Beni gbɛgbalɔi enyɔ komɛi tee shĩa ko mli yɛ Kenya lɛ, amɛyana nuu tswɛtswɛlii ko ni atsɛɔ lɛ Onesmus kã saa nɔ, ni bɔ ni edaaa lɛ ha amɛnaa kpɛ amɛhe waa. Egbɔmɔtso bibioo, kɛ eniji kpitibii. Beni amɛha nuu lɛ le shi ni Nyɔŋmɔ ewo akɛ “obubuafoi aaatumɔ akɛ ofrote” lɛ, emii shɛ ehe waa.—Yes. 35:6.

Gbɛgbalɔi lɛ ná le akɛ Onesmus eye aaafee afii 38, ni akɛ hela ko (osteogenesis imperfecta) fɔ lɛ. Hela nɛɛ hewɔ lɛ, ewui lɛ amli waaa kwraa, ni kɛ́ efee gidigidi fioo nɔŋŋ lɛ, ewui lɛ kumɔɔ. Akɛni abɛ hela nɛɛ naa tsabaa hewɔ lɛ, Onesmus le akɛ ebaakã he epiŋ, ni ebaata helatsɛmɛi ashwiili mli ewala beaŋ fɛɛ.

Onesmus ha akɛ lɛ bɔi Biblia lɛ kasemɔ. Shi emami ekpɛlɛɛɛ ni eya Kristofoi akpeei, ejaakɛ esusu akɛ no baaye lɛ awui ni ebaaha epiŋ babaoo. No hewɔ lɛ, nyɛmimɛi lɛ rikɔdiɔ kpeei lɛ amɛhaa Onesmus, ni eboɔ toi yɛ shĩa. Beni akɛ Onesmus ekase nii nyɔji enumɔ sɛɛ lɛ, ekpɛ eyiŋ akɛ ebaaya kpeei lɛ, ekɔɔɔ he eko nɔ ni baaba.

Ani Kristofoi akpeei ni Onesmus bɔi yaa lɛ ha epiŋ babaoo? No moŋ ye ebua lɛ. Onesmus kɛɛ akɛ: “Etamɔ nɔ ni kɛ́ mitee kpeei lɛ, mipiŋmɔ lɛ naa baa shi.” Ena akɛ hiɛnɔkamɔ hee ni ená lɛ hewɔ ehe jɔɔ lɛ lɛ. Onesmus mami yɔse tsakemɔ ni eba ebi lɛ shihilɛ mli lɛ, ni enɛ ha emii shɛ ehe aahu akɛ, lɛ hu eha akɛ lɛ bɔi Biblia lɛ kasemɔ. Efɔɔ kɛɛmɔ akɛ: “Sɔɔmɔ ni mibi lɛ sɔmɔɔ Nyɔŋmɔ lɛ ji tsofã ha lɛ.”

Etsɛɛɛ kɛkɛ ni Onesmus batsɔ shiɛlɔ ni abaptisiko lɛ. Sɛɛ mli lɛ, abaptisi lɛ, ni amrɔ nɛɛ eesɔmɔ akɛ asafoŋ sɔɔlɔ. Eyɛ mli akɛ Onesmus nyɛɛɛ enyiɛ, ni enine kome hu tsuuu nii moŋ, shi eesumɔ ni efee bɔ fɛɛ bɔ ni eeenyɛ yɛ Yehowa sɔɔmɔ lɛ mli. No mli lɛ eetao ekɛ ehe awo gbɛgbalɔi awamɔ nitsumɔ lɛ mli, shi eshashao shi. Mɛni hewɔ? Ejaakɛ ele akɛ nakai feemɔ baabi ni ená mɔ ko ni baatsi lɛ yɛ eshwiili lɛ mli kɛya kɛba daa. Beni eha enyɛmimɛi Kristofoi lɛ le enaagba lɛ, amɛwo lɛ shi akɛ amɛbaaye amɛbua lɛ. Ni lɛɛlɛŋ, amɛye amɛbua Onesmus ni enyɛ etsu gbɛgbalɔi awamɔ nitsumɔ lɛ.

Beni Onesmus ná shwelɛ lɛ akɛ ekɛ ehe baawo daa gbɛgbamɔ nitsumɔ lɛ mli lɛ, ekɛ naagba kome too nɛɛ nɔŋŋ kpe. Shi gbi ko lɛ, daa gbi ŋmalɛ lɛ wo lɛ hewalɛ. Nakai gbi lɛ ŋmalɛ lɛ je kpo yɛ Lala 34:9 ni kɛɔ akɛ: “Nyɛsaa nyɛnaa nyɛkwɛa, ni nyɛaana akɛ Yehowa hi” lɛ. Beni Onesmus jwɛŋ ŋmalɛ nɛɛ nɔ lɛ, ekpɛ eyiŋ akɛ ebaatsɔ daa gbɛgbalɔ. Amrɔ nɛɛ, ekɛ gbii ejwɛ yaa shiɛmɔ yɛ otsi mli, ni eyɛ Biblia mli nikaselɔi babaoo ni miiya amɛhiɛ. Yɛ afi 2010 lɛ, etee Gbɛgbalɔi Asɔɔmɔ Skul lɛ eko. Onesmus mii shɛ ehe waa beni ena akɛ nyɛmimɛi hii enyɔ ni kɛ lɛ bakase nii klɛŋklɛŋ kwraa lɛ ateŋ mɔ kome fata tsɔɔlɔi lɛ ahe lɛ!

Amrɔ nɛɛ, Onesmus fɔlɔi egboi moŋ, shi nyɛmimɛi hii kɛ yei ni yɔɔ asafo lɛ mli lɛ kwɛɔ lɛ daa nɛɛ. Jɔɔmɔi ni ená lɛ fɛɛ haa emii shɛɔ ehe waa, ni eekpa gbi ni “maŋbii lɛ ateŋ mɔ ko ekɛŋ akɛ: Migbɔjɔ!” lɛ gbɛ.—Yes. 33:24.