1, 2. (a) Namɔ ji “naanɔi amaŋtsɛ” lɛ, ni mɛni hewɔ nakai gbɛ́i lɛ sa lɛ lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni hewɔ wɔsumɔɔ ni Yehowa aye wɔnɔ lɛ?

MAŊTSƐ SOBHUZA II lɛ kɛ aaafee afii 61 ye nɔ yɛ Swaziland. Maŋtsɛ nɛɛ ye nɔ be kpalaŋŋ. Eyɛ mli akɛ Maŋtsɛ Sobhuza kɛ afii babaoo ye nɔ moŋ, shi maŋtsɛ ko yɛ ni eye nɔ afii pii fe adesai. Biblia lɛ tsɛɔ lɛ “naanɔi amaŋtsɛ.” (1 Tim. 1:17) Lalatsɛ ko tsɔɔ Nɔyelɔ nɛɛ gbɛ́i beni ewie akɛ: “Yehowa ji maŋtsɛ kɛjɛ naanɔ kɛyashi naanɔ” lɛ.—Lala 10:16.

² Bei abɔ ni Nyɔŋmɔ kɛye nɔ akɛ Maŋtsɛ lɛ haa esoroɔ enɔyeli lɛ kwraa yɛ adesai anɔ he. Shi gbɛ ni Yehowa tsɔɔ nɔ eyeɔ nɔ lɛ ji nɔ ni haa wɔnyɛɔ wɔbɛŋkɛɔ lɛ lɛ. Maŋtsɛ ko ni kɛ afii 40 ye nɔ yɛ blema Israel lɛ kɛ wiemɔi ni nyiɛ sɛɛ nɛɛ jie Nyɔŋmɔ yi akɛ: “Mɔbɔnalɔ kɛ durolɔ ji Yehowa, emli fuuu mra, ni emɔbɔnalɛ fá. Yehowa lɛ, eŋɔ emaŋtsɛsɛi lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ.” (Lala 103:8, 19) Jeee akɛ Yehowa ji wɔ-Maŋtsɛ kɛkɛ, shi eji wɔ-Tsɛ hu—wɔŋwɛi Tsɛ ni sumɔɔ wɔ. Enɛ teɔ sanebimɔi enyɔ shi: Mɛɛ gbɛ nɔ Yehowa etsɔɔ akɛ eji Tsɛ? Mɛɛ gbɛ nɔ Yehowa etsɔɔ akɛ ekã he eji Maŋtsɛ kɛjɛ be ni atse atua yɛ Eden lɛ? Sanebimɔi nɛɛ ahetoi baaye abua wɔ ni wɔtsi wɔbɛŋkɛ Yehowa, ni wɔjá lɛ kɛ wɔtsui fɛɛ.

3. Namɔ ji Yehowa jeŋ muu fɛɛ weku lɛ mli klɛŋklɛŋ mɔ, ni namɛi hu abɔ akɛ Nyɔŋmɔ “bii”?

³ Yehowa mii shɛ ehe waa beni ebɔ e-Bi koome lɛ! Nyɔŋmɔ ebuuu lɛ akɛ mɔ ko ni he ehiaaa. Moŋ lɛ, esumɔ lɛ akɛ Bi, ni eha lɛ hegbɛ ni efata ehe kɛbɔ enɔyeli lɛ shishi bii krokomɛi ni eye emuu. (Kol. 1:15-17) Amɛteŋ mɛi komɛi ji bɔfoi akpekpe toi akpei abɔ lɛ. Biblia lɛ wieɔ bɔfoi nɛɛ ahe akɛ “esɔɔlɔi ní feɔ esuɔmɔnaa nii,” ni Nyɔŋmɔ kɛ woo haa amɛ kɛtsɔ tsɛ ni etsɛɔ amɛ akɛ “bii” lɛ nɔ. Amɛfata Yehowa jeŋ muu fɛɛ weku lɛ he.—Lala 103:20-22; Hiob 38:7.

4. Te fee tɛŋŋ ni adesai bafata Nyɔŋmɔ jeŋ muu fɛɛ weku lɛ he lɛ?

⁴ Beni Yehowa bɔ ŋwɛi kɛ shikpɔŋ lɛ egbe naa lɛ, elɛɛ ejeŋ muu fɛɛ weku lɛ mli. Beni esaa shikpɔŋ lɛ nɔ fɛfɛo sɛɛ lɛ, ebɔ klɛŋklɛŋ nuu, ni ji Adam yɛ Lɛ diɛŋtsɛ esubaŋ nɔ. (1 Mose 1:26-28) Akɛni Yehowa ji mɔ ni bɔ Adam hewɔ lɛ, eesumɔ ni Adam abo lɛ toi. Akɛ Tsɛ lɛ, Yehowa jɛ suɔmɔ kɛ mlihilɛ mli ekɛ gbɛtsɔɔmɔi ha. Gbɛtsɔɔmɔi nɛɛ ateŋ eko kwraa haaa Adam he afĩ lɛ.—Nyɛkanea 1 Mose 2:15-17.

5. Mɛɛ gbɛjianɔ Nyɔŋmɔ to koni adesai ayi shikpɔŋ lɛ nɔ obɔ?

⁵ Akɛ mɔ ni tamɔɔɔ adesai nɔyelɔi lɛ, Yehowa kɛ eshishi bii lɛ yeɔ akɛ weku, ni akɛni eyɛ hekɛnɔfɔɔ yɛ amɛ mli hewɔ lɛ, etuɔ nitsumɔ ewoɔ amɛdɛŋ. Akɛ nɔkwɛmɔnɔ lɛ, eha Adam hegbɛ ni eye bɔɔ nii krokomɛi fɛɛ nɔ, ni eha lɛ hegbɛ po ni ewo kooloi lɛ agbɛ́i, ni enɛ ji nitsumɔ ni yɔɔ miishɛɛ ni kãaa shi akɔɔɔ. (1 Mose 1:26; 2:19, 20) Nyɔŋmɔ diɛŋtsɛ ebɔɔɔ adesai fɛɛ ni baahi shikpɔŋ lɛ nɔ. Moŋ lɛ, ebɔ yoo ni eye emuu, ni ji Hawa eha Adam akɛ eŋa. (1 Mose 2:21-22) Kɛkɛ ni eha gbalashihilɛ mli hefatalɔi nɛɛ hegbɛ akɛ amɛfɔ ni amɛyi shikpɔŋ lɛ nɔ obɔ. Akɛni Adam kɛ Hawa eye emuu hewɔ lɛ, kulɛ fiofio lɛ, amɛbaanyɛ amɛlɛɛ abɔɔ ni amɛyɔɔ mli lɛ mli kɛyashi shikpɔŋ muu lɛ fɛɛ baatsɔ paradeiso. Kɛkɛ lɛ, adesai kɛ ŋwɛibɔfoi fɛɛ baafee ekome akɛ weku kɛjá Yehowa kɛya naanɔ. Enɛ ji gbɛkpamɔ ko ni yɔɔ miishɛɛ waa, ni emaa suɔmɔ ni Yehowa yɔɔ akɛ tsɛ lɛ nɔ mi!

6. (a) Mɛɛ gbɛ nɔ atuatsemɔ je shishi yɛ Nyɔŋmɔ weku lɛ mli? (b) Mɛni hewɔ atua ni atse lɛ etsɔɔɔ akɛ Yehowa nyɛɛɛ eye shikpɔŋ lɛ nɔ dɔŋŋ lɛ?

⁶ Dɔlɛ sane ji akɛ, Adam kɛ Hawa ekpɛlɛɛɛ Yehowa nɔ akɛ amɛ-Nɔyelɔ. Moŋ lɛ, amɛyafi Satan, ni ji Nyɔŋmɔ mumɔŋ bi ni tse atua lɛ sɛɛ. (1 Mose 3:1-6) Nɔ ni jɛ enɛ mli kɛba ji piŋmɔ, nɔnaa, kɛ gbele ni sa amɛ kɛ amɛbii fɛɛ he lɛ. (1 Mose 3:16-19; Rom. 5:12) No hewɔ lɛ, mɔ ko bɛ shikpɔŋ lɛ nɔ ni boɔ Nyɔŋmɔ toi yɛ nakai beaŋ. Ani enɛ tsɔɔ akɛ Nyɔŋmɔ nyɛɛɛ eye adesai kɛ nibii ni yɔɔ shikpɔŋ lɛ nɔ lɛ anɔ dɔŋŋ, ni akɛ, ejie ejwɛŋmɔ yɛ shikpɔŋ lɛ nɔ? Dabi kwraa! Etee nɔ etsɔɔ akɛ eyɛ hegbɛ yɛ adesai anɔ kɛtsɔ shwiemɔ ni eshwie Adam kɛ Hawa kɛjɛ Eden abɔɔ lɛ mli, ni eŋɔ kerubim eto naa koni amɛkaná hegbɛ kɛtee jɛi dɔŋŋ lɛ nɔ. (1 Mose 3:23, 24) Yɛ nakai beaŋ nɔŋŋ lɛ, Nyɔŋmɔ tsɔɔ akɛ eji tsɛ ni yɔɔ suɔmɔ kɛtsɔ shi ni ewo akɛ ebaaha eyiŋtoo akɛ adesai kɛ ŋwɛibɔfoi ni yeɔ lɛ anɔkwa lɛ fɛɛ afee ekome kɛjá lɛ lɛ aba mli lɛ nɔ. Ewo shi hu akɛ, ebaaha ‘seshi’ ko abakpata Satan hiɛ ni ejie nibii gbohii ni ejɛ Adam esha lɛ mli kɛba lɛ kɛya.—Nyɛkanea 1 Mose 3:15.

7, 8. (a) Te shihilɛ lɛ yɔɔ ha tɛŋŋ yɛ shikpɔŋ lɛ nɔ yɛ Noa beaŋ? (b) Mɛɛ gbɛjianɔ Yehowa to kɛjie efɔŋfeemɔ yɛ shikpɔŋ lɛ nɔ ni ebaa adesai aweku lɛ yi?

 ⁷ Yɛ afii ohai abɔ ni nyiɛ sɛɛ kɛba lɛ amli lɛ, hii komɛi ye Yehowa anɔkwa. Amɛteŋ mɛi komɛi ji Habel kɛ Henok. Kɛlɛ, adesai babaoo kpoo Yehowa akɛ amɛ-Tsɛ kɛ amɛ-Maŋtsɛ. Beni shɛɔ Noa beaŋ lɛ, shikpɔŋ lɛ nɔ eyi “obɔ kɛ yiwalɛ.” (1 Mose 6:11) Ani enɛ tsɔɔ akɛ Yehowa kɛ ehe wooo adesai asaji amli dɔŋŋ? Mɛni Biblia lɛ haa wɔleɔ yɛ enɛ he?

⁸ Nyɛhaa wɔsusua amaniɛbɔɔ ni kɔɔ Noa he lɛ he wɔkwɛa. Yehowa kɛ gbɛtsɔɔmɔi ni yɔɔ fitsofitso ha lɛ koni ekpɛ adeka wulu ko ni ekɛhere ekɛ eweku lɛ yiwala. Nyɔŋmɔ tsɔɔ hu akɛ, esumɔɔ adesai fɛɛ kɛtsɔ fãmɔ ni efã Noa, mɔ ni sɛɛ mli lɛ atsɛ lɛ akɛ “jalɛ shiɛlɔ lɛ” ni eshiɛ lɛ nɔ. (2 Pet. 2:5) Eka shi faŋŋ akɛ, Noa kɛɛ mɛi lɛ ni amɛtsake amɛtsui, ni ebɔ amɛ kɔkɔ yɛ hiɛkpatamɔ ko ni miiba lɛ he, shi amɛbooo lɛ toi. Noa kɛ eweku lɛ hi yinɔbii ni sumɔɔ yiwalɛ ni amɛjeŋba ekpɔtɔ lɛ ateŋ afii babaoo. Akɛ Tsɛ ni yɔɔ suɔmɔ lɛ, Yehowa bu nakai anɔkwafoi kpaanyɔ lɛ ahe ni ejɔɔ amɛ. Yehowa tsɔ Nu Afua ni ekɛba nakai je lɛ nɔ lɛ nɔ etsɔɔ akɛ eyɛ hewalɛ yɛ adesai atuatselɔi kɛ bɔfoi fɔji lɛ anɔ. Hɛɛ, eyɛ jeŋ muu lɛ fɛɛ nɔ hewalɛ lɛɛlɛŋ!—1 Mose 7:17-24.

9. Mɛɛ hegbɛ Yehowa kɛha adesai yɛ Nu Afua lɛ sɛɛ?

⁹ Beni Noa kɛ eweku lɛ je adeka lɛ mli lɛ, eka shi faŋŋ akɛ, amɛná miishɛɛ waa akɛ Yehowa kwɛ amɛnɔ ni ebu amɛhe. Amrɔ nɔŋŋ lɛ, Noa ma afɔleshaa latɛ ni eshã afɔlei kɛjá Yehowa. Nyɔŋmɔ jɔɔ Noa kɛ eweku lɛ, ni ekɛɛ amɛ akɛ: “Nyɛfɔa ni nyɛyi afáa, ni nyɛyia shikpɔŋ lɛ nɔ obɔ.” (1 Mose 8:20–9:1) Shi kome ekoŋŋ lɛ, adesai ená hegbɛ ni amɛkɛaafee ekome akɛ weku kɛjá Yehowa, ni amɛfɔ ni amɛyi shikpɔŋ lɛ nɔ obɔ.

10. (a) Yɛ Nu Afua lɛ sɛɛ lɛ, nɛgbɛ atse Yehowa nɔyeli lɛ hiɛ atua yɛ, ni mɛɛ gbɛ nɔ atsɔ afee enɛ? (b) Mɛni Yehowa fee koni eyiŋtoo lɛ aba mli?

¹⁰ Shi Nu Afua lɛ ejieee emuu ni adesai yeee lɛ kɛyaaa, ni ehe bahia ni adesai aya nɔ akpee nɔnyɛɛ ni Satan kɛ daimonioi lɛ kɛbaa amɛnɔ lɛ naa. Etsɛɛɛ kɛkɛ ni adesai kpoo Yehowa nɔyeli ni suɔmɔ yɔɔ mli lɛ ekoŋŋ. Akɛ nɔkwɛmɔnɔ lɛ, Noa nanakaŋsowa ni atsɛɔ lɛ Nimrod lɛ te shi ewo Yehowa nɔyeli lɛ yɛ gbɛ ni ehiii kwraa nɔ. Biblia lɛ wie Nimrod he akɛ, eji ‘gbɔbilɔ kpanaa ni teɔ shi woɔ Yehowa.’ Eto maji wuji babaoo, tamɔ Babel nɛkɛ, ni ewo ehe maŋtsɛ yɛ “Shinear shikpɔŋ lɛ nɔ.” (1 Mose 10:8-12) Mɛni naanɔi a-Maŋtsɛ lɛ baafee maŋtsɛ atuatselɔ nɛɛ ni taoɔ akɛ etswa Nyɔŋmɔ yiŋtoo akɛ ‘ayi shikpɔŋ lɛ nɔ obɔ’ lɛ efɔ̃ lɛ? Nyɔŋmɔ futu mɛi ni yɔɔ shikpɔŋ nɔ yɛ Nimrod beaŋ lɛ awiemɔ, ni no ha mɛi ni nyiɛ Nimrod sɛɛ lɛ gbɛ shwã “shikpɔŋ lɛ fɛɛ nɔ.” Amɛkɛ apasa jamɔ ni amɛkase lɛ kɛ gbɛ ni adesai tsɔɔ nɔ amɛyeɔ nɔ lɛ tee hei ni amɛtee lɛ.—1 Mose 11:1-9.

11. Mɛɛ gbɛ nɔ Yehowa ye enaanyo Abraham anɔkwa?

¹¹ Eyɛ mli akɛ mɛi babaoo tee nɔ amɛjá amale nyɔŋmɔi yɛ Nu Afua lɛ sɛɛ moŋ, shi mɛi komɛi tee nɔ amɛye Yehowa anɔkwa. Amɛteŋ mɔ kome ji Abraham, mɔ ni bo Yehowa toi ni eshi ogbɔjɔ shihilɛ ni yɔɔ ejakumaŋ Ur, ni eyahi buui amli afii babaoo lɛ. (1 Mose 11:31; Heb. 11:8, 9) Beni Abraham kpaa shi lɛ, bei pii lɛ, ekɛ maŋtsɛmɛi ni yɔɔ maji ni atswa gbogboi awo he lɛ amli lɛ sharaa, shi etaooo hebuu kɛjɛɛɛ amɛdɛŋ. Moŋ lɛ, Yehowa ji mɔ ni bu Abraham kɛ eweku lɛ he. Lalatsɛ lɛ wie bɔ ni Yehowa buɔ ewebii ahe taakɛ tsɛ feɔ lɛ he akɛ:  “[Nyɔŋmɔ] eŋmɛɛɛ mɔ ko mɔ ko gbɛ ni efee amɛ efɔŋ, ni ekã maŋtsɛmɛi yɛ amɛhewɔ.” (Lala 105:13, 14) Akɛni Yehowa yeɔ enaanyo Abraham anɔkwa hewɔ lɛ, ewo lɛ shi akɛ: “Maŋtsɛmɛi aaajɛ omli.”—1 Mose 17:6; Yak. 2:23.

12. Mɛɛ gbɛ nɔ Yehowa jie hewalɛ ni eyɔɔ akɛ nɔyelɔ lɛ kpo etsɔɔ Mizraimbii lɛ, ni mɛɛ gbɛ nɔ enɛ ye ebua ewebii lɛ?

¹² Nyɔŋmɔ ti shi ni ewo Abraham akɛ ebaajɔɔ lɛ, ni eha maŋtsɛmɛi ajɛ eseshi lɛ mli lɛ mli eha ebi Isak kɛ enabi Yakob. (1 Mose 26:3-5; 35:11) Shi dani abaaná maŋtsɛmɛi kɛjɛ Yakob seshi lɛ mli lɛ, eseshi lɛ yatsɔ nyɔŋ yɛ Mizraim. Ani enɛ tsɔɔ akɛ Yehowa yeŋ eshiwoo lɛ nɔ loo akɛ ejie ejwɛŋmɔ yɛ shikpɔŋ lɛ nɔ akɛ Nɔyelɔ? Dabi kwraa! Yɛ be ni sa mli lɛ, Yehowa jie ehewalɛ lɛ kpo, ni etsɔɔ akɛ enɔ kwɔ kwraa fe Farao kuɛŋtilɔ lɛ. Israelbii ni etsɔmɔ nyɔji lɛ kɛ amɛhe fɔ̃ Yehowa nɔ, ni etsɔ naakpɛɛ gbɛ nɔ ekpɔ̃ amɛ kɛfo Ŋshɔ Tsuru lɛ. Enɛ tsɔɔ faŋŋ akɛ, Yehowa kã he eji Jeŋ Muu Fɛɛ Nɔyelɔ, ni taakɛ tsɛ ni susuɔ ebii ahe feɔ lɛ, ekɛ ehewalɛ kpele lɛ bu ewebii lɛ ahe.—Nyɛkanea 2 Mose 14:13, 14.

13, 14. (a) Mɛni Israelbii lɛ wie yɛ maŋtsɛ ni Yehowa ji lɛ he yɛ lala ko mli? (b) Mɛɛ shi Nyɔŋmɔ wo David?

¹³ Beni Yehowa tsɔ naakpɛɛ gbɛ nɔ ekpɔ̃ Israelbii lɛ kɛjɛ Mizraim lɛ sɛɛ etsɛɛɛ lɛ, amɛlá kunimyeli lala kɛjie eyi. Nɛkɛ lala nɛɛ ni aŋma yɛ 2 Mose yitso 15 lɛ kɛɔ yɛ kuku 18 lɛ akɛ: “Yehowa aaaye maŋtsɛ kɛaatee naanɔi anaanɔ!” Yehowa batsɔ maŋ hee nɛɛ nɔ Maŋtsɛ lɛɛlɛŋ. (5 Mose 33:5) Shi Israelbii lɛ atsui eyanyɔɔɔ amɛmli akɛ amɛyɛ Maŋtsɛ ni anaaa lɛ, ni ji Yehowa. Beni amɛshi Mizraim lɛ sɛɛ aaafee afii 400 lɛ, amɛbi ni Nyɔŋmɔ aha amɛ maŋtsɛ ni anaa lɛ taakɛ maji ni bɔle amɛ ni jáa wɔji lɛ yɔɔ lɛ. (1 Sam. 8:5) Yɛ enɛ fɛɛ sɛɛ lɛ, Yehowa tee nɔ eye nɔ akɛ Maŋtsɛ, ni ana enɛ faŋŋ beni David, ni ji Israel maŋtsɛ ni ji enyɔ nɔ lɛ yeɔ nɔ lɛ.

¹⁴ David kɛ kpaŋmɔ adeka lɛ ba Yerusalem. Yɛ nɛkɛ miishɛɛ be nɛɛ mli lɛ, Levibii lɛ lá yijiemɔ lala ko, ni wiemɔ ko ni sa kadimɔ waa yɛ mli ni aŋma yɛ 1 Kronika 16:31 lɛ akɛ: “Akɛɛ yɛ jeŋmaji lɛ ateŋ akɛ: Yehowa miiye [etsɔ, NW]  maŋtsɛ!” Ekolɛ mɔ ko baabi akɛ, ‘Akɛni Yehowa ji naanɔi a-Maŋtsɛ hewɔ lɛ, te fee tɛŋŋ ni etsɔ Maŋtsɛ yɛ nakai beaŋ lɛ?’ Be fɛɛ be ni Yehowa kɛ ehewalɛ lɛ baatsu nii loo ebaaha mɔ ko aye enajiaŋ kɛtsu nɔ ko he nii lɛ, abaanyɛ akɛɛ akɛ Yehowa etsɔ Maŋtsɛ. Ehe miihia waa ni wɔle be mli ni akɛɔ akɛ Yehowa etsɔ Maŋtsɛ. Dani David baagbo lɛ, Yehowa wo lɛ shi akɛ ebaaha enɔyeli lɛ ahi shi kɛya naanɔ. Ewie akɛ: “Matée oseshinyo ni jɛ omusuŋ shi yɛ osɛɛ, ni maha emaŋtsɛyeli lɛ adamɔ shi shiŋŋ.” (2 Sam. 7:12, 13) Shiwoo nɛɛ ba mli nɔ ni fe afii 1,000 sɛɛ, beni David ‘seshi’ lɛ pue lɛ. Namɔ ji seshi nɛɛ, ni mɛɛ be ebaatsɔ Maŋtsɛ?

15, 16. Mɛɛ be afɔ Yesu mu akɛ mɔ ni baaye Maŋtsɛ wɔsɛɛ, ni beni Yesu yɔɔ shikpɔŋ lɛ nɔ lɛ, mɛɛ gbɛjianɔ eto yɛ enɔyeli lɛ hewɔ?

¹⁵ Yɛ afi 29 Ŋ.B. lɛ, Yohane Baptisilɔ lɛ bɔi shiɛmɔ akɛ, “ŋwɛi Maŋtsɛyeli lɛ ebɛŋkɛ.” (Mat. 3:2) Beni Yohane baptisi Yesu lɛ, Yehowa fɔ Yesu mu akɛ shiwoo Mesia kɛ Maŋtsɛ ni baaye Nyɔŋmɔ Maŋtsɛyeli lɛ nɔ wɔsɛɛ. Yehowa jie suɔmɔ kpo etsɔɔ Yesu akɛ tsɛ kɛtsɔ wiemɔi nɛɛ nɔ akɛ: “Mɔnɛ ji misuɔmɔ bi ní mináa ehe tsui lɛ.”—Mat. 3:17.

¹⁶ Yesu wo e-Tsɛ lɛ hiɛ nyam yɛ esɔɔmɔ nitsumɔ lɛ mli. (Yoh. 17:4) Efee enɛ kɛtsɔ Nyɔŋmɔ Maŋtsɛyeli lɛ he sane ni eshiɛ lɛ nɔ. (Luka 4:43) Etsɔɔ esɛɛnyiɛlɔi ni amɛsɔle koni nakai Maŋtsɛyeli lɛ aba. (Mat. 6:10) Akɛni ahala Yesu akɛ mɔ ni baaye Maŋtsɛ wɔsɛɛ hewɔ lɛ, enyɛ ekɛɛ mɛi ni teɔ shi amɛwoɔ lɛ lɛ akɛ: “Nyɔŋmɔ maŋtsɛyeli lɛ, eyɛ nyɛteŋ.” (Luka 17:21, Ga Biblia hee) Gbi gbɛkɛ ni enɔ jetsɛremɔ lɛ agbe Yesu lɛ, ekɛ esɛɛnyiɛlɔi lɛ fee ‘kpaŋmɔ kɛha maŋtsɛyeli.’ Enɛ tsɔɔ akɛ, ekaselɔi anɔkwafoi lɛ ateŋ mɛi komɛi baafata ehe kɛye nɔ akɛ maŋtsɛmɛi yɛ Nyɔŋmɔ Maŋtsɛyeli lɛ mli.—Nyɛkanea Luka 22:28-30.

17. Mɛɛ gbɛ nɔ Yesu bɔi nɔyeli yɛ klɛŋklɛŋ afii 100 lɛ mli, shi mɛni ehe bahia ni emɛ?

¹⁷ Mɛɛ be Yesu baabɔi nɔyeli akɛ Nyɔŋmɔ Maŋtsɛyeli lɛ nɔ Maŋtsɛ? Enyɛŋ eye nɔ yɛ nakai beaŋ akɛ maŋtsɛ, ejaakɛ gbi ni ekɛ ekaselɔi lɛ fee kpaŋmɔ lɛ nɔ jetsɛremɔ shwane mli lɛ, agbe lɛ, ni esɛɛnyiɛlɔi lɛ gbɛ shwã. (Yoh. 16:32) Shi taakɛ Yehowa fee yɛ bei ni eho lɛ amli lɛ, etee nɔ etsɔɔ akɛ lɛ ji nɔyelɔ. Yɛ gbi ni ji etɛ lɛ nɔ lɛ, etee e-Bi lɛ shi, ni yɛ afi 33 Ŋ.B. Pentekoste gbi lɛ nɔ lɛ, Yesu bɔi Kristofoi asafo ni afɔ emli bii lɛ mu lɛ nɔyeli. (Kol. 1:13) Shi esa akɛ Yesu, ni ji ‘seshi’ ni awo shi yɛ ehe lɛ, amɛ kɛyashi be ni abaaha eye shikpɔŋ muu lɛ fɛɛ nɔ akɛ maŋtsɛ. Yehowa kɛɛ e-Bi lɛ akɛ: “Tá mininejurɔ nɔ kɛyashi beyinɔ ní maŋɔ ohenyɛlɔi lɛ mafee onajiashi maaŋoo.”—Lala 110:1.

18, 19. Mɛni nɔ ni wɔsusu he lɛ tsirɛɔ wɔ ni wɔfee, ni mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁸ Ŋwɛibɔfoi kɛ adesai ete shi amɛwo Yehowa nɔyeli lɛ yɛ afii akpei abɔ ni eho lɛ amli. Kɛlɛ, Yehowa ejieko ejwɛŋmɔ yɛ shikpɔŋ lɛ nɔ akɛ nɔyelɔ; etee nɔ eye nɔ yɛ bei fɛɛ mli. Akɛ Tsɛ ni yɔɔ suɔmɔ lɛ, ekwɛ anɔkwafoi tamɔ Noa, Abraham, kɛ David nɔ, ni ebu amɛhe. Ani enɛ tsirɛɛɛ wɔ ni wɔtsi wɔbɛŋkɛ wɔ-Maŋtsɛ lɛ ni wɔbo lɛ toi?

¹⁹ Shi amrɔ nɛɛ wɔbaanyɛ wɔbi akɛ: Mɛɛ gbɛ nɔ Yehowa etsɔ Maŋtsɛ yɛ wɔbei nɛɛ amli? Te wɔɔfee tɛŋŋ wɔtsɔɔ akɛ wɔbaa wɔhe shi wɔhaa Yehowa koni wɔtsɔmɔ bii ni eye emuu yɛ ejeŋ muu fɛɛ weku lɛ mli lɛ? Kɛ́ akɛɛ wɔsɔle ni Nyɔŋmɔ Maŋtsɛyeli lɛ aba lɛ, te atsɔɔ tɛŋŋ? Abaaha sanebimɔi nɛɛ ahetoo yɛ nikasemɔ ni nyiɛ sɛɛ lɛ mli.