Yehowa Odasefoi fiii afã ko sɛɛ yɛ maŋkwramɔ saji amli yɛ amɛjámɔ mli hemɔkɛyeli ni damɔ nɔ ni Biblia lɛ tsɔɔ lɛ nɔ lɛ hewɔ. Wɔwooo mɛi ayiŋ, wɔfɔ̃ɔɔ oshiki wɔhãaa paati ko loo mɛi ni miitao maŋkwramɔŋ hegbɛ, wɔtaooo hegbɛ yɛ nɔyelii amli, ni wɔkɛ wɔhe wooo atuatsemɔ nifeemɔi ni akɛtsakeɔ nɔyelɔi lɛ amli. Wɔheɔ wɔyeɔ akɛ, Biblia lɛ tsɔɔ yiŋtoo kpakpa hewɔ ni esaaa akɛ wɔfiɔ afã ko sɛɛ lɛ.

• Wɔnyiɛɔ Yesu ni kpoo maŋkwramɔ hegbɛ lɛ nɔkwɛmɔnɔ lɛ sɛɛ. (Yohane 6:​15) Etsɔɔ ekaselɔi lɛ akɛ ‘amɛkɛ amɛhe akawo je lɛ nifeemɔi amli,’ ni efee lɛ faŋŋ kɛhã amɛ akɛ, amɛkɛ amɛhe akawo maŋkwramɔ saji amli.​—Yohane 17:14, 16; 18:36; Marko 12:13-​17.

• Yesu wie Nyɔŋmɔ Maŋtsɛyeli lɛ he akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ,” Nyɔŋmɔ Maŋtsɛyeli nɛɛ sɛɛ wɔfiɔ. (Mateo 24:14) Akɛ Nyɔŋmɔ Maŋtsɛyeli lɛ najiaŋdamɔlɔi ni afã wɔ koni wɔjaje ebaa lɛ wɔtsɔɔ lɛ, wɔfiii afã ko sɛɛ yɛ maŋkwramɔ saji ni yaa nɔ yɛ maji srɔtoi lɛ anɔ lɛ eko eko mli, ní he ni wɔyɔɔ lɛ po fata he lɛ.​—2 Korintobii 5:​20; Efesobii 6:​20.

• Akɛni wɔkɛ wɔhe wooo maŋkwramɔ saji amli hewɔ lɛ, wɔnyɛɔ wɔshiɛɔ Nyɔŋmɔ Maŋtsɛyeli lɛ he sanekpakpa lɛ wɔhãa mɛi ni yɔɔ maŋkwramɔ kui srɔtoi amli lɛ ni wɔsheee gbeyei. Wɔtsɔɔ wɔwiemɔi kɛ nifeemɔi anɔ wɔhãa mɛi leɔ akɛ, Nyɔŋmɔ Maŋtsɛyeli lɛ nɔ wɔkɛ wɔhiɛ fɔ̃ɔ akɛ je lɛŋ naagbai lɛ anaa tsabaa.​—Lala  56:11, Ga Biblia hee.

• Akɛni wɔkɛ wɔhe wooo maŋkwramɔ nifeemɔi ní kɛ mligbalamɔi baa lɛ amli hewɔ lɛ, wɔfee ekome yɛ jeŋ muu fɛɛ akɛ nyɛmimɛi. (Kolosebii 3:​14; 1 Petro 2:​17) Nɔ ni tamɔɔɔ nakai lɛ, jámɔi ní kɛ amɛhe woɔ maŋkwramɔ saji amli lɛ amli egbala.​—1 Korintobii 1:​10.

Bulɛ kɛhã nɔyelii. Eyɛ mli akɛ wɔkɛ wɔhe wooo maŋkwramɔ saji amli moŋ, shi wɔjieɔ bulɛ kpo wɔtsɔɔ maŋkwramɔ hegbɛi ni yɔɔ hei ni wɔyɔɔ lɛ. Enɛ kɛ Biblia fãmɔ lɛ kpãa gbee akɛ: “Mɔ fɛɛ mɔ aŋɔ ehe awo hegbɛi ni nɔ kwɔlɔ fe lɛ lɛ ashishi.” (Romabii 13:1) Wɔyeɔ mlai anɔ, wɔwoɔ too, ni wɔkɛ nɔyelii lɛ feɔ ekome kɛtsuɔ maŋbii lɛ ahiamɔ nii ahe nii. Nɔ najiaŋ ni wɔkɛ wɔhe baawo nifeemɔi ni akɛbutuɔ nɔyelii amli lɛ, wɔkɛ Biblia ŋaawoo ni kɛɔ akɛ asɔle “ahã maŋtsɛmɛi kɛ mɛi fɛɛ ni yɔɔ gbɛhei ni nɔ kwɔlɔ” lɛ tsuɔ nii, titrii lɛ, kɛ́ amɛkpɛ yiŋ ni baasa jámɔ mli heyeli ni wɔyɔɔ lɛ he lɛ.​—1 Timoteo 2:​1, 2, shishigbɛ niŋmaa.

Kɛfata he lɛ, wɔkpɛlɛɔ nɔ akɛ mɔ fɛɛ mɔ yɛ hegbɛ akɛ ekpɛɔ eyiŋ yɛ maŋkwramɔŋ saji ahe. Akɛ nɔkwɛmɔnɔ lɛ, wɔfeee nɔ ko ni baafite oshikifɔ̃ɔ, ni wɔwooo mɛi ni yafɔ̃ɔ oshiki lɛ hu ayiŋ.

Ani afã ko sɛɛ ni wɔfiii lɛ je shishi ŋmɛnɛ beiaŋ? Dabi. Yesu kaselɔi lɛ kɛ klɛŋklɛŋ afii 100 lɛ mli Kristofoi lɛ kɔ shidaamɔ ni tamɔ nɛkɛ nɔŋŋ yɛ maŋkwramɔ agbɛfaŋ. Wolo ko (Beyond Good Intentions) kɛɛ akɛ: “Eyɛ mli akɛ mra beiaŋ Kristofoi lɛ kpɛlɛ nɔ akɛ, esa akɛ amɛkɛ woo ahã maŋkwramɔ nɔyelɔi lɛ moŋ, shi amɛheee amɛyeee akɛ esa akɛ amɛkɛ amɛhe awo maŋkwramɔ saji amli.” Nakai nɔŋŋ wolo ni ji On the Road to Civilization lɛ wie akɛ mra beiaŋ Kristofoi lɛ “ekpɛlɛɛɛ maŋkwramɔ hegbɛi ni ahã amɛ lɛ anɔ.”

Ani afã ko sɛɛ ni wɔfiii lɛ kɛ maŋ shweshweeshwe feemɔ woɔ oshara mli? Dabi. Wɔ ji maŋbii ni tiuɔ toiŋjɔlɛ sɛɛ, no hewɔ lɛ, maŋkwramɔ nɔyelɔi bɛ nɔ ko ni amɛbaadamɔ nɔ amɛshe gbeyei. Susumɔ amaniɛbɔɔ ko ni Ukraine nitsumɔhe ko (National Academy of Sciences) kɛhã yɛ afi 2001 lɛ he okwɛ. Amaniɛbɔɔ lɛ wie afã ko sɛɛ ni wɔfiii lɛ he akɛ: “Ŋmɛnɛ lɛ, mɛi pii ebasumɔŋ shidaamɔ ni Yehowa Odasefoi ekɔ lɛ; ni enɛ hewɔ ni Nazi kɛ Komunist nɔyeli lɛ ewa amɛyi lɛ.” Fɛɛ sɛɛ lɛ, yɛ Soviet yiwalɛ nɔyeli lɛ shishi po lɛ, Odasefoi lɛ “hi shi akɛ maŋbii ni yeɔ mla nɔ. Amɛkɛ anɔkwayeli kɛ tsui muu fɛɛ tsu nii yɛ ŋmɔji amli kɛ nitsumɔhe wuji amli ni amɛhãaa Komunist nɔyeli lɛ naagba ko.” Amaniɛbɔɔ lɛ mu sane lɛ naa akɛ, nakai nɔŋŋ ŋmɛnɛ lɛ, Yehowa Odasefoi ahemɔkɛyeli kɛ nifeemɔi “kɛ maŋ ko shweshweeshwe feemɔ wooo oshara mli, ni amɛbutuuu maŋ hu.”