Ani mɔ ko egba bo teemɔŋ sane ko pɛŋ?— * Biblia lɛ wieɔ teemɔŋ sane ko ni yɔɔ srɔto ni atsɛɔ lɛ ‘teemɔŋ sane krɔŋkrɔŋ’ lɛ he. Eyɛ krɔŋkrɔŋ ejaakɛ ejɛ Nyɔŋmɔ ŋɔɔ. Ni eji teemɔŋ sane ejaakɛ no mli lɛ mɛi lé. Ŋwɛibɔfoi po sumɔ akɛ amɛle sane ni ji. Ani obaasumɔ ni ole teemɔŋ sane nɛɛ?​—

Be ko ni eho ni etsɛ lɛ, Nyɔŋmɔ bɔ klɛŋklɛŋ nuu kɛ yoo lɛ. Atsɛɔ nuu lɛ Adam, ni atsɛɔ yoo lɛ Hawa. Nyɔŋmɔ ha amɛ shĩa fɛfɛo ko ni atsɛɔ lɛ Eden trom. Adam kɛ Hawa bo Nyɔŋmɔ toi kulɛ, amɛ kɛ amɛbii lɛ baafee shikpɔŋ muu lɛ fɛɛ fɛfɛo tamɔ nakai trom lɛ. Ni kulɛ amɛbaahi shi yɛ Paradeiso kɛya naanɔ. Shi okaiɔ nɔ ni Adam kɛ Hawa fee lɛ?​—

Adam kɛ Hawa eyabooo Nyɔŋmɔ toi. Enɛ hewɔ lɛ, ŋmɛnɛ lɛ Paradeiso lɛ ebɔ wɔ. Shi Nyɔŋmɔ ewo shi akɛ ebaaha shikpɔŋ muu lɛ fɛɛ afee fɛo. Mɔ fɛɛ mɔ baahi shi kɛya naanɔ ni wɔmii baashɛ wɔhe. Shi mɛɛ gbɛ nɔ ebaatsɔ efee enɛ? Afii pii baho ni mɛi leee. No mli lɛ eji teemɔŋ sane.

Beni Yesu ba shikpɔŋ lɛ nɔ lɛ, eha mɛi le teemɔŋ sane nɛɛ he nii babaoo. Eha mɛi le akɛ teemɔŋ sane nɛɛ kɔɔ Nyɔŋmɔ Maŋtsɛyeli lɛ he. Yesu kɛɛ mɛi akɛ amɛsɔle ni Maŋtsɛyeli nɛɛ aba. Maŋtsɛyeli nɛɛ baaha shikpɔŋ lɛ atsɔ paradeiso ni yɔɔ fɛo.

Ani omii eshɛ ohe akɛ obale teemɔŋ sane nɛɛ?​— Kaimɔ akɛ mɛi ni boɔ Yehowa toi lɛ pɛ baahi Paradeiso. Biblia lɛ gbaa wɔ hii kɛ yei babaoo ni bo Yehowa toi lɛ ahe sane. Ani obaasumɔ ni okase amɛhe nii?​— Ha wɔkase amɛteŋ mɛi komɛi ahe sane ni wɔkwɛ bɔ ni wɔɔfee wɔtamɔ amɛ.