Ekolɛ obaabi akɛ, ‘Kɛ́ Nyɔŋmɔ le nɔ fɛɛ nɔ, ele nɔ ni yɔɔ miyitsoŋ ni ele mihiamɔ nii lɛ, mɛni hewɔ esa akɛ masɔle?’ Sanebimɔ nɛɛ sa jogbaŋŋ. Ani Yesu ekɛɛɛ akɛ Nyɔŋmɔ ‘le nii ni hiaa wɔ dani wɔbiɔ lɛ’? (Mateo 6:8) Blema Israel Maŋtsɛ David yɔse enɛ, ni eŋma akɛ: “Wiemɔ ko wiemɔ ko bɛ mililɛi nɔ ni bo, Yehowa oleee fɛɛ.” (Lala 139:4) Kɛ́ nakai lɛ, mɛni hewɔ mɔ esa akɛ wɔsɔle wɔhã Nyɔŋmɔ? Bɔ ni afee ni wɔnyɛ wɔhã sanebimɔ nɛɛ hetoo lɛ, hã wɔsusu nɔ ni Biblia lɛ kɛɔ yɛ Nyɔŋmɔ tsuji asɔlemɔi ahe. *

Eyɛ mli akɛ Biblia lɛ kɛɔ akɛ Yehowa * Nyɔŋmɔ le nɔ fɛɛ nɔ moŋ, shi ehãa wɔleɔ hu akɛ etsuji lɛ ahe sane ni eeele kɛkɛ lɛ, jeee no ji nɔ titri ni he hiaa lɛ. (Lala 139:6; Romabii 11:33) Yehowa kɛ etsuji fɛɛ ahe sane toɔ ejwɛŋmɔŋ, ni enɛ jeee nɔ ko kwraa kɛhã lɛ. Shi ekɛ saji nɛɛ etooo ejwɛŋmɔŋ kɛkɛ tamɔ bɔ ni akɛ saji toɔ kɔmpiuta nɔ lɛ. Yɛ anɔkwale mli lɛ, nɔ titri ni Nyɔŋmɔ miisumɔ ni ele ji nibii ni yɔɔ wɔtsuiŋ, ejaakɛ eetao ni wɔbɛŋkɛ lɛ kpaakpa. (Lala 139:23, 24; Yakobo 4:8) Enɛ hewɔ lɛ, Yesu wo esɛɛnyiɛlɔi lɛ hewalɛ ni amɛsɔle eyɛ mli akɛ e-Tsɛ lɛ le nibii fɛɛ ni he hiaa wɔ lɛ. (Mateo 6:6-8) Kɛ́ wɔkɛ wɔ-Bɔlɔ lɛ gba sane yɛ sɔlemɔ mli kpitiokpitio lɛ, wɔbaatsi wɔbɛŋkɛ lɛ kpaakpa.

Bei komɛi lɛ, wɔnaaa nɔ pɔtɛ̃ɛ ni esa akɛ wɔsɔle wɔbi. Kɛ́ ebalɛ nakai lɛ, nilee ni mli kwɔ ni Nyɔŋmɔ yɔɔ lɛ hãa enaa nɔ pɔtɛ̃ɛ ni he hiaa wɔ lɛ ni etsuɔ he nii, tsɛ wɔbiko lɛ. (Romabii 8:26, 27; Efesobii 3:20) Nyɔŋmɔ yeɔ ebuaa wɔ, ni bei komɛi po lɛ, efeɔ nakai yɛ gbɛi ni ekolɛ wɔjwɛŋmɔ kɔŋ sɛɛ amrɔ nɔŋŋ lɛ anɔ. Kɛ́ wɔna enɛ lɛ, ehãa wɔnuɔ he akɛ wɔbɛŋkɛ lɛ kpaakpa.

Biblia lɛ maa nɔ mi ehãa wɔ akɛ, Nyɔŋmɔ Ofe lɛ hãa etsuji anɔkwafoi lɛ asɔlemɔi ahetoo, shi etsɔɔ nɔ hewɔ ni ebooo sɔlemɔi komɛi atoi lɛ hu. Akɛ nɔkwɛmɔnɔ lɛ, be ni awuiyeli he shi waa yɛ blema Israel lɛ, Nyɔŋmɔ fã gbalɔ Yesaia ni ekɛɛ amɛ akɛ: “Kɛ́ nyɛsɔle babaoo tete lɛ, miboŋ nyɛ toi: nyɛniji ahe eyimɔ kɛ lá!” (Yesaia 1:15) No hewɔ lɛ, eyɛ faŋŋ akɛ, Nyɔŋmɔ booo mɛi ni ebuuu emlai lɛ loo mɛi ni ehiɛɛɛ jwɛŋmɔ kpakpa lɛ asɔlemɔi atoi.—Abɛi 28:9; Yakobo 4:3.

Nɔ ni tamɔɔɔ nakai lɛ, Biblia lɛ kɛɔ akɛ: “Kɛji wɔba nɔ ko yɛ esuɔmɔ naa lɛ, eboɔ wɔ toi.” (1 Yohane 5:14) Ani enɛ tsɔɔ akɛ, belɛ, Nyɔŋmɔ hãa etsuji nɔ fɛɛ nɔ ni amɛbiɔ lɛ lɛ kɛkɛ? Dabi, etsɔɔɔ nakai. Susumɔ bɔfo Paulo shihilɛ lɛ he okwɛ. Ekpa Nyɔŋmɔ fai shii etɛ akɛ ejie naagba ko ni tamɔ ‘ŋmei yɛ eheloo mli’ lɛ ehã lɛ. (2 Korintobii 12:7, 8) Eeenyɛ efee akɛ, no mli lɛ Paulo miiye hiŋmɛii hela ko ni ehiii tsamɔ. Kwɛ bɔ ni enɛ baasũ etsui ahã! Ahã Paulo hewalɛ ni ekɛtsa mɛi, ni enyɛ etee mɔ ko shi kɛjɛ gbele mli po, shi enyɛɛɛ etsa lɛ diɛŋtsɛ ehela lɛ. (Bɔfoi lɛ Asaji 19:11, 12; 20:9, 10) Eyɛ mli akɛ Nyɔŋmɔ hãaa Paulo sɔlemɔi lɛ ahetoo yɛ gbɛ ni etaoɔ lɛ nɔ moŋ, shi Paulo hiɛ sɔ yelikɛbuamɔ ni Nyɔŋmɔ kɛhã lɛ lɛ ni ekpɛlɛ nɔ.—2 Korintobii 12:9, 10.

Nyɔŋmɔ hã mɛi komɛi ni awie amɛhe yɛ Biblia lɛ mli lɛ asɔlemɔi ahetoo yɛ naakpɛɛ gbɛ nɔ. (2 Maŋtsɛmɛi 20:1-7) Shi yɛ nakai beaŋ po lɛ, eyɛ mli aahu shi kome dani efeɔ nakai. Nyɔŋmɔ tsuji komɛi ye amɛtsui waa be ni efee tamɔ nɔ ni Nyɔŋmɔ hãko amɛsɔlemɔi lɛ ahetoo. Maŋtsɛ David bi akɛ: “Yehowa, mɛɛ beyinɔ po okɛ ohiɛ aaatee mi kɛyashi?” (Lala 13:2) Shi be ni David ni ji nuu anɔkwafo lɛ bana akɛ Yehowa eye ebua lɛ shii abɔ lɛ, ekɛ ehiɛ fɔ̃ Nyɔŋmɔ nɔ ekoŋŋ. David wie yɛ nakai sɔlemɔ lɛ nɔŋŋ mli akɛ: “Shi mi lɛ, omɔbɔnalɛ nɔ mihiɛ kã.” (Lala 13:6) Ekolɛ ehe baahia ni Nyɔŋmɔ tsuji ni yɔɔ ŋmɛnɛ lɛ ahiɛ sɔlemɔ mli daa tamɔ bɔ ni David fee lɛ, kɛyashi beyinɔ ni amɛbaayoo akɛ Nyɔŋmɔ ehã amɛsɔlemɔi lɛ ahetoo.—Romabii 12:12.

Nyɔŋmɔ hãa wɔ nibii ni he hiaa wɔ lɛɛlɛŋ lɛ.

Jeee be fɛɛ be fɔlɔi ni yɔɔ suɔmɔ lɛ hãa amɛbii nibii ni amɛbiɔ amɛ lɛ yɛ be ni amɛbaabi lɛ mli nɔŋŋ, ni eja gbɛ akɛ amɛaafee nakai. Nakai nɔŋŋ Nyɔŋmɔ hu feɔ; ekolɛ ehaŋ wɔsɔlemɔi lɛ ahetoo yɛ be kɛ gbɛ ni wɔkpaa gbɛ lɛ nɔ. Shi wɔbaanyɛ wɔkɛ wɔhiɛ afɔ̃ wɔ-Bɔlɔ lɛ nɔ akɛ ebaatsɔ gbɛ ni sa nɔ ehã wɔ nibii ni he hiaa wɔ lɛɛlɛŋ lɛ yɛ be ni sa mli, taakɛ tsɛ kpakpa feɔ ehãa ebii lɛ.—Luka 11:11-13.

Ekolɛ Nyɔŋmɔ baahã wɔsɔlemɔi lɛ ahetoo, shi wɔnaŋ amrɔ nɔŋŋ.

Ni kɛ́ wɔsɔle ni Nyɔŋmɔ ajie wɔ kɛjɛ naagba ko ni miisũ wɔtsui amrɔ nɛɛ mli hu? Ani wɔbaamu sane naa akɛ akɛni Yehowa tsɔko naakpɛɛ gbɛ nɔ ehãko wɔsɔlemɔi lɛ ahetoo hewɔ lɛ, etsuko nɔ ko kwraa yɛ he? Nɔ najiaŋ ni wɔɔmu sane naa nakai lɛ, esa akɛ wɔkwɛ kɛji Nyɔŋmɔ etsɔ gbɛ kroko ko nɔ ehã wɔsɔlemɔi lɛ ahetoo. Akɛ nɔkwɛmɔnɔ lɛ, ekolɛ wɔnaanyo ko ni susuɔ wɔhe waa lɛ fee nɔ ko kɛye ebua wɔ be ni yelikɛbuamɔ he ehia wɔ lɛ. (Abɛi 17:17) Ani eeenyɛ efee akɛ Yehowa ji mɔ ni hã eye ebua wɔ lɛ? Kɛfata he lɛ, ekolɛ Nyɔŋmɔ baatsɔ nibii ni aŋmala yɛ Biblia lɛ mli lɛ anɔ ehã wɔsɔlemɔi lɛ ahetoo. Saji ni yɔɔ Biblia lɛ mli lɛ baanyɛ ahã wɔná sɛɛyoomɔ ni wɔkɛkpee shihilɛ ko ni jaraa lɛ naa.—2 Timoteo 3:16, 17.

Bei pii lɛ, yɛ nɔ najiaŋ ni Nyɔŋmɔ aaajie naagba ko ni haoɔ wɔ lɛ kɛjɛ wɔnɔ lɛ, ehãa wɔ nyɛmɔ ni wɔkɛkpee naa. (2 Korintobii 4:7) Akɛ nɔkwɛmɔnɔ lɛ, be ni Yesu kpa e-Tsɛ lɛ fai akɛ ejie lɛ kɛjɛ kaa ko ni baanyɛ ahã agbe Nyɔŋmɔ gbɛ́i lɛ he guɔ lɛ mli lɛ, Yehowa tsu bɔfo ko ni ebawo e-Bi lɛ hewalɛ. (Luka 22:42, 43) Nakai nɔŋŋ Nyɔŋmɔ baanyɛ etsɔ wɔnaanyo kpaakpa ko nɔ ewo wɔ hewalɛ be mli ni hewalɛwoo he miihia wɔ. (Abɛi 12:25) Akɛni ewa akɛ aaayɔse gbɛ nɛɛ ni Nyɔŋmɔ tsɔɔ nɔ ehãa wɔsɔlemɔi ahetoo lɛ hewɔ lɛ, ehe baahia ni wɔkɛ wɔhiɛ afɔ̃ shi dani wɔbaana.

Nyɔŋmɔ baahã wɔsɔlemɔi lɛ ahetoo yɛ be ni sa mli.

Biblia lɛ kɛɔ akɛ, Nyɔŋmɔ Ofe lɛ naa mɛi ni baa amɛhe shi lɛ mɔbɔ “yɛ be ni sa mli.” (1 Petro 5:6) No hewɔ lɛ, kɛ́ wɔjɛ wɔtsuiŋ wɔsɔle wɔbi nɔ ko, ni efee tamɔ nɔ ni nii lɛ sɛɛ miigbala shi lɛ, esaaa akɛ wɔmuɔ sane naa akɛ Yehowa susuuu wɔhe. Akɛni nilee ni wɔ-Bɔlɔ ni sumɔɔ wɔ lɛ yɔɔ lɛ mli kwɔ kwraa fe wɔnɔ lɛ hewɔ lɛ, ele nɔ ni hi kɛhã wɔ, ni ekã shi faŋŋ akɛ no nɔ edamɔɔ etsuɔ wɔnibimɔi lɛ ahe nii.

Naa nɔkwɛmɔnɔ ko: Ŋɔɔ lɛ akɛ oyɛ binuu ko ni kɛɛ oyahe okɔokpe ohã lɛ. Ani obaahe ohã lɛ kɛkɛ ni osusuuu he fioo po? Kɛ́ ona akɛ eshɛko mɔ ni baanyɛ ata okɔokpe lɛ, ekolɛ oheŋ ohaŋ lɛ bianɛ. Kɛ̃lɛ, fee sɛɛ, be ni agbɛnɛ eshɛ mɔ ni baanyɛ ata okɔokpe lɛ, ekolɛ obaahe ohã lɛ. Nakai nɔŋŋ Nyɔŋmɔ baahã wɔ ‘nii ni wɔtsui taoɔ lɛ’ yɛ be ni sa mli kɛ́ wɔtee nɔ wɔsɔle yɛ he.—Lala 37:4.

Biblia lɛ woɔ anɔkwa Kristofoi hewalɛ akɛ, amɛkabu sɔlemɔ akɛ nɔ ko fɛlɛfɛlɛ. Shi mɛi komɛi baakɛɛ akɛ, ‘Enɛ lɛ ekɛɛmɔ waaa tamɔ efeemɔ.’ Anɔkwale, kɛ́ naagba ko kɛ wɔ miiwuwua shi loo aaye wɔ sane ko ni ejaaa lɛ, ekolɛ ebaawa kɛhã wɔ akɛ wɔɔmɛ ni Nyɔŋmɔ ahã wɔsɔlemɔi lɛ ahetoo. Shi esa akɛ wɔkai akɛ Yesu wo wɔ hewalɛ ni wɔsɔle daa ni wɔkafɔ̃ɔ.

 Yesu bu abɛ ko ni kɔɔ yoo okulafo ohiafo ko he. Yoo nɛɛ tee kojolɔ ko ni yeee jalɛsane lɛ ŋɔɔ shii abɔ koni efã ehe. (Luka 18:1-3) Eyɛ mli akɛ shishijee mli lɛ kojolɔ lɛ kpoo akɛ eeeye ebua lɛ moŋ, shi sɛɛ mli lɛ ekɛɛ yɛ eyiŋ akɛ: “Mafã ehe, koni, be ni yi aaayawula shi lɛ, ekaba ni ebashwie mihiɛ ma.” (Luka 18:4, 5) Nɔ ni wiemɔ ni ji “ekaba ni ebashwie mihiɛ ma” ni kojolɔ lɛ kɛtsu nii lɛ tsɔɔ diɛŋtsɛ ji ni “ekaba ni ebagbe mihe guɔ.” * Kɛ́ kojolɔ ni yeee jalɛsane nɛɛ ye ebua yoo okulafo ohiafo lɛ akɛni eeshe gbeyei akɛ abaagbe ehe guɔ hewɔ lɛ, enyiɛ nɔŋŋ ni Nyɔŋmɔ ni sumɔɔ wɔ lɛ yeŋ mɛi ni “bolɔɔ tsɛ́ɔ lɛ shwane kɛ nyɔɔŋ lɛ” asane ehaŋ amɛ! Taakɛ Yesu kɛɛ lɛ, Nyɔŋmɔ ‘baafã amɛhe oya.’—Luka 18:6-8.

Bei komɛi lɛ, wɔbaasɔle wɔbi Yehowa nɔ ko aahu, shi esaaa akɛ wɔnijiaŋ jeɔ wui. Kɛ́ wɔkã he wɔsɔle lɛ, no baatsɔɔ akɛ wɔmiishwe waa ni Nyɔŋmɔ aye abua wɔ. Agbɛnɛ hu lɛ, no baahã wɔkɛ wɔhiɛ afɔ̃ shi koni wɔyɔse gbɛi ni Nyɔŋmɔ tsɔɔ nɔ ehãa wɔsɔlemɔi lɛ ahetoo, ni enɛ baahã wɔtsi wɔbɛŋkɛ lɛ kpaakpa. Wɔyɛ nɔmimaa akɛ Yehowa baahã wɔsɔlemɔi ni sa lɛ ahetoo kɛ́ wɔtee nɔ wɔbi yɛ hemɔkɛyeli mli.—Luka 11:9.