Afɔ mi awo akutso ko ni atsɛɔ lɛ Bilbao, ni yɔɔ Spain kooyigbɛ lɛ mli, mɛi ni yɔɔ jɛmɛ lɛ bɛ lɛ butuu tsɔ. Mi ji bi ni ji enyɔ nɔ yɛ bii ejwɛ ateŋ. Wɔweku lɛ kɛ Katolik jamɔ shwɛɛɛ kwraa, ni miyaa Mass daa gbi. Beni miye afii 23 lɛ, mibatsɔ tsɔɔlɔ—nitsumɔ ko ni kã mitsui nɔ waa ni mikɛ afii 40 sɔŋŋ tsu. Nibii ni mitsɔɔ lɛ ateŋ nɔ ni minya he titri ji Katolik jamɔŋ tsɔɔmɔi, ni daa gbɛkɛ lɛ mitsɔɔ oblayei ni baaye amɛ klɛŋklɛŋ nuŋtsɔ lɛ niyenii lɛ anii.

Beni mikɛ miwu ehi shi kɛ miishɛɛ afii 12 lɛ, ebagbo trukaa ni eshi wɔbiyei ejwɛ lɛ akwɛmɔ efɔ mi nɔ. No mli lɛ miye afii 33 pɛ! Mibɔ mɔdɛŋ akɛ mikɛ mihiɛ afɔ Katolik jamɔ lɛ nɔ kɛha miishɛjemɔ, shi sanebimɔi komɛi tee nɔ egba minaa. Mibi mihe akɛ: ‘Kɛ́ Kristo gbo kɛkpɔ̃ wɔ lɛ, mɛni hewɔ mɔ adesai yaa nɔ amɛgboiɔ? Kɛ́ mɛi kpakpai yaa ŋwɛi lɛ, mɛni hewɔ mɔ ni wɔsɔleɔ koni Nyɔŋmɔ Maŋtsɛyeli lɛ aba lɛ?’ Nɔ ni gba minaa fe fɛɛ ji: ‘Kɛ́ wɔgbo nɔŋŋ ni Nyɔŋmɔ kojoɔ wɔ lɛ, mɛni hewɔ sɛɛ mli lɛ ehe baahia ni wɔshi ŋwɛi, hetsuumɔhe, loo hɛl kɛba kɛha naagbee kojomɔ?’

Mikɛ sanebimɔi nɛɛ fɔ̃ osɔfoi komɛi ni mikɛkpe lɛ ahiɛ. Amɛteŋ mɔ kome ha hetoo akɛ: “Mileee. Yaabi osɔfonukpa lɛ. Ani enɛ he miihia kwraa po? Bɛ oheɔ Nyɔŋmɔ nɔ oyeɔ, aloo jeee nakai? No kɛkɛ fa!” Shi mikpaaa sanebimɔi nɛɛ ahetoo taomɔ. Sɛɛ mli lɛ, miyabo wiemɔi ni Katolik Osɔfoi komɛi, Pentekoste Tsɔɔlɔi, kɛ kuu ko (Gnostics) ha lɛ atoi. Kɛlɛ amɛteŋ mɔ kome flo po nyɛɛɛ aha misanebimɔi lɛ ahetoo bɔ ni mitsui baanyɔ mimli.

Beni miyɔɔ afi 60 afiiaŋ lɛ, skul gbekɛ ko ni eye afii kpawo fɔ̃ mi nine kɛtee Yehowa Odasefoi akpee ko. Nibii ni mina kɛ saji ni minu lɛ ha mimii shɛ mihe waa, shi akɛni mibɛ deka kwraa hewɔ lɛ, miyanyɛɛɛ mikɛ Odasefoi lɛ ayanɔ ashara yɛ no beaŋ. Afii enyɔ sɛɛ lɛ, Odasefonyo ko ni atsɛɔ lɛ Juan kɛ eŋa Maite batswa mishinaa lɛ. Mibiɔ lɛ saji ni ehaa mi hetoo, enɛ tee nɔ nyɔji etɛ sɔŋŋ, ni naagbee lɛ ekɛ mi bɔi Biblia mli nikasemɔ feemɔ.

 Mikɛ miishɛɛ kpa nikasemɔ lɛ eko fɛɛ eko gbɛ. Mikɛ Biblia shishitsɔɔmɔi srɔtoi etɛ pɛi nibii amli fitsofitso kɛkwɛ akɛ nɔ ni Yehowa Odasefoi lɛ tsɔɔ lɛ, anɔkwale ni lo. Etsɛɛɛ kɛkɛ ni mibayɔse akɛ, asomoaŋ jamɔ efutu miyiŋ afii nyɔŋmai komɛi. Beni mibana srɔtofeemɔ agbo ni kã nɔ ni mikase yɛ Biblia lɛ mli, kɛ mitsutsu hemɔkɛyeli lɛ teŋ lɛ, mihao waa. Mibanu he tamɔ akɛ misɛɛ esa shi, oookɛɛ aafã mitsutsu hemɔkɛyeli ni tamɔ tso ko ni shishifã ehe shi lɛ ashɛ afɔ̃.

No sɛɛ lɛ, miwu ni ji enyɔ nɔ lɛ he baye waa ni egbo. Nakai beaŋ nɔŋŋ lɛ, mikpa nitsumɔ ni mitsuɔ lɛ, ni mishi Bilbao, he ni miyɔɔ lɛ daŋ. Juan kɛ Maite hu shi jɛmɛ. Dɔlɛ sane ji akɛ, mikpa Biblia lɛ kasemɔ. Kɛlɛ, yɛ mitsuiŋ tɔŋŋ lɛ, mile akɛ miná jwetri ko. Mihiɛ kpaaa nɔ gbi ko gbi ko.

Aaafee afii 20 sɛɛ be ni miye afii 82 lɛ, Juan kɛ Maite ku amɛsɛɛ amɛba Bilbao, ni amɛba sara mi. Mimii shɛ mihe pam akɛ mina amɛ ekoŋŋ! Mibayɔse akɛ, asomoaŋ Yehowa hiɛ kpako minɔ, no hewɔ lɛ mibɔi Biblia lɛ kasemɔ ekoŋŋ. Juan kɛ Maite to amɛtsui shi waa amɛha mi, akɛni efɔɔ kaa akɛ mibiɔ sane kometoo lɛ nɔŋŋ shii abɔ lɛ hewɔ. Ehe bahia ni manu Biblia mli saji otii komɛi ashishi jogbaŋŋ shii abɔ bɔni afee ni manyɛ mikɛ mitsutsu hemɔkɛyeli lɛ afo tako mli kwraa. Kɛfata he lɛ, no mli lɛ miitao male Biblia mli anɔkwalei lɛ jogbaŋŋ koni manyɛ magbala mli matsɔɔ minanemɛi kɛ miweku lɛ.

Gbi ni abaptisi mi—beni miye afii 87—lɛ ji be ni mimii shɛ mihe fe fɛɛ yɛ mishihilɛ mli. Abaptisi mi yɛ Yehowa Odasefoi akpee ko ni afee lɛ shishi. Yehowa Odasefonyo ko ni eji asafoŋ onukpa jɛ Biblia lɛ mli eha wiemɔ; ni aje gbɛ ato wiemɔ lɛ he gbɛjianɔ kɛha wɔ mɛi ni abaabaptisi wɔ lɛ. Wiemɔ lɛ ha mifó. Mibo toi jogbaŋŋ oookɛɛ Yehowa kɛ mi miiwie tɛɛ. Beni abaptisi mi agbe naa lɛ, Yehowa Odasefoi pii ba mimasɛi ni amɛbajuro mi—tsɛ amɛteŋ mɛi saŋŋ kɛ mi ekpeko pɛŋ.

No beaŋ fɛɛ lɛ, mile akɛ Yesu Kristo ji “gbɛ lɛ.” (Yohane 14:6) Shi mi-Biblia kasemɔ lɛ ye ebua mi ni mibale Yehowa, mɔ ni atsɔɔ Yesu nɔ kɛyaa eŋɔɔ lɛ. Amrɔ nɛɛ manyɛ mikɛ Nyɔŋmɔ awie yɛ sɔlemɔŋ tamɔ mi-Tsɛ kɛ Naanyo. Beni mikane wolo ni ji Tsi Obɛŋkɛ Yehowa * lɛ, ená mishihilɛ nɔ hewalɛ waa. Beni miyɔse bɔ ni Yehowa naa mɔ mɔbɔ ehaa lɛ, eta mitsuiŋ waa.

Kɛ́ mikwɛ be kplaŋŋ ni ehe mi dani mibana anɔkwa jamɔ lɛ, Yesu wiemɔi nɛɛ baa mijwɛŋmɔŋ, no ji: “Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele aha nyɛ.” (Mateo 7:7) Amrɔ nɛɛ ni mibaná hetoi ni mikpa gbɛ afii saŋŋ nɛ lɛ, mináa he miishɛɛ waa akɛ maha mɛi krokomɛi hu ale.

Amrɔ nɛɛ, miye afii 90, shi nibii babaoo yɛ lolo ni makase yɛ Yehowa he. Kpee fɛɛ kpee ni maya yɛ Maŋtsɛyeli Asa lɛ nɔ lɛ bafeɔ be krɛdɛɛ ko kɛhaa mi—ejaakɛ mikaseɔ nibii kpakpai babaoo, ni mikɛ minyɛmimɛi hii kɛ yei lɛ sharaa kɛ miishɛɛ. Mishwelɛ ji masaa matsɔ tsɔɔlɔ yɛ Paradeiso ni baaba shikpɔŋ nɛɛ nɔ lɛ mli. (Kpojiemɔ 21:3, 4) Nɔ ni mikpaa gbɛ titri ji ní mana akɛ atee misuɔlɔi ni gboi lɛ ashi kɛba wala mli ekoŋŋ koni maná hegbɛ matsɔɔ amɛ Biblia mli anɔkwalei lɛ. (Bɔfoi lɛ Asaji 24:15) Kwɛ bɔ ni mishweɔ waa akɛ maha amɛle nikeenii ni nɔ bɛ kwraa ni Yehowa kɛha mi yɛ migbɔlɛ beaŋ!