“Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:44.

Nyɔŋmɔ Maŋtsɛyeli lɛ ji ŋwɛi nɔyeli. Enɔyelɔ ni ahala, ni ji Yesu Kristo lɛ baaye adesai anɔyelii fɛɛ anajiaŋ, ni ebaakwɛ koni afee Nyɔŋmɔ suɔmɔnaa nii yɛ shikpɔŋ nɛɛ nɔ taakɛ afeɔ yɛ ŋwɛi lɛ. (Mateo 6:9, 10) Adesa nɔyeli ko kwraa ebayeŋ nɔyeli nɛɛ najiaŋ, ejaakɛ eji “Nuŋtsɔ kɛ yiwalaherelɔ Yesu Kristo naanɔ maŋtsɛyeli.” Ebaakwɛ koni aná toiŋjɔlɛ ni sɛɛ efooo.—2 Petro 1:11.

“Satan diɛŋtsɛ tsakeɔ ehe etsɔɔ la bɔfo; no hewɔ lɛ kɛ́ esɔɔlɔi lɛ hu tsakeɔ amɛhe feɔ tamɔ jalɛ sɔɔlɔi lɛ, ejeee nɔ ko wulu ko; amɛ lɛ amɛnaagbee baafee bɔ ni amɛnitsumɔi lɛ yɔɔ lɛ.”—2 Korintobii 11:14, 15.

Abaakpa apasa jamɔ he mama koni ana akɛ eji Abonsam nitsumɔ, ni abaajie lɛ yɛ shihilɛ mli kwraa. Hetsɛ̃ kɛ lashishwiemɔ ni jamɔi kɛbaa lɛ fɛɛ sɛɛ baafo. Enɛ baaha mɛi ni sumɔɔ “anɔkwa Nyɔŋmɔ hiɛkãlɔ lɛ” aná hegbɛ amɛkɛ “hemɔkɛyeli kome” asɔmɔ lɛ yɛ “mumɔ kɛ anɔkwale mli.” Mɛɛ toiŋjɔlɛ kɛ ekomefeemɔ po enɛ kɛbaaba nɛkɛ!—1 Tesalonikabii 1:9; Efesobii 4:5; Yohane 4:23.

“Nyɔŋmɔ diɛŋtsɛ kɛ amɛ aaahi shi. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

Yehowa Nyɔŋmɔ baatsɔ e-Bi, Yesu ni kɛ ewala ha yɛ adesai ahewɔ lɛ nɔ, eha enɛ aba mli. (Yohane  3:16) Yɛ Yesu nɔyeli shishi lɛ, akɛ adesai baaba emuuyeli mli. Nɔnaa ko ehiŋ shi dɔŋŋ, ejaakɛ “Nyɔŋmɔ diɛŋtsɛ kɛ amɛ aaahi shi” ni eeetsumɔ “amɛhiɛaŋ yaafonui fɛɛ.” Etsɛŋ ni emuu ni adesai yeee kɛ nɔnaa fɛɛ baaho aya; “jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

“[Yesu Kristo] mɔ drako lɛ, blema onufu lɛ ni ji diabolo (abonsam) kɛ satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa, koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa; ni no sɛɛ lɛ ja afɛ̃ne lɛ be fioo ko.”—Kpojiemɔ 20:2, 3.

Kɛ́ afimɔ Satan kɛ daimonioi lɛ, ni aŋɔ amɛ awo “bu kwɔŋkwɔŋ lɛ” mli, ni ji shihilɛ ni amɛnyɛŋ nɔ ko kwraa amɛfee yɛ mli lɛ, Satan nifeemɔi lɛ fɛɛ sɛɛ baafo. Amɛnyɛŋ amɛkɛ amɛhewalɛ gbonyo lɛ akudɔ adesai anifeemɔi dɔŋŋ. Kwɛ bɔ ni wɔtsui baanyɔ wɔmli aha akɛ wɔbaahi jeŋ ko ni Satan kɛ mumɔi fɔji lɛ bɛ nɔ hewalɛ dɔŋŋ lɛ mli!

“Naagbee gbii lɛ” baaba enaagbee kɛ nɔ ni Yesu tsɛ lɛ akɛ “amanehulu babaoo” loo amanehulu kpeteŋkpele lɛ. Ekɛɛ akɛ: “No be lɛ mli lɛ amanehulu babaoo aaaba, ní anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.”—Mateo 24:21.

Ebaafee amanehulu kpeteŋkpele kɛ shishinumɔ akɛ haomɔi ni eko bako daŋ baaba. Enɛ baaba naagbee kɛ “Nyɔŋmɔ Ofe lɛ gbi wulu lɛ nɔ ta” ni ale lɛ jogbaŋŋ akɛ “Harmagedon” lɛ.—Kpojiemɔ 16:14, 16.

Gbɔmɛi ni yɔɔ je lɛŋ he fɛɛ he ni sumɔɔ jalɛnifeemɔ lɛ miikpa nibii agbɛjianɔtoo fɔŋ nɛɛ naagbee gbɛ. Bo lɛ susumɔ jɔɔmɔi ni mɛɔ amɛ yɛ Nyɔŋmɔ Maŋtsɛyeli lɛ shishi lɛ fioo komɛi ahe okwɛ.

Abaabaa “asafo babaoo” ko yi kɛya toiŋjɔlɛ jeŋ hee ko mli: Nyɔŋmɔ Wiemɔ lɛ kɛɔ akɛ “asafo babaoo” ko baaje “amanehulu kpeteŋkpele lɛ mli,” ni abaabaa amɛyi kɛya jalɛ jeŋ hee ko mli. (Kpojiemɔ 7:9, 10, 14; 2 Petro 3:13) Amɛbaakɛɛ akɛ amɛyibaamɔ lɛ jɛ Yesu Kristo, “Nyɔŋmɔ toobi lɛ ni wóɔ je lɛ he esha lɛ kɛyaa lɛ.”—Yohane 1:29.

Abaaná Nyɔŋmɔ tsɔsemɔ he sɛɛ babaoo: Yɛ jeŋ hee lɛ mli lɛ, “shikpɔŋ lɛ nɔ aaayi obɔ kɛ Yehowa he nilee.” (Yesaia 11:9) Nɔ ni baafata tsɔsemɔ ni Nyɔŋmɔ kɛbaaha lɛ he ji bɔ ni akɛ gbɔmɛi kɛ adebɔɔ nii krokomɛi fɛɛ baahi shi yɛ toiŋjɔlɛ mli aha. Nyɔŋmɔ ewo shi akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.”—Yesaia 48:17.

Abaatee suɔlɔi ni egboi lɛ ashi kɛjɛ gbohii abui amli: Beni Yesu yɔɔ shikpɔŋ lɛ nɔ lɛ, etee enaanyo Lazaro shi kɛjɛ gbohii ateŋ. (Yohane 11:1, 5, 38-44) No hewɔ lɛ, ekɛ no tsɔɔ akɛ, ebaafee nɔ ni fe nakai po yɛ Nyɔŋmɔ Maŋtsɛyeli lɛ shishi.—Yohane 5:28, 29.

Toiŋjɔlɛ kɛ jalɛnifeemɔ baahi shi kɛya naanɔ: Yɛ Kristo nɔyeli lɛ shishi lɛ, abaajie mlakwamɔ yɛ shihilɛ mli. Te wɔfeɔ tɛŋŋ wɔleɔ? Wɔleɔ enɛ, ejaakɛ Yesu nyɛɔ enaa mɛi atsuiŋ, ni ekɛ nakai nyɛmɔ lɛ baatsu nii kɛkojo jalɔi kɛ efɔŋfeelɔi lɛ. Aŋmɛŋ mɛi ni ekpɛlɛɛɛ akɛ amɛbaatsake amɛgbɛ fɔŋ lɛ gbɛ koni amɛhi Nyɔŋmɔ jeŋ hee lɛ mli.—Lala 37:9, 10; Yesaia 11:3, 4; 65:20; Mateo 9:4.

Biblia gbalɛi babaoo ni tsɔɔ jɔɔmɔi ni kã wɔhiɛ lɛ fioo komɛi kɛkɛ ahe wɔsusu nɛɛ. Kɛ́ Nyɔŋmɔ Maŋtsɛyeli lɛ bɔi shikpɔŋ lɛ nɔ nɔyeli lɛ, ‘hejɔlɛ loo toiŋjɔlɛ babaoo’ baahi shi kɛya naanɔ. (Lala 37:11, 29) Abaajie nibii fɛɛ ni haa adesai piŋɔ loo amɛnáa nɔ lɛ kɛjɛ shihilɛ mli. Nyɔŋmɔ diɛŋtsɛ ewo he shi akɛ: “Naa, miifee nii fɛɛ ehee. . . . Nɛkɛ wiemɔi nɛɛ anɔkwa wiemɔi ni ma shi shiŋŋ ni.”—Kpojiemɔ 21:5.