Tsɔɔmɔ Obii lɛ Anii

Yeremia Kpaaa Yehowa Sɔɔmɔ

ANI bei komɛi lɛ onijiaŋ jeɔ wui ni onuɔ he akɛ okpa Yehowa sɔɔmɔ?— * Mɛi babaoo nuɔ he nakai. Beni Yeremia ji oblanyo fioo lɛ enu he nakai. Shi ehaaa nɔ ni mɛi krokomɛi kɛɛ loo amɛfee lɛ aje enijiaŋ wui. Nyɛhaa wɔsusua Yeremia ni Nyɔŋmɔ sumɔɔ esane waa, shi lɛ po be shɛ ni enu he akɛ esa akɛ ekpa lɛ sɔɔmɔ lɛ he wɔkwɛa.

Dani abaafɔ Yeremia lɛ, no mli lɛ Yehowa ni ji anɔkwa Nyɔŋmɔ lɛ ehala lɛ akɛ gbalɔ koni ebɔ maŋbii lɛ kɔkɔ yɛ amɛnifeemɔnii ni esaaa Nyɔŋmɔ hiɛ lɛ ahe. Afii komɛi asɛɛ lɛ ole nɔ ni Yeremia kɛɛ Yehowa?— Ekɛɛ akɛ: “Mileee wiemɔ; ejaakɛ gbekɛ ji mi.”

Mɛɛ hetoo nɛkɛ nyɛsusuɔ akɛ Yehowa kɛha Yeremia?— Ejɛ mlijɔlɛ mli ekɛ lɛ wie, shi yɛ gbɛ ni yɔɔ shiŋŋ nɔ, ekɛɛ lɛ akɛ: ‘Kaakɛɛ akɛ: Gbekɛ ji mi! Shi moŋ mɔ fɛɛ mɔ ŋɔɔ ní matsuo lɛ, yaa, ni nɔ fɛɛ nɔ ní mafão lɛ, wiemɔ! Kaashe amɛ gbeyei.’ Mɛni hewɔ esaaa akɛ esheɔ gbeyei lɛ? Yehowa kɛɛ lɛ akɛ: “Ejaakɛ mikɛo yɛ, ni majieo.”—Yeremia 1:4-8.

Shi taakɛ wɔwie he kɛtsɔ hiɛ lɛ, sɛɛ mli lɛ Yeremia nijiaŋ je wui. Nɔ̃ hewɔ jɛ ji akɛ aye ehe fɛo yɛ Nyɔŋmɔ ní ejáa lɛ hewɔ. Ekɛɛ akɛ: ‘Mɔ fɛɛ mɔ ŋmɔɔ mi daa jenamɔ.’ No hewɔ lɛ ekpɛ eyiŋ akɛ ebaakpa lɛ sɔɔmɔ. Yeremia kɛɛ akɛ: “Mitsiŋ [Yehowa] tã, ni miwieŋ yɛ egbɛi anɔ dɔŋŋ.” Shi ani ekpa lɛ jamɔ lɛɛlɛŋ?

Yeremia kɛɛ akɛ: ‘Yehowa wiemɔ lɛ tsɔ tamɔ la ní tsoɔ yɛ mitsui mli, ní aŋa yi awo miwui amli, enaatsii etɔ mi.’ (Yeremia 20:7-9) Eyɛ mli akɛ ebashɛ he ko ni Yeremia she gbeyei moŋ, shi suɔmɔ ni eyɔɔ kɛha Yehowa hewɔ lɛ ekpaaa lɛ sɔɔmɔ. Nyɛhaa wɔkwɛa gbɛ nɔ ni Yehowa tsɔ ebu Yeremia he, akɛni ekpaaa lɛ sɔɔmɔ lɛ hewɔ.

Yehowa kɛɛ Yeremia koni ebɔ Yerusalembii lɛ kɔkɔ akɛ kɛji amɛtsakeee amɛgbɛ̀i fɔji lɛ abaakpata maŋ lɛ hiɛ. Gbɔmɛi lɛ amli fu beni Yeremia kɛ nakai kɔkɔbɔɔ lɛ ha amɛ lɛ, ni amɛkɛɛ: “Nuu nɛɛ sa gbele.” Shi Yeremia  kpa amɛfai koni ‘amɛbo Yehowa gbee toi.’ Kɛkɛ ni ekɛfata he akɛ: ‘Nyɛnáa nyɛlea akɛ kɛji nyɛgbe mi lɛ, nyɛgbe nuu ni efeko nɔ ko, ejaakɛ Yehowa tsu mi akɛ mikɛnyɛ abawie.’ Ani nyɛle nɔ ni ba?—

Biblia lɛ kɛɔ akɛ: “Lumɛi lɛ kɛ maŋ muu lɛ fɛɛ kɛɛ osɔfoi lɛ kɛ gbalɔi lɛ akɛ: Nuu nɛɛ esaaa gbele; ejaakɛ Yehowa gbɛi amli ewie etsɔɔ wɔ yɛ.” No hewɔ lɛ, akɛni Yeremia haaa gbeyeishemɔ aha ekpa kɔkɔ ni esa akɛ ebɔ lɛ hewɔ lɛ, Yehowa bu ehe. Agbɛnɛ ha wɔkwɛ nɔ ni ba Uria, ni ji Yehowa gbalɔ kroko ní eyafeee enii taakɛ Yeremia fee lɛ nɔ.

Biblia lɛ kɛɔ akɛ: ‘Uria tee nɔ egba eshi Yerusalem tamɔ bɔ pɛ ni Yeremia fee lɛ.’ Shi beni Maŋtsɛ Yehoiakim mli fu Uria lɛ, ole nɔ ni Uria fee?— Eshe gbeyei, ekpa Nyɔŋmɔ suɔmɔnaa nifeemɔ, ni ejo foi kɛtee Mizraim. No hewɔ lɛ, maŋtsɛ lɛ tsu ní ayatao lɛ koni akɛlɛ aku sɛɛ kɛba. Ani ole nɔ ni maŋtsɛ fɔŋ nɛɛ fee beni amɛkɛ lɛ ku sɛɛ kɛba lɛ?— Egbe Uria kɛ klante!—Yeremia 26:8-24.

Mɛni hewɔ ni obaakɛɛ akɛ Yehowa bu Yeremia he ni ebuuu Uria he lɛ?— Ojogbaŋŋ, ekolɛ Yeremia she gbeyei tamɔ Uria moŋ, shi Yeremia tee nɔ esɔmɔ Yehowa, ni ejooo foi. Ekpaaa Yehowa sɔɔmɔ. Mɛni osusuɔ akɛ wɔbaanyɛ wɔkase kɛjɛ nɔ ni Yeremia fee lɛ mli?— No ji akɛ bei komɛi lɛ ebaawa kɛha wɔ akɛ wɔɔfee nɔ ni Nyɔŋmɔ kɛɔ wɔ akɛ wɔfee lɛ moŋ, shi esa akɛ wɔkɛ wɔhe afɔ enɔ be fɛɛ be ni wɔbo lɛ toi.—w09-E 12/1.

[Shishigbɛ niŋmaa]

Sanebimɔi:

○ Mɛɛ nitsumɔ Nyɔŋmɔ kɛwo Yeremia dɛŋ?

○ Mɛni hewɔ Yeremia nu he akɛ esa akɛ ekpa Yehowa sɔɔmɔ lɛ?

○ Mɛni hewɔ abu Yeremia he shi afeee nakai yɛ Uria gbɛfaŋ lɛ?

○ Mɛni okase kɛjɛ nɔ ni Yeremia fee lɛ mli?