Bɔ ni Ooofee Otsɔ Nyɔŋmɔ Bii lɛ Ateŋ Mɔ Kome

AAAFEE afii 30 sɛɛ beni Korea Ta lɛ eba naagbee lɛ, Korea Adafitswaa Nitsumɔhe lɛ to gbɛjianɔ koni aye abua mɛi ni ta lɛ gbala amɛkɛ amɛwekumɛi ateŋ lɛ koni amɛkɛtao he ni amɛ mɛi lɛ yɔɔ. Mɛni jɛ enɛ feemɔ mli ba? Mɛi ni fa fe 11,000 na amɛsuɔlɔi lɛ ekoŋŋ, ni amɛkɛ yaafonui, mlifilimɔi, kɛ fuamɔi fɛɛ kpee amɛ. Korea Times lɛ bɔ amaniɛ akɛ: “Nɔ ko bako yɛ Koreabii lɛ ayinɔsane mli ni eha miishɛɛ yaafonui ekpala yɛ mɛi babaoo ahiŋmɛiiaŋ yɛ be kome too lɛ mli tamɔ nɛkɛ pɛŋ.”

Yɛ Brazil lɛ, akɛ Cézar ni no mli lɛ eji abifao lɛ yaha mɔ ko kɛwo nyɔmɔ ko ni ahiɛ lɛ lɛ. Aaafee afii nyɔŋma sɛɛ lɛ, emii shɛ ehe waa akɛ ena enyɛ awo, aahu akɛ eshi fɔlɔi niiatsɛmɛi ni ŋɔ lɛ akɛ amɛbi lɛ ni ekɛ enyɛ diɛŋtsɛ ni fɔ lɛ lɛ yahi shi.

Kɛ́ weku mlibii amli gbala loo amɛlaaje ni sɛɛ mli lɛ amɛna amɛhe ekoŋŋ lɛ, kwɛ bɔ ni amɛmii shɛɔ amɛhe jogbaŋŋ! Biblia lɛ tsɔɔ bɔ ni fee ni adesai tse amɛhe yɛ gbɛ ni yɔɔ oshara nɔ kɛjɛ Nyɔŋmɔ weku lɛ he lɛ mli. Etsɔɔ bɔ ni amrɔ nɛɛ aafee amɛ ekome yɛ miishɛɛ mli hu. Te fee tɛŋŋ ni ebalɛ nakai? Ni te ooofee tɛŋŋ oná nakai miishɛɛ lɛ eko?

Bɔ ni Fee ni Nyɔŋmɔ Weku lɛ Mli Gbala

Lalatsɛ lɛ wie yɛ Yehowa Nyɔŋmɔ, ni ji Bɔlɔ lɛ he akɛ: “Bo oŋɔɔ wala nubu yɔɔ.” (Lala 36:10) Yehowa ji jeŋ muu fɛɛ weku ni bɔɔ nii ni yɔɔ nilee ni yeɔ lɛ anɔkwa yɔɔ mli lɛ a-Tsɛ. Nakai eweku lɛ fã yɛ ŋwɛi ni fã hu yɛ shikpɔŋ lɛ nɔ. Mɛi ni feɔ nakai weku lɛ fã ni yɔɔ ŋwɛi ji ŋwɛibɔfoi ni ji emumɔŋ bii lɛ, ni mɛi ni feɔ nakai weku lɛ fã ni yɔɔ shikpɔŋ lɛ nɔ lɛ ji adesai ni bafee eshikpɔŋ lɛ nɔ bii lɛ.

Beni Nyɔŋmɔ klɛŋklɛŋ bi ni ji Adam tse atua taakɛ atsɔɔ mli yɛ sane ni tsɔ hiɛ lɛ mli lɛ, adesai aweku lɛ kɛ amɛ-Tsɛ kɛ Bɔlɔ ni yɔɔ suɔmɔ lɛ teŋ gbala yɛ gbɛ ni yɔɔ mɔbɔ nɔ. (Luka 3:38) Nɔ hewɔ ni ebalɛ nakai ji akɛ, yɛ Adam atuatsemɔ lɛ hewɔ lɛ, hegbɛ ni eyɔɔ akɛ Nyɔŋmɔ bi lɛ ŋmɛɛ lɛ kɛ eshwiei fɛɛ ni anako afɔ́ amɛ lɛ. Nyɔŋmɔ tsɔ etsulɔ Mose nɔ eha ale nɔ ni jɛ atuatsemɔ nɛɛ mli kɛba akɛ: “Amɛye lɛ sane fɔŋ, jeee [Nyɔŋmɔ] bii ni, amɛ diɛŋtsɛ amɛhe kpa ni.” “Kpa” lɛ loo esha ni adesai fee lɛ gbala  amɛkɛ Nyɔŋmɔ ni yɔɔ krɔŋkrɔŋ ni eye emuu kɛmɔ shi lɛ teŋ. (5 Mose 32:4, 5; Yesaia 6:3) Belɛ, yɛ shishinumɔ ko naa lɛ, adesai laaje ni amɛbɛ tsɛ.—Efesobii 2:12.

Biblia lɛ tsɛɔ mɛi ni bɛ Nyɔŋmɔ weku lɛ mli lɛ akɛ “henyɛlɔi” kɛtsɔɔ bɔ ni adesai etse amɛhe kwraa kɛjɛ Nyɔŋmɔ he lɛ mli. (Romabii 5:8, 10) Akɛni adesai etse amɛhe kɛjɛ Nyɔŋmɔ he hewɔ lɛ, amɛna nɔ̃ yɛ Satan yiwalɛ nɔyeli lɛ shishi, ni nɔ ni ejɛ esha ni amɛná kɛjɛ fɔmɔ mli kɛ emuu ni ayeee lɛ mli kɛba lɛ hu epiŋ amɛ waa. (Romabii 5:12; 1 Yohane 5:19) Ani adesai eshafeelɔi baanyɛ abatsɔ Nyɔŋmɔ weku lɛ mlibii? Ani bɔɔ nii ni yeee emuu lɛ baanyɛ abatsɔmɔ Nyɔŋmɔ bii ni eye emuu kɛmɔ shi, taakɛ Adam kɛ Hawa ji dani amɛfee esha lɛ?

Bii ni Etse Amɛhe lɛ Anaabuamɔ

Miishɛɛ sane ji akɛ, Yehowa to gbɛjianɔ ko ni he yɔɔ sɛɛnamɔ kɛha adesai ni yeee emuu ni sumɔɔ lɛ lɛ. (1 Korintobii 2:9) Bɔfo Paulo tsɔɔ mli akɛ: “Nyɔŋmɔ tsɔ Kristo nɔ ekpata lɛ diɛŋtsɛ ekɛ je lɛ teŋ, ni ebuuu amɛ nɔtɔmɔi lɛ ehaaa amɛ.” (2 Korintobii 5:19) Taakɛ atsɔɔ mli yɛ sane ni tsɔ hiɛ lɛ mli lɛ, Yehowa Nyɔŋmɔ kɛ Yesu Kristo ha akɛ kpɔmɔnɔ kɛha wɔhe eshai lɛ. (Mateo 20:28; Yohane 3:16) Bɔfo Yohane kɛ hiɛsɔɔ ŋma akɛ: “Nyɛkwɛa suɔmɔ bɔ sɔŋŋ ni tsɛ lɛ eŋɔsumɔ wɔ, akɛ atsɛ wɔ Nyɔŋmɔ bii.” (1 Yohane 3:1) Enɛ gbele gbɛ kɛha adesai ni feɔ toiboo lɛ koni amɛbatsɔmɔ Yehowa weku lɛ mlibii ekoŋŋ.

Eyɛ mli akɛ adesai fɛɛ ni abuaa amɛnaa awoɔ Nyɔŋmɔ weku lɛ mli lɛ baahi shi yɛ ekomefeemɔ ni nɔ bɛ mli yɛ amɛŋwɛi Tsɛ lɛ kwɛmɔ shishi moŋ, shi kadimɔ bɔ nɔ ni Biblia lɛ tsɔɔ akɛ aabua amɛnaa aawo kui srɔtoi enyɔ mli lɛ. Wɔkaneɔ akɛ: ‘[Nyɔŋmɔ] eto eyiŋ yɛ emli eha bei lɛ ayinɔ lɛ gbɛjianɔtoo, koni eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ.’ (Efesobii 1:9, 10) Mɛni hewɔ ni Nyɔŋmɔ toɔ nibii ahe gbɛjianɔ yɛ gbɛ ni tamɔ nɛkɛ nɔ lɛ?

Yɛ anɔkwale mli lɛ, bɔ ni Yehowa toɔ ebii lɛ ahe gbɛjianɔ ewoɔ kui enyɔ mli lɛ yeɔ ebuaa ni gbeekpamɔ hiɔ eweku lɛ mli. Ewaaa kwraa akɛ wɔɔle yiŋtoo hewɔ ni ebaalɛ nakai lɛ. Nyɔŋmɔ weku lɛ da aahu akɛ, abaanyɛ akɛto maŋ he. Yɛ maŋ fɛɛ maŋ nɔ lɛ, ahalaa mɛi fioo ni akɛ amɛ toɔ nɔyeli shishi bɔni afee ni mɛi ni eshwɛ lɛ anyɛ aná mla kɛ gbɛjianɔtoo kpakpa he sɛɛ. Eji anɔkwale akɛ, adesai anɔyeli ko bɛ ni enyɛ eha eshishibii lɛ ená toiŋjɔlɛ diɛŋtsɛ, shi Nyɔŋmɔ eto nɔyeli ni yeɔ emuu diɛŋtsɛ shishi eha eweku lɛ. Klɛŋklɛŋ kuu lɛ, ni ji “nii ni yɔɔ ŋwɛi” lɛ ji Nyɔŋmɔ bii ni Yehowa hala kɛto nɔyeli loo Maŋtsɛyeli shishi yɛ ŋwɛi lɛ. Amɛbaajɛ jɛmɛ ‘amɛye nɔ akɛ maŋtsɛmɛi yɛ shikpɔŋ lɛ nɔ.’—Kpojiemɔ 5:10.

Nyɔŋmɔ Bii ni Yɔɔ Shikpɔŋ lɛ Nɔ

Yehowa miibua “nii ni yɔɔ shikpɔŋ lɛ nɔ” ni ji mɛi akpekpei abɔ ni yɔɔ je lɛŋ fɛɛ lɛ anaa, koni yɛ naagbee lɛ amɛbatsɔmɔ eshikpɔŋ lɛ nɔ bii. Ákɛ Tsɛ ni mli hi lɛ, etsɔɔ amɛ esuɔmɔ gbɛ̀i lɛ bɔni afee ni amɛnyɛ amɛhi shi yɛ gbeekpamɔ kɛ ekomefeemɔ mli, ekɔɔɔ he eko maji anɔ ni amɛjɛ. Aafɔ̃ yiwalɔi, ŋkomeŋfatsɛmɛi, mɛi ni baa jeŋba shara, kɛ Nyɔŋmɔ nɔ toigbolɔi po anine ni ‘amɛha akpata amɛ kɛ Nyɔŋmɔ teŋ.’—2 Korintobii 5:20.

Ni mɛi ni ekpɛlɛɛɛ ninefɔɔ ni Nyɔŋmɔ kɛhaa koni akpata amɛkɛ lɛ teŋ lɛ nɔ, ni amɛbatsɔmɔ ebii lɛ nɔ hu? Yehowa kɛ mɛi nɛɛ baaye kɛ hiɛdɔɔ, bɔni afee ni toiŋjɔlɛ kɛ ekomefeemɔ anyɛ ahi eweku lɛ mli. “Kojomɔ kɛ gbɔmɛi ní kwá Nyɔŋmɔ lɛ ahiɛkpatamɔ gbi” miiba. (2 Petro 3:7) Nyɔŋmɔ baajie atuatselɔi fɛɛ yɛ shikpɔŋ lɛ nɔ. Mɛɛ hejɔlɛ po mɛi ni feɔ toiboo lɛ aaaná nɛkɛ!—Lala 37:10, 11.

Yɛ enɛ sɛɛ lɛ, afii akpe ni toiŋjɔlɛ yɔɔ mli baaba, ni no beaŋ lɛ, abaaye abua mɛi fɛɛ ni kpɛlɛ Nyɔŋmɔ suɔmɔ lɛ nɔ lɛ fiofio kɛshɛ wala ni yeɔ emuu ni ŋmɛɛ Adam lɛ he. Abaatee mɛi ni egboi lɛ po ashi. (Yohane 5:28, 29; Kpojiemɔ 20:6; 21:3, 4) Nakai beaŋ lɛ Nyɔŋmɔ baatsu eshiwoo nɛɛ he nii, akɛ: “Bɔɔ nii lɛ [adesai] diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”—Romabii 8:21.

 Bɔ ni Ooofee Okɛ Oŋwɛi Tsɛ lɛ Afee Ekome

Ehe bahia ni Cézar kɛ Koreabii akpei abɔ ni atsĩ amɛtã yɛ sane nɛɛ shishijee mli lɛ afee nɔ ko bɔni afee ni amɛkɛ amɛweku mlibii lɛ akpe ekoŋŋ. Ehe bahia ni mɛi ni yɔɔ Korea lɛ akpɛlɛ gbɛjianɔtoo lɛ nɔ, ni Cézar hu shi fɔlɔi ni ŋɔ lɛ fee amɛbi lɛ. Nakai nɔŋŋ ekolɛ ebaabi ni okpɛ oyiŋ koni oha akpata okɛ oŋwɛi Tsɛ lɛ, ni ji Yehowa Nyɔŋmɔ teŋ, bɔni afee ni obatsɔ eweku lɛ mlinyo. Mɛni esa akɛ ofee?

Bɔni afee ni onyɛ obɛŋkɛ Nyɔŋmɔ akɛ o-Tsɛ lɛ, esa akɛ okase e-Wiemɔ ni ji Biblia lɛ, koni no aye abua bo ni oná hemɔkɛyeli ni mli wa yɛ Nyɔŋmɔ kɛ eshiwoi lɛ amli. No baaha ona akɛ, bo diɛŋtsɛ ohilɛ-kɛhamɔ hewɔ ni Nyɔŋmɔ kɛɔ bo akɛ ofee nɔ ni ekɛɔ bo lɛ. Ehe baahia hu ni okpɛlɛ jajemɔ kɛ tsɔsemɔ ni Nyɔŋmɔ kɛhaa lɛ nɔ, ejaakɛ Biblia lɛ kɛɔ Kristofoi akɛ: “Nyɔŋmɔ hiɛɔ nyɛ tamɔ ebii; ejaakɛ mɛɛ bi yɔɔ ni etsɛ tsɔseee lɛ?”—Hebribii 12:7.

Gbɛ ni tamɔ nɛkɛ ni obaakɔ lɛ baatsake oshihilɛ fɛɛ. Biblia lɛ kɛɔ akɛ: ‘Nyɛtsɔmɔa mɛi heei yɛ nyɛjwɛŋmɔ mumɔ lɛ mli, ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.’ (Efesobii 4:23, 24) No sɛɛ lɛ, okɛ ŋaawoo ni bɔfo Petro kɛha nɛɛ atsu nii: “Nyɛfea nyɛhe tamɔ bii toibolɔi, ní nyɛkaba nyɛjeŋ yɛ sá beni nyɛleee nɔ ko lɛ mli akɔnɔi lɛ anaa dɔŋŋ.”—1 Petro 1:14.

Bɔ ni Ooofee Ona Oweku lɛ Diɛŋtsɛ

Beni Cézar na lɛ diɛŋtsɛ enyɛ awo lɛ, emii shɛ ehe waa diɛŋtsɛ akɛ asomoaŋ lɛ hu eyɛ nyɛmi nuu kɛ nyɛmi yoo. Nakai nɔŋŋ hu kɛji otsi obɛŋkɛ oŋwɛi Tsɛ lɛ, obaana akɛ oyɛ nyɛmimɛi hii kɛ yei babaoo yɛ Kristofoi asafo lɛ mli. Beni okɛ amɛ bɔɔ lɛ, ekolɛ obaayɔse akɛ amɛbɛŋkɛɔ bo gbagbalii po fe oheloonaa weku lɛ mlibii.—Bɔfoi lɛ Asaji 28:14, 15; Hebribii 10:24, 25.

Aafɔ̃ bo nine koni okɛ o-Tsɛ diɛŋtsɛ kɛ onyɛmimɛi hii kɛ yei diɛŋtsɛ lɛ abafee ekome. Miishɛɛ ni obaaná lɛ baanyɛ afa babaoo tamɔ nɔ ni Cézar kɛ Koreabii akpei abɔ lɛ ná beni amɛkɛ amɛwekumɛi lɛ yafee ekome ekoŋŋ lɛ.

[Mfoniri ni yɔɔ baafa 8]

Cézar ni eye afii 19 kɛ enyɛ awo

[Mfonirii ni yɔɔ baafa 10]

Too gbɛjianɔ koni otsi obɛŋkɛ Nyɔŋmɔ