SANEYITSO LƐ MLITSƆƆMƆ | MƐNI HE BIBLIA LƐ WIEƆ?
Sane Kpakpa Kɛha Adesai Fɛɛ
Yesu shitee lɛ ha ekaselɔi ná hekɛnɔfɔ̃ɔ kɛ ekãa kpele. Bɔfo Paulo titri fa gbɛ kɛkpa Asia Bibioo lɛ kɛ Mediteranea niiaŋ fɛɛ kɛto asafoi ahe gbɛjianɔ, ni ewaje Kristofoi ni yɔɔ jɛmɛ lɛ koni amɛnyɛ amɛkpee jeŋba he kai kɛ shiteekɛwoi ni amɛkɛ baakpe lɛ anaa. Yɛ naagbai nɛɛ fɛɛ sɛɛ lɛ, mɛi babaoo batsɔmɔ Kristofoi.
Sɛɛ mli lɛ, awo Paulo diɛŋtsɛ po tsuŋ. Kɛlɛ, beni eyɔɔ tsuŋwoo he lɛ po lɛ, eŋmala woji ni ekɛmaje Kristofoi asafoi lɛ koni ekɛwo amɛ hewalɛ ni ekɛwo amɛŋaa hu. Ebɔ amɛ kɔkɔ po yɛ naagba wulu ko ni faŋ nɔ ni amɛkɛkpeɔ lɛ he—hemɔkɛyeli kwamɔ. Yɛ Nyɔŋmɔ mumɔ krɔŋkrɔŋ lɛ gbɛtsɔɔmɔ naa lɛ, Paulo tsɔ hiɛ ena akɛ “klaji fulɔi” ni wieɔ “nii ni ejaaa” baabote amɛteŋ, ni “amɛaakpala kaselɔi lɛ amɛshwie amɛsɛɛ.”—Bɔfoi lɛ Asaji 20:29, 30.
Beni shɛɔ klɛŋklɛŋ afi oha lɛ naagbee lɛ, no mli lɛ hemɔkɛyeli kwamɔ lɛ eje shishi momo. Aaafee no beaŋ ni Yesu ni atee lɛ shi lɛ jie Ninaa ko ni damɔ shi kɛha nibii ni baaba wɔsɛɛ lɛ kpo etsɔɔ bɔfo Yohane. Taakɛ Yohane ŋma yɛ no beaŋ lɛ, shiteekɛwolɔi lɛ jio apasa tsɔɔlɔi lɛ jio, amɛteŋ mɔ ko kwraa nyɛŋ atsĩ Nyɔŋmɔ naa koni ekanyɛ etsu eshishijee yiŋtoo kɛha shikpɔŋ lɛ kɛ adesai lɛ he nii. Gbɔmɛi ni jɛ “jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ” nɔ lɛ baanu Nyɔŋmɔ Maŋtsɛyeli lɛ he sane kpakpa lɛ. (Kpojiemɔ 14:6) Abaaku sɛɛ akɛ Paradeiso aba shikpɔŋ lɛ nɔ ekoŋŋ, ni mɔ fɛɛ mɔ ni sumɔɔ ni efee Nyɔŋmɔ suɔmɔnaa nii lɛ baanyɛ aná mli gbɛfaŋnɔ!
Aso enɛ jeee “sane kpakpa” kɛha bo? Kɛ́ nakai lɛ, kanemɔ saji krokomɛi ni Nyɔŋmɔ yɔɔ kɛha adesai ni jeɔ kpo yɛ Biblia lɛ mli lɛ koni ole bɔ ni obaafee oná he sɛɛ ŋmɛnɛ kɛ wɔsɛɛ fɛɛ.
Obaanyɛ okane Biblia lɛ yɛ Intanɛt lɛ nɔ yɛ www.isa4310.com. Kɛ́ otee Wɛb saiti nɛɛ nɔ lɛ, obaaná woji ni ji Sanekpakpa ni Jɛ Nyɔŋmɔ Ŋɔɔ!, Mɛni Biblia lɛ Tsɔɔ Diɛŋtsɛ?, kɛ woji krokomɛi hu yɛ owiemɔ mli ni tsɔɔ nɔ hewɔ ni wɔbaanyɛ wɔkɛ wɔhe afɔ̃ Biblia lɛ nɔ, kɛ bɔ ni wɔbaafee wɔkɛ Biblia mli ŋaawoi atsu nii yɛ wɔweku lɛ kɛ wɔ diɛŋtsɛ wɔshihilɛ mli. Aloo obaanyɛ obi Yehowa Odasefoi lɛ kɛha saji krokomɛi ni tamɔ nɛkɛ.
