Kasemɔ Nii Kɛjɛ Nyɔŋmɔ Wiemɔ Lɛŋ

Ani Hiɛnɔkamɔ yɛ Kɛha Gbohii Lɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Mɛɛ hiɛnɔkamɔ yɔɔ kɛha gbohii lɛ?

Beni Yesu yashɛ Betania ni bɛŋkɛ Yerusalem lɛ, no mli lɛ eshieŋtsɛ Lazaro egbo gbii ejwɛ nɛ. Yesu kɛ Marta kɛ Maria, ni ji Lazaro nyɛmimɛi yei lɛ tee gbonyobu lɛ he. Etsɛɛɛ ni mɛi babaoo babua shi. Feemɔ miishɛɛ ni Marta kɛ Maria ná beni Yesu tee Lazaro shi kɛba wala mli lɛ he mfoniri okwɛ.—Kanemɔ Yohane 11:20-24, 38-44.

Marta heɔ eyeɔ akɛ abaatee gbohii lɛ ashi. Yehowa tsuji anɔkwafoi le kɛjɛ teteete akɛ wɔsɛɛ lɛ, Nyɔŋmɔ baatee gbohii lɛ ashi kɛba shikpɔŋ lɛ nɔ ekoŋŋ.—Kanemɔ Hiob 14:14, 15.

2. Mɛɛ shihilɛ mli gbohii lɛ yɔɔ?

Wala mumɔ ji nɔ ni haa adesai kɛ kooloi hiɔ wala mli, shi no etsɔɔɔ akɛ wɔyɛ susuma ko ni gbooo yɛ wɔmli. (Jajelɔ 3:19; 1 Mose 7:21, 22) Wɔji heloo kɛ lá, ni shikpɔŋ sũ akɛshɔ̃ wɔ. (1 Mose 2:7; 3:19) Kɛ́ wɔjwɛŋmɔ lɛ gbo lɛ, wɔsusumɔi fɛɛ laajeɔ. No hewɔ lɛ, beni atee Lazaro shi lɛ, ewieee nɔ ko ni tsɔɔ akɛ eyafee nɔ ko yɛ gbohiiaje, ejaakɛ gbohii lɛ leee nɔ ko nɔ ko.—Kanemɔ Lala 146:4; Jajelɔ 9:5, 10.

Eyɛ faŋŋ akɛ gbohii lɛ nyɛŋ ana nɔ̃. No hewɔ lɛ, tsɔɔmɔ ni atsɔɔ akɛ Nyɔŋmɔ piŋɔ mɛi yɛ amɛgbele sɛɛ lɛ ji amale. Nakai tsɔɔmɔ lɛ gbeɔ Nyɔŋmɔ he guɔ. Eehi akɛ aaapiŋ mɛi yɛ la mli.—Kanemɔ Yeremia 7:31.

  3. Ani wɔbaanyɛ wɔkɛ gbohii lɛ awie?

Gbohii lɛ nyɛɛɛ awie. (Lala 115:17) Shi kɛ́ ŋwɛi bɔfoi fɔji lɛ kɛ mɛi wie lɛ, amɛlakaa amɛ akɛ gbohii lɛ amɛkɛwieɔ lɛ. (2 Petro 2:4) Yehowa hiɔ mɔdɛŋ ni abɔɔ ákɛ akɛ gbohii lɛ aaawie lɛ.—Kanemɔ 5 Mose 18:10, 11.

4. Namɛi ashi abaatee?

Yɛ jeŋ hee ni baa lɛ mli lɛ, mɛi akpekpei abɔ ni yɔɔ gbohiiabui lɛ amli lɛ baaba wala mli ekoŋŋ. Abaatee mɛi komɛi ni fee nibii fɔji akɛni amɛleee Yehowa lɛ po ashi.—Kanemɔ 2 Petro 3:13; Bɔfoi lɛ Asaji 24:15.

Mɛi ni abaatee amɛ shi lɛ baaná hegbɛ kɛkase anɔkwale ni kɔɔ Nyɔŋmɔ he lɛ ní amɛbo Yesu toi kɛtsɔɔ akɛ amɛheɔ enɔ amɛyeɔ. (Kpojiemɔ 20:11-13) Mɛi ni baaba wala mli ekoŋŋ ní baafee nibii kpakpai lɛ baahi shi kɛya naanɔ yɛ shikpɔŋ lɛ nɔ. Shi kɛlɛ, mɛi ni abaatee amɛ shi lɛ ateŋ mɛi komɛi baaya nɔ amɛfee nibii fɔji. Amɛshitee lɛ baafee ‘shitee kɛmiiya kojomɔ mli.’—Kanemɔ Yohane 5:28, 29.

5. Mɛni gbohiiashitee lɛ tsɔɔ wɔ yɛ Yehowa he?

Tsu ni Nyɔŋmɔ tsu e-Bi lɛ kɛba ní ekɛ ewala baha yɛ wɔhewɔ lɛ ji nɔ ni baaha atee gbohii lɛ ashi lɛ. No hewɔ lɛ gbohiiashitee lɛ ji Yehowa duromɔ keenii, ni etsɔɔ akɛ esumɔɔ wɔ.—Kanemɔ Yohane 3:16; Romabii 6:23.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 6 kɛ 7 lɛ mli.

[Mfoniri ni yɔɔ baafa 26]

Akɛ shikpɔŋ sũ bɔ Adam