Akɛ Yehowa Odasefoi lɛ, wɔsumɔɔ ni wɔkɛ jamɔi fɛɛ amli bii agba wɔhemɔkɛyeli lɛ he sane, shi wɔkɛ wɔhe wooo amɛjamɔŋ nifeemɔi amli. Biblia lɛ hãa wɔnaa akɛ anɔkwa Kristofoi ‘feɔ ekome kɛtsuɔ nii,’ ni nɔ titri ni hãa anaa nakai ji akɛ amɛyɛ hemɔkɛyeli kome. (Efesobii 4:16; 1 Korintobii 1:10; Filipibii 2:2) Enɛ biɔ babaoo fe ni wɔbaakpã gbee yɛ sui kpakpai tamɔ suɔmɔ, mlitsɔlɛ, kɛ eshaifaa he kɛkɛ. Wɔjamɔŋ hemɔkɛyelii lɛ damɔ anɔkwa nilee ni yɔɔ Biblia lɛ mli lɛ anɔ, ni kɛ́ jeee no kulɛ, wɔhemɔkɛyeli lɛ baafee yaka.​—Romabii 10:​2, 3.

Biblia lɛ kɛ mɛi ni esoro amɛjamɔŋ hemɔkɛyeli ni akɛ amɛ feɔ ekome yɛ jamɔ nifeemɔ mli lɛ toɔ kɔɔŋtso kome ni eŋmɛɛɛ pɛpɛɛpɛ he, eji mlatɔmɔ ni baanyɛ afite Kristofonyo hemɔkɛyeli. (2 Korintobii 6:​14-​17) No hewɔ lɛ, Yesu eŋmɛɛɛ ekaselɔi lɛ agbɛ ni amɛkɛ mɛi ni hiɛ hemɔkɛyeli kroko lɛ afee ekome yɛ jamɔ nifeemɔi amli. (Mateo 12:30; Yohane 14:6) Nakai nɔŋŋ Nyɔŋmɔ Mla ni etsɔ Mose nɔ ekɛhã blema Israelbii lɛ bɔ amɛ kɔkɔ ni amɛkɛ maji ni ebɔle amɛ lɛ anɔ bii lɛ akafee ekome yɛ jamɔ nifeemɔi amli. (2 Mose 34:11-​14) Sɛɛ mli be ni mɛi komɛi ni esoro amɛhemɔkɛyeli lɛ hala akɛ amɛbaaye amɛbua Israelbii anɔkwafoi lɛ, Israelbii lɛ kpoo, ejaakɛ no baahã amɛ kɛ amɛ afee ekome yɛ jamɔ nifeemɔi amli.​—Ezra 4:​1-3.

Hɛɛ. Tamɔ bɔ ni bɔfo Paulo fee lɛ, wɔ hu yɛ wɔshiɛmɔ nitsumɔ lɛ mli lɛ, wɔsumɔɔ akɛ wɔnu ‘mɛi srɔtoi fɛɛ’ asusumɔi kɛ amɛhemɔkɛyelii lɛ ashishi. (1 Korintobii 9:​19-​22) Kɛ́ wɔkɛ mɛi miigba sane lɛ, wɔbɔɔ mɔdɛŋ wɔkɛ ŋaa ni Biblia lɛ woɔ akɛ wɔjie “bulɛ ni mli kwɔ” kpo wɔtsɔɔ mɛi lɛ tsuɔ nii.​—1 Petro 3:​15.