Kɛha Mɛi Ni Kaneɔ Wolo Nɛɛ

WƆYƐ he miishɛɛ akɛ wɔɔha nyɛle akɛ kɛjɛ wolo tɛtrɛɛ nɛɛ kɛ nɔ ni baaba kɛtsara nɔ lɛ nɔ kɛyaa lɛ, abaafee tsakemɔi yɛ bɔ ni aŋmaa Buu-Mɔɔ ahaa lɛ mli. Dani wɔɔha nyɛle nɔ ni baafee srɔto yɛ wolo nɛɛ mli lɛ, nyɛhaa wɔwiea nibii ni tsakeŋ lɛ ahe dã.

Gbɛi ni akɛtsɛɔ wolo tɛtrɛɛ nɛɛ, ni ji Buu-Mɔɔ Eetswa Yehowa Maŋtsɛyeli He Adafi lɛ tsakeŋ. No hewɔ lɛ, Buu-Mɔɔ baaya nɔ ekɛ woo aha Yehowa akɛ anɔkwa Nyɔŋmɔ, ni ekɛ Maŋtsɛyeli lɛ he sanekpakpa lɛ baashɛje mɛi ni kaneɔ lɛ amii. Saji ni yɔɔ wolo tɛtrɛɛ nɛɛ baafa 5 kɛyashi 9 lɛ tsɔɔ nɔ ni nakai Maŋtsɛyeli lɛ ji kɛ be ni ebaaba. Kɛfata he lɛ, Buu-Mɔɔ lɛ baaya nɔ awo mɛi hewalɛ koni amɛná hemɔkɛyeli yɛ Yesu Kristo mli, ebaafi Biblia mli anɔkwalei asɛɛ, ni ebaadamɔ Biblia mli gbalɛi anɔ etsɔɔ nɔ ni nibii ni yaa nɔ yɛ je lɛ mli lɛ tsɔɔ, taakɛ etee nɔ efee afii nyɔŋmai abɔ nɛ lɛ.

Belɛ, mɛɛ nibii baatsake lɛ? Nyɛhaa wɔtsɔɔa nyɛ nibii heei komɛi ni yɔɔ miishɛɛ ni baaje kpo yɛ nɔ ni daa nyɔŋ nɔ gbi 1 yɔɔ nɔ lɛ mli. *

Saji srɔtoi ni haa mɔ susuɔ nii ahe kɛyaa shɔŋŋ baaje kpo yɛ eko fɛɛ eko ni baa daa nyɔŋ nɔ lɛ mli. Saneyitso ni ji “Ani Ole?” lɛ baaha wɔle saji ni yɔɔ miishɛɛ ni kɔɔ Biblia mli amaniɛbɔi komɛi ni ahala lɛ ahe, ni ebaaha wɔnu shishi jogbaŋŋ. Saneyitso ni ji “Tsi Obɛŋkɛ Nyɔŋmɔ” lɛ baatsɔɔ nibii ni wɔbaanyɛ wɔkase yɛ Yehowa he kɛjɛ Biblia mli saji pɔtɛɛ komɛi amli. Fã ni ji “Saji ni Mɛi ni Kaneɔ lɛ Biɔ” lɛ baaha Biblia mli saji ni mɛi pii fɔɔ bimɔ lɛ ahetoo. Ákɛ nɔkwɛmɔnɔ lɛ, mɛi babaoo biɔ akɛ, “Ani Nyɔŋmɔ Maŋtsɛyeli lɛ yɛ otsui mli?” Obaana hetoo lɛ yɛ baafa 13 lɛ.

Ato saji babaoo ni baaje kpo daa lɛ ahe gbɛjianɔ koni akɛye abua wekui lɛ. Sane ni ji “Nibii ni Haa Miishɛɛ Hiɔ Weku Mli” ni baaje kpo shii ejwɛ yɛ afi fɛɛ afi mli lɛ baawie naagbai ni yaa nɔ diɛŋtsɛ yɛ wekui amli lɛ ahe, ni ebaatsɔɔ bɔ ni Biblia mli shishitoo mlai baanyɛ aye abua kɛtsu naagbai nɛɛ ahe nii. Abaaŋma sane ni ji “Tsɔɔmɔ Obii lɛ Anii” ni baaje kpo daa nyɔji enyɔ lɛ aha fɔlɔi koni amɛkɛ amɛbii lɛ akane. Yɛ nyɔŋ nɔ ni sane nɛɛ ejeee kpo lɛ, akɛ sane ni ji “Kɛha Oblahii kɛ Oblayei” baaye no najiaŋ, ni enɛ ji Biblia kasemɔ he nifeemɔi ni ato he gbɛjianɔ aha oblahii kɛ oblayei.

Saji fioo krokomɛi hu baaje kpo shii ejwɛ yɛ afi fɛɛ afi mli. Saneyitso ni ji “Kasemɔ Amɛhemɔkɛyeli Lɛ” baawo wɔ hewalɛ koni wɔkase nɔkwɛmɔnɔ ni Biblia mli gbɔmɔ ko fee lɛ. Ákɛ nɔkwɛmɔnɔ lɛ, kɛ́ okane sane ko ni kanyaa mɔ ni kɔɔ gbalɔ Elia he ni yɔɔ wolo nɛɛ baafa 18 kɛyashi 21 lɛ, obaana bɔ ni wɔɔfee wɔkase ehemɔkɛyeli lɛ. Sane ni ji “Amaniɛbɔɔ ni Jɛ . . . ” lɛ baaha ale amaniɛbɔi ni maŋsɛɛ sanekpakpa shiɛlɔi kɛ mɛi krokomɛi ni yɔɔ je lɛŋ hei srɔtoi fɛɛ lɛ kɛhaa. “Nɔ ni Wɔkaseɔ Kɛjɛɔ Yesu Ŋɔɔ” lɛ baawie Biblia mli shishijee tsɔɔmɔi ahe yɛ gbɛ ni yɔɔ mlɛo nɔ.

Wɔyɛ nɔmimaa akɛ wolo nɛɛ kanelɔi ni yɔɔ bulɛ kɛha Biblia lɛ, ni miisumɔ ni amɛle nɔ ni Biblia lɛ tsɔɔ diɛŋtsɛ lɛ baaya nɔ aná Buu-Mɔɔ lɛ kanemɔ he miishɛɛ. Wɔheɔ wɔyeɔ akɛ wolo tɛtrɛɛ nɛɛ baaye abua bo koni onine ashɛ Biblia mli anɔkwalei ni otaoɔ lɛ anɔ.

MƐI NI FEE WOLO NƐƐ

[Shishigbɛ niŋmaa]