1. Mɛni haa anáa weku shihilɛ ni miishɛɛ yɔɔ mli?

YEHOWA NYƆŊMƆ miisumɔ ni oweku lɛ shihilɛ afee nɔ ni yɔɔ miishɛɛ. E-Wiemɔ ni ji Biblia lɛ kɛ gbɛtsɔɔmɔi haa weku lɛ mli bii lɛ ateŋ mɔ fɛɛ mɔ, ni etsɔɔ nitsumɔ ni Nyɔŋmɔ taoɔ akɛ amɛteŋ mɔ fɛɛ mɔ atsu lɛ mli. Kɛji akɛ weku lɛ mli bii tsu amɛgbɛnaa nii ahe nii yɛ ŋaawoo ni Nyɔŋmɔ kɛhaa lɛ kɛ gbeekpamɔ naa lɛ, ehaa amɛtsui nyɔɔ amɛmli jogbaŋŋ. Yesu kɛɛ akɛ: “Ajɔɔ mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!”—Luka 11:28.

2. Mɛni nɔ ní wɔɔkpɛlɛ lɛ wɔweku miishɛɛnamɔ damɔ nɔ?

² Miishɛɛ ni wɔɔná yɛ weku lɛ mli lɛ damɔ kpɛlɛmɔ ni wɔɔkpɛlɛ nɔ akɛ mɔ ni to weku lɛ shishi lɛ ji Yehowa, ní Yesu tsɛ́ lɛ akɛ “Wɔtsɛ” lɛ nɔ. (Mateo 6:9) Wɔŋwɛi Tsɛ lɛ hewɔ ni wekui fɛɛ ni yɔɔ shikpɔŋ nɔ lɛ yɔɔ shihilɛ mli—ni ekã shi faŋŋ akɛ ele nɔ ni haa weku mli bii náa miishɛɛ. (Efesobii 3:14, 15) Belɛ, mɛni Biblia lɛ tsɔɔ yɛ weku lɛ mli bii lɛ ateŋ mɔ fɛɛ mɔ gbɛnaa nii ahe?

3. Te Biblia lɛ tsɔɔ adesai aweku lɛ shishijee mli eha tɛŋŋ, ni mɛni haa wɔleɔ akɛ nɔ ni ekɛɛ lɛ ji anɔkwale lɛ?

³ Yehowa bɔ klɛŋklɛŋ gbɔmɛi ni ji Adam kɛ Hawa, ni efee  amɛ ekome ákɛ wu kɛ ŋa. Ekɛ amɛ wo shikpɔŋ nɔ paradeiso shihilɛhe fɛfɛo ko ni ji Eden abɔɔ lɛ mli—ni ekɛɛ amɛ akɛ amɛfɔ́. Yehowa kɛɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ̃.” (1 Mose 1:26-28; 2:18, 21-24) Enɛ jeee adesã loo sane ko ni afo atã, ejaakɛ Yesu tsɔɔ akɛ nɔ ni Mose Klɛŋklɛŋ Wolo lɛ wie yɛ weku shihilɛ shishijee he lɛ ji anɔkwale. (Mateo 19:4, 5) Eyɛ mli akɛ amrɔ nɛɛ wɔkɛ naagbai babaoo kpeɔ, ni shihilɛ lɛ tamɔɔɔ bɔ ni Nyɔŋmɔ to eyiŋ yɛ he lɛ moŋ, shi ha wɔsusu nɔ hewɔ ni abaanyɛ aná miishɛɛ yɛ weku lɛ mli he wɔkwɛ.

4. (a) Mɛɛ gbɛ nɔ weku lɛ mli bii lɛ ateŋ mɔ fɛɛ mɔ baanyɛ aye abua kɛha weku lɛ miishɛɛnamɔ? (b) Mɛni hewɔ Yesu shihilɛ he nii ni aaakase lɛ he hiaa waa kɛha weku miishɛɛnamɔ lɛ?

⁴ Weku lɛ mli bii lɛ ateŋ mɔ fɛɛ mɔ baanyɛ aye abua koni akɛha weku shihilɛ lɛ afee nɔ ni miishɛɛ yɔɔ mli, kɛtsɔ bɔ ni Nyɔŋmɔ jieɔ suɔmɔ kpo etsɔɔ lɛ ni amɛaakase lɛ nɔ. (Efesobii 5:1, 2) Shi akɛni wɔnaaa Nyɔŋmɔ hewɔ lɛ, te wɔɔfee tɛŋŋ wɔkase lɛ lɛ? Wɔbaanyɛ wɔkase bɔ ni Yehowa feɔ enii ehaa lɛ, ejaakɛ etsu ekromɔ Bi lɛ kɛjɛ ŋwɛi kɛba shikpɔŋ lɛ nɔ. (Yohane 1:14, 18) Beni nɛkɛ Bi nɛɛ ni ji Yesu Kristo yɔɔ shikpɔŋ lɛ nɔ lɛ, efee enii tamɔ eŋwɛi Tsɛ lɛ aahu akɛ na ni aaana Yesu ní abo lɛ toi lɛ tamɔ nɔ ni ayɛ Yehowa masɛi ni aabo Lɛ toi nɔŋŋ. (Yohane 14:9) No hewɔ lɛ, kɛ́ wɔteŋ mɔ fɛɛ mɔ kase suɔmɔ ni Yesu jie lɛ kpo lɛ ní wɔnyiɛ enɔkwɛmɔnɔ lɛ sɛɛ lɛ, wɔbaanyɛ wɔye wɔbua koni wɔkɛha weku shihilɛ lɛ afee nɔ ni yɔɔ miishɛɛ jogbaŋŋ.

5, 6. (a) Bɔ ni Yesu kɛ asafo lɛ ye eha lɛ ji nɔkwɛmɔnɔ kɛha wumɛi yɛ mɛɛ gbɛ nɔ? (b) Mɛni esa akɛ mɔ afee koni ená eshaifaa?

⁵ Biblia lɛ kɛɔ akɛ, esa akɛ wumɛi kɛ amɛŋamɛi aye taakɛ Yesu kɛ ekaselɔi lɛ ye eha lɛ pɛpɛɛpɛ. Susumɔ Biblia mli gbɛtsɔɔmɔ nɛɛ he okwɛ: ‘Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ lɛ. Nakai sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei. Mɔ  ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo dã, shi moŋ elɛ̀ɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ.’—Efesobii 5:23, 25-29.

⁶ Suɔmɔ ni Yesu yɔɔ kɛha ekaselɔi ni ji asafo lɛ ji nɔkwɛmɔnɔ kpakpa kɛha wumɛi. Eyɛ mli akɛ amɛyeee emuu moŋ, shi akɛni Yesu ‘sumɔ amɛ kɛwula shi’ hewɔ lɛ, ekɛ ewala ŋmɛ shi eha amɛ. (Yohane 13:1; 15:13) Nakai nɔŋŋ awoɔ wumɛi hu hewalɛ akɛ: ‘Nyɛyaa nɔ nyɛsumɔa nyɛŋamɛi, ni nyɛmli akajoa yɛ amɛnɔ.’ (Kolosebii 3:19) Mɛni baaye abua wu ko koni enyɛ ekɛ ŋaawoo nɛɛ atsu nii, titri lɛ kɛji akɛ eŋa efeee enii yɛ nilee mli yɛ bei komɛi amli? Esa akɛ ekai akɛ lɛ hu etɔ̃ɔ, ni ekai nɔ ni esa akɛ efee koni enine ashɛ eshaifaa nɔ kɛjɛ Nyɔŋmɔ dɛŋ lɛ hu. Mɛni esa akɛ efee? Esa akɛ ekɛ mɛi ni tɔ̃ɔ enɔ, ní eŋa hu fata he lɛ ahe eshai ake amɛ. Yɛ anɔkwale mli lɛ, esa akɛ ŋa lɛ hu afee nakai nɔŋŋ. (Mateo 6:12, 14, 15) Ani oona nɔ̃ hewɔ ni mɛi komɛi kɛɔ akɛ omanyeyeli yɛ gbalashihilɛ mli lɛ damɔ gbɔmɛi enyɔ ni efee ekome kɛhi shi ní nyɛɔ amɛjɛɔ amɛsuɔmɔ mli amɛkɛ amɛtɔmɔi keɔ amɛhe lɛ nɔ lɛ?

7. Mɛɛ nibii ahe Yesu susu, ni mɛɛ nɔkwɛmɔnɔ ekɛ enɛ fee eha wumɛi?

⁷ Esa akɛ wumɛi akadi hu akɛ Yesu susu ekaselɔi lɛ ahe be fɛɛ be. Esusu amɛfatɔɔi kɛ heloonaa hiamɔ nii ahe. Ákɛ nɔkwɛmɔnɔ lɛ, beni etɔ amɛ lɛ, ekɛɛ amɛ akɛ: “Nyɛ sɔŋŋ nyɛbaa ni wɔtea ŋa lɛ nɔ he ko banee, ni nyɛyajɔɔa nyɛhe fioo.” (Marko 6:30-32) Esa akɛ asusu ŋamɛi hu ahe jogbaŋŋ. Biblia lɛ wieɔ ŋamɛi ahe akɛ ‘mɛi ni he waaa tuutu ko,’ ni afãa wumɛi ni amɛkɛ ‘woo aha amɛ.’ Mɛni hewɔ? Ejaakɛ wumɛi kɛ ŋamɛi fɛɛ ji “wala duromɔ lɛ wɔfaasei.” (1 Petro 3:7) Esa akɛ wumɛi akai akɛ anɔkwayeli ji nɔ ni haa mɔ jara waa yɛ Nyɔŋmɔ hiɛ, shi jeee nuu loo yoo ni mɔ ko ji.—Lala 101:6.

8. (a) Mɛni hewɔ wu “ni sumɔɔ eŋa lɛ, lɛ diɛŋtsɛ ehe esumɔɔ” lɛ? (b) Mɛni “heloo kome” ni wu kɛ ŋa ji lɛ tsɔɔ kɛha amɛ?

⁸ Biblia lɛ kɛɔ akɛ wu “ni sumɔɔ eŋa lɛ, lɛ diɛŋtsɛ ehe esumɔɔ.” Taakɛ Yesu tsɔɔ mli lɛ, nɔ hewɔ lɛ ji akɛ nuu lɛ kɛ eŋa lɛ ‘jeee mɛi enyɔ dɔŋŋ, shi moŋ heloo kome.’ (Mateo 19:6)  No hewɔ lɛ, esaaa akɛ amɛkɛ mɔ kroko náa bɔlɛ. (Abɛi 5:15-21; Hebribii 13:4) Amɛbaanyɛ amɛtsu enɛ he nii kɛji amɛkɛ mɔ hesusumɔ ni pɛsɛmkunya bɛ mli tsu amɛteŋ mɔ fɛɛ mɔ hiamɔ nii ahe nii. (1 Korintobii 7:3-5) Kaimɔ ko ni sa kadimɔ jogbaŋŋ ji akɛ: ‘Mɔ ko enyɛko lɛ diɛŋtsɛ eheloo dã, shi moŋ elɛ̀ɔ lɛ ni ehiɛɔ lɛ dɔdɔɔdɔ.’ Ehe miihia ni wumɛi asumɔ amɛŋamɛi taakɛ amɛsumɔɔ amɛ diɛŋtsɛ amɛhe lɛ, ni amɛkai akɛ amɛbaabu amɛhe akɔntaa amɛha amɛyitso ni ji Yesu Kristo lɛ.—Efesobii 5:29; 1 Korintobii 11:3.

9. Mɛɛ su ko ni Yesu yɔɔ atsĩ tã yɛ Filipibii 1:8, ni mɛni hewɔ esa akɛ wumɛi ajie su nɛɛ kpo amɛtsɔɔ amɛŋamɛi lɛ?

⁹ Bɔfo Paulo wie ‘mlitsɔlɛ ni Yesu Kristo yɔɔ’ lɛ he. (Filipibii 1:8) Mlitsɔlɛ ni Yesu yɔɔ lɛ ji su ko ni haa mɔ tsui nyɔɔ emli, ni yei ni batsɔmɔ ekaselɔi lɛ ná su nɛɛ he miishɛɛ. (Yohane 20:1, 11-13, 16) Ni ŋamɛi sumɔɔ ni amɛwumɛi kɛ amɛ aye yɛ mlitsɔlɛ naa.

10. Mɛɛ gbɛ nɔ Yesu tsɔ efee nɔkwɛmɔnɔ eha ŋamɛi?

¹⁰ Weku lɛ ji gbɛjianɔtoo, ni bɔni afee ni enyɛ etsu nii jogbaŋŋ lɛ, esa akɛ ená hiɛnyiɛlɔ. Yesu po yɛ Mɔ ni ebaa ehe shi ehaa lɛ akɛ e-Yitso. “Kristo yitso ji Nyɔŋmɔ” taakɛ “yoo fɛɛ yoo yitso ji nuu” lɛ. (1 Korintobii 11:3) Yesu he shi ní ebaa ehaa Nyɔŋmɔ yitsoyeli lɛ ji nɔkwɛmɔnɔ ni hi jogbaŋŋ, ejaakɛ wɔteŋ mɔ fɛɛ mɔ yɛ yitso ni esa akɛ wɔba wɔhe shi wɔha lɛ.

11. Mɛɛ su esa akɛ ŋa ajie lɛ kpo yɛ ewu he, ni mɛni baanyɛ ajɛ esubaŋ lɛ mli aba?

¹¹ Hii ni yeee emuu lɛ tɔ̃ɔ, ni bei pii lɛ amɛnyɛɛɛ amɛfee amɛnii akɛ weku yitsei kpakpai. No hewɔ lɛ, mɛni esa akɛ ŋa afee? Esaaa akɛ ebuɔ nibii ni ewu feɔ lɛ akɛ nibii ni he ehiaaa loo ni eeebɔ mɔdɛŋ akɛ eeehe eyitsoyeli lɛ yɛ edɛŋ. Esa akɛ ŋa lɛ akai akɛ, mumɔ ni he jɔ ni yɔɔ kpoo ji nɔ ni jara wa yɛ Nyɔŋmɔ hiɛ. (1 Petro 3:4) Kɛ́ ŋa jie su ni tamɔ nɛkɛ kpo lɛ, ewaŋ kɛhaŋ lɛ kwraa akɛ ebaajɛ Nyɔŋmɔ gbeyeishemɔ mli ni eba ehe shi yɛ shihilɛi ni mli wawai po amli. Kɛfata he lɛ, Biblia lɛ  kɛɔ akɛ: “Esa akɛ ŋa lɛ kɛ bulɛ ni mli kwɔ aha ewu.” (Efesobii 5:33, NW) Shi kɛji akɛ wu lɛ ekpɛlɛɛɛ Kristo nɔ akɛ e-Yitso hu? Biblia lɛ woɔ ŋamɛi aŋaa akɛ: ‘Nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni, kɛ́ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ, ejaakɛ amɛnaa nyɛjeŋba ni hetsemɔ kɛ bulɛ ni mli kwɔ yɔɔ mli lɛ.’—1 Petro 3:1, 2.

12. Mɛni hewɔ ejeee tɔmɔ akɛ ŋa ko kɛ bulɛ aaajie esusumɔ kpo lɛ?

¹² Kɛ́ ŋa ko tsɔ ŋaa gbɛ nɔ etsɔɔ esusumɔ ko ni yɔɔ srɔto yɛ ewu ni ji heyelilɔ loo ejeee heyelilɔ lɛ nɔ̃ he lɛ, no etsɔɔɔ akɛ ebuuu lɛ. Ekolɛ esusumɔ lɛ ja, ni weku muu lɛ fɛɛ baanyɛ aná he sɛɛ kɛji akɛ ewu lɛ bo lɛ toi. Eyɛ mli akɛ Abraham eyakpɛlɛɛɛ ŋaawoo kpakpa ni eŋa Sara kɛha yɛ amɛweku lɛ mli naagba ko he nitsumɔ mli lɛ nɔ moŋ, shi Nyɔŋmɔ kɛɛ lɛ akɛ: “Bo egbee toi.” (1 Mose 21:9-12) Shi kɛlɛ, kɛji akɛ wu lɛ kpɛ eyiŋ yɛ sane ko he, ni eyiŋkpɛɛ lɛ eteee shi ewooo Nyɔŋmɔ mla lɛ, no lɛ esa akɛ eŋa lɛ akpɛlɛ eyiŋkpɛɛ lɛ nɔ ní ekɛtsɔɔ akɛ ebaa ehe shi ehaa lɛ.—Bɔfoi lɛ Asaji 5:29; Efesobii 5:24.

13. (a) Mɛni Tito 2:4, 5 lɛ woɔ yei ni ebote gbalashihilɛ mli lɛ aŋaa koni amɛfee? (b) Mɛni Biblia lɛ kɛɔ yɛ mligbalamɔ kɛ gbalamlitsemɔ he?

¹³ Ŋa lɛ baanyɛ afee babaoo yɛ eweku lɛ kwɛmɔ he gbɛnaa nii lɛ ahe nitsumɔ mli. Ákɛ nɔkwɛmɔnɔ lɛ, Biblia lɛ tsɔɔ akɛ esa akɛ yei ni ebote gbalashihilɛ mli lɛ ‘asumɔ amɛwumɛi, amɛsumɔ amɛbii, amɛhiɛ akã shi, amɛhe atse, amɛbaa amɛwe yi jogbaŋŋ, amɛmli ahi, amɛba amɛhe shi amɛha amɛwumɛi.’ (Tito 2:4, 5) Yoo ni ji ŋa kɛ nyɛ hu ni tsuɔ egbɛnaa nii ahe nii yɛ gbɛ ni tamɔ nɛkɛ nɔ lɛ weku lɛ baasumɔ lɛ, ni amɛbaajie bulɛ kpo amɛtsɔɔ lɛ daa. (Abɛi 31:10, 28) Shi akɛni gbalashihilɛ ji aŋkroaŋkroi ni yeee emuu ni efee ekome kɛhi shi hewɔ lɛ, shihilɛi komɛi ni mli wawai baanyɛ ekɛ mligbalamɔ loo gbalamlitsemɔ aba. Biblia lɛ ŋmɛɔ mligbalamɔ gbɛ yɛ shihilɛi komɛi amli. Kɛlɛ, esaaa akɛ abuɔ mligbalamɔ akɛ eji nɔ ko ni hiɛdɔɔ bɛ he, ejaakɛ Biblia lɛ woɔ ŋaa akɛ: “Ŋa akatse ewu gbala; . . . ni wu lɛ hu akaŋmɛɛ eŋa he.” (1 Korintobii 7:10, 11) Ajwamaŋbɔɔ mli ni gbalashihilɛ mli hefatalɔi lɛ ateŋ  mɔ ko kɛ ehe aaawo lɛ pɛ ji nɔ ni kɛ Ŋmalɛ naa nɔdaamɔnɔ haa kɛha gbalamlitsemɔ.—Mateo 19:9.

14. Te Yesu kɛ gbekɛbii ye eha tɛŋŋ, ni mɛni ehe hiaa ni fɔlɔi afee aha amɛbii?

¹⁴ Yesu fee nɔkwɛmɔnɔ ni hi jogbaŋŋ efɔ̃ shi eha fɔlɔi yɛ bɔ ni ekɛ gbekɛbii ye eha lɛ mli. Beni mɛi komɛi bɔ mɔdɛŋ ni amɛtsĩ gbekɛbii lɛ anaa koni amɛkaba Yesu ŋɔɔ lɛ, ekɛɛ amɛ akɛ: “Nyɛhaa gbekɛbii lɛ abaa miŋɔɔ, ni nyɛkatsĩa amɛ gbɛ.” Biblia lɛ kɛɔ akɛ, kɛkɛ ni “eloo amɛ atuu, ni eŋɔ eniji eshwie amɛnɔ, ni ejɔɔ amɛ.” (Marko 10:13-16) Akɛni Yesu ná be eha gbekɛbii hewɔ lɛ, ani esaaa akɛ ofeɔ nakai nɔŋŋ ohaa bo diɛŋtsɛ obihii kɛ obiyei lɛ? Jeee be fioo ko ni obaaná oha amɛ lɛ he hiaa amɛ, shi moŋ ehe miihia ni oná be babaoo oha amɛ. Ehe miihia ni oná be ni okɛtsɔɔ amɛ nii, ejaakɛ nakai ji bɔ ni Yehowa fãa fɔlɔi akɛ amɛfee.—5 Mose 6:4-9.

15. Mɛni fɔlɔi baanyɛ afee kɛbu amɛbii ahe?

¹⁵ Akɛni efɔŋfeemɔ miiya nɔ eefa yɛ je nɛɛ mli hewɔ lɛ, ehe miihia ni gbekɛbii aná fɔlɔi ni baabu amɛhe kɛjɛ mɛi ni taoɔ akɛ amɛye amɛ awui, tamɔ mɛi ni feɔ gbekɛbii bɔlɛnamɔ mli niseniianii nɛkɛ lɛ ahe. Susumɔ bɔ ni Yesu bu ekaselɔi  ni ejɛ suɔmɔ mli etsɛ́ amɛ “bii bibii” lɛ ahe eha lɛ he okwɛ. Beni abaamɔ Yesu ni etsɛŋ ni abaagbe lɛ lɛ, eto gbɛjianɔ kɛbu amɛhe. (Yohane 13:33; 18:7-9) Ákɛ fɔlɔ lɛ, ehe miihia ni ohiɛ ahi ohe nɔ yɛ mɔdɛŋ ni Abonsam bɔɔ koni ekɛye obii bibii lɛ awui lɛ he. Ehe miihia ni otsɔ hiɛ obɔ amɛ kɔkɔ. * (1 Petro 5:8) Be ko bako ni amɛhelooŋ, mumɔŋ, kɛ jeŋba gbɛfaŋ shweshweeshwefeemɔ eyaje oshara mli tamɔ nɛkɛ pɛŋ.

16. Mɛni fɔlɔi baanyɛ akase kɛjɛ bɔ ni Yesu tsu ekaselɔi lɛ afatɔɔi ahe nii eha lɛ mli?

¹⁶ Yɛ gbi gbɛkɛ dani Yesu baagbo lɛ, ekaselɔi lɛ taa saji anaa  yɛ mɔ ni ji agbo fe fɛɛ yɛ amɛteŋ lɛ he. Yɛ nɔ najiaŋ ni Yesu mli baafu amɛ lɛ, etee nɔ ejɛ suɔmɔ mli ekɛ wiemɔ kɛ nɔkwɛmɔnii tsɔɔ amɛ nii. (Luka 22:24-27; Yohane 13:3-8) Kɛji akɛ fɔlɔ ji bo lɛ, ani oona gbɛ nɔ ni obaanyɛ otsɔ okɛ Yesu nɔkwɛmɔnɔ lɛ atsu nii yɛ gbɛ ni otsɔɔ nɔ ojajeɔ obii lɛ mli? Eji anɔkwale akɛ tsɔsemɔ he miihia amɛ, shi esa akɛ atsu he nii “bɔ ni sa kɛkɛ,” shi jeee yɛ mlifu mli kɔkɔɔkɔ. Esaaa akɛ owieɔ bambam ni osusuuu he “tamɔ adumɔɔ klante.” (Yeremia 30:11; Abɛi 12:18) Esa akɛ okɛ tsɔsemɔ aha obii lɛ yɛ gbɛ nɔ ni baaha amɛyɔse yɛ sɛɛ mli akɛ eji nɔ ni sa jogbaŋŋ kɛha amɛ.—Efesobii 6:4; Hebribii 12:9-11.

17. Mɛɛ gbɛ̀i anɔ Yesu fee nɔkwɛmɔnɔ ni hi jogbaŋŋ eha gbekɛbii?

¹⁷ Ani gbekɛbii baanyɛ akase nii kɛjɛ Yesu ŋɔɔ? Hɛɛ, amɛbaanyɛ amɛfee nakai! Yesu kɛ nɔkwɛmɔnɔ ni lɛ diɛŋtsɛ efee lɛ tsɔɔ gbekɛbii bɔ ni esa akɛ amɛbo amɛfɔlɔi atoi amɛha. Ekɛɛ akɛ: “Bɔ ni mitsɛ tsɔɔ mi lɛ, nakai mifeɔ.” Ekɛfata he akɛ: “Mi lɛ, nɔ ni sa ehiɛ mifeɔ daa.” (Yohane 8:28, 29) Yesu fee toiboo eha eŋwɛi Tsɛ lɛ, ni Biblia lɛ kɛ famɔ haa gbekɛbii koni amɛfee toiboo amɛha amɛfɔlɔi. (Efesobii 6:1-3) Eyɛ mli akɛ Yesu ji gbekɛ ni eye emuu moŋ, shi efee toiboo eha Yosef kɛ Maria ni ji eshikpɔŋ nɔ fɔlɔi ni yeee emuu lɛ. Ekã shi faŋŋ akɛ enɛ ha Yesu weku lɛ mli bii lɛ ateŋ mɔ fɛɛ mɔ ná miishɛɛ!—Luka 2:4, 5, 51, 52.

18. Mɛni hewɔ Yesu feɔ toiboo ehaa eŋwɛi Tsɛ lɛ be fɛɛ be lɛ, ni namɔ mii shɛɔ ehe kɛji akɛ gbekɛbii ni yɔɔ ŋmɛnɛ lɛ fee toiboo amɛha amɛfɔlɔi?

¹⁸ Ani gbekɛbii baanyɛ ayɔse gbɛ̀i anɔ ni amɛaatsɔ amɛfee amɛnii tamɔ Yesu, koni amɛkɛha amɛfɔlɔi amii ashɛ amɛhe? Eji anɔkwale akɛ bei komɛi lɛ ebaawa kɛha gbekɛbii akɛ amɛaafee toiboo amɛha amɛfɔlɔi, shi Nyɔŋmɔ miisumɔ ni gbekɛbii abo amɛ toi. (Abɛi 1:8; 6:20) Yesu feɔ toiboo ehaa eŋwɛi Tsɛ lɛ be fɛɛ be, efeɔ nakai yɛ shihilɛi ni mli wawai po amli. Be ko beni ehe bahia ni Yesu atsu Nyɔŋmɔ suɔmɔnaa  nii ko ni efeemɔ wa waa he nii lɛ, Yesu kɛɛ akɛ: “Jiemɔ kpulu nɛɛ kɛje minɔ!” Kɛlɛ, Yesu fee nɔ ni Nyɔŋmɔ bi ni efee lɛ, ejaakɛ ele akɛ e-Tsɛ le nɔ ni hi fe fɛɛ kɛha lɛ. (Luka 22:42) Kɛji akɛ gbekɛbii kase toiboo lɛ, amɛbaaha amɛfɔlɔi kɛ amɛŋwɛi Tsɛ lɛ mii ashɛ amɛhe babaoo. *—Abɛi 23:22-25.

19. (a) Mɛɛ gbɛ nɔ Satan tsɔɔ ekaa gbekɛbii? (b) Mɛɛ hewalɛ gbekɛbii ajeŋba fɔŋ baanyɛ aná yɛ amɛfɔlɔi anɔ?

¹⁹ Abonsam ka Yesu, ni wɔbaanyɛ wɔná nɔmimaa akɛ ebaaka gbekɛbii koni amɛfee nibii ni ejaaa. (Mateo 4:1-10) Satan Abonsam kɛ tipɛŋfoi anɔnyɛɛ ni ji nifeemɔ ko ni ewa akɛ aaadamɔ naa lɛ tsuɔ nii. Belɛ, kwɛ bɔ ni ehe hiaa waa akɛ gbekɛbii kɛ efɔŋfeelɔi akabɔ naanyo! (1 Korintobii 15:33) Yakob biyoo Dina kɛ mɛi ni jáaa Yehowa yabɔ naanyo, ni enɛ kɛ naagbai babaoo ba enɔ. (1 Mose 34:1, 2) Kwɛ bɔ ni bɔlɛnamɔ mli jeŋba shara mli ni weku lɛ mli bii lɛ ateŋ mɔ ko kɛ ehe aaawo lɛ baanyɛ aye weku lɛ awui aha!—Abɛi 17:21, 25.

20. Mɛni esa akɛ weku lɛ mli bii lɛ ateŋ mɔ fɛɛ mɔ afee bɔni afee koni ekɛha weku lɛ shihilɛ afee nɔ ni miishɛɛ yɔɔ mli?

²⁰ Kɛ́ akɛ Biblia mli ŋaawoo tsu nii lɛ, ehaa weku mli naagbai  ahe nitsumɔ feɔ mlɛo. Yɛ anɔkwale mli lɛ, ŋaawoo nɛɛ ni akɛaatsu nii lɛ ji nɔ̃ diɛŋtsɛ ni kɛ weku miishɛɛ baa. No hewɔ lɛ wumɛi, nyɛsumɔa nyɛŋamɛi, ni nyɛkɛ amɛ ayea taakɛ Yesu kɛ esafo lɛ yeɔ lɛ. Ŋamɛi, nyɛbaa nyɛhe shi nyɛhaa nyɛwumɛi lɛ ayitsoyeli lɛ, ni nyɛnyiɛ yoo kpakpa ni awie ehe yɛ Abɛi 31:10-31 lɛ nɔkwɛmɔnɔ lɛ sɛɛ. Fɔlɔi, nyɛtsɔsea nyɛbii lɛ. (Abɛi 22:6) Tsɛmɛi, ‘nyɛyea nyɛ diɛŋtsɛ nyɛwe nɔ jogbaŋŋ.’ (1 Timoteo 3:4, 5; 5:8) Ni nyɛ gbekɛbii lɛ, nyɛboa nyɛfɔlɔi atoi. (Kolosebii 3:20) Weku lɛ mli bii lɛ ateŋ mɔ ko mɔ ko yeee emuu, ejaakɛ amɛ fɛɛ amɛtɔ̃ɔ. No hewɔ lɛ, nyɛbaa nyɛhe shi, ni nyɛkɛ nyɛtɔ̃mɔi akea nyɛhe.

21. Mɛɛ gbɛkpamɔi ni yɔɔ miishɛɛ kã wɔhiɛ, ni te wɔɔfee tɛŋŋ wɔná weku shihilɛ ni miishɛɛ yɔɔ mli amrɔ nɛɛ?

²¹ Yɛ anɔkwale mli lɛ, weku shihilɛ he ŋaawoi kɛ gbɛtsɔɔmɔi babaoo ni he hiaa waa lɛ yɛ Biblia lɛ mli. Kɛfata he lɛ, etsɔɔ wɔ Nyɔŋmɔ jeŋ hee lɛ kɛ shikpɔŋ nɔ paradeiso ni Yehowa jálɔi ni yɔɔ miishɛɛ lɛ baahi mli lɛ ahe nii. (Kpojiemɔ 21:3, 4) Mɛɛ gbɛkpamɔi ni yɔɔ miishɛɛ kã wɔhiɛ nɛkɛ! Wɔbaanyɛ wɔná weku shihilɛ ni yɔɔ miishɛɛ amrɔ nɛɛ po kɛtsɔ gbɛtsɔɔmɔi ni Nyɔŋmɔ kɛha yɛ e-Wiemɔ ni ji Biblia lɛ mli lɛ kɛ nitsumɔ nɔ.