1. Mɛni ekolɛ obaabi ohe be ni okase wolo nɛɛ jogbaŋŋ ogbe naa lɛ?

OKASE Biblia mli anɔkwalei babaoo yɛ wolo nɛɛ mli. Ekomɛi ji naanɔ wala ni Nyɔŋmɔ ewo he shi lɛ, shihilɛ ni gbohii lɛ yɔɔ mli lɛ, kɛ gbohiiashitee he hiɛnɔkamɔ lɛ. (Jajelɔ 9:5; Luka 23:43; Yohane 5:28, 29; Kpojiemɔ 21:3, 4) Ekolɛ okɛ Yehowa Odasefoi ebɔi asafoŋ kpeeiyaa, ni ona akɛ amɛ amɛhiɛ anɔkwa jamɔ lɛ. (Yohane 13:35) Ekolɛ okɛ Yehowa ebɔi naanyobɔɔ, ni ekolɛ okpɛ oyiŋ akɛ obaasɔmɔ lɛ.  No hewɔ lɛ, ekolɛ obaabi ohe akɛ, ‘Amrɔ nɛɛ, mɛni esa akɛ mafee koni masɔmɔ Nyɔŋmɔ?’

2. Mɛni hewɔ nuu ko ni jɛ Etiopia lɛ taoɔ ni abaptisi lɛ lɛ?

² Nuu ko ni jɛ Etiopia ni hi shi yɛ Yesu beiaŋ lɛ bi ehe nakai sane lɛ. Be ni atee Yesu shi sɛɛ lɛ, ekaselɔ Filipo shiɛ ehã nuu nɛɛ. Filipo hã ena faŋŋ akɛ, Yesu ji Mesia lɛ. Enɛ ta Etiopianyo lɛ tsuiŋ aahu akɛ, ewie amrɔ nɔŋŋ akɛ: “Naa! Nu nɛ; mɛni tsĩɔ mibaptisimɔ gbɛ?”​—Bɔfoi 8:26-36.

3. (a) Mɛni Yesu fã esɛɛnyiɛlɔi lɛ akɛ amɛfee? (b) Te esa akɛ abaptisi mɔ ko ahã tɛŋŋ?

³ Biblia lɛ tsɔɔ faŋŋ akɛ, kɛ́ oosumɔ ni osɔmɔ Yehowa lɛ, esa akɛ abaptisi bo. Yesu kɛɛ esɛɛnyiɛlɔi lɛ akɛ: “Nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ.” (Mateo 28:19) Agbɛnɛ hu, Yesu diɛŋtsɛ hã abaptisi lɛ ni ekɛfee nɔkwɛmɔnɔ ehã wɔ. Akɛ egbɔmɔtso muu lɛ fɛɛ wo nu mli, jeee akɛ akɛ nu shwã eyiteŋ. (Mateo 3:16) Ŋmɛnɛ lɛ, kɛ́ aabaptisi Kristofonyo ko lɛ, esa akɛ akɛ egbɔmɔtso muu lɛ fɛɛ awo nu mli.

4. Kɛ́ abaptisi bo lɛ, mɛni no hãa mɛi naa?

⁴ Kɛ́ abaptisi bo lɛ, no hãa mɛi naa akɛ oosumɔ ni otsɔ Nyɔŋmɔ naanyo lɛɛlɛŋ, ni oosumɔ ni osɔmɔ lɛ. (Lala 40:7, 8) No hewɔ lɛ, ekolɛ obaabi ohe akɛ, ‘Mɛni esa akɛ mafee koni abaptisi mi?’

5. (a) Mɛni esa akɛ ofee klɛŋklɛŋ dani abaanyɛ abaptisi bo? (b) Mɛni hewɔ Kristofoi akpeei ni obaaya lɛ he hiaa lɛ?

⁵ Esa akɛ ole Yehowa kɛ Yesu dani abaanyɛ abaptisi bo. Akɛni ookase Biblia lɛ hewɔ lɛ, oje nakai feemɔ shishi momo. (Kanemɔ Yohane 17:3.) Shi no pɛ  kɛkɛ faaa. Biblia lɛ kɛɔ akɛ, esa akɛ ‘oyi obɔ’ kɛ Yehowa suɔmɔnaa nii lɛ “he nilee krɔŋŋ.” (Kolosebii 1:9) Kpeei ni Yehowa Odasefoi lɛ feɔ lɛ baawa bo ni obɛŋkɛ Yehowa kpaakpa. No ji yiŋtoo kome ni he hiaa hewɔ ni esa akɛ oya kpeei nɛɛ daa lɛ.​—Hebribii 10:24, 25.

6. Mɛni kɛ mɛni esa akɛ ole yɛ Biblia lɛ mli dani abaptisi bo?

⁶ Eji anɔkwale akɛ, Yehowa kpaaa gbɛ akɛ obaale nibii fɛɛ ni yɔɔ Biblia lɛ mli dani abaptisi bo. Ekpaaa gbɛ akɛ nuu ni jɛ Etiopia lɛ ale nɔ fɛɛ nɔ dani abaptisi lɛ. (Bɔfoi 8:30, 31) Wɔbaaya nɔ wɔkase Nyɔŋmɔ he nii kɛya naanɔ. (Jajelɔ 3:11) Shi dani abaabaptisi bo lɛ, kɛ́ hooo lɛ, esa akɛ ole Biblia mli tsɔɔmɔi ni esa akɛ ale klɛŋklɛŋ lɛ, ni okpɛlɛ nɔ.​—Hebribii 5:12.

7. Te Biblia lɛ ni okaseɔ lɛ ewa bo tɛŋŋ?

⁷ Biblia lɛ kɛɔ akɛ: “Kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ.” (Hebribii 11:6) No hewɔ lɛ, esa akɛ oná hemɔkɛyeli dani abaanyɛ abaptisi bo. Biblia lɛ kɛɔ akɛ, mɛi komɛi ni hi blema maŋ ni ji Korinto lɛ mli lɛ nu nɔ ni Yesu sɛɛnyiɛlɔi lɛ tsɔɔ lɛ, ni ‘amɛhe amɛye ni abaptisi amɛ.’ (Bɔfoi 18:8) Nakai nɔŋŋ Biblia lɛ ni okaseɔ lɛ ewa bo ni oná hemɔkɛyeli yɛ Nyɔŋmɔ shiwoi lɛ kɛ hewalɛ ni Yesu afɔleshaa lɛ yɔɔ lɛ mli, afɔleshaa ni baanyɛ ahere wɔ kɛje esha kɛ gbele mli lɛ.​—Yoshua 23:14; Bɔfoi 4:12; 2 Timoteo 3:16, 17.

8. Mɛni baahã ogba mɛi krokomɛi nibii ni okase lɛ?

⁸ Be ni okaseɔ nibii pii yɛ Biblia lɛ mli, ni onaa bɔ ni ewaa bo yɛ oshihilɛ mli lɛ, ohemɔkɛyeli lɛ mli  baawa. Obaasumɔ ni ogba mɛi krokomɛi nibii ni okaseɔ lɛ. (Yeremia 20:9; 2 Korintobii 4:13) Shi namɛi esa akɛ ogba amɛ?

9, 10. (a) Namɛi obaanyɛ ogba amɛ nibii ni okaseɔ lɛ? (b) Kɛ́ ootao ofata asafo lɛ he kɛshiɛ lɛ, mɛni esa akɛ ofee?

⁹ Ekolɛ obaagba owekumɛi, loo onanemɛi, loo okutsoŋbii, loo mɛi ni okɛtsuɔ nii lɛ nibii ni okaseɔ lɛ. Ehi waa, shi be fɛɛ be lɛ, okɛ mlihilɛ kɛ suɔmɔ afee nakai. Sɛɛ mli lɛ, obaaná hegbɛ ni ofata asafo lɛ he kɛshiɛ. Kɛ́ onu he akɛ esa akɛ obɔi shiɛmɔyaa lɛ, obaanyɛ okɛ Odasefonyo ni kɛ bo kaseɔ Biblia lɛ agba he sane, ni okɛɛ lɛ akɛ oosumɔ ni ofata asafo lɛ he kɛshiɛ. Kɛ́ mɔ lɛ na akɛ oshɛ mɔ ni baanyɛ afee nakai, ni oohi shi bɔ ni Biblia lɛ kpaa gbɛ lɛ, no lɛ, asafoŋ onukpai enyɔ kɛ bo kɛ lɛ fɛɛ baakpe.

¹⁰ Mɛni baaya nɔ yɛ nakai kpee lɛ shishi? Asafoŋ onukpai lɛ kɛ bo baawie, ni amɛbaakwɛ kɛji onuɔ Biblia mli tsɔɔmɔi ni esa akɛ ale klɛŋklɛŋ lɛ ashishi ni oheɔ oyeɔ, ni okɛ nɔ ni Biblia lɛ tsɔɔ lɛ tsuɔ nii yɛ oshihilɛ mli daa, ni akɛ, oosumɔ ni otsɔ Yehowa Odasefonyo lɛɛlɛŋ lo. Kaimɔ akɛ, asafoŋ onukpai lɛ kwɛɔ asafoŋbii lɛ fɛɛ anɔ, ni bo hu ofata he, no hewɔ lɛ, kaashe gbeyei akɛ okɛ amɛ baagba sane. (Bɔfoi 20:28; 1 Petro 5:2, 3) Kɛ́ agbe kpee nɛɛ naa lɛ, asafoŋ onukpai lɛ baahã ole kɛji obaanyɛ ofata asafo lɛ he kɛshiɛ.

11. Mɛni hewɔ ehe hiaa waa ni ofee tsakemɔi dani obaanyɛ ofata asafo lɛ he kɛshiɛ lɛ?

¹¹ Ekolɛ asafoŋ onukpai lɛ baahã ole akɛ ehe miihia ni ofee tsakemɔi komɛi lolo dani ofata asafo lɛ he kɛshiɛ. Mɛni hewɔ ehe hiaa waa ni ofee tsakemɔi  nɛɛ? Ejaakɛ kɛ́ wɔmiitsɔɔ mɛi krokomɛi Nyɔŋmɔ he nii lɛ, wɔdamɔ Yehowa najiaŋ, ni no hewɔ lɛ esa akɛ wɔhi shi yɛ gbɛ ni woɔ ehiɛ nyam nɔ.​—1 Korintobii 6:9, 10; Galatiabii 5:19-21.

12. Mɛni hewɔ esa akɛ gbɔmɛi fɛɛ atsake amɛtsui lɛ?

¹² Nɔ kroko hu yɛ ni esa akɛ ofee dani abaanyɛ abaptisi bo. Bɔfo Petro kɛɛ akɛ: “No hewɔ lɛ, nyɛtsakea nyɛtsui ni nyɛkua nyɛsɛɛ koni agbe nyɛhe eshai lɛ.” (Bɔfoi 3:19) Kɛ́ akɛɛ otsake otsui lɛ, mɛni etsɔɔ? Etsɔɔ akɛ, obaashwa ohe waa yɛ nɔ ko ni ehiii ni ofee lɛ he. Akɛ nɔkwɛmɔnɔ lɛ, kɛ́ be ko ni eho lɛ, obɔɔ ajwamaŋ lɛ, no lɛ, esa akɛ otsake otsui. Ni kɛ́ owala shihilɛ mli fɛɛ lɛ obɔɔ mɔdɛŋ akɛ obaafee nɔ ni ja po lɛ, ehe miihia lolo ni otsake otsui, ejaakɛ wɔ fɛɛ wɔfeɔ esha, ni ehe miihia ni wɔbi Nyɔŋmɔ ni ekɛ wɔhe eshai ake wɔ.​—Romabii 3:23; 5:12.

13. Kɛ́ akɛɛ ‘oku osɛɛ’ lɛ, mɛni etsɔɔ?

¹³ Ani ohe ni obaashwa yɛ nɔ ni ofee lɛ he lɛ pɛ kɛkɛ fa? Dabi. Petro kɛɛ akɛ, esa akɛ ‘oku osɛɛ’ hu. Enɛ tsɔɔ akɛ, esa akɛ otsi ohe yɛ otsutsu jeŋba ni esaaa lɛ he, ni obɔi nɔ ni ja feemɔ. Akɛ nɔkwɛmɔnɔ lɛ, ŋɔɔ lɛ akɛ ohiɛ tsɔne kɛmiifã gbɛ kɛmiiya he ko klɛŋklɛŋ kwraa. Ooya, kɛkɛ ni oyɔse akɛ olaaje. Mɛni obaafee? Ŋwanejee ko bɛ he akɛ, obaajɔɔ la lɛ he, obaawa, ni obaadɔ ohe, kɛkɛ lɛ oyi gbɛ ni ja lɛ nɔ. Nakai nɔŋŋ be ni okaseɔ Biblia lɛ, ekolɛ obaana akɛ ehe miihia ni otsake ojeŋba loo nibii komɛi ni ofeɔ yɛ oshihilɛ mli lɛ. Bɔɔ mɔdɛŋ ni ‘oku osɛɛ’​—ni tsɔɔ akɛ, ofee tsakemɔi ni he hiaa lɛ​—ni obɔi nɔ ni ja feemɔ.

14. Mɛni obaafee kɛ́ obaajɔɔ ohe nɔ ohã Nyɔŋmɔ?

¹⁴ Nɔ kroko ni he hiaa ni esa akɛ ofee dani abaptisi bo ji, ni ojɔɔ ohe nɔ ohã Yehowa. Kɛ́ akɛɛ ojɔɔ ohe nɔ ohã Yehowa lɛ, no tsɔɔ akɛ, osɔle ni owo lɛ shi yɛ nakai sɔlemɔ lɛ mli akɛ obaajá lɛ pɛ, ni akɛ, obaahã esuɔmɔnaa nii afee nɔ ni he hiaa bo fe fɛɛ yɛ oshihilɛ mli.​—5 Mose 6:15.

15, 16. Mɛni tsirɛɔ mɔ ko koni ejɔɔ ehe nɔ ehã Nyɔŋmɔ?

¹⁵ Kɛ́ owo Yehowa shi akɛ obaajá lɛ pɛ lɛ, etamɔ nɔ ni owo mɔ ko ni osumɔɔ lɛ shi akɛ okɛ lɛ baahi shi owala gbii abɔ fɛɛ. Ŋɔɔ lɛ akɛ, nuu ko kɛ yoo ko miibɔ naanyo koni amɛle amɛhe dani amɛbote gbalashihilɛ mli. Be ni nuu lɛ baleɔ yoo lɛ jogbaŋŋ lɛ, ebasumɔɔ lɛ, ni esumɔɔ akɛ ekɛ lɛ abote gbalashihilɛ mli. Eyɛ mli akɛ nifeemɔ nɛɛ yɛ hiɛdɔɔ moŋ, shi nuu lɛ miisumɔ ni etsu he nii ejaakɛ esumɔɔ yoo lɛ.

¹⁶ Be ni okaseɔ Yehowa he nii lɛ, obasumɔɔ lɛ, ni osumɔɔ akɛ ofee bɔ fɛɛ bɔ ni ooonyɛ kɛsɔmɔ lɛ. Enɛ baatsirɛ bo ni osɔle ni owo lɛ shi akɛ obaasɔmɔ lɛ. Biblia lɛ kɛɔ akɛ, esa akɛ mɔ fɛɛ mɔ ni miisumɔ ni enyiɛ Yesu sɛɛ lɛ ‘akwa ehe.’ (Marko 8:34) Mɛni no tsɔɔ? Etsɔɔ akɛ yɛ oshihilɛ mli fɛɛ lɛ, obaabo Yehowa toi yɛ nɔ fɛɛ nɔ mli. Nɔ ni Yehowa taoɔ lɛ he miihia kwraa fe nibii ni oshweɔ akɛ oná kɛ otii ni okɛmamɔ ohiɛ.​—Kanemɔ 1 Petro 4:2.

17. Mɛni hewɔ mɛi komɛi ejɔɔɔ amɛhe nɔ amɛhãaa Yehowa lɛ?

¹⁷ Mɛi komɛi ejɔɔɔ amɛhe nɔ amɛhãaa Yehowa, ejaakɛ amɛsheɔ gbeyei akɛ kɛ́ amɛwo lɛ shi akɛ amɛbaasɔmɔ  lɛ lɛ, amɛnyɛŋ amɛye nɔ. Amɛsumɔŋ ni amɛfee nɔ ko ni baadɔ Yehowa, aloo ekolɛ amɛbaasusu akɛ, kɛ́ amɛjɔɔɔ amɛhe nɔ amɛhãaa Yehowa lɛ, no lɛ, kɛ́ amɛfee nɔ ko lɛ, egbalaŋ amɛtoi.

18. Mɛni baawa bo koni okashe gbeyei akɛ onyɛŋ oya nɔ oye Yehowa anɔkwa?

¹⁸ Kɛ́ osumɔɔ Yehowa lɛ, no hãŋ oshe gbeyei akɛ onyɛŋ oya nɔ oye lɛ anɔkwa. Akɛni osumɔɔ lɛ hewɔ lɛ, obaafee bɔ fɛɛ bɔ ni ooonyɛ koni oye shi ni owo lɛ lɛ nɔ. (Jajelɔ 5:4; Kolosebii 1:10) Onaŋ Yehowa suɔmɔnaa nii ni obaafee lɛ akɛ ewa tsɔ. Bɔfo Yohane ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ; ni ekitãi lɛ anɔyeli waaa.”​—1 Yohane 5:3.

19. Mɛni hewɔ esaaa akɛ osheɔ gbeyei akɛ obaajɔɔ ohe nɔ ohã Yehowa lɛ?

¹⁹ Yehowa kpaaa gbɛ akɛ oye emuu dani ojɔɔ ohe nɔ ohã lɛ. Ekpaaa gbɛ kɔkɔɔkɔ akɛ wɔfee babaoo fe bɔ ni wɔbaanyɛ. (Lala 103:14) Ebaawa bo ni ofee nɔ ni ja. (Yesaia 41:10) Okɛ ohiɛ afɔ̃ Yehowa nɔ kɛ otsui fɛɛ, ni “ebaahã ogbɛi aja.”​—Abɛi 3:5, 6.

20. Kɛ́ ojɔɔ ohe nɔ ohã Nyɔŋmɔ lɛ, mɛni esa akɛ ofee yɛ no sɛɛ?

²⁰ Ani kɛ́ okwɛ lɛ, ofee klalo akɛ obaajɔɔ ohe nɔ ohã Yehowa? Kɛ́ ojɔɔ ohe nɔ ohã Yehowa lɛ, obaanyɛ ofee nɔ ni nyiɛ henɔjɔɔmɔ sɛɛ lɛ. No ji, esa akɛ ohã abaptisi bo.

21, 22. Te ooofee tɛŋŋ ‘ojaje ohemɔkɛyeli lɛ otsɔɔ’?

²¹ Hã osafo lɛ mli onukpai akuu lɛ saji ahe gbɛjianɔtolɔ lɛ ale akɛ ojɔɔ ohe nɔ ohã Yehowa, ni oosumɔ ni abaptisi bo. Kɛkɛ lɛ, ebaahã asafoŋ onukpai komɛi kɛ bo asusu Biblia mli tsɔɔmɔi ni esa akɛ ale  klɛŋklɛŋ lɛ ahe. Kɛ́ amɛna akɛ osa mɔ ni abaptisiɔ lɛ lɛ, amɛbaahã ole akɛ abaabaptisi bo yɛ Yehowa Odasefoi akpee bibioo loo kpee wulu ni baanyiɛ sɛɛ lɛ shishi. Kɛ́ atee kpee lɛ, abaahã wiemɔ ko ni baatsɔɔ nɔ ni baptisimɔ ji lɛ mli. No sɛɛ lɛ, wielɔ lɛ baabi mɛi ni abaabaptisi amɛ lɛ saji enyɔ komɛi ni waaa. Kɛ́ ohã nakai sanebimɔi lɛ ahetoo lɛ, belɛ ‘oojaje ohemɔkɛyeli lɛ ootsɔɔ.’​—Romabii 10:10.

 ²² No sɛɛ lɛ, abaabaptisi bo. Akɛ ogbɔmɔtso muu lɛ fɛɛ baawo nu mli. Baptisimɔ lɛ baahã mɛi fɛɛ ana akɛ ojɔɔ ohe nɔ ohã Yehowa, ni amrɔ nɛɛ oji Yehowa Odasefonyo.

23. Kɛ́ akɛɛ abaptisi mɔ ko “yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli” lɛ, mɛni etsɔɔ?

²³ Yesu kɛɛ abaabaptisi ekaselɔi lɛ “yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli.” (Kanemɔ Mateo 28:19.) Mɛni no tsɔɔ? Etsɔɔ akɛ, okpɛlɛɔ nɔ akɛ Yehowa ji onɔyelɔ, ni okpɛlɛɔ nɔ ni Yesu tsuɔ koni Nyɔŋmɔ yiŋtoo aba mli lɛ nɔ, ni oheɔ oyeɔ akɛ Nyɔŋmɔ kɛ emumɔ krɔŋkrɔŋ lɛ tsuɔ nii koni eyiŋtoo aba mli.​—Lala 83:18; Mateo 28:18; Galatiabii 5:22, 23; 2 Petro 1:21.

24, 25. (a) Mɛni baptisimɔ tsɔɔ? (b) Mɛni he wɔbaasusu yɛ naagbee yitso lɛ mli?

²⁴ Baptisimɔ tsɔɔ nɔ ko ni he hiaa waa. Kɛ́ akɛ ogbɔmɔtso muu lɛ fɛɛ wo nu lɛ mli lɛ, etsɔɔ akɛ ogbo ohã otsutsu shihilɛ lɛ loo okwa nakai shihilɛ lɛ kwraa. Kɛ́ oje nu lɛ mli lɛ, obaaje shihilɛ hee shishi, ni tsɔɔ akɛ, obaafee Nyɔŋmɔ suɔmɔnaa nii. Etsɔɔ akɛ, kɛjɛ no nɔ kɛyaa lɛ obaasɔmɔ Yehowa. Kaimɔ akɛ jeee gbɔmɔ ko, loo kuu ko, loo nitsumɔ ko ojɔɔ ohe nɔ ohã lɛ. Ojɔɔ owala nɔ ohã Yehowa.

²⁵ Ohenɔjɔɔmɔ lɛ baahã okɛ Nyɔŋmɔ teŋ naanyobɔɔ lɛ mli awa. (Lala 25:14) Enɛ etsɔɔɔ akɛ kɛ́ abaptisi mɔ ko lɛ, no kɛkɛ baahã ahere eyiwala. Bɔfo Paulo ŋma akɛ: “Nyɛyaa nɔ nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ he nii.” (Filipibii 2:12) Baptisimɔ ji eshishijee kɛkɛ. Shi te ooofee tɛŋŋ ohi Yehowa masɛi daa lɛ? Wolo nɛɛ naagbee yitso lɛ baahã sanebimɔ nɛɛ hetoo.