Saji ni Mɛi ni Kaneɔ lɛ Biɔ

Mɛni Hewɔ Nyɔŋmɔ Ŋmɛɔ Piŋmɔ Gbɛ?

Jeee Nyɔŋmɔ ji mɔ ni haa adesai piŋɔ. Biblia lɛ kɛɔ akɛ: “Enɛ akagbale Mawu akɛ eeefee nɔ̃ fɔŋ.” (Hiob 34:10) Belɛ, namɔ ji mɔ titri ni haa mɛi piŋɔ lɛ mɔ?

Yesu tsɛ́ Satan akɛ “je lɛŋ lumɔ lɛ.” (Yohane 14:30) Eji anɔkwale akɛ, Yehowa ji Jeŋ Muu Fɛɛ Maŋtsɛ. Eŋmɛŋ nakai gbɛhe ni eyɔɔ lɛ he kɔkɔɔkɔ. Shi kɛlɛ, Nyɔŋmɔ eŋmɛ Satan gbɛ koni eye adesai babaoo anɔ kɛyashi be ko.—1 Yohane 5:19.

Mɛɛ nɔyelɔ nɛkɛ Satan ejie ehe kpo akɛ eji? Kɛjɛ beni Satan ná hegbɛ ekɛ adesai shãra klɛŋklɛŋ kwraa kɛbaa nɛɛ, eha ana akɛ eji gbɔmɔgbelɔ kɛ amalelɔ. Satan kɛ sakasakafeemɔ babaoo diɛŋtsɛ baa adesai aweku lɛ nɔ. Yesu wie wiemɔi nɛɛ eshi lɛ akɛ: “Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli, ejaakɛ anɔkwale bɛ emli. Kɛ́ eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔ tsɛ ji lɛ.” (Yohane 8:44) Yesu wie hu akɛ mɛi ni taoɔ lɛ agbe lɛ ji klɛŋklɛŋ gbɔmɔgbelɔ lɛ bii. Amɛfee amɛhe ebii akɛni amɛfee amɛnii tamɔ lɛ lɛ hewɔ. Abɛbua ko kɛɔ akɛ, kaa fɔɔɔ loofɔlɔ.

Satan kã he eewo adesai hewalɛ koni amɛná gbɔmɔgbee su. Ákɛ nɔkwɛmɔnɔ lɛ, R. J. Rummel ni ji tsutsu nilelɔ kpanaa yɛ Hawaii Univɛsiti, U.S.A. lɛ bu akɔntaa akɛ, kɛjɛ afi 1900 kɛyashi afi 1987 lɛ, nɔyelii srɔtoi gbe mɛi aaafee 169,198,000 yɛ nɔyelii ni maŋbii lɛ sumɔɔɔ dɔŋŋ lɛ abutumɔ mli, yɛ wiemɔ kuu pɔtɛɛ komɛi ashishibulemɔ mli, kɛ agbɛnɛ hu yɛ mɛi ni agbeɔ amɛ kɛkɛ ni yiŋtoo ko bɛ sɛɛ lɛ amli. Nakai mɛi ni agbe lɛ fataaa mɛi akpekpei nyɔŋmai abɔ ni agbe yɛ tai amli yɛ nakai afii lɛ nɔŋŋ amli lɛ he.

Kɛ́ jeee Nyɔŋmɔ ji mɔ ni haa mɛi piŋɔ lɛ, belɛ mɛni hewɔ eŋmɛɔ piŋmɔ gbɛ lɛ? Ejaakɛ esa akɛ ana saji komɛi ni atée amɛ shi afii babaoo ni eho nɛ, ni kɔɔ bɔɔ nii fɛɛ ni yɔɔ jeŋ muu lɛ fɛɛ mli lɛ ahe, yɛ nɔ ni ja kɛ nɔ ni ejaaa he lɛ naa lolo. Nyɛhaa wɔsusua saji nɛɛ ateŋ ekome pɛ he wɔkwɛa.

Yɛ adesai ashishijee mli lɛ, Adam kɛ Hawa yafi Satan sɛɛ. Amɛkpoo Nyɔŋmɔ nɔyeli lɛ ni amɛhala akɛ amɛaaye amɛ diɛŋtsɛ amɛhe nɔ, shi nɔ ni enɛ tsɔɔ diɛŋtsɛ ji akɛ Abonsam ji mɔ ni yeɔ amɛnɔ lɛ.—1 Mose 3:1-6; Kpojiemɔ 12:9.

Yehowa jalɛ shishitoo mlai lɛ bi koni aha be ashwie mli ni anyɛ aná odaseyelii babaoo ni baaha ana sane lɛ naa. Mɛɛ odaseyeli ni yɔɔ faŋŋ ejɛ mli kɛba? Ana akɛ piŋmɔ pɛ ji nɔ ni jɛɔ adesai anɔyeli ni yɔɔ Satan kudɔmɔ shishi lɛ mli kɛbaa. Yɛ anɔkwale mli lɛ, nɔ ni ejɛ be ni Nyɔŋmɔ ha eshwie mli lɛ mli kɛba lɛ eye ebua adesai waa. Yɛ mɛɛ gbɛ nɔ? Mɛi ni kaseɔ odaseyeli lɛ he nii ni amɛheɔ amɛyeɔ hu lɛ náa hegbɛ koni amɛkɛtsɔɔ akɛ amɛmiisumɔ ni Nyɔŋmɔ aye amɛnɔ. Mɛi ni kaseɔ Nyɔŋmɔ taomɔ nii lɛ ahe nii, ni asaŋ amɛhiɔ shi yɛ naa lɛ yɛ gbɛkpamɔ akɛ amɛaahi shi kɛya naanɔ.—Yohane 17:3; 1 Yohane 2:17.

Eji anɔkwale akɛ, amrɔ nɛɛ je lɛ yɛ Satan kudɔmɔ shishi. Shi esɛɛ etsɛŋ kwraa. Hɛɛ, etsɛŋ kwraa ni Yehowa baaha e-Bi lɛ ‘afite abonsam nitsumɔi lɛ.’ (1 Yohane 3:8) Yɛ Nyɔŋmɔ gbɛtsɔɔmɔ naa lɛ, Yesu baatsa tsuii ni ekumɔ lɛ ni ebaajie shihilɛi fɔji ni adesai kɛkpeɔ lɛ fɛɛ kɛya. Ebaatée adesai akpekpei toi akpei abɔ ni piŋ ni amɛgboi yɛ afii ohai abɔ ni eho lɛ amli lɛ shi kɛba wala mli ekoŋŋ yɛ shikpɔŋ lɛ nɔ.—Yohane 11:25.

Yesu ni Nyɔŋmɔ tée lɛ shi lɛ feɔ Abonsam nitsumɔi lɛ anɔ kunim ni Nyɔŋmɔ eye lɛ he nɔkwɛmɔnɔ—ni enɛ tsɔɔ nɔ ni adesai ni fiɔ Nyɔŋmɔ nɔyeli lɛ sɛɛ lɛ anine baashɛ nɔ lɛ he nɔ ko fioo kɛkɛ. (Bɔfoi lɛ Asaji 17:31) Biblia lɛ kɛ wiemɔi ni shɛjeɔ mɔ mii nɛɛ yeɔ ebuaa wɔ ni wɔnuɔ nɔ ni wɔnine baashɛ nɔ yɛ wɔsɛɛ be mli lɛ shishi jogbaŋŋ. Ekɛɔ akɛ: “Nyɔŋmɔ diɛŋtsɛ kɛ [adesai] aaahi shi. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.