Osɔfoi ni abuɔ amɛ waa lɛ kɛ Yesu tee amralo lɛ shĩa. Pilato bi amɛ akɛ: ‘Mɛni nyɛkɛɛ nuu nɛɛ efee?’ Amɛkɛɛ lɛ akɛ: ‘Ekɛɛ maŋtsɛ ji lɛ!’ Pilato bi Yesu akɛ: “Ani bo ji Yudafoi lɛ a-Maŋtsɛ lɛ?” Yesu hã hetoo akɛ: “Mi-Maŋtsɛyeli lɛ jɛɛɛ je nɛɛ mli.”

Kɛkɛ ni Pilato hã akɛ Yesu tee Herode, ni ji mɔ ni yeɔ Galilea nɔ lɛ, ŋɔɔ koni lɛ hu ekwɛ akɛ ebaana nɔ fɔŋ ko yɛ ehe lo. Shi Herode hu enaaa nɔ fɔŋ ko yɛ Yesu he, no hewɔ lɛ, ehã akɛ Yesu ku sɛɛ kɛtee Pilato ŋɔɔ. Kɛkɛ ni Pilato kɛɛ mɛi lɛ akɛ: ‘Mi kɛ Herode fɛɛ enaaa nɔ fɔŋ ko yɛ nuu nɛɛ he. No hewɔ lɛ, maŋmɛɛ ehe.’ Shi mɛi lɛ bolɔ akɛ: ‘Gbee lɛ! Gbee lɛ!’ Asraafoi lɛ kɛ kpãa ko shãa mɔ waa yi Yesu, amɛtsɛ̃ lajɔ̃ amɛshwie ehe, ni amɛmamɔ lɛ atswɛrɛi. Amɛkɛ ŋmeii fee maŋtsɛ fai ni amɛkɛbu eyitso, ni amɛye ehe fɛo akɛ: ‘Wɔmiiŋa bo, Yudafoi lɛ a-Maŋtsɛ.’ Pilato kɛɛ mɛi lɛ ekoŋŋ akɛ: ‘Minaaa nɔ fɔŋ ko yɛ nuu nɛɛ he.’ Shi amɛbolɔ akɛ: “Gbee lɛ yɛ tso jaŋŋ lɛ nɔ!” No hewɔ lɛ, Pilato kɛ lɛ hã koni ayagbe lɛ.

Asraafoi lɛ kɛ Yesu tee he ko ni atsɛɔ lɛ Golgota. Kɛkɛ ni amɛkala lɛ amɛkpɛtɛ tso jaŋŋ ko he ni amɛwó tso lɛ nɔ amɛdamɔ shi. Yesu sɔle akɛ: ‘Ataa, okɛ amɛhe ake amɛ, ejaakɛ amɛleee nɔ ni amɛfeɔ lɛ.’ Mɛi ye Yesu he fɛo amɛkɛɛ akɛ: ‘Kɛ́ Nyɔŋmɔ Bi ji bo lɛ, yi shi kɛjɛ tso lɛ nɔ! Heremɔ ohe.’

Efɔŋfeelɔi ni asɛŋ amɛ yɛ Yesu masɛi lɛ ateŋ mɔ kome kɛɛ lɛ akɛ: “Yesu, kɛ́ oba o-Maŋtsɛyeli lɛ mli lɛ, kaimɔ mi.” Yesu wo lɛ shi akɛ: “Obaafata mihe yɛ Paradeiso.” Shwane mli lɛ, duŋ wo yɛ shikpɔŋ lɛ nɔ fɛɛ ŋmɛlɛtswai etɛ. Maria, ni ji Yesu mami, kɛ Yesu kaselɔi krokomɛi damɔ tso lɛ he. Yesu kɛɛ Yohane akɛ ekwɛ Maria tamɔ lɛ diɛŋtsɛ emami.

Naagbee lɛ, Yesu kɛɛ akɛ: “Agbe naa!” Ema eyitso shi ni emu enaagbee mumɔ. Amrɔ nɔŋŋ lɛ, shikpɔŋ lɛ hoso waa. Muhɔɔ loo mama agbo ni jaa sɔlemɔ shĩa lɛ He Krɔŋkrɔŋ lɛ kɛ He  Krɔŋkrɔŋ Fe Fɛɛ lɛ mli lɛ mli gba enyɔ. Asraafonyo nukpa ko wie akɛ: “Lɛɛlɛŋ, Nyɔŋmɔ Bi nɛ.”