɔɔ U.S.A lɛ, ni wɔkɛ Katolik jamɔ shwɛɛɛ kwraa. Mitee Katolik skul srɔtoi, ni misɔmɔ akɛ oblahii ni yeɔ amɛbuaa osɔfoi lɛ ateŋ mɔ kome. Eji mifɔlɔi ashwelɛ akɛ mi kɛ minyɛmiyoo lɛ aye omanye yɛ shihilɛ mli. No hewɔ lɛ, amɛŋmɛ mi gbɛ ni mikɛ mihe awo spɔts mli kɛ́ akpa skul, loo mikɛ mibe fã atsu nii, kɛ́ no hãaa mɔdɛŋ ni mibɔɔ yɛ skul lɛ aba shi. Ehã mikase bɔ ni ayeɔ henɔ kɛ bɔ ni atsuɔ nibii ahe nii be ni midako tsɔ.

 Be ni miye afii 17 lɛ, mibɔi karatnɔmɔ kasemɔ. Mipraktisiɔ ŋmɛlɛtswai etɛ daa gbi, gbii ekpaa yɛ otsi lɛ mli, ni mifee enɛ afii babaoo. Daa otsi lɛ, mikɛ ŋmɛlɛtswai babaoo jwɛŋɔ karatnɔmɔ lɛ mli ŋai anɔ, ni mikwɛɔ ehe vidio ni baahã maya mihiɛ hu. Kɛ́ miipraktisi ni aha mihiɛ ni mihiɛ nibii ni wɔkɛnɔɔ lɛ eko po lɛ, minyaa he waa. Minyɛɔ mikɛ mitswɛrɛ kome po kuɔ tsei, loo blɔki mli. Mibatsɔ mɛi ni he esa waa lɛ ateŋ mɔ kome, ni miná jweremɔnii yɛ akaŋshii amli. Karatnɔmɔ batsɔ nɔ ni he hiaa mi fe fɛɛ yɛ mishihilɛ mli.

 Mibanu he akɛ miye omanye yɛ shihilɛ mli. Be ni migbe yunivɛsiti naa lɛ, mifata mɛi ni bɔ mɔdɛŋ waa fe fɛɛ lɛ ahe. Mitsu nii yɛ kɔmpene wulu ko mli akɛ kɔmpiuta injinia. Kɔmpene lɛ hã mi nibii babaoo, ni no mli lɛ miyɛ mishia kɛ jɔle hu. No mli lɛ mɛi krokomɛi naa mi akɛ miyɛ miishɛɛ, shi mibɛ miishɛɛ ejaakɛ mibi saji babaoo ni mináaa hetoo.

 Bɔ ni afee ni maná misanebimɔi lɛ ahetoo lɛ, mibɔi sɔlemɔ yaa. Miyaa sɔlemɔ shii enyɔ daa otsi, ni misɔleɔ koni Nyɔŋmɔ aye abua mi. Kɛkɛ ni gbi ko lɛ, sane ko ni mikɛ minaanyo ko gba lɛ tsake mishihilɛ. Mibi lɛ akɛ: “Ani obi ohe pɛŋ akɛ mɛni hewɔ wɔyɔɔ shihilɛ mli?” Mikɛfata he akɛ: “Naagbai babaoo yɛ shihilɛ mli, ni ayeee jalɛ sane hu!” Ekɛɛ mi akɛ, lɛ hu ebi ehe saji ni tamɔ nakai dã, ni ená hetooi yɛ Biblia lɛ mli ni hã etsui nyɔ emli waa. Ehã mi wolo ko ni gbɛ́i ji Obaanyɛ Ohi Shi Kɛya Naanɔ Yɛ Paradeiso Yɛ Shikpɔŋ Nɔ. a Ekɛɛ mi akɛ Yehowa Odasefoi kɛ lɛ kaseɔ Biblia lɛ. Shishijee lɛ misumɔɔɔ akɛ mikaneɔ, ejaakɛ minu he akɛ esaaa akɛ mikaneɔ jamɔ ko wolo ko akɛ ja mi diɛŋtsɛ mijamɔ lɛ wolo pɛ. Shi akɛni no mli lɛ, miishwe ni maná misanebimɔi lɛ ahetoo hewɔ lɛ, minu he akɛ esa akɛ makane koni makwɛ akɛ nɔ ni Odasefoi lɛ tsɔɔ lɛ nilee yɛ mli lo.

 Be ni mibana nɔ ni Biblia lɛ tsɔɔ diɛŋtsɛ lɛ, minaa kpɛ mihe waa. Mibaná mile akɛ kulɛ Nyɔŋmɔ yiŋtoo kɛhã adesai ji ní amɛhi shi kɛya naanɔ yɛ paradeiso yɛ shikpɔŋ nɔ, ni nakai yiŋtoo lɛ tsakeko. (1 Mose 1:28) Be ni mina Nyɔŋmɔ gbɛ́i ni ji Yehowa lɛ yɛ mi diɛŋtsɛ mi-Biblia ni ji King James vɛshɛŋ lɛ mli, ni mibaná mile akɛ eji gbɛ́i ni misɔleɔ yɛ he kɛ́ miikɛɛ Nuŋtsɔ Lɛ Sɔlemɔ lɛ, minaa kpɛ mihe waa. (Lala 83:18; Mateo 6:9) Kɛfata he lɛ, mibanu nɔ hewɔ ni Nyɔŋmɔ eŋmɛ gbɛ ni adesai ana nɔ be kukuoo lɛ shishi agbɛnɛ. Mibana akɛ nilee yɛ nibii fɛɛ ni mikaseɔ lɛ amli! Mimii shɛ mihe waa.

 Mihiɛ kpaŋ bɔ ni minu he mihã gbi klɛŋklɛŋ ni mitee Yehowa Odasefoi akpee lɛ eko lɛ nɔ kɔkɔɔkɔ. Mɔ fɛɛ mɔ here mi hiɛmɛɛ ni amɛbi mi migbɛ́i. Yɛ miklɛŋklɛŋ kpee lɛ mli lɛ, ahã maŋshiɛmɔ krɛdɛɛ ko ni kɔɔ sɔlemɔi ni Nyɔŋmɔ boɔ toi lɛ ahe. Minya nakai wiemɔ he waa, ejaakɛ no mli lɛ misɔleɔ koni Nyɔŋmɔ aye abua mi. No sɛɛ lɛ, mitee gbi jurɔ ni ayeɔ kɛkaiɔ Yesu gbele lɛ. Yɛ kpeei nɛɛ ashishi lɛ, kɛ́ atsɛ ŋmalɛ lɛ, bɔ ni gbekɛbii tete po gbeleɔ amɛ-Biblia lɛ ni amɛnyiɛɔ sɛɛ be ni aakane lɛ hã minaa kpɛ mihe waa. Shishijee lɛ no mli lɛ kɛ́ atsɛ ŋmalɛ lɛ mileee bɔ ni mafee magbele, shi Odasefoi lɛ ye amɛbua mi waa, ni amɛtsɔɔ mi bɔ ni agbeleɔ ŋmalɛ ahãa.

 Be ni mitee kpeei lɛ kɛtsara nɔ lɛ, mihiɛ basɔ bɔ ni Yehowa Odasefoi lɛ tsɔɔ nii amɛhãa waa. Mikase nibii babaoo yɛ kpee lɛ eko fɛɛ eko shishi, ni be fɛɛ be ni mashi kpee lɛ shishi lɛ nibii ni atsɔɔ ewo mi hewalɛ, ni ehã mitsui enyɔ mimli. Kɛkɛ ni Odasefoi lɛ bi mi kɛji masumɔ ni akɛ mi akase Biblia lɛ.

 Nɔ ni miyɔse yɛ Yehowa Odasefoi lɛ ateŋ lɛ yɛ srɔto kwraa yɛ nɔ ni no mli lɛ minaa yɛ misɔlemɔ lɛ he. Mina Odasefoi lɛ akɛ kuu ko ni ekomefeemɔ yɔɔ amɛteŋ, mɛi ni efeee osato, ni amɛmiibɔ mɔdɛŋ fɛɛ ni amɛbaanyɛ kɛsa Nyɔŋmɔ hiɛ. Mibaná nɔmimaa kwraa akɛ amɛmiijie su ni akɛyɔseɔ anɔkwa Kristofoi lɛ kpo, no ji akɛ suɔmɔ yɛ amɛteŋ.​—Yohane 13:35.

 Be ni mitee nɔ mikase Biblia lɛ jogbaŋŋ lɛ, ehã mifee tsakemɔi babaoo koni mahi shi yɛ Biblia lɛ gbɛtsɔɔmɔi anaa. Kɛ̃lɛ minu he akɛ minyɛŋ makpa karatnɔmɔ. Misumɔɔ praktisimɔ kɛ akaŋshii. Be ni mihã Odasefonyo ni kɛ mi kaseɔ nii lɛ le enɛ lɛ, ejɛ mlihilɛ mli ewo mi hewalɛ ekɛɛ: “Bo lɛ yaa nɔ okase Biblia lɛ, mile akɛ obaakpɛ yiŋ ni ja.” Enɛ ji nɔ tuuntu ni no mli lɛ mitaoɔ manu lɛ. Be ni mitee nɔ mikase Biblia lɛ jogbaŋŋ lɛ, ehã mibɔ mɔdɛŋ koni masa Yehowa Nyɔŋmɔ hiɛ.

 Shihilɛ ni hã mikpa karatnɔmɔ lɛ ji nɔ ni mitsĩ tã yɛ sane nɛɛ shishijee lɛ, be ni mijeee gbɛ mishi mɔ ni mikɛpraktisiɔ lɛ gugɔ ŋtia lɛ. Nakai oshãra lɛ hã misusu nii ahe kɛtee shɔŋŋ, ni mibi mihe akɛ: “Kɛ́ mikpaaa karat nɛɛ nɔmɔ lɛ, ani manyɛ maya nɔ mafee Kristo sɛɛnyiɛlɔ ni tiuɔ toiŋjɔlɛ sɛɛ?” No mli lɛ, mikase akɛ agba yɛ Yesaia 2:3 4 lɛ akɛ, mɛi ni nyiɛɔ Yehowa gbɛtsɔɔmɔi asɛɛ lɛ ‘ekaseŋ tawuu dɔŋŋ.’ Mikase hu akɛ Yesu tsɔɔ etoibolɔi lɛ akɛ, kɛ́ aye amɛ sane ni ejaaa po lɛ, amɛkaye mɛi awui. (Mateo 26:52) Enɛ hewɔ mikpa karatnɔmɔ, nɔ ko ni misumɔɔ efeemɔ waa lɛ.

 No sɛɛ lɛ, mikɛ Biblia ŋaawoo ni kɛɔ akɛ “okɛma ohiɛ akɛ okɛ Nyɔŋmɔjamɔ baatsɔse ohe” lɛ tsu nii. (1 Timoteo 4:7) Mikɛ mibe kɛ minyɛmɔ fɛɛ, ni be ko ni eho lɛ mikɛwoɔ karatnɔmɔ mli lɛ miitsu nii amrɔ nɛɛ kɛmiibɛŋkɛ Yehowa, ni miisɔmɔ lɛ. Mijɔle lɛ kɛ nibii ni no mli lɛ mikaseɔ yɛ Biblia lɛ mli lɛ kpãaa gbee, no hewɔ mikɛ lɛ kpa. Abaptisi mi akɛ Yehowa Odasefonyo yɛ January 24,1987. Etsɛɛɛ kɛkɛ ni mibɔi sɔɔmɔ akɛ be fɛɛ sɔɔlɔ, no ji mikɛ mibe babaoo tsɔɔ mɛi Biblia mli anɔkwalei lɛ. Kɛjɛ be ni mikɛ mibe babaoo bɔi mɛi Biblia mli anɔkwalei lɛ tsɔɔmɔ lɛ, mikpako, ni misɔmɔ po yɛ Yehowa Odasefoi anitsumɔhe yitso ni yɔɔ New York yɛ U.S.A lɛ dã.

 Amrɔ nɛɛ ni mibale anɔkwale ni kɔɔ Nyɔŋmɔ he lɛ, mina nɔ ni no mli lɛ eŋmɛɔ mi yɛ mishihilɛ mli lɛ. Minuuu he dɔŋŋ akɛ nɔ ko eŋmɛɛ mi. Moŋ lɛ mitsui enyɔ mimli yɛ shihilɛ mli, miyɛ wɔsɛɛ hiɛnɔkamɔ kpakpa ko, ni mimii hu shɛɔ mihe waa diɛŋtsɛ. Mifeɔ nibii kɛgbɔleɔ mikpɔiaŋ lolo, shi jeee no ji nɔ ni he hiaa mi fe fɛɛ yɛ mishihilɛ mli bianɛ. Amrɔ nɛɛ, nɔ ni he hiaa mi fe fɛɛ yɛ mishihilɛ mli ji ní masɔmɔ Yehowa Nyɔŋmɔ.

 Be ni minɔɔ karat lɛ, mihãa mihiɛ hiɔ mihe nɔ be fɛɛ be koni kɛ́ mɔ ko miiba ebatutua mi lɛ, manyɛ mafã mihe. Bianɛ hu lɛ, kɛ́ miyɛ mɛi atɛŋ lɛ mihãa mihiɛ hiɔ mihe nɔ, shi yɛ yiŋtoo kroko hewɔ, no ji koni maye mabua amɛ. Biblia lɛ ehã mibatsɔ mɔ ni feɔ ejurɔ kɛ wu kpakpa hu kɛhã miŋa Brenda ni misumɔ lɛ waa lɛ.

 Kulɛ misumɔɔ karatnɔmɔ waa. Shi amrɔ nɛɛ mikɛ nɔ ko kpakpa ni hi kwraa fe no eye najiaŋ. Biblia lɛ wieɔ yɛ gbɛ ni ja nɔ akɛ: “Gbɔmɔtsoŋ tsɔsemɔ he yɛ sɛɛnamɔ yɛ gbɛ bibioo nɔ, shi Nyɔŋmɔjamɔ he yɛ sɛɛnamɔ yɛ nibii fɛɛ amli, ejaakɛ ehiɛ wala ni yɔɔ amrɔ nɛɛ kɛ wala ni baaba lɛ he shiwoo.”​—1 Timoteo 4:8.