Ama Yehowa Odasefoi Akpee Asa Hee ko yɛ Amazon koo haai ni nugbɔ fɔɔ nɛmɔ yɛ jɛmɛ lɛ teŋgbɛ tuuntu. Shikpɔŋ ni ama Kpee Asa lɛ yɛ nɔ lɛ dalɛ ji eka 128, ni efã kpotoo lɛ koo sɔŋŋ, eyɛ Brazil maŋ ni ji Manaus lɛ kooyigbɛ. Anuɔ loofɔji fɛfɛji tamɔ akoo kɛ amɛhenɔi kɛ loofɔji krokomɛi agbee yɛ Brazil koo haai nɛɛ mli tsei srɔtoi fɛfɛji lɛ anɔ. Mɛni hewɔ ama Kpee Asa yɛ he ko tamɔ nɛkɛ?

Manaus maŋ nɛɛ kɛ Amazon Faa ni ehé gbɛi waa lɛ teŋ jekɛmɔ shɛɔ kilomitai 1,450, ni mɛi ni yɔɔ jɛmɛ lɛ ayifalɛ miihe ashɛ akpekpei enyɔ. Yehowa Odasefoi aaafee 7,000 ni yɔɔ Manaus maŋ lɛ kɛ ehewɔ maji lɛ, ni Amazon faa lɛ naa shihilɛhei srɔtoi lɛ hu fata he lɛ, baaná Kpee Asa nɛɛ he sɛɛ. Maji ni baaná he sɛɛ nɛɛ ekome ji, São Gabriel da Cachoeira ni yɔɔ Manaus anaigbɛ lɛ; ekɛ Manaus teŋ jekɛmɔ shɛɔ kilomitai 800. Dani Yehowa Odasefoi lɛ ekomɛi baanyɛ aya kpokpaa nɔ kpeei loo kpeei wuji ni afeɔ lɛ, ehe bahiaa ni amɛkɛ lɛlɛ afã gbɛ gbii etɛ sɔŋŋ yɛ faa hiɛ kɛya kpee lɛ!

Akɛ abaama Kpee Asa yɛ he ko tamɔ Amazon lɛ teŋgbɛ lɛ jeee nitsumɔ ni kãa shi akɔɔ kwraa. Ehe bahia ni akɛ kɔnteenai 13 ni tsumaa nibii yɔɔ mli ashi Brazil ŋshɔnaa maŋ ko ni ji Santos, yɛ São Paulo lɛ kɛtsɔ ŋshɔ hiɛ; no sɛɛ lɛ akɛtsɔ Amazon Faa lɛ nɔ kɛtee he ni ama Kpee Asa lɛ yɛ lɛ.

Asa hee nɛɛ gbeɔ yi feɔ Kpeei Asa 27 nɔ ni ama yɛ Brazil, ni mɛi 1,956 yabua amɛhe naa kɛhã Asa nɛɛ nɔjɔɔmɔ lɛ yɛ Hɔgbaa, May 4, 2014. Mɛi babaoo amii shɛ amɛhe waa, ejaakɛ no bafee klɛŋklɛŋ kwraa ni amɛba kpee yɛ Kpee Asa nɔ.

Jeee akɛ toibolɔi lɛ nu wielɔ lɛ gbee kɛkɛ, shi amɛna lɛ hu. Ebafee tsakemɔ kpele kwraa, ejaakɛ bei ni eho lɛ amli lɛ, kɛ́ aafee kpokpaa nɔ kpee aloo kpee wulu ko lɛ, mɛi babaoo enaaa wiemɔ kpoku lɛ nɔ po aahu ní amɛbaana wielɔ lɛ. Yehowa Odasefonyo ko kɛɛ akɛ: “Mitee kpeei wuji afii abɔ, shi minaaa Biblia drama ni afeɔ lɛ, drama lɛ toi kɛkɛ miboɔ.” Amrɔ nɛɛ mɔ fɛɛ mɔ kwraa baanyɛ ana wiemɔ kpoku lɛ nɔ.