NIKASEMƆ 44
Ani Gbijurɔyelii Fɛɛ Saa Nyɔŋmɔ Hiɛ?
Yehowa sumɔɔ ni wɔná miishɛɛ yɛ shihilɛ mli, ní bei komɛi po lɛ, wɔye gbi jurɔ. Shi ani gbijurɔyelii fɛɛ saa ehiɛ? Te wɔbaafee tɛŋŋ wɔhã ana yɛ sane nɛɛ mli akɛ, wɔsumɔɔ Yehowa?
1. Mɛni hewɔ gbijurɔyelii pii esaaa Yehowa hiɛ lɛ?
Ekolɛ kɛ́ oná ole akɛ susumɔi ni hã ato gbijurɔyelii pii shishi lɛ kɛ Biblia mli tsɔɔmɔi kpãaa gbee loo amɛjɛ amale jamɔ mli lɛ, onaa baakpɛ ohe. Gbijurɔyelii lɛ ekomɛi hãa mɛi feɔ nibii ni baahã amɛkɛ mumɔi ashãra, loo amɛhãa mɛi heɔ amɛyeɔ akɛ susuma lɛ gbooo. Ekomɛi hãa mɛi heɔ nibii ni bɛ mli amɛyeɔ loo amɛkɛ amɛhiɛ fɔ̃ɔ shade kpakpa nɔ. (Yesaia 65:11) Yehowa bɔɔ mɛi ni jáa lɛ lɛ kɔkɔ akɛ: “Nyɛtsea nyɛhe . . . ni nyɛkpaa nɔ ni he tseee lɛ hetaa.”—2 Korintobii 6:17. a
2. Gbijurɔyelii komɛi hãa akɛ woo ni esaaa adesai hãa amɛ. Te Yehowa naa nakai gbijurɔyelii lɛ ehãa tɛŋŋ?
Yehowa bɔɔ wɔ kɔkɔ ni ‘wɔkɛ wɔhiɛ akafɔ̃ gbɔmɔ adesa nɔ.’ (Kanemɔ Yeremia 17:5.) Gbijurɔyelii komɛi hãa akɛ woo hãa nɔyelɔi loo asraafoi. Ekomɛi hãa akɛ woo hãa maŋ okadii loo gbi ni maŋ lɛ ná heyeli. (1 Yohane 5:21) Ni ekomɛi hu hãa akɛ woo hãa maŋkwramɔ kui loo maŋnɔyaa kui. Kɛ́ wɔkɛ woo ni esaaa kui loo woo ni esaaa mɛi hã amɛ, titri lɛ, kɛ́ amɛhiɛ susumɔi ni kɛ Yehowa yiŋtoo kpãaa gbee lɛ, te Yehowa baanu he ehã tɛŋŋ?
3. Mɛɛ nifeemɔi baanyɛ ahã gbijurɔyeli ko afee nɔ ni esaaa Nyɔŋmɔ hiɛ?
Biblia lɛ wieɔ eshiɔ “dãa ni anuɔ kɛtekeɔ nɔ, kɛ henaabuamɔi ni yɔɔ hoo, kɛ dãanumɔ mli akaŋshii.” (1 Petro 4:3) Kɛ́ aaye gbii juji komɛi lɛ, mɛi feɔ nɔ fɛɛ nɔ kɛkɛ ni amɛsumɔɔ, ni amɛkɛ amɛhe woɔ jeŋba sha mli. Ja wɔtsi wɔhe kwraa kɛje nibii gbohii nɛɛ ahe, dani wɔbaakã he wɔfee Yehowa nanemɛi.
KASEMƆ PII OFATA HE
Obaana bɔ ni obaafee okpɛ yiŋ kpakpai yɛ gbijurɔyelii ahe koni Yehowa aná ohe miishɛɛ.
4. Tsi ohe kɛje gbijurɔyelii ni kɛ woo hãaa Yehowa lɛ ahe
Nyɛkanea Efesobii 5:10 lɛ, ni nyɛsusua sanebimɔi nɛɛ ahe:
-
Mɛni esa akɛ wɔle dani wɔkpɛ wɔyiŋ akɛ wɔbaaye gbi jurɔ ko loo wɔyeŋ?
-
Mɛɛ gbii juji mɛi yeɔ waa yɛ he ni oyɔɔ lɛ?
-
Kɛ́ okwɛ lɛ, gbijurɔyelii nɛɛ saa Yehowa hiɛ?
Akɛ nɔkwɛmɔnɔ lɛ, ani obi ohe pɛŋ akɛ, ‘Te Nyɔŋmɔ naa fɔmɔgbiyeli ehãa tɛŋŋ?’ Biblia lɛ ewieee akɛ Yehowa jálɔ ko ye efɔmɔ gbi, shi ewie fɔmɔgbiyelii enyɔ ahe, ni mɛi ni ye lɛ fɛɛ sɔmɔɔɔ Yehowa. Nyɛkanea 1 Mose 40:20-22 kɛ Mateo 14:6-10 lɛ. No sɛɛ lɛ, nyɛsusua sanebimɔi nɛɛ ahe:
-
Mɛni afee yɛ fɔmɔgbiyelii enyɔ lɛ fɛɛ ashishi?
-
Yɛ Biblia mli saji enyɔ nɛɛ anaa lɛ, kɛ́ okwɛ lɛ, te Yehowa naa fɔmɔgbiyeli ehãa tɛŋŋ?
Shi ekolɛ, loloolo lɛ obaabi ohe akɛ, ‘Kɛ́ mikɛ mihe wo fɔmɔgbiyeli loo gbi jurɔ kroko ni kɛ Biblia lɛ kpãaa gbee mli lɛ, ani ebaagba Yehowa naa?’ Nyɛkanea 2 Mose 32:1-8 lɛ. No sɛɛ lɛ, jiemɔ VIDIO lɛ ni nyɛsusua sanebimɔi ni nyiɛ sɛɛ nɛɛ ahe.
-
Mɛni hewɔ esa akɛ wɔkwɛ akɛ nifeemɔ ko saa Yehowa hiɛ lo lɛ?
-
Mɛɛ gbɛ nɔ wɔbaanyɛ wɔtsɔ wɔfee nakai?
Bɔ ni obaafee ona akɛ gbijurɔyeli ko esaaa Nyɔŋmɔ hiɛ
-
Ani edamɔ tsɔɔmɔi ni kɛ Biblia lɛ kpãaa gbee nɔ? Taomɔ nɔ hewɔ ni ato shishi lɛ mli.
-
Ani ehãa akɛ woo ni esaaa kui, maŋ okadii, loo adesai hãa amɛ? Wɔkɛ woo ni fe fɛɛ hãa Yehowa, ni wɔheɔ wɔyeɔ waa akɛ lɛ ebaatsu je lɛŋ naagbai lɛ ahe nii.
-
Ani kusumii kɛ nibii ni afeɔ yɛ shishi lɛ teɔ shi ewoɔ Biblia mli mlai lɛ? Esa akɛ wɔhã wɔjeŋba he atse be fɛɛ be.
5. Feemɔ nibii ni baahã mɛi aná bulɛ ahã nibii ni oheɔ oyeɔ lɛ
Kɛ́ mɛi miinyɛ onɔ ni okɛ ohe awo gbijurɔyelii ni esaaa Yehowa hiɛ lɛ amli lɛ, ebɛ mlɛo kwraa akɛ obaakpoo. Too otsui shi ni ojɛ bulɛ mli ogbála oyiŋkpɛɛ lɛ mli otsɔɔ amɛ. Bɔ ni afee ni ona gbɛ ni obaanyɛ otsɔ nɔ ofee enɛ lɛ, jiemɔ VIDIO lɛ.
Nyɛkanea Mateo 7:12 lɛ, ni nyɛsusua sanebimɔi nɛɛ ahe:
-
Yɛ ŋmalɛ nɛɛ naa lɛ, kɛ́ okwɛ lɛ, esa akɛ okɛɛ owekumɛi ni sɔmɔɔɔ Yehowa lɛ akɛ amɛkaye gbi jurɔ ko?
-
Mɛni obaanyɛ ofee koni owekumɛi lɛ ana akɛ, kɛ́ okɛ amɛ yeee gbi jurɔ lɛ po lɛ, osumɔɔ amɛ ni osusuɔ amɛhe?
6. Yehowa miisumɔ ni wɔná miishɛɛ
Yehowa miisumɔ ni wɔ kɛ wɔwekumɛi kɛ wɔnanemɛi aná wɔhewɔ miishɛɛ. Nyɛkanea Jajelɔ 8:15 lɛ, ni nyɛsusua sanebimɔ nɛɛ he:
-
Mɛɛ gbɛ nɔ ŋmalɛ nɛɛ hãa wɔnaa akɛ Yehowa miisumɔ ni wɔná miishɛɛ?
Yehowa miisumɔ ni ewebii lɛ afee ekome kɛshwɛ ni amɛná amɛhewɔ miishɛɛ. Jiemɔ VIDIO lɛ koni ona bɔ ni wɔfeɔ nakai yɛ wɔmajimaji ateŋ kpeei lɛ ashishi.
Nyɛkanea Galatiabii 6:10 lɛ, ni nyɛsusua sanebimɔi nɛɛ ahe:
-
Ani ja wɔye gbii juji ni mɛi pii yeɔ lɛ dani wɔbaanyɛ ‘wɔfee mɛi ekpakpa’?
-
Kɛ́ okwɛ lɛ, te nibii enyɔ nɛɛ ateŋ nɔ ni baahã oná miishɛɛ waa—ni obaake mɛi nii akɛni aaye gbi jurɔ ko lɛ hewɔ, aloo ni obaake mɛi nii akɛni oosumɔ ni ofee nakai lɛ hewɔ?
-
Odasefoi pii toɔ hiɛtserɛjiemɔ loo nɔ ko ni tamɔ nakai he gbɛjianɔ amɛhãa amɛbii yɛ be kɛ beiaŋ, ni amɛkeɔ amɛ nii po. Kɛ́ oyɛ bii lɛ, mɛɛ nibii komɛi obaanyɛ ofee ohã amɛ koni amɛná miishɛɛ?
MƐI KOMƐI KƐƆ AKƐ: “Nɔ hewɔ ni ato gbijurɔyeli ko shishi lɛ he ehiaaa. Nɔ ni he hiaa ji, ni wɔkɛ wɔwekumɛi kɛ wɔnanemɛi baafee ekome kɛná wɔhewɔ miishɛɛ.”
-
Kɛ́ mɔ ko kɛɛ nakai lɛ, mɛni obaakɛɛ?
EMLI OTI
Yehowa miisumɔ ni wɔ kɛ wɔwekumɛi kɛ wɔnanemɛi aná wɔhewɔ miishɛɛ. Shi eesumɔ hu ni wɔtsi wɔhe kɛje gbijurɔyelii ni esaaa ehiɛ lɛ ahe.
Mɛni Okase?
-
Mɛɛ saji wɔbaanyɛ wɔbi wɔhe koni wɔna kɛji gbijurɔyeli ko saa Yehowa hiɛ loo esaaa ehiɛ?
-
Mɛni wɔbaanyɛ wɔfee koni wɔwekumɛi kɛ wɔnanemɛi anu nɔ hewɔ ni wɔyeee gbii juji komɛi lɛ shishi?
-
Te ofeɔ tɛŋŋ oleɔ akɛ Yehowa miisumɔ ni wɔshwɛ ni wɔná wɔhewɔ miishɛɛ?
EHE SAJI KROKOMƐI
Obaana gbii juji komɛi ni Kristofoi yeee.
“Mɛni Hewɔ Yehowa Odasefoi Yeee Gbii Juji Komɛi Lɛ?” (jw.org lɛ nɔ sane)
Obaana yiŋtoi ejwɛ ahewɔ ni wɔheɔ wɔyeɔ akɛ fɔmɔgbiyeli esaaa Nyɔŋmɔ hiɛ lɛ.
“Mɛni Hewɔ Yehowa Odasefoi Yeee Fɔmɔ Gbi?” (jw.org lɛ nɔ sane)
Obaana bɔ ni gbekɛbii bibii ni sumɔɔ Yehowa lɛ baanyɛ afee amɛnii kɛ́ aaye gbii juji koni esumɔ amɛsane waa.
Yehowa Sumɔɔ Bo Waa (11:35)
Kristofoi akpekpei abɔ ekpɛ mli akɛ amɛyeŋ Blonya. Te amɛnuɔ he amɛhãa tɛŋŋ yɛ yiŋkpɛɛ nɛɛ he?
a Kɛ́ ootao ole nɔ ni esa akɛ ofee yɛ gbijurɔyelii komɛi amli nifeemɔi ahe lɛ, kwɛmɔ Saji Krokomɛi 5.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
