Kasemɔ Nii Kɛjɛ Nyɔŋmɔ Wiemɔ Lɛŋ

Namɔ Ji Nyɔŋmɔ?

Sane nɛɛ teɔ sanebimɔi komɛi ni ekolɛ osusu he pɛŋ lɛ ashi, ni etsɔɔ he ni obaanyɛ ona hetoi lɛ yɛ, yɛ o-Biblia lɛ mli. Yehowa Odasefoi baaná he miishɛɛ akɛ amɛ kɛ bo aaasusu hetoi nɛɛ ahe.

1. Namɔ ji Nyɔŋmɔ?

Anɔkwa Nyɔŋmɔ lɛ ji mɔ ni bɔ nibii fɛɛ. Biblia lɛ tsɛɔ lɛ ‘naanɔi a-Maŋtsɛ,’ ni tsɔɔ akɛ ebɛ shishijee ni ebɛ naagbee hu. (1 Timoteo 1:17) Akɛni Nyɔŋmɔ ji wala Halɔ hewɔ lɛ, esa akɛ wɔja ekome too.—Kanemɔ Kpojiemɔ 4:11.

2. Te Nyɔŋmɔ ji ha tɛŋŋ?

Mɔ ko mɔ ko enako Nyɔŋmɔ pɛŋ ejaakɛ Mumɔ ni, ni tsɔɔ akɛ enɔ kwɔ fe bɔɔnii fɛɛ ni yɔɔ shikpɔŋ lɛ nɔ lɛ. (Yohane 1:18; 4:24) Anaa Nyɔŋmɔ sui lɛ yɛ nibii ni efee lɛ amli. Akɛ nɔkwɛmɔnɔ lɛ, kɛ́ wɔkwɛ aduawai kɛ fɔfɔi ahenɔi srɔtoisrɔtoi ni yɔɔ kɛ bɔ ni afee amɛ aha lɛ, wɔnaa akɛ Nyɔŋmɔ yɛ suɔmɔ ni ele nii. Bɔ ni jeŋ muu lɛ da ha lɛ haa wɔnaa akɛ Nyɔŋmɔ yɛ hewalɛ.—Kanemɔ Romabii 1:20.

Wɔbaanyɛ wɔkase Nyɔŋmɔ sui lɛ ahe nii babaoo kɛjɛ Biblia lɛ mli. Akɛ nɔkwɛmɔnɔ lɛ, etsɔɔ wɔ nɔ ni Nyɔŋmɔ sumɔɔ kɛ nɔ ni esumɔɔɔ, bɔ ni ekɛ mɛi yeɔ haa, kɛ bɔ ni efeɔ enii ehaa yɛ shihilɛi srɔtoi amli.—Kanemɔ Lala 103:7-10.

3. Ani Nyɔŋmɔ yɛ gbɛi?

Yesu kɛɛ akɛ: “Wɔtsɛ ni yɔɔ ŋwɛi, ogbɛi lɛ he atse.” (Mateo 6:9) Eyɛ mli akɛ Nyɔŋmɔ yɛ sablai babaoo moŋ, shi gbɛi kome pɛ eyɔɔ. Esoro bɔ ni atsɛɔ gbɛi nɛɛ yɛ wiemɔ fɛɛ wiemɔ mli. Yɛ Ga mli lɛ, wɔtsɛɔ lɛ “Yehowa” loo bei komɛi lɛ “Yahweh.”—Kanemɔ Lala 83:19.

Ajie Nyɔŋmɔ gbɛi lɛ kɛjɛ Bibliai babaoo amli ni akɛ sablai ni ji Nuŋtsɔ loo Nyɔŋmɔ eye najiaŋ. Shi beni aŋma Biblia lɛ, Nyɔŋmɔ gbɛi lɛ je kpo yɛ mli aaafee shii 7,000 sɔŋŋ. Yesu kɛ Nyɔŋmɔ gbɛi lɛ tsu nii beni etsɔɔ mɛi Nyɔŋmɔ Wiemɔ lɛ mli lɛ, ni ekɛha ale Nyɔŋmɔ gbɛi lɛ. Eye ebua mɛi ni amɛle Nyɔŋmɔ.—Kanemɔ Yohane 17:26.

 4. Ani Yehowa susuɔ wɔhe?

Yehowa diɛŋtsɛ boɔ wɔsɔlemɔi lɛ atoi, ni no tsɔɔ akɛ esusuɔ wɔhe. (Lala 65:3) Ani bɔ ni nɔnai efa pii lɛ tsɔɔ akɛ Nyɔŋmɔ susuuu wɔhe? Mɛi komɛi kɛɔ akɛ Nyɔŋmɔ haa wɔnaa nɔ̃ koni ekɛka wɔ ekwɛ, shi enɛ jeee anɔkwale. Biblia lɛ kɛɔ akɛ: “Enɛ akagbale Mawu akɛ eeefee nɔ̃ fɔŋ.”—Hiob 34:10; kanemɔ Yakobo 1:13.

Nyɔŋmɔ ewo adesai ahiɛ nyam ejaakɛ eŋmɛɔ wɔ gbɛ ni wɔ diɛŋtsɛ wɔkpɛ yiŋ wɔha wɔhe. Ani eŋɔɔɔ wɔnaa akɛ wɔbaanyɛ wɔhala akɛ wɔɔsɔmɔ Nyɔŋmɔ? (Yoshua 24:15) Nɔnai efa pii ejaakɛ mɛi feɔ mɛi krokomɛi nibii fɔji. Edɔɔ Yehowa akɛ ayeee jalɛsane tamɔ nɛkɛ.—Kanemɔ 1 Mose 6:5, 6.

Etsɛŋ, Yehowa baaha Yesu ajie nɔnai kɛ mɛi ni haa anaa nɔ lɛ fɛɛ kɛya. Shi dani nakai be lɛ aaashɛ lɛ, Yehowa yɛ yiŋtoo kpakpa ko hewɔ ni eŋmɛ piŋmɔ gbɛ be fioo lɛ. Sane kroko ni baaba sɛɛ mli lɛ baagbala nɔ hewɔ ni Nyɔŋmɔ eŋmɛ piŋmɔ gbɛ lɛ mli.—Kanemɔ Yesaia 11:4.

5. Mɛni Nyɔŋmɔ taoɔ ni wɔfee?

Yehowa bɔ wɔ bɔ ni wɔbaanyɛ wɔle lɛ ni wɔsumɔ lɛ. Eesumɔ ni wɔkase anɔkwalei ni kɔɔ ehe lɛ. (1 Timoteo 2:4) Kɛ́ wɔkase Biblia lɛ, ebaanyɛ eha wɔle Nyɔŋmɔ akɛ wɔ-Naanyo.—Kanemɔ Abɛi 2:4, 5.

Akɛni Yehowa haa wɔ wala hewɔ lɛ, esa akɛ wɔsumɔ lɛ fe mɔ fɛɛ mɔ. Wɔbaanyɛ wɔha Nyɔŋmɔ ana akɛ wɔsumɔɔ lɛ kɛtsɔ sane ni wɔkɛ lɛ aaagba yɛ sɔlemɔ mli kɛ esuɔmɔnaa nii ni wɔɔfee lɛ nɔ. (Abɛi 15:8) Yehowa biɔ wɔ ni wɔkɛ mɛi aye yɛ suɔmɔ mli.—Kanemɔ Marko 12:29, 30; 1 Yohane 5:3.—w11-E 02/1.

Kɛ́ ootao ole enɛ he sane babaoo lɛ, kwɛmɔ wolo nɛɛ, Mɛni Biblia Lɛ Tsɔɔ Diɛŋtsɛ? ni Yehowa Odasefoi fee lɛ yitso 1 lɛ mli.

[Mfoniri ni yɔɔ baafa 17]

Ani Nyɔŋmɔ yɛ yiŋtoo kpakpa ko hewɔ ni eŋmɛ piŋmɔ gbɛ be fioo lɛ?