Saji ni Mɛi ni Kaneɔ lɛ Biɔ

Mɛni Hewɔ Yehowa Odasefoi Eyaaa Ta Lɛ?

Ale Yehowa Odasefoi yɛ he fɛɛ he ni amɛyɔɔ kɛjɛ jeeŋmɔ akɛ, amɛkɛ amɛhe wooo heloonaa tawuu ni yaa nɔ yɛ majimaji ateŋ loo nɔ ni yaa nɔ yɛ kui srɔtoi ni yɔɔ maŋ ko mli lɛ ateŋ lɛ mli. Afii nyɔŋmai enumɔ ni eho nɛ lɛ, Australian Encyclopædia lɛ kɛɛ akɛ: “Kɛ́ aawu ta lɛ, Yehowa Odasefoi kɛ amɛhe wooo mli kwraa.”

Yiŋtoo titri hewɔ ni Odasefoi lɛ kɛ amɛhe wooo tai amli ji akɛ, nakai feemɔ kɛ amɛ-Kristofoi ahenilee lɛ kpãaa gbee. Amɛhaa Nuŋtsɔ Yesu Kristo kitai lɛ kɛ enɔkwɛmɔnɔ lɛ tsɔseɔ amɛhenilee lɛ. Yesu fã esɛɛnyiɛlɔi lɛ koni amɛsumɔ amɛnanemɛi gbɔmɛi. Efã amɛ hu akɛ: “Nyɛsumɔa nyɛhenyɛlɔi; nyɛfea mɛi ní he tsɛ̃ɔ nyɛ lɛ ejurɔ [daa].” (Luka 6:27; Mateo 22:39) Beni ekaselɔi lɛ ateŋ mɔ kome bɔ mɔdɛŋ ni ekɛ klante afã Yesu he lɛ, Yesu kɛɛ lɛ akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:52) No hewɔ lɛ, Yesu tsɔ ewiemɔ kɛ enifeemɔ nɔ eha efee faŋŋ kɛha esɛɛnyiɛlɔi lɛ akɛ, esaaa akɛ amɛkɛ heloonaa tawuu nibii tsuɔ nii.

Yiŋtoo kroko hewɔ ni Yehowa Odasefoi eyaaa ta lɛ ji akɛ, amɛjamɔ lɛ mli bii yɛ je lɛŋ he fɛɛ he. Kɛ́ amɛkɛ amɛhe wo tawuu mli lɛ, ebaaha amɛgbe amɛnyɛmimɛi Kristofoi lɛ, ni enɛ teɔ shi ewoɔ Yesu famɔ akɛ ‘amɛsumɔsumɔɔ amɛhe lɛ.’—Yohane 13:35.

Yehowa Odasefoi ewieee suɔmɔ he shishitoo mlai ni atsĩ tã kɛtsɔ hiɛ lɛ ahe kɛkɛ, shi moŋ amɛhiɔ shi yɛ naa. Anaa enɛ he nɔkwɛmɔnɔ yɛ bɔ ni amɛfee amɛnii amɛha beni awuɔ Jeŋ Ta II lɛ, kɛjɛ afi 1939-1945 lɛ mli. Yɛ United States lɛ, awo Yehowa Odasefoi ni fa fe 4,300 tsuŋ akɛni amɛkpoo akɛ amɛkɛ amɛhe baawo ta ni yaa nɔ lɛ mli lɛ hewɔ. Yɛ Britain lɛ, awo amɛteŋ mɛi ni fa fe 1,500 ni yei ni fa fe 300 fata he lɛ tsuŋ akɛni amɛkpoo akɛ amɛkɛ amɛhe baawo ta ni yaa nɔ lɛ mli lɛ hewɔ. Nazi nɔyeli lɛ ni yeɔ Germany nɔ yɛ nakai beaŋ lɛ ha agbe Odasefoi ni fa fe 270, ejaakɛ amɛkpoo akɛ amɛkɛ amɛhe baawo ta ni yaa nɔ lɛ mli. Beni Nazi nɔyeli lɛ yeɔ nɔ lɛ, awo Odasefoi ni fa fe 10,000 kpabuŋ yɛ tsuŋwoohei srɔtoi loo yɛ yiwalɛ ŋsarai amli. Awa Odasefoi ni yɔɔ Japan lɛ hu ayi yɛ nakai gbɛ nɔŋŋ nɔ. Mɛi fɛɛ ni amɛsuɔlɔ ko gbo yɛ Jeŋ Ta II lɛ mli lɛ loo tai krokomɛi ni ba yɛ no sɛɛ lɛ amli lɛ baanyɛ aná nɔmimaa akɛ, anyɛŋ ashwa Yehowa Odasefoi lɛ ateŋ mɔ ko kwraa yɛ gbelei nɛɛ ahe.

Wiemɔi ni Wolfgang Kusserow wie dani agbe lɛ lɛ gbalaa susumɔ ni Yehowa Odasefoi hiɛ yɛ tawuu he lɛ mli jogbaŋŋ. Yɛ afi 1942 mli lɛ, Nazibii lɛ fó oblanyo nɛɛ ni ji Germanynyo ni eye afii 20 lɛ yi, ejaakɛ ekpoo akɛ ekɛ ehe baawo ta ni yaa nɔ lɛ mli. (Yesaia 2:4) Ewie yɛ asraafoi ni yeɔ esane lɛ ahiɛ akɛ: “Akɛ Nyɔŋmɔ wiemɔ ni yɔɔ Ŋmalɛ Krɔŋkrɔŋ lɛ mli lɛ tsɔse mi ákɛ Yehowa Odasefonyo. Kita wulu fe fɛɛ kɛ nɔ ni yɔɔ krɔŋŋ fe fɛɛ ni Nyɔŋmɔ kɛha adesai ji: ‘Suɔmɔ o-Nyɔŋmɔ lɛ fe nɔ fɛɛ nɔ, ni osumɔ onaanyo tamɔ bɔ ni osumɔɔ bo diɛŋtsɛ ohe.’ Ekitai krokomɛi hu kɛɔ akɛ: ‘Kaagbe gbɔmɔ.’ Ani wɔ-Bɔlɔ lɛ ha aŋmala enɛɛmɛi fɛɛ ashwie shi kɛha tsei koni amɛye nɔ?”—Marko 12:29-31; 2 Mose 20:13.

Yehowa Odasefoi heɔ amɛyeɔ akɛ, Yehowa ni ji Nyɔŋmɔ ofe lɛ pɛ baanyɛ ekɛ toiŋjɔlɛ ni sɛɛ efooo aba shikpɔŋ lɛ nɔ. Amɛyɛ hiɛnɔkamɔ akɛ ebaaye eshiwoo akɛ ebaaha ‘tai asɛɛ afo kɛyashi shikpɔŋ lɛ naagbeehei lɛ’ nɔ.—Lala 46:10.