Abu Mɛi Ni Afeɔ Amɛ Niseniianii Lɛ Bem

YƐ May 3, afi 2007 lɛ, kojolɔi ni yɔɔ Europabii a-Saneyelihe ni Ayeɔ Hegbɛi ni Adesai Yɔɔ lɛ Ahe Saji yɛ ni yɔɔ Strasbourg, France lɛ fɛɛ bu Yehowa Odasefoi ni yɔɔ Republic of Georgia lɛ bem. Saneyelihe lɛ na ákɛ akɛ Odasefoi lɛ eye yɛ gbɛ ni esaaa kwraa nɔ, ni ákɛ akũ heyeli hegbɛ ni amɛyɔɔ lɛ mli. Saneyelihe lɛ hu wie eshi Georgia nɔyeli ni tsɔ hiɛ lɛ akɛni efeee nɔ ko kɛgbalaaa efɔŋfeelɔi lɛ atoi lɛ hewɔ. Mɛni ha amɛkpɛ yiŋ ni tamɔ nakai?

Yɛ October 17, afi 1999 lɛ, no mli lɛ Gldani Asafo ni ji Yehowa Odasefoi asafo ko ni yɔɔ Georgia maŋtiase Tbilisi lɛ mli ni mlibii aaafee 120 lɛ ekpe yɛ toiŋjɔlɛ mli kɛha jámɔ. Kɛkɛ ni trukaa lɛ, basabasafeelɔi akuu ko kɛ emlibii babaoo ni Vasili Mkalavishvili ni ji Ɔtodɔks osɔfo ko ni akpa lɛ osɔfoyeli lɛ ji amɛhiɛnyiɛlɔ lɛ kɛ gidigidifeemɔ bote heni afeɔ kpee lɛ yɛ lɛ. Basabasafeelɔi akuu nɛɛ ni hiɛ tsei kɛ dadei ni akɛfee krɔs lɛ kɛ yitsoŋwalɛ yatutua mɛi ni eba kpee lɛ, ni amɛpila amɛteŋ mɛi babaoo waa diɛŋtsɛ. Tutuamɔ nɛɛ ha yei lɛ ateŋ mɔ kome hiŋmɛi fite kwraa. Kɛ́ hooo kwraa lɛ ehe bahia ni akɛ mɛi 16 aya helatsamɔhe. Beni Odasefoi lɛ ateŋ mɛi komɛi tee polisifoi lɛ aŋɔɔ kɛha yelikɛbuamɔ lɛ, polisi onukpa lɛ kɛɛ amɛ akɛ eji mi ni kulɛ mafee nyɛ nɔ ni fe nakai! Tutualɔi lɛ ateŋ mɔ kome shá nɔ ni tee nɔ lɛ, ni sɛɛ mli lɛ ajie enɛ atsɔɔ yɛ maŋ lɛŋ tɛlivishiŋ srɔtoi lɛ anɔ, ni enɛ ha ana mɛi tuuntu ni yatutua Odasefoi lɛ. *

Odasefoi ni atutua amɛ lɛ yasama awuiyelɔi lɛ, shi agbalaaa awuiyelɔi nɛɛ atoi. Polisifonyo ni afã lɛ akɛ eyatao sane lɛ mli lɛ kɛɛ akɛ Ɔtodɔksnyo ji lɛ ni no hewɔ lɛ enyɛŋ etsu sane lɛ he nii ni ekwɛɛɛ hiɛaŋ. Akɛni maŋ lɛŋ onukpai lɛ efeee sane lɛ he nɔ ko hewɔ lɛ, enɛ wo mɛi ni feɔ keketee yɛ jamɔ saji ahe lɛ hewalɛ ni amɛtee nɔ amɛkɛ tutuamɔi ni tamɔ nakai ni fe oha ba Odasefoi lɛ anɔ.

Yɛ June 29, afi 2001 lɛ, Yehowa Odasefoi lɛ kɛ sane lɛ yaha Europabii a-Saneyelihe ni Ayeɔ Hegbɛi ni Adesai Yɔɔ lɛ Ahe Saji yɛ lɛ koni amɛye amɛha amɛ. * Saneyelihe lɛ kɛ naagbee kojomɔ ha yɛ May 3, afi 2007, ni yɛ sane lɛ buamɔ mli lɛ Saneyelihe lɛ tsɔɔ bɔ ni tutuamɔ lɛ tee nɔ eha lɛ mli fitsofitso ni ebu Georgia maŋsɔɔlɔi lɛ fɔ́ akɛni amɛfeee nɔ ko kɛtsiii nakai nifeemɔ lɛ naa lɛ hewɔ. Saneyelihe lɛ tsɔɔ mli akɛ: “Eji maŋsɔɔlɔi lɛ . . . agbɛnaa akɛ kulɛ amɛtsu sane” ni kɔɔ tutuamɔ lɛ he lɛ “he nii amrɔ nɔŋŋ kɛtao anɔkwale ni yɔɔ sane lɛ mli.” Saneyelihe lɛ kɛɛ yɛ amɛyiŋkpɛɛ lɛ mli akɛ “tutuamɔ lɛ he nii ni maŋsɔɔlɔi lɛ eyatsuuu lɛ haŋ maŋbii lɛ aná hekɛnɔfɔɔ yɛ jalɛsaneyeli he gbɛjianɔtoo ni akɛkudɔɔ maŋ lɛ mli, ni nakai nɔŋŋ amɛnaŋ hekɛnɔfɔɔ hu yɛ mla kɛ nitsumɔ mli.”

Saneyelihe lɛ mu sane naa akɛ: “Akɛni nɔyeli lɛ kũ amɛhiɛ amɛshwie klɛŋklɛŋ tutuamɔ ni naa wa ni akɛba Yehowa Odasefoi lɛ anɔ yɛ October 17, afi 1999 lɛ, ni amɛgbalaaa tutualɔi lɛ atoi hewɔ lɛ, enɛ wo tutualɔi nɛɛ hewalɛ ni amɛtee nɔ amɛha jamɔ mli basabasafeemɔ gbɛ eshwã Georgia maŋ lɛ mli fɛɛ.”

Enɛ hewɔ lɛ abu mɛi ni afee amɛ niseniianii lɛ bem, ni afã Georgia nɔyeli lɛ koni ewo mla naa shika ko eha Gldani Asafo lɛ mlibii lɛ yɛ amɛhe guɔ ni agbe kɛ amɛnibii ni afite lɛ hewɔ. Yɛ be mli ni Yehowa Odasefoi ni yɔɔ Georgia lɛ amii eshɛ amɛhe akɛ yiwalɛ kɛ basabasafeemɔ lɛ naa eba shi lɛ, amɛmii shɛɔ amɛhe jogbaŋŋ hu akɛ Saneyelihe lɛ yiŋkpɛɛ lɛ eha amɛná hegbɛ koni amɛnyɛ amɛkpe yɛ toiŋjɔlɛ mli kɛha jamɔ. Amɛdaa Yehowa Nyɔŋmɔ ni ji amɛŋwɛi Tsɛ lɛ shi kɛha ehebuu kɛ gbɛtsɔɔmɔ yɛ nakai yiwalɛ be lɛ mli.—Lala 23:4.

[Shishigbɛ niŋmai]