Kɛjɛ jeeŋmɔ beebe lɛ, Biblia lɛ pɛ nɔ wɔkɛ wɔhemɔkɛyelii lɛ damɔɔ, no hewɔ lɛ wɔtsakeɔ wɔhemɔkɛyelii lɛ koni ekɛ shishinumɔ hee ni wɔná yɛ ŋmalɛi lɛ amli lɛ akpã gbee. a

Tsakemɔi nɛɛ kɛ Biblia shishitoo mla ni yɔɔ Abɛi 4:​18 lɛ kpãa gbee, jɛmɛ kɛɔ akɛ: “Jalɔi agbɛ lɛ tamɔ leebi la ni yaa nɔ ekpɛɔ fiofio kɛyashiɔ shwane fintiŋŋ.” Bɔ ni hulu yaa nɔ ekpɛɔ fiofio ni ehãa anaa nibii jogbaŋŋ lɛ, nakai nɔŋŋ Nyɔŋmɔ hu hãa wɔnuɔ anɔkwalei ni yɔɔ Biblia lɛ mli lɛ ashishi fiofio yɛ be ni eto lɛ mli. (1 Petro 1:​10-​12) Biblia lɛ egba akɛ, Nyɔŋmɔ baahã ŋmalɛi lɛ ashishinumɔ afee faŋŋ yɛ “naagbee be lɛ” mli.​—Daniel 12:4.

Esaaa akɛ tsakemɔi ni afeɔ yɛ bɔ ni wɔnuɔ nibii komɛi ashishi wɔhãa lɛ mli lɛ feɔ wɔ naakpɛɛ loo egbaa wɔnaa. Nyɔŋmɔ jalɔi ni hi shi yɛ blema lɛ hu ná susumɔi kɛ gbɛkpamɔi ni ejaaa yɛ saji komɛi ahe, ni ehe bahia ni amɛtsake amɛsusumɔi.

• Mose kɛ ehe hã akɛ kpɔ̃lɔ kɛhã Israel maŋ lɛ afii 40 dani be ni Nyɔŋmɔ eto lɛ shɛ.​—Bɔfoi 7:​23-​25, 30, 35.

• Yesu kaselɔi lɛ eyanuuu gbalɛi ni kɔɔ Mesia lɛ gbele kɛ eshitee lɛ he lɛ shishi jogbaŋŋ.​—Yesaia 53:​8-​12; Mateo 16:21-​23.

• Blema Kristofoi komɛi yaná susumɔ ni ejaaa yɛ be ni “Yehowa gbi lɛ” baaba lɛ he.​—2 Tesalonikabii 2:​1, 2.

Sɛɛ mli lɛ, Nyɔŋmɔ jaje susumɔi ni ejaaa ni amɛhiɛ lɛ, no hewɔ lɛ wɔle akɛ ebaafee nakai ehã wɔ hu.​—Yakobo 1:5.