Tsi Obɛŋkɛ Nyɔŋmɔ

Tsɛ ni Mɔ ko kɛ Lɛ Yeee Egbɔ

Mateo 3:16, 17

“WƆTSƐ.” Wiemɔi fioo komɛi teeɔ henumɔi ni mli wa shi yɛ adesai amli. Tsɛ ni sumɔɔ ebii jogbaŋŋ lɛ yeɔ ebuaa amɛ koni amɛye omanye. Belɛ yiŋtoo kpakpa hewɔ ni Biblia lɛ tsɛɔ Yehowa Nyɔŋmɔ akɛ “Wɔtsɛ” lɛ. (Mateo 6:9) Mɛɛ Tsɛ nɛkɛ Yehowa ji? Kɛha nakai sanebimɔ lɛ hetoo lɛ, nyɛhaa wɔpɛia wiemɔi ni Yehowa kɛ Yesu wie be mli ni abaptisiɔ Yesu lɛ mli wɔkwɛa. Yɛ anɔkwale mli lɛ, bɔ ni tsɛ ko kɛ ebii wieɔ haa lɛ haa anaa fɔlɔ ni eji.

Yesu tee Yordan Faa lɛ naa aaafee October afi 29 Ŋ.B. koni abaptisi lɛ. Biblia lɛ bɔ nɔ ni tee nɔ lɛ he amaniɛ akɛ: “Ni beni abaptisi Yesu lɛ, ejɛ nu lɛ mli amrɔ eje kpo; ni naa, agbele ŋwɛi naa aha lɛ, ni ena Nyɔŋmɔ Mumɔ lɛ miikpeleke shi tamɔ okpo kɛmiiba enɔ. Ni naa, gbee ko jɛ ŋwɛi kɛɛ: Mɔnɛ ji misuɔmɔ bi ní mináa ehe tsui lɛ.” * (Mateo 3:16, 17) Yehowa diɛŋtsɛ ji mɔ ni wie wiemɔi nɛɛ, ni nakai mlijɔlɛ wiemɔi lɛ haa wɔleɔ babaoo yɛ Tsɛ ni eji lɛ he. Kadimɔ nibii etɛ ni Yehowa kɛɛ e-Bi lɛ.

Klɛŋklɛŋ lɛ, Yehowa miitsɔ wiemɔi ni ji ‘Mɔnɛ ji mibi’ ni ekɛtsu nii lɛ nɔ eekɛɛ akɛ, ‘Miyɛ he miishɛɛ akɛ miji o-Tsɛ.’ Tsɛ ni yɔɔ sɛɛyoomɔ lɛ tsuɔ ebii lɛ ashwelɛ akɛ abaabu amɛ akɛ amɛhe hiaa ni agbala jwɛŋmɔ kɛba amɛnɔ lɛ he nii. Ehe miihia ni ama nɔ mi aha gbekɛbii lɛ akɛ amɛhe hiaa waa yɛ weku lɛ mli. Kwɛ bɔ ni Yesu ni eda lɛ po nu he eha, beni e-Tsɛ lɛ ha ele akɛ esumɔɔ lɛ waa lɛ!

Nɔ ni ji enyɔ lɛ, Yehowa tsɔ tsɛ́ ni etsɛ́ e-Bi lɛ akɛ “misuɔmɔbi” lɛ nɔ etsɔɔ faŋŋ akɛ esumɔɔ Yesu waa. Yɛ gbɛ kroko nɔ lɛ, Tsɛ lɛ miikɛɛ akɛ, ‘Misumɔɔ bo.’ Tsɛ kpakpa kɛɔ ebii akɛ esumɔɔ amɛ waa. Wiemɔi ni tamɔ enɛɛmɛi ni akɛ hedɔɔ wieɔ lɛ yeɔ ebuaa gbekɛbii lɛ ni amɛyeɔ omanye yɛ shihilɛ mli. Kwɛ bɔ ni enɛ ta Yesu tsui mli akɛ enu ni e-Tsɛ lɛ miikɛɛ lɛ akɛ esumɔɔ lɛ!

Nɔ ni ji etɛ lɛ, Yehowa tsɔ wiemɔ ni ji “mináa ehe tsui” lɛ nɔ etsɔɔ akɛ ekpɛlɛɔ e-Bi lɛ nɔ. Etamɔ nɔ ni Yehowa miikɛɛ akɛ, ‘Mibi, mihiɛ esɔ nɔ ni otsu lɛ waa.’ Tsɛ ni yɔɔ suɔmɔ lɛ taoɔ hegbɛi koni ekɛha ebii lɛ ale akɛ ehiɛ sɔɔ nibii kpakpai ni amɛwieɔ loo amɛfeɔ lɛ. Kɛ́ gbekɛbii na akɛ amɛfɔlɔi kpɛlɛɔ amɛnɔ lɛ, ewajeɔ amɛ ni ewoɔ amɛ hewalɛ. Ekã shi faŋŋ akɛ beni Yesu nu akɛ e-Tsɛ kpɛlɛɔ enɔ lɛ, enɛ wo lɛ hewalɛ waa!

Lɛɛlɛŋ akɛ Yehowa ji Tsɛ ni mɔ ko kɛ lɛ yeee egbɔ. Ani otsui shweɔ akɛ obaaná tsɛ ni tamɔ nakai? Kɛ́ nakai ni lɛ, belɛ eji nɔ ni shɛjeɔ mɔ mii akɛ ooole akɛ obaanyɛ oná okɛ Yehowa teŋ wekukpãa. Kɛ́ okɛ hemɔkɛyeli kase ehe nii ní ojɛ anɔkwayeli mli obɔ mɔdɛŋ ofee esuɔmɔnaa nii lɛ, ebaaye ebua bo. Biblia lɛ kɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:8) Mɛni po baanyɛ aha ofee shweshweeshwe fe akɛ oooná okɛ Yehowa Nyɔŋmɔ, ni ji Tsɛ ni fe fɛɛ lɛ teŋ wekukpãa ni bɛŋkɛ kpaakpa?

[Shishigbɛ niŋmaa]