Yɛ afii 30 ni eho lɛ amli lɛ, mɛi babaoo etsɔɔ akɛ nibii miiya lɛ jogbaŋŋ yɛ majimaji lɛ ateŋ ejaakɛ amɛkɛ amɛhe wuuu ta. Shi nibii ni eba nyɛsɛɛ nɛɛ ehã ana akɛ susumɔ nɛɛ etsake kwraa.

•   “Mɛi babaoo miiye amɛtsui akɛ, ta ni yaa nɔ yɛ Gaza lɛ baasa maji ni bɛŋkɛ jɛmɛ niiaŋ lɛ ahe, ejaakɛ Israel kɛ Hezbollah ebɔi nɔmɔ yɛ Lebanon bɔda lɛ naa.”​—Reuters, January 6, 2024.

•   “Kui ni yɔɔ Iran shishi lɛ kɛ Iran efee ekome ni amɛmiitutua mɛi kɛmiijɛ hei srɔtoi, ni kɛfata he lɛ, Iran ebɔi nuklea okplɛmii feemɔ ekoŋŋ trukaa. Agbɛnɛ hu, Russia kɛ China miifi Iran sɛɛ bianɛ, enɛ ehã mɛi ni yɔɔ anaigbɛ maji lɛ amli lɛ awala eyaje oshãra mli.”​—The New York Times, January 7, 2024.

•   “Russia tutuamɔ lɛ miiya nɔ eefite nii waa yɛ Ukraine fɛɛ.”​—UN Adafitswaa, January 11, 2024.

•   “Bɔ ni China maŋ lɛ yaa ehiɛ yɛ shika kɛ asraafoi ahewalɛ gbɛfaŋ, kɛ bɔ ni Taiwan maŋ lɛ yaa nɔ eheɔ gbɛ́i, kɛ béi ni yaa nɔ yɛ Beijing kɛ Washington teŋ lɛ hãa wɔnaa akɛ ewaaa kwraa akɛ enɛ baanyɛ ahã ta ate shi.”​—The Japan Times, January 9, 2024.

 Ani Biblia lɛ ewie nɔ ko yɛ béi ni yaa nɔ ŋmɛnɛ yɛ majimaji lɛ ateŋ lɛ he? Ani enɛ kɛ jeŋ ta baaba?

 Biblia lɛ egbaaa ta pɔtɛɛ ko ni wɔnaa ŋmɛnɛ lɛ he sane efɔ̃ɔɔ shi. Moŋ lɛ, egba akɛ tai baaba yɛ heihei yɛ wɔbei nɛɛ amli, ni tai nɛɛ baajie “toiŋjɔlɛ kɛje shikpɔŋ lɛ nɔ.”​—Kpojiemɔ 6:4.

 Daniel wolo lɛ gba akɛ yɛ “naagbee be lɛ mli lɛ,” jeŋ hewalɛi lɛ “baashishii amɛhe,” loo amɛkɛ amɛhe baatswa kɛpele nɔyeli he. Enɛ baabi ni maji ni kɛ amɛhe tswaa lɛ kɛ asraafoi babaoo ni yɔɔ hewalɛ atsu nii, ni amɛfite “jwetrii,” loo shika babaoo hu.​—Daniel 11:40, 42, 43.

 Biblia lɛ tsɔɔ akɛ je lɛ shihilɛ lɛ mli baawo wu waa dani nibii baahi ekoŋŋ. Yesu gba akɛ “amanehulu kpeteŋkpele ni anako enɔ dã kɛjɛ je lɛ shishijee” lɛ baaba. (Mateo 24:21) Nakai “amanehulu kpeteŋkpele” lɛ baayagbe naa yɛ ta ko ni atsɛɔ lɛ Harmagedon, ni ji “Nyɔŋmɔ Ofe lɛ gbi wulu lɛ nɔ ta lɛ” mli.​—Kpojiemɔ 16:14, 16.

 Shi abaawu Harmagedon ta lɛ koni akɛhere adesai ayiwala, jeee ni akɛkpãta amɛhiɛ. Nyɔŋmɔ baatsɔ ta nɛɛ nɔ efo adesai anɔyelii fɛɛ sɛɛ, ejaakɛ nomɛi ehã awu tai babaoo ni kpãtaa nii ahiɛ lɛ. Kɛ́ ootao ona bɔ ni Harmagedon baahã aná toiŋjɔlɛ kɛya naanɔ lɛ, kanemɔ saji ni nyiɛ sɛɛ nɛɛ:

•   “Mɛni Ji Harmagedon Ta Lɛ?”

•   “Wɔkɛ Miishɛɛ Miikpa Harmagedon Ta Lɛ Gbɛ!”