1-3. (a) Te mɛi komɛi nuɔ he amɛhaa tɛŋŋ yɛ nibii ni amɛfee loo amɛyanyɛɛɛ amɛfee lɛ ahe, ni mɛɛ gbɛ nɔ enɛ baanyɛ asa wɔhe? (b) Mɛni wɔbaanyɛ wɔkase kɛjɛ Paulo dɛŋ?

LALAWIEMƆ ŋmalɔ ko (J. G. Whittier) ŋma akɛ: “Wiemɔ ni yɔɔ dɔlɛ fe fɛɛ ni awieɔ loo aŋmaa ji: ‘Mile kulɛ!’” No mli lɛ, eewie nibii ni wɔfeɔ ni wɔshwaa wɔhe yɛ he, ni wɔná kulɛ wɔfee lɛ jogbaŋŋ loo wɔfeee kwraa. Wɔ fɛɛ wɔbaanyɛ wɔkai nibii komɛi ni wɔfee ni wɔná kulɛ wɔfee ekoŋŋ yɛ gbɛ kroko nɔ. Shi mɛi komɛi yaa nɔ amɛshwaa amɛhe loo amɛnuɔ dɔlɛ he waa yɛ nibii ni amɛfee loo amɛyanyɛɛɛ amɛfee lɛ ahe. Ani bo hu onuɔ he nakai bei komɛi?

² Mɛi komɛi etɔ̃ tɔmɔi wuji komɛi loo amɛfee eshai ni yɔɔ hiɛdɔɔ po. Mɛi komɛi hu efeko nɔ ko gbonyo ko moŋ, shi amɛyiŋ etɛ̃ɛɛ amɛ yɛ yiŋ ni amɛkpɛ yɛ shihilɛ mli lɛ he. Mɛi komɛi nyɛɔ amɛjieɔ amɛjwɛŋmɔ yɛ tsutsu nibii nɛɛ anɔ. Mɛi krokomɛi hu haa nibii ni amɛfee be ko ni eho lɛ yaa nɔ egbaa amɛnaa, ni amɛkɛɔ akɛ, ‘Kɛ́ jeee nɛkɛ kulɛ!’ (Lala 51:5) Te bo hu onuɔ he ohaa tɛŋŋ? Ani obaasumɔ ni ojá Nyɔŋmɔ yɛ gbɛ ni haŋ oshwa ohe nɔ kɛjɛ bianɛ kɛyaa? Ani mɔ ko yɛ ni enɔkwɛmɔnɔ baanyɛ aye abua bo ni ofee nakai? Hɛɛ, mɔ ko yɛ, lɛ ji bɔfo Paulo.

³ Paulo fee nibii ni yɔɔ hiɛdɔɔ, shi ekpɛ yiŋ ni nilee yɔɔ mli hu. Eshwa ehe waa yɛ nibii fɔji ni efee lɛ ahe, shi yɛ nakai beaŋ nɔŋŋ lɛ, ekɛ ejwɛŋmɔ ma bɔ ni eeefee eya nɔ esɔmɔ Nyɔŋmɔ lɛ nɔ. Ha wɔkwɛ nɔ ni wɔbaanyɛ wɔkase kɛjɛ enɔkwɛmɔnɔ lɛ mli.

4. Mɛni Paulo fee ni sɛɛ mli lɛ eshwa ehe yɛ he?

⁴ Beni Paulo ji Farisifonyo oblanyo ni atsɛɔ lɛ Saulo lɛ, efee nibii ni sɛɛ mli lɛ eshwa ehe. Akɛ  nɔkwɛmɔnɔ lɛ, ewa Kristo kaselɔi lɛ ayi waa. Biblia lɛ haa wɔleɔ akɛ, beni agbe Stefano lɛ sɛɛ nɔŋŋ lɛ, ‘Saulo kpata asafo lɛ hiɛ butuu, eboteɔ shĩai ni eyagbalaa hii kɛ yei ni eyawoɔ amɛ tsuŋ.’ (Bɔf. 8:3) Woloŋlelɔ ko ni atsɛɔ lɛ Albert Barnes lɛ tsɔɔ Hela wiemɔ ni atsɔɔ shishi yɛ biɛ akɛ “ekpata asafo lɛ hiɛ butuu” lɛ mli akɛ, “eji wiemɔ ni mli wa ni tsɔɔ ekãa kɛ mlifu ni naa wa ni [Saulo] kɛtsu nii kɛwa mɛi ayi.” Barnes tsɔɔ mli akɛ: “Saulo mli wo la ewo asafo lɛ tamɔ kooloo awuiyelɔ ko.” No mli lɛ, Saulo ji Yudanyo ni yɔɔ ekãa ni heɔ eyeɔ akɛ Nyɔŋmɔ eha lɛ hegbɛ akɛ ekpata Kristofoi asafo hiɛ. No hewɔ lɛ, ewa Kristofoi lɛ ayi waa, ni ‘emu hegbeyeiwoo kɛ gbee mumɔ eshwie hii kɛ yei fɛɛ’ nɔ.—Bɔf. 9:1, 2; 22:4. *

5. Mɛni ha Saulo kpa Yesu Kaselɔi lɛ ayi waa ni ebabɔi Kristo he sanekpakpa lɛ shiɛmɔ?

⁵ Sɛɛ mli lɛ, kulɛ Saulo miiya Damasko ni eyamɔmɔ Yesu Kaselɔi lɛ kɛjɛ amɛshĩai amli kɛya Yerusalem koni Akuashɔŋ lɛ agbala amɛtoi. Shi Yesu, ni ji Kristofoi asafo lɛ Yitso lɛ, sa enaa. (Efe. 5:23) Beni Saulo nyiɛ gbɛ kɛmiiya Damasko lɛ, Yesu jie ehe kpo etsɔɔ lɛ, ni la ko ni jɛ ŋwɛi lɛ shwila lɛ. No sɛɛ lɛ, Yesu ha Saulo tee Damasko koni atsɔɔ lɛ nɔ ni esa akɛ efee. Wɔle nɔ ni ba yɛ no sɛɛ.—Bɔf. 9:3-22.

6, 7. Mɛni tsɔɔ akɛ Paulo le krɛdɛɛ akɛ efee nibii gbohii ni yɔɔ hiɛdɔɔ?

⁶ Beni Paulo batsɔ Kristofonyo lɛ, ekpa Kristofoi lɛ ayi waa ni ekɛ ekãa shiɛ. Sɛɛ mli lɛ, eŋma yɛ lɛ diɛŋtsɛ ehe akɛ: “Nyɛnu misa jeŋba lɛ he yɛ Yudafoi ajamɔ lɛ mli, bɔ ni miwa Nyɔŋmɔ asafo lɛ yi babaoo ni mikpata ehiɛ.” (Gal. 1:13) Esaa ewie etsutsu shihilɛ lɛ he ekoŋŋ beni eŋmaa wolo eyaha Korintobii, Filipibii, kɛ Timoteo lɛ. (Nyɛkanea 1 Korintobii 15:9; Fil. 3:6; 1 Tim. 1:13) Nibii gbohii ni Paulo fee lɛ gba enaa moŋ, shi efeee enii oookɛɛ nɔ ni efee lɛ jeee nɔ ko. Ele krɛdɛɛ akɛ efee nibii gbohii ni yɔɔ hiɛdɔɔ.—Bɔf. 26:9-11.

⁷ Woloŋlelɔ ko ni atsɛɔ lɛ Frederic W. Farrar tsɔɔ akɛ, kɛ́ wɔjwɛŋ bɔ ni Saulo wa Kristofoi lɛ ayi waa eha lɛ he lɛ, ebaaha wɔnu bɔ ni enifeemɔ lɛ dɔ lɛ eha, kɛ bɔ ni mɛi krokomɛi wie amɛshi lɛ lɛ shishi. Eeenyɛ efee akɛ bei komɛi lɛ, kɛ́ Paulo yasara asafo ko, ni nyɛmimɛi lɛ kɛ lɛ kpe klɛŋklɛŋ kwraa lɛ, amɛkɛɔ lɛ akɛ, ‘Asomoaŋ, bo ji mɔ ni wa wɔ yi lɛ!’—Bɔf. 9:21.

8. Te Paulo nu suɔmɔ kɛ mɔbɔnalɛ ni Yehowa kɛ Yesu jie lɛ kpo amɛtsɔɔ lɛ lɛ he eha tɛŋŋ, ni mɛni wɔkaseɔ kɛjɛɔ mli?

⁸ Fɛɛ sɛɛ lɛ, Paulo yɔse akɛ Nyɔŋmɔ duromɔ lɛ hewɔ ni enyɛ etsu esɔɔmɔ nitsumɔ lɛ. Etsĩ Nyɔŋmɔ duromɔ lɛ tã aaafee shii 90 sɔŋŋ yɛ woji 14 ni eŋmala lɛ amli—fe Biblia ŋmalɔi krokomɛi fɛɛ. (Nyɛkanea 1 Korintobii 15:10.) Paulo hiɛ sɔ bɔ ni Nyɔŋmɔ na lɛ mɔbɔ lɛ waa, ni esumɔɔɔ ni Nyɔŋmɔ duromɔ lɛ feɔ yaka. No hewɔ lɛ, ‘etsu nɔ ni teke’ bɔfoi krokomɛi lɛ fɛɛ anɔ lɛ. Mɛni wɔkaseɔ kɛjɛɔ Paulo dɛŋ? Kɛ́ wɔná hemɔkɛyeli yɛ Yesu kpɔmɔ afɔle lɛ mli, wɔjaje wɔhe eshai lɛ, ni wɔfɔ̃ɔ efɔŋfeemɔ lɛ, Yehowa kɛ eshai ni yɔɔ hiɛdɔɔ po baake wɔ tswaa. No hewɔ lɛ, kɛ́ wɔsusuɔ akɛ wɔhe eshai lɛ yɛ hiɛdɔɔ aahu akɛ Kristo kpɔmɔ afɔle lɛ nyɛŋ aye abua wɔ lɛ, nyɛhaa wɔkaia Paulo nɔkwɛmɔnɔ lɛ. (Nyɛkanea 1 Timoteo 1:15, 16.) Eyɛ mli akɛ Paulo wa Kristo yi moŋ, shi eŋma akɛ: ‘Nyɔŋmɔ bi lɛ, sumɔ mi ni eŋɔ ehe  eha yɛ mihewɔ.’ (Gal. 2:20; Bɔf. 9:5) Paulo kase akɛ esa akɛ efee bɔ fɛɛ bɔ ni eeenyɛ ni esɔmɔ Nyɔŋmɔ yɛ bɔ ni etsutsu shihilɛ ji lɛ fɛɛ sɛɛ, bɔni afee ni ekashwa ehe wɔsɛɛ dɔŋŋ. Ani bo hu okase nɔ ko ni tamɔ nakai?

9, 10. (a) Mɛni hewɔ Yehowa webii lɛ ekomɛi shwaa amɛhe bei komɛi lɛ? (b) Mɛni hewɔ esaaa akɛ wɔfeɔ yeyeeye yɛ nibii komɛi ni wɔfee kɛho lɛ ahe lɛ?

⁹ Ani ofee nibii komɛi ni bo hu oshwa ohe akɛ ofee? Ani bei komɛi lɛ, onuɔ he akɛ ole kulɛ okɛ obe kɛ ohewalɛ tsu nibii ni he hiaa titri lɛ ahe nii? Ani ofee nibii komɛi ní eye mɛi komɛi awui? Aloo ekolɛ nɔ kroko ni ofee loo ofeee lɛ haa oshwaa ohe. Kɛ́ nakai ni lɛ, mɛni obaanyɛ ofee?

¹⁰ Mɛi babaoo haoɔ! Amɛsusuɔ nibii ni amɛfeee jogbaŋŋ lɛ ahe aahu akɛ ehaa amɛnuɔ dɔlɛ he, ni amɛfeɔ yeyeeye waa. Shi ani yeyeeyefeemɔ baatsu naagbai lɛ ahe nii? Dabi! Ŋɔɔ lɛ akɛ ota tso okpɔŋɔ nɔ ni ootao oya hiɛ, ni ooya ŋwɛi ooba shi sɔŋŋ. Obaafite ohewalɛ efolo, ni oshɛŋ he ko. Yɛ nɔ najiaŋ ni ooye otsui yɛ naagbai nɛɛ ahe lɛ, esa akɛ ofee bɔ fɛɛ bɔ ni ooonyɛ kɛtsu amɛhe nii. Yaa ni oyakpa mɛi ni otɔ̃ amɛnɔ lɛ fai, koni obɔ mɔdɛŋ osaa okɛ amɛ teŋ ekoŋŋ. Susumɔ nɔ ni ha otɔ̃ amɛnɔ lɛ he, koni okafee nakai dɔŋŋ. Shi bei komɛi lɛ, onyɛŋ ojo nibii ni ejɛ onifeemɔ lɛ mli kɛba lɛ anaa foi. Shi otsui ni obaaye yɛ he lɛ yeŋ ebuaŋ bo, anɔkwa, ehaŋ onyɛ osɔmɔ Nyɔŋmɔ jogbaŋŋ. Ni onaŋ yeyeeyefeemɔ lɛ he sɛɛ!

11. (a) Mɛni esa akɛ wɔfee koni Yehowa ana wɔ mɔbɔ, ní ejie suɔmɔ kpo etsɔɔ wɔ? (b) Mɛni Biblia lɛ tsɔɔ akɛ wɔfee koni nibii ni wɔfee kɛho lɛ akahao wɔ?

¹¹ Mɛi komɛi haa nibii ni amɛfee tsutsu ko lɛ haoɔ amɛ aahu akɛ amɛnuɔ he akɛ Nyɔŋmɔ enaŋ amɛ mɔbɔ.  Amɛnuɔ he akɛ akɛni nɔ ni amɛfee lɛ yɛ hiɛdɔɔ waa loo amɛfee lɛ shii abɔ hewɔ lɛ, Nyɔŋmɔ kɛfaŋ amɛ. Shi anɔkwa sane ji akɛ, ekɔɔɔ he eko nɔ ni mɔ ko efee be ko ni eho lɛ, ebaanyɛ eshwa ehe, etsake etsui, ni ebi eshaifaa. (Bɔf. 3:19) Yehowa baanyɛ ena mɔ lɛ mɔbɔ, ní ejie suɔmɔ kpo etsɔɔ lɛ taakɛ efee eha mɛi babaoo lɛ. Yehowa baajɛ mlihilɛ mli ekɛfa mɔ ni baa ehe shi ni yeɔ anɔkwa ni etsake etsui lɛ. Nyɔŋmɔ kɛfa Hiob, mɔ ni kɛɛ akɛ: “Miishwa mihe yɛ sũ kɛ lamulu mli” lɛ. (Hiob 42:6) Esa akɛ wɔ fɛɛ wɔfee nɔ ni Biblia lɛ kɛɔ akɛ wɔfee koni nibii ni wɔfee kɛho lɛ akahao wɔ, no ji: “Mɔ ni tsimɔɔ enɔtɔmɔ nɔ lɛ, eshwereŋ; shi mɔ ni jajeɔ ni efɔ̃ɔ lɛ, aaana lɛ mɔbɔ.” (Abɛi 28:13; Yak. 5:14-16) No hewɔ lɛ, esa akɛ wɔjaje wɔhe eshai lɛ wɔtsɔɔ Nyɔŋmɔ, wɔbi ni ekɛfa wɔ, ni wɔfee nibii ni tsɔɔ akɛ wɔshwa wɔhe lɛɛlɛŋ. (2 Kor. 7:10, 11) Kɛ́ mɔ ko fee nibii nɛɛ, Yehowa baana lɛ mɔbɔ ni “ekɛaafa lɛ aahu!”—Yes. 55:7.

12. (a) Kɛ́ nɔ ko ni wɔfee kɛho lɛ miihao wɔ lɛ, mɛɛ gbɛ nɔ David nɔkwɛmɔnɔ lɛ baanyɛ aye abua wɔ? (b) Mɛɛ shishinumɔ naa abaanyɛ akɛɛ akɛ Yehowa eshwa ehe, ni mɛɛ gbɛ nɔ enɛ ni wɔɔle lɛ baanyɛ aye abua wɔ? (Kwɛmɔ akrabatsa lɛ.)

¹² Sɔlemɔ yɛ hewalɛ waa, ni eji gbɛ ni Nyɔŋmɔ tsɔɔ nɔ eyeɔ ebuaa wɔ. David jie ehenumɔi akpo yɛ sɔlemɔ ko ni ejɛ hemɔkɛyeli mli esɔle ni eŋma yɛ Lalai lɛ amli lɛ mli. (Nyɛkanea Lala 32:1-5.) Taakɛ David tsɔɔ lɛ, beni ejajeko ehe eshai lɛ, ehenilee hao lɛ waa. Efee basaa, hela mɔ lɛ, ni ehao. Mɛni ha akɛfa David, ni ehe jɔ lɛ? No ji ehe eshai ni ejaje etsɔɔ Nyɔŋmɔ lɛ. Yehowa bo David sɔlemɔ lɛ toi, ni eha ehe jɔ lɛ, ni eye ebua lɛ koni eya nɔ efee nɔ ni ja. Nakai nɔŋŋ kɛji otee nɔ osɔle kɛjɛ otsuiŋ lɛ, Yehowa baabo toi. Kɛji nibii ni ofee kɛho lɛ miihao bo lolo lɛ, bɔɔ mɔdɛŋ ni otsu he nii, ni oná nɔmimaa akɛ Yehowa ebo osɔlemɔ lɛ toi ni ekɛfa bo!—Lala 86:5.

13, 14. (a) Mɛni esa akɛ wɔsusu he waa amrɔ nɛɛ? (b) Mɛɛ sanebimɔi baaye abua wɔ kɛpɛi nɔ ni wɔfeɔ amrɔ nɛɛ mli?

¹³ Eyɛ mli akɛ wɔbaanyɛ wɔkase nii kɛjɛ nibii ni wɔfee kɛho lɛ amli moŋ, shi esaaa akɛ wɔhaa ehaoɔ wɔ. Susumɔ nɔ ni ofeɔ amrɔ nɛɛ kɛ nɔ ni obaafee wɔsɛɛ lɛ moŋ he. Bi ohe akɛ: ‘Ani mashwa mihe yɛ otii ni mikɛmamɔɔ mihiɛ amrɔ nɛɛ ahe wɔsɛɛ? Ani manu he akɛ mile kulɛ mifeee nakai? Ani mikɛ anɔkwayeli miisɔmɔ  Nyɔŋmɔ bɔni afee ni mikashwa mihe wɔsɛɛ?’

¹⁴ Beni amanehulu kpeteŋkpele lɛ bɛŋkɛɔ nɛɛ, wɔsumɔŋ akɛ saji komɛi ahao wɔ, tamɔ, ‘Ani kulɛ manyɛ mafee babaoo yɛ Nyɔŋmɔ sɔɔmɔ lɛŋ? Mɛni hewɔ mitsuuu gbɛgbamɔ nitsumɔ lɛ beni miná hegbɛ lɛ? Mɛni haaa manyɛ maya mihiɛ ni matsɔ asafoŋ sɔɔlɔ lɛ? Ani mifee nɔ fɛɛ nɔ ni manyɛ koni mawo gbɔmɔ hee lɛ? Ani miji mɔ ko ni Yehowa baasumɔ ni ehi jeŋ hee lɛ mli?’ Yɛ nɔ najiaŋ ni wɔɔha saji ni tamɔ nɛkɛ lɛ ahao wɔ lɛ, esa akɛ amɛha wɔsusu bɔ ni wɔjáa Yehowa amrɔ nɛɛ he moŋ, ni wɔkɛ wɔnyɛmɔ fɛɛ asɔmɔ lɛ. Kɛ́ jeee nakai lɛ, wɔbaafee nibii ni baaha wɔshwa wɔhe waa wɔsɛɛ.—2 Tim. 2:15.

15, 16. (a) Mɛɛ nibii mɛi pii kɛshã afɔle koni amɛkɛ Nyɔŋmɔ sɔɔmɔ lɛ aye klɛŋklɛŋ gbɛhe? (b) Mɛni hewɔ esaaa akɛ wɔshwaa wɔhe yɛ nibii ni wɔkɛshã afɔle yɛ Maŋtsɛyeli lɛ hewɔ lɛ ahe lɛ?

¹⁵ Ani okɛ nibii eshã afɔle koni onyɛ okɛ obe fɛɛ asɔmɔ Yehowa? Ekolɛ okpa nitsumɔ kpakpa ko ni otsuɔ lɛ tsumɔ bɔni afee ni onyɛ ofee babaoo yɛ Yehowa sɔɔmɔ lɛ mli. Aloo ekolɛ ohi shi oshija loo kɛ́ obote gbalashihilɛ mli po lɛ, okɛ bii afɔmɔ shã afɔle bɔni afee ni onyɛ okɛ ohe awo be fɛɛ sɔɔmɔ lɛ fãi komɛi tamɔ Betel sɔɔmɔ, majimaji ateŋ tsumaa nitsumɔ, kpokpaa nɔkwɛmɔ nitsumɔ, loo maŋsɛɛ sɔɔmɔ nitsumɔ lɛ mli. Amrɔ nɛɛ ni odaa yɛ afii amli nɛɛ, ani esa akɛ oshwa ohe akɛ ofee nakai? Ani esa akɛ onu he akɛ kulɛ esaaa akɛ okɛ nibii nɛɛ shãa afɔle, aloo ofee nakai mra tsɔ? Dabi kwraa!

¹⁶ Suɔmɔ ni mli wa ni oyɔɔ kɛha Yehowa kɛ shwelɛ ni oyɔɔ akɛ oye obua mɛi ni miitao asɔmɔ lɛ lɛ hewɔ ni okpɛ yiŋ ni tamɔ nakai lɛ. Esaaa akɛ osusuɔ akɛ eji ofeee nakai kulɛ nibii baahi ahao fe bɔ ni eji amrɔ nɛɛ. Esa akɛ oha omii ashɛ ohe akɛ okɔ gbɛ ni ja. Omli baanyɛ afili bo akɛ okɛ onyɛmɔ fɛɛ sɔmɔ Yehowa. Ehiɛ kpaŋ ohe ni okɛshã afɔle kɛha lɛ lɛ nɔ. Ebaaha oná anɔkwa wala lɛ, ni ebaajuro bo kɛ nibii ni hi kwraa fe bɔ ni okpaa gbɛ!—Lala 145:16; 1 Tim. 6:19.

17, 18. (a) Mɛni ye ebua Paulo ni enyɛ esɔmɔ Nyɔŋmɔ ni eshwaaa ehe? (b) Mɛni okpɛ mli akɛ obaafee yɛ nɔ ni ofee ni eho, nɔ ni ofeɔ amrɔ nɛɛ, kɛ nɔ ni obaafee wɔsɛɛ yɛ Yehowa sɔɔmɔ mli lɛ he?

¹⁷ Mɛni Paulo fee bɔni afee ni enyɛ esɔmɔ Nyɔŋmɔ bɔ ni eshwaŋ ehe sɛɛ mli? Paulo kɛɛ akɛ ejie ejwɛŋmɔ yɛ nibii ni eho lɛ anɔ, ni emia ehiɛ waa koni enine ashɛ juromɔnɔ lɛ nɔ. (Nyɛkanea Filipibii 3:13, 14.) Paulo eyaaa nɔ esusuuu nibii gbohii ni efee beni eyɔɔ Yuda jamɔ mli lɛ ahe. Moŋ lɛ, ekɛ enyɛmɔ fɛɛ tsu nii bɔni afee ni enine ashɛ naanɔ wala ni ebaaná wɔsɛɛ lɛ nɔ.

¹⁸ Wɔ fɛɛ wɔbaanyɛ wɔkase nɔ ko kɛjɛ nɔ ni Paulo wie lɛ mli. Yɛ nɔ najiaŋ ni wɔɔjwɛŋ nibii ni eho ni wɔnyɛŋ amɛhe nɔ ko wɔfee lɛ anɔ lɛ, esa akɛ wɔkɛ wɔjwɛŋmɔ ama nibii ni wɔbaanyɛ wɔfee amrɔ nɛɛ koni wɔná juromɔnɔ lɛ anɔ. Eyɛ mli akɛ nibii ni wɔfee ni eho lɛ ejeŋ wɔjwɛŋmɔŋ moŋ, shi esaaa akɛ wɔhaa amɛhaoɔ wɔ. Wɔbaanyɛ wɔjie wɔjwɛŋmɔ yɛ nɔ ni eho lɛ nɔ, wɔkɛ wɔnyɛmɔ fɛɛ asɔmɔ Nyɔŋmɔ, ni wɔkpa nyamɔ ni kã wɔhiɛ lɛ gbɛ!