Gilead Skul Lɛ Klas Ni Ji 126 Lɛ Naagbee Nifeemɔ

Bɔ Ni Ooofee Oye Omanye Akɛ Maŋsɛɛ Sanekpakpa Shiɛlɔ

MƐI babaoo kɛ miishɛɛ bua amɛhe naa yɛ Watchtower Educational Center ni yɔɔ Patterson yɛ New York lɛ kɛha nifeemɔ krɛdɛɛ ko. Nifeemɔ nɛɛ tee nɔ yɛ Hɔɔ, March 14, 2009, ni eji Buu-Mɔɔ Gilead Biblia Skul lɛ klas ni ji 126 lɛ naagbee nifeemɔ. No mli lɛ, aaba abatsu mɛi ni egbe Gilead Skul lɛ naa lɛ kɛya maji 22 anɔ koni amɛyashiɛ Nyɔŋmɔ Maŋtsɛyeli lɛ he sanekpakpa lɛ.—Mateo 24:14.

No mli lɛ, skulbii lɛ egbe Biblia mli nikasemɔ ni haa akɛ nyɔji enumɔ kaseɔ nibii babaoo lɛ naa, ni ato nikasemɔ nɛɛ he gbɛjianɔ koni eye ebua amɛ ni amɛtsɔmɔ Kristofoi maŋsɛɛ sanekpakpa shiɛlɔi ni yeɔ omanye. Nifeemɔ nɛɛ ni akɛmuɔ amɛnikasemɔ lɛ naa lɛ haa amɛnáa naagbee hegbɛ akɛ klas kome koni amɛkɛbo ŋaawoi ni nilee yɔɔ mli ni kɔɔ bɔ ni amɛaafee amɛshɛ oti nɛɛ he lɛ toi.

Anthony Morris ni ji Yehowa Odasefoi a-Nɔyeli Kuu lɛ mlinyo ni fee sɛinɔtalɔ kɛha nifeemɔ nɛɛ wie akɛ, aje Gilead Skul lɛ shishi yɛ 1943 kɛha maŋsɛɛ sanekpakpa shiɛlɔi atsɔsemɔ. Kɛjɛ nakai beaŋ kɛbaa lɛ, mɛi ni egbe Gilead Skul lɛ naa lɛ etsu babaoo yɛ jeŋ muu fɛɛ shiɛmɔ nitsumɔ lɛ mli.

Wielɔ lɛ kɛɛ akɛ, eyɛ mli akɛ woloŋmalɔi kɛ Farisifoi lɛ bu Yesu bɔfoi lɛ akɛ ‘amɛjeee woloŋlelɔi kɛ nilelɔi’ moŋ, shi ekãa ni bɔfoi lɛ kɛwie lɛ ha shiteekɛwolɔi nɛɛ kɔ sɛɛ akɛ bɔfoi lɛ kɛ Yesu hi shi. (Bɔfoi lɛ Asaji 4:13) Tsɔsemɔ ni skulbii lɛ anine shɛ nɔ lɛ haa amɛnyɛɔ amɛkɛ ekãa wieɔ.

Robert Ciranko ni ji Nɔyeli Kuu lɛ Niŋmaa Ajinafoi Akuu lɛ yelikɛbualɔi lɛ ateŋ mɔ kome lɛ ha wiemɔ ko ni yitso ji, “Kaafee Mɔ ni Kwɛɔ Mɛi Ahiɛaŋ.” Eha efee faŋŋ kɛha skulbii lɛ akɛ, etsɛŋ ni amɛkɛ gbɔmɛi srɔtoi ni esoro amɛnifeemɔi kɛ kusumii baakpe. Kɛlɛ, kɛ́ skulbii lɛ ná Yehowa susumɔ lɛ eko lɛ, ewaŋ kɛhaŋ amɛ akɛ amɛkɛ mɛi nɛɛ baahi shi ni amɛshiɛ amɛha amɛ. Awie yɛ Bɔfoi lɛ Asaji 10:34 lɛ akɛ, “Nyɔŋmɔ jeee mɛi ahiɛaŋkwɛlɔ,” ni tsɔɔ akɛ ebuuu hiɛ ko akɛ eyɛ nyam fe hiɛ kroko. Yɛ gbɛ kroko nɔ lɛ, Nyɔŋmɔ ejieee niiaŋ. (Bɔfoi lɛ Asaji 10:35) Nyɛminuu Ciranko kɛɛ akɛ, “Kɛ́ nyɛná Nyɔŋmɔ susumɔ lɛ eko ni nyɛbu mɔ fɛɛ mɔ ni yɔɔ hei ni abaaha nyɛyatsu nii yɛ lɛ akɛ mɔ ko ni baanyɛ asa Nyɔŋmɔ hiɛ lɛ, no lɛ bɔ fɛɛ bɔ ni fee lɛ nyɛbaaye omanye akɛ Nyɔŋmɔ maŋsɛɛ sanekpakpa shiɛlɔi.”

“Nyɛyɛ Nɔ ni Baaha Nyɛye Omanye”

Samuel Herd ni ji Nɔyeli Kuu lɛ mlinyo lɛ je ewiemɔ lɛ shi akɛ, “Mɛi komɛi buɔ afukpɔŋɔ akɛ ehe bɛ fɛo, kɛlɛ bɔ ni abɔ lɛ aha lɛ haa enyɛɔ ehiɔ ŋa kpataa nɔ jogbaŋŋ.” Nakai nɔŋŋ hu maŋsɛɛ sanekpakpa shiɛlɔi hei nɛɛ yɛ nɔ ni baaha amɛye omanye yɛ shikpɔŋkukuji ni akɛha amɛ lɛ amli. Nibii enumɔ baaye abua amɛ.

1. Suɔmɔ kɛha Yehowa. (Mateo 22:37, 38) Skulbii lɛ etsɔɔ momo akɛ amɛtswa amɛfai shi akɛ amɛbaasɔmɔ Yehowa.

2. Nyɔŋmɔ Wiemɔ lɛ he nilee ni aŋɔto. Afukpɔŋɔ kɛ niyenii toɔ fɔ ni yɔɔ efu lɛ mli lɛ mli. Kɛlɛ, ekpaaa niyeli koni emu efɔ̃ nɔ ni ekɛto kɛha fimɔ bei lɛ nɔ. Nakai nɔŋŋ hu esaaa akɛ maŋsɛɛ sanekpakpa shiɛlɔi lɛ muɔ amɛfɔ̃ɔ nibii ni amɛbakase yɛ Gilead Skul lɛ pɛ anɔ, shi esa akɛ amɛya nɔ amɛkɛ Biblia mli nilee awaje amɛhe.

3. Suɔmɔ kɛha gbɔmɛi. (Mateo 22:39) Skulbii lɛ yɛ musuŋtsɔlɛ kɛha gbɔmɛi.

4. He-kɛ-afɔleshãa mumɔ. (Lala 110:3) Kɛ́ maŋsɛɛ sanekpakpa shiɛlɔ ko hewalɛ naa ba shi lɛ, Yehowa baaha lɛ hewalɛ ni fa pii.—Yesaia 40:29.

5. Oblahiiaŋ hewalɛ. Taakɛ bɔ ni afukpɔŋɔ tereɔ mɔ ni ta enɔ lɛ kɛfoɔ ŋa kpataa lɛ, nakai nɔŋŋ hu esa akɛ maŋsɛɛ sanekpakpa shiɛlɔ “atere” enyɛmi Kristofonyo ni kɛ naagba miikpe yɛ Yehowa  sɔɔmɔ mli lɛ. Enɛ biɔ hewalɛ babaoo, shi maŋsɛɛ sanekpakpa shiɛlɔi lɛ yɛ oblahiiaŋ hewalɛ.

Nifeemɔ lɛ Mli Nibii Krokomɛi

Michael Burnett ni ji Gilead tsɔɔlɔi lɛ ateŋ mɔ kome lɛ kɛɛ akɛ, ŋmɛi fata nibii kpakpai ni Yakob kɛtsu ni akɛyaha Mizraim nɔyelɔ ko akɛ nikeenii lɛ ahe. (1 Mose 43:11) Niyenii mli hewalɛ srɔtoi babaoo yɛ ŋmɛi amli. Skulbii lɛ ekpe mfonirifeemɔŋ ŋmɛi babaoo yɛ amɛnikasemɔ lɛ mli. Nibii ni esa akɛ amɛŋɔ kɛya lɛ ateŋ ekomɛi ji akɛ, esa akɛ amɛmii ashɛ nibii ni Yehowa kɛhaa lɛ ahe, ni agbɛnɛ hu amɛsumɔ shihilɛ hee ni amɛbaayaje mli lɛ.

Mark Noumair ni lɛ hu eji Gilead tsɔɔlɔi lɛ ateŋ mɔ kome lɛ tsɔɔ mli akɛ, Nyɔŋmɔ Wiemɔ lɛ tamɔ baagi ni “nilee” eyi mli obɔ. (Hiob 28:18) Esa akɛ wɔ gbele baagi nɛɛ naa ni wɔkɛ nibii ni yɔɔ mli lɛ atsu nii. Kɛ́ nibii eyabaaa lɛ bɔ ni skulbii lɛ kpaa gbɛ yɛ maŋsɛɛ sanekpakpa shiɛmɔ nitsumɔ lɛ mli lɛ, amɛbaanyɛ amɛjwɛŋ bɔfo Paulo nɔkwɛmɔnɔ lɛ nɔ. Yesu kaselɔi lɛ ha eyatsu nii yɛ emaŋ afii nɛɛhu. Yɛ nɔ najiaŋ ni Paulo aaakɛɛ akɛ, akɛni eji ‘dɛŋdade ni ahala’ hewɔ lɛ, esa akɛ eyasɔmɔ yɛ he kroko lɛ, ekɛ ekãa babaoo tsu nii yɛ he fɛɛ he ni eyɔɔ. (Bɔfoi lɛ Asaji 9:15, 28-30) Ekolɛ ebaafee nɔ ni wa akɛ wɔɔkpɛlɛ Yehowa yiŋkpɛi anɔ. Mɔ kroko ni kpɛlɛ Yehowa yiŋkpɛɛ nɔ ji Yonatan. Beni Yonatan yɔse akɛ David ji maŋtsɛ ni Yehowa ehala lɛ, ejɛ etsui mli efi esɛɛ.

Yɛ nifeemɔ lɛ fã ni yitso ji “Nyɔŋmɔ Tsuji Wieɔ kɛ Ekãa” lɛ mli lɛ, skulbii lɛ fee niiashikpamɔi ni amɛná yɛ shiɛmɔ nitsumɔ lɛ mli yɛ amɛnikasemɔ be lɛ mli lɛ he nɔkwɛmɔnɔ. Amɛteŋ mɛi babaoo kɛ mɛi je Biblia mli nikasemɔi ashishi. Abibii mɛi etɛ ni kɛ afii babaoo esɔmɔ akɛ maŋsɛɛ sanekpakpa shiɛlɔi lɛ saji yɛ wiemɔ ni aha kɛnyiɛ sɛɛ ni yitso ji, “Yehowa Gbɛjianɔtoo lɛ Esaa Amɛ Eto” lɛ mli. Amɛteŋ mɔ fɛɛ mɔ gba bɔ ni atsɔse amɛ koni amɛkɛ Nyɔŋmɔ gbɛjianɔtoo lɛ afee ekome lɛ he sane.

“Ná Miishɛɛ akɛ Maŋsɛɛ Sanekpakpa Shiɛlɔ”

No sɛɛ lɛ, Gerrit Lösch ni ji Nɔyeli Kuu lɛ mlinyo kroko lɛ ha nifeemɔ lɛ mli wiemɔ titri ni yitso ji, “Ná Miishɛɛ akɛ Maŋsɛɛ Sanekpakpa Shiɛlɔ” lɛ. Ewie akɛ, nifeemɔi babaoo ni asusuɔ akɛ amɛhaa “shihilɛ ŋɔɔ” lɛ haaa aná anɔkwa miishɛɛ. (Abɛi 14:13; Jajelɔ 2:10, 11) Eyɛ mli akɛ jeee be fɛɛ be eyɔɔ mlɛo akɛ aaafee Nyɔŋmɔ suɔmɔnaa nii moŋ, shi no haa anáa miishɛɛ ni sɛɛ efooo. Eyɛ mli akɛ nibii ni akaseɔ yɛ Gilead lɛ biɔ deŋmegbomɔ moŋ, shi ehaa mɔ tsui nyɔɔ emli waa.

Nibii babaoo ji nɔ ni haa anɔkwa Kristofoi náa miishɛɛ. Amɛjáa miishɛɛ Nyɔŋmɔ lɛ. (Lala 33:12; 1 Timoteo 1:11, NW) Biblia mli nilee ni amɛkɛtsuɔ nii hewɔ lɛ, amɛyɛ mfonirifeemɔŋ paradeiso mli, ni agbɛnɛ hu, Biblia lɛ ewo shi akɛ etsɛŋ shikpɔŋ lɛ baatsɔ paradeiso diɛŋtsɛ. Amɛna yiŋtoo hewɔ ni wɔyɔɔ wala mli lɛ—no ji akɛ ni wɔsɔmɔ Yehowa ni wɔjie eyi. Kɛfata he lɛ, Yehowa kɛ Yesu sumɔɔ amɛ.

Wielɔ lɛ kɛshi sɛɛ akɛ, “Kɛ́ omii shɛ onii ahe lɛ, obaaná miishɛɛ akɛ maŋsɛɛ sanekpakpa shiɛlɔ.” Kɛ́ osumɔɔ mɛi krokomɛi ni amɛ hu amɛsumɔɔ bo lɛ, no hu haa onáa miishɛɛ. No hewɔ lɛ, nyɛtsimɔa mɛi krokomɛi atɔ̃mɔi anɔ moŋ fe nɔ ni nyɛaawie he. Nyɛfea mɛi krokomɛi ejurɔ, nyɛyea nyɛbuaa mɛi ni efee gbedee lɛ, nyɛgbaa mɛi niiashikpamɔi kpakpai. (Lala 41:2, 3; Bɔfoi lɛ Asaji 20:35) Kɛ́ wɔkɛ wɔnyɛmɔ fɛɛ tsu shiɛmɔ nitsumɔ lɛ, wɔbaaná miishɛɛ.—Luka 11:28.

Nyɛminuu Lösch mu esane lɛ naa akɛ, “Nyɛyaa akɛ maŋsɛɛ sanekpakpa shiɛlɔi ni yɔɔ miishɛɛ,  nyɛjiea nyɛhiɛtserɛ fioo pɛ, shi nyɛkɛ nyɛjwɛŋmɔ amaa wɔmiishɛɛ Nyɔŋmɔ ni ji Yehowa lɛ yijiemɔ kɛ agbɛnɛ hu mɛi krokomɛi babaoo ni nyɛaaha amɛná miishɛɛ lɛ nɔ.”

Beni Anthony Morris kɛ ŋamɔi ni maji komɛi kɛmaje lɛ eha sɛɛ lɛ, ekɛ skulbii lɛ ayijiemɔ woji ha amɛ. No sɛɛ lɛ, klas ni ji 126 lɛ mlibii lɛ ateŋ mɔ kome kane wolo ni amɛŋma kɛha Nɔyeli Kuu lɛ. Yɛ amɛwolo lɛ mli lɛ, amɛtsɔɔ bɔ ni amɛhiɛ esɔ Gilead Skul lɛ ni amɛba lɛ.

Beni sɛinɔtalɔ lɛ muɔ nifeemɔ lɛ naa lɛ, ekɛɛ akɛ “talɔi kɛ fãi” ni tsaraa gbɔmɔtso lɛ efeɔ lɛ ekome lɛ tamɔ gbɛjianɔtoi ni “tsulɔ anɔkwafo kɛ nilelɔ” lɛ kɛtsuɔ nii koni ekɛlɛ̀ Yehowa webii lɛ ni ekɛtsɔɔ amɛgbɛ lɛ. (Kolosebii 2:18, 19; Mateo 24:45) Kɛ́ mɛi ni egbe Gilead Skul lɛ naa lɛ kɛ Nyɔŋmɔ najiaŋdamɔlɔi ni ehole amɛ lɛ fee ekome kɛmɔ shi lɛ, amɛbaagbe amɛsɔɔmɔ lɛ naa kwraa yɛ omanyeyeli mli.—2 Timoteo 4:5.—w09 09/01-E.

[Akrabatsa ni yɔɔ baafa 30]

KLASBII LƐ AHE SAJI

Maji srɔtoi anɔ ni amɛjɛ kɛba: 6

Maji srɔtoi anɔ ni aha amɛ nitsumɔ yɛ: 22

Skulbii lɛ ayifalɛ: 56

Mɛi ni ebote gbalashihilɛ mli lɛ ayibɔ: 28

Amɛfii lɛ mlijaa: 32.8

Afii abɔ ni amɛkɛhi anɔkwale lɛ mli lɛ mlijaa: 17.9

Afii abɔ ni amɛkɛhi be-fɛɛ sɔɔmɔ nitsumɔ lɛ mli lɛ mlijaa: 13.5

HEI NI AHA KLASBII LƐ NITSUMƆ YƐ

Aha mɛi ni egbe Gilead naa lɛ nitsumɔ yɛ Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ne Uganda.

[Mfoniri ni yɔɔ baafa 31]

Buu-Mɔɔ Gilead Biblia Skul Klasbii ni Ji 126 ní Gbe Nikasemɔ Naa Lɛ

Nɔmbai ni yɔɔ gbɛi lɛ ahe lɛ tsɔɔ bɔ ni amɛdamɔ shi amɛha, kɛjɛ hiɛgbɛ kɛmiiya sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.