Mɛni Esa akɛ Gbekɛbii Akase?

“Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.”—2 TIMOTEO 3:16.

ESA akɛ atsɔɔ gbekɛbii Nyɔŋmɔ he anɔkwale lɛ. Nɛgbɛ amɛbaanyɛ amɛkase enɛ kɛjɛ? Yɛ jamɔ he wolo ni abuɔ fe fɛɛ yɛ je lɛŋ, ni ji Biblia lɛ mli.

Biblia lɛ tamɔ wolo ko ni Nyɔŋmɔ eŋma wɔ. Nyɔŋmɔ tsɔɔ wolo nɛɛ nɔ etsɔɔ mɔ ni eji, ni ekɛ gbɛtsɔɔmɔi haa ebii fɛɛ, onukpai kɛ gbekɛbii, yɛ bɔ ni esa akɛ amɛba amɛjeŋ amɛha lɛ he. Bo lɛ susumɔ Biblia lɛ mli tsɔɔmɔi kɛ nibii ni gbekɛbii po baanyɛ akase kɛjɛ mli lɛ fioo komɛi pɛ ahe okwɛ.

Mɛni Nyɔŋmɔ taoɔ ni wɔle yɛ ehe?

▪ Nɔ ni Biblia lɛ tsɔɔ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”—Lala 83:19.

Nɔ ni wɔkaseɔ: Nyɔŋmɔ jeee hewalɛ ko kɛkɛ, shi moŋ eji Mɔ ko ni yɔɔ diɛŋtsɛ, ni eyɛ gbɛ́i.

▪ Nɔ ni Biblia lɛ tsɔɔ: “Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ. Kɛji oootao lɛ lɛ, eeehã ona lɛ.”—1 Kronika 28:9.

Nɔ ni wɔkaseɔ: Yehowa Nyɔŋmɔ susuɔ wɔ fɛɛ wɔhe, ni gbekɛbii bibii hu fata he. (Lala 10:14; 146:9) Eesumɔ ni wɔkase ehe nii.

▪ Nɔ ni Biblia lɛ tsɔɔ: “Nyɛkawaa . . . awusã ko yi. Shi kɛji owa amɛ yi, ni amɛfó amɛtsɛ mi lɛ, ja mibo amɛyaafo lɛ toi.”—2 Mose 22:22-24.

Nɔ ni wɔkaseɔ: Yehowa boɔ gbekɛbii bibii po asɔlemɔi atoi. Wɔbaanyɛ wɔkɛ Nyɔŋmɔ afɔ sanegbaa ni wɔfɔse wɔtsuiŋ kɛ wɔhenumɔi wɔshwie ehiɛ.

▪ Nɔ ni Biblia lɛ tsɔɔ: “Amɛka Mawu nɔtonɔto, ni amɛwo Israel Mɔ krɔŋkrɔŋ lɛ mli la.”—Lala 78:41.

Nɔ ni wɔkaseɔ: Wɔwiemɔ kɛ wɔnifeemɔi baanyɛ aha Yehowa aná miishɛɛ loo etsui akumɔ, no hewɔ lɛ esa akɛ wɔsusu nii ahe dani wɔwie loo wɔfee nɔ ko.

 Te esa akɛ wɔkɛ mɛi ni esoro amɛ yɛ wɔhe lɛ aye aha tɛŋŋ?

▪ Nɔ ni Biblia lɛ tsɔɔ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.

Nɔ ni wɔkaseɔ: Akɛni Nyɔŋmɔ sumɔɔ adesai fɛɛ hewɔ lɛ, esaaa akɛ wɔjieɔ niiaŋ yɛ mɛi ahewolo nɔ su loo bɔ ni amɛhiɛ yɔɔ ha lɛ hewɔ.

▪ Nɔ ni Biblia lɛ tsɔɔ: “Daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ní yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.”—1 Petro 3:15.

Nɔ ni wɔkaseɔ: Kɛ́ wɔkɛ mɛi miisusu Nyɔŋmɔjamɔ he lɛ, esa akɛ wɔkɛ nɔmimaa awie, shi yɛ mlijɔlɛ mli. Esa akɛ wɔjie bulɛ kpo hu wɔtsɔɔ mɛi ni esoro amɛhemɔkɛyelii yɛ wɔnɔ̃ he lɛ.

Te esa akɛ wɔkɛ wɔweku mli bii aye aha tɛŋŋ?

▪ Nɔ ni Biblia lɛ tsɔɔ: “Bii lɛ, nyɛboa nyɛfɔlɔi atoi yɛ nibii fɛɛ gbɛfaŋ; ejaakɛ no sa Nuŋtsɔ lɛ hiɛ jogbaŋŋ.”—Kolosebii 3:20.

Nɔ ni wɔkaseɔ: Kɛ́ gbekɛbii boɔ amɛfɔlɔi atoi lɛ, amɛkɛtsɔɔ akɛ amɛsumɔɔ amɛfɔlɔi lɛ ni amɛmiitao ni amɛsa Nyɔŋmɔ hiɛ hu.

▪ Nɔ ni Biblia lɛ tsɔɔ: “Kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni Kristo hu ŋɔfa nyɛ lɛ, nakai nyɛ hu nyɛfea.”—Kolosebii 3:13.

Nɔ ni wɔkaseɔ: Bei komɛi lɛ, mɛi baanyɛ afee nibii ni baagba wɔnaa, ni wɔweku mli bii po fata he. Shi ja wɔkɛ mɛi atɔmɔi eke amɛ dani Nyɔŋmɔ kɛ wɔ hu wɔtɔmɔi lɛ baake wɔ.—Mateo 6:14, 15.

 Mɛni hewɔ esa akɛ wɔye anɔkwa ní wɔmli ahi?

▪ Nɔ ni Biblia lɛ tsɔɔ: “Nyɛshɛ́a amale nyɛfɔa ní nyɛteŋ mɔ fɛɛ mɔ kɛ enaanyo awie anɔkwale.”—Efesobii 4:25.

Nɔ ni wɔkaseɔ: Kɛ́ wɔwieɔ anɔkwale lɛ, belɛ wɔmiikase Nyɔŋmɔ, ni emii shɛɔ ehe. Kɛ́ wɔkɛ malemɔ fee wɔsu lɛ, wɔbatsɔmɔɔ tamɔ Nyɔŋmɔ henyɛlɔ, ni ji Abonsam, mɔ ni ji “malemɔ tsɛ” lɛ.—Yohane 8:44; Tito 1:2.

▪ Nɔ ni Biblia lɛ tsɔɔ: “Nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.”—Mateo 7:12.

Nɔ ni wɔkaseɔ: Esa akɛ wɔna mli wɔha wɔweku mlibii kɛ wɔkutsoŋbii lɛ, ni wɔfó amɛnɔ̃ mli. Kɛ́ ‘wɔnaa mli wɔhaa mɛi’ lɛ, amɛ hu amɛkɛ wɔ baaye yɛ mlihilɛ mli.—1 Petro 3:8; Luka 6:38.

Taakɛ nɔkwɛmɔnii nɛɛ tsɔɔ lɛ, saji ni yɔɔ Biblia lɛ mli lɛ baanyɛ aye abua gbekɛbii ni amɛhiɛ asɔ nii, amɛbu mɔ, ni amɛnu he amɛha mɛi kɛ́ amɛdara. Shi namɔ esa akɛ etsɔɔ gbekɛbii lɛ nibii nɛɛ?