Nɛgbɛ Wɔjɛ?

MƐNI HEWƆ HETOO LƐ HE HIAA LƐ? Atsɔɔ mɛi babaoo akɛ nibii ni wala yɔɔ amɛmli ni yɔɔ shikpɔŋ lɛ nɔ lɛ ba shihilɛ mli trukaa. Nɔ ni akɛɔ amɛ ji akɛ adesai aweku ni yɔɔ henumɔi, nilee, kɛ nyɛmɔi ni akɛtaoɔ nɔ hewɔ ni wɔyɔɔ shihilɛ mli lɛ ba trukaa kɛtsɔ sutsakemɔ gbɛ̀i srɔtoi anɔ.

Shi bo lɛ susumɔ enɛ he okwɛ: Kɛji sutsakemɔ nɔ wɔtsɔ kɛba shihilɛ mli, ni Bɔlɔ ko hu bɛ lɛ, no lɛ yɛ shishinumɔ ko naa lɛ awusãi ji wɔ. No baatsɔɔ akɛ adesai naŋ mɔ ko ni yɔɔ nilee kwraa fe amɛ ni baawo amɛ ŋaa—ni wɔnaŋ mɔ ko hu ni baaye abua wɔ kɛtsu wɔnaagbai lɛ ahe nii. Kulɛ enɛ baabi ni wɔkɛ wɔhe afɔ̃ adesai anilee nɔ kɛtsu shihilɛ mli osharai, maŋkwramɔŋ béi, kɛ wɔ diɛŋtsɛ wɔnaagbai ahe nii.

Ani susumɔi ni tamɔ nɛkɛ lɛ haa otoiŋ jɔɔ bo? Kɛ́ hetoo lɛ ji dabi lɛ, belɛ susumɔ nɔ kroko ni baanyɛ aha oná toiŋjɔlɛ lɛ he okwɛ. Jeee akɛ nakai feemɔ sa kɛkɛ, shi moŋ jwɛŋmɔ yɛ mli hu akɛ ooofee nakai.

Nɔ ni Biblia lɛ Kɛɔ

Biblia lɛ tsɔɔ akɛ Nyɔŋmɔ ji mɔ ni bɔ adesai. Jeee sutsakemɔ ni jwɛŋmɔ bɛ mli, ni asaŋ etsɔɔɔ suɔmɔ lɛ nɔ atsɔ afee wɔ. Nɔ ni tamɔɔɔ nakai lɛ, wɔji Tsɛ ni yɔɔ nilee kɛ suɔmɔ lɛ bii. Kadimɔ wiemɔi nɛɛ ni mli kã shi faŋŋ ni awie yɛ Biblia lɛ mli lɛ.

1 Mose 1:27. “Nyɔŋmɔ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.”

Lala 139:14. “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.”

Mateo 19:4-6. “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, “nuu kɛ yoo ebɔ amɛ”? Ni ekɛɛ: “Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.” Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.”

 Bɔfoi lɛ Asaji 17:24, 25. “Nyɔŋmɔ ni fee je lɛ kɛ emli nibii fɛɛ, ni ji ŋwɛi kɛ shikpɔŋ nuŋtsɔ lɛ, ehiii sɔlemɔtsui ni akɛ niji fee mli, ni asaŋ akɛ gbɔmɛi aniji jaaa lɛ, tamɔ mɔ ko ni nɔ ko fiɔ lɛ, lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.”

Kpojiemɔ 4:11. “Nuŋtsɔ [Yehowa], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”

Bɔ ni Hetoo ni Biblia lɛ Kɛhaa lɛ Haa Anáa Toiŋjɔlɛ Diɛŋtsɛ

Kɛji wɔná wɔle akɛ Nyɔŋmɔ nii ji “mɛi fɛɛ ni yɔɔ . . . shikpɔŋ lɛ nɔ lɛ,” ebaatsake bɔ ni wɔbuɔ mɛi krokomɛi wɔhaa. (Efesobii 3:15) Nilee ni tamɔ nɛkɛ ni wɔbaaná lɛ hu saa bɔ ni wɔbuɔ wɔ diɛŋtsɛ wɔhe kɛ wɔnaagbai lɛ wɔhaa lɛ ahe. Enɛ baaná wɔsusumɔi anɔ hewalɛ yɛ gbɛ̀i ni nyiɛ sɛɛ nɛɛ anɔ.

Kɛji wɔkɛ shihilɛi ni mli wawai kpe ni ebaabi ni wɔkpɛ wɔyiŋ yɛ he lɛ, wɔgbaŋ wɔhe naa tsɔ yɛ adesai asusumɔi ni ejaaa lɛ ahe. Yɛ no najiaŋ lɛ, wɔkɛ wɔhe baafɔ̃ Biblia mli ŋaawoi lɛ anɔ kwraa kɛmɔ shi. Mɛni hewɔ? Ejaakɛ “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.

Eji anɔkwale akɛ ebiɔ mɔdɛŋbɔɔ kɛ mɔ he tsɔsemɔ diɛŋtsɛ dani mɔ lɛ baanyɛ ekɛ Biblia mli ŋaawoi atsu nii. Bei komɛi lɛ, Biblia mli ŋaawoi ni wɔkɛaatsu nii lɛ baabi ni wɔfee nii yɛ gbɛ̀i ni ekolɛ ekɛ wɔsusumɔi kpaaa gbee nɔ. (1 Mose 8:21) Shi kɛlɛ, kɛji wɔkpɛlɛ nɔ akɛ ŋwɛi Tsɛ ko ni yɔɔ suɔmɔ ji mɔ ni bɔ wɔ lɛ, no lɛ ebafee nɔ ni nilee yɔɔ mli akɛ wɔɔmu sane naa akɛ lɛ ji mɔ ni le gbɛ ni hi fe fɛɛ ni esa akɛ wɔtsɔ nɔ. (Yesaia 55:9) No hewɔ lɛ, e-Wiemɔ lɛ kɛɔ wɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!” (Abɛi 3:5, 6) Kɛji wɔkɛ ŋaawoo nɛɛ tsu nii lɛ, ebaaha yeyeeye babaoo ni wɔfeɔ yɛ naagbai kɛ yiŋkpɛi ni wɔkɛkpeɔ lɛ ahewɔ lɛ sɛɛ afo.

Kɛji mɛi ahe tsɛ̃ɔ wɔ loo amɛkɛ wɔ yeee yɛ jalɛ naa lɛ, wɔŋmɛŋ gbɛ ni no aha wɔnu he akɛ wɔbaa shi fe mɛi krokomɛi, ni wɔsusu po akɛ kɛ́ akɛ wɔ to mɛi krokomɛi ni hiɛ hewolonɔ su kroko loo amɛjɛ weku kroko mli lɛ ahe lɛ, wɔhe bɛ sɛɛnamɔ ko kwraa. Yɛ no najiaŋ lɛ, ebaaha wɔná bulɛ ni ŋmɛɔ pɛpɛɛpɛ wɔha wɔhe. Mɛni hewɔ? Ejaakɛ Yehowa Nyɔŋmɔ ni ji wɔ-Tsɛ lɛ “jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.

Enɛ ni wɔɔle lɛ baaye abua wɔ koni wɔkaha hetsɛ̃ ná bɔ ni wɔkɛ mɛi krokomɛi yeɔ haa lɛ nɔ hewalɛ. Ebaaha wɔnu shishi akɛ esaaa akɛ wɔsusuɔ akɛ wɔhi fe mɛi krokomɛi ni hiɛ hewolonɔ su kroko lɛ, ejaakɛ Nyɔŋmɔ ŋɔ “lá kome efee gbɔmɛi adesai fɛɛ, ni amɛhi shikpɔŋ lɛ fɛɛ hiɛ.”—Bɔfoi lɛ Asaji 17:26.

Ekã shi faŋŋ akɛ, kɛ́ wɔná wɔle akɛ abɔ wɔ, ni ákɛ wɔ-Bɔlɔ lɛ susuɔ wɔhe waa lɛ, ebaaha wɔna nɔ ni wɔbaanyɛ wɔfee koni wɔná toiŋjɔlɛ diɛŋtsɛ. Shi kɛji wɔtoiŋ baajɔ wɔ diɛŋtsɛ lɛ, no lɛ ebaabi ni wɔfee nibii babaoo kɛfata he.

[Wiemɔ ni akɔ ni akɛmiitsu nii ni yɔɔ baafa 4]

Ani sutsakemɔ nɔ adesai tsɔ kɛba shihilɛ mli?

[Mfoniri ni yɔɔ baafa 5]

Kɛji wɔná wɔle akɛ wɔ-Bɔlɔ lɛ susuɔ wɔhe lɛ, ebaanyɛ eha wɔná toiŋjɔlɛ diɛŋtsɛ