KWƐ bɔ ni nakai sane lɛ ji anɔkwale ha! Bei pii lɛ, je nɛɛ mli shihilɛ bafeɔ “tɔlɛ kɛ deŋme” sɔŋŋ. Ekolɛ, obi ohe pɛŋ akɛ, ‘Ani mɔ ko tsui baanyɛ anyɔ emli yɛ shihilɛ mli amrɔ nɛɛ?’

Akɛ nɔkwɛmɔnɔ lɛ, susumɔ Maria he okwɛ. Kulɛ, eji mɔ ko ni yɔɔ gbɔmɔtsoŋ hewalɛ ni yaa ebaa daa, shi amrɔ nɛɛ eye afii 84 ni eka tsu mli, enyɛɛɛ kpo eje lɛ diɛŋtsɛ dɔŋŋ. Ejwɛŋmɔŋ kã shi, shi etamɔ nɔ ni egbɔmɔtso lɛ nyɛɛɛ akpee shihilɛ lɛ naa dɔŋŋ. Te ebaafee tɛŋŋ enu he akɛ etsui baanyɛ anyɔ emli yɛ shihilɛ nɛɛ mli?

Ni bo hu? Ekolɛ, obi ohe pɛŋ akɛ ani mitsui nyɔɔ mimli yɛ shihilɛ mli lo. Eeenyɛ efee akɛ, nitsumɔ kome too lɛ nɔŋŋ otsuɔ daa, ni eji tɔlɛ kɛ anihao sɔŋŋ. Ekolɛ mɛi yɔseŋ omɔdɛŋbɔɔ loo nɔ ni otsuɔ lɛ po. Kɛ́ nibii miiya lɛ jogbaŋŋ kɛmiiha bo amrɔ nɛɛ po lɛ, ekolɛ obaafee yeyeeye yɛ owɔsɛɛ he. Bei komɛi lɛ, obaanu shoofeemɔ he loo obaahao. Naataamɔi kɛ bei baanyɛ afa yɛ oweku lɛ mli. Ekolɛ, gbele ebaŋɔ osuɔlɔ ko kɛtee. Nuu ko ni atsɛɔ lɛ André ni eye afii 42 lɛ kɛ epapa yɛ jogbaŋŋ diɛŋtsɛ, shi trukaa ni epapa he baye ni egbo. Enɛ baye André awui waa, ni no ha enu he akɛ enyɛŋ eye shihilɛ ni batswa lɛ ojo nɛɛ nɔ kɔkɔɔkɔ.

Ekɔɔɔ he eko naagba ni wɔkɛbaakpe lɛ, nɔ ko yɛ ni ehe miihia waa akɛ wɔle: Ani otsui baanyɛ anyɔ omli yɛ shihilɛ mli lɛɛlɛŋ? Wɔbaanyɛ wɔná sanebimɔ nɛɛ hetoo yɛ bɔ ni nuu ko—Yesu Kristo, ni ba shikpɔŋ nɛɛ nɔ aaafee afii 2000 ni eho nɛɛ lɛ hi shi eha lɛ mli. Yɛ gbɛtsĩi nii ni Yesu kɛkpe lɛ fɛɛ sɛɛ lɛ, etsui nyɔ emli diɛŋtsɛ yɛ shihilɛ mli. No hewɔ lɛ, kɛ́ wɔnyiɛ enɔkwɛmɔnɔ lɛ sɛɛ lɛ, wɔ hu wɔtsui baanyɔ wɔmli diɛŋtsɛ yɛ shihilɛ mli.