Yaa nɔ Oba Ojeŋ akɛ Maŋtsɛyeli lɛ Mli Nyo!
Yaa nɔ Oba Ojeŋ akɛ Maŋtsɛyeli lɛ Mli Nyo!
“Nyɛ maŋ sane gbɛfaŋ lɛ nyɛbaa nyɛjeŋ bɔ ni sa.”—FIL. 1:27.
TE OBAAHA HETOO OHA TƐŊŊ?
Namɛi baanyɛ afee Maŋtsɛyeli lɛ mli bii?
Mɛni Maŋtsɛyeli lɛ wiemɔ lɛ, eyinɔsane lɛ, kɛ emlai lɛ ni wɔɔkase lɛ tsɔɔ?
Mɛni kɛ́ Maŋtsɛyeli lɛ mli bii lɛ fee lɛ, no baatsɔɔ akɛ amɛsumɔɔ Nyɔŋmɔ mlai lɛ?
1, 2. Mɛni hewɔ ŋaa ni Paulo wo asafo ni yɔɔ Filipi lɛ hiɛ shishinumɔ krɛdɛɛ ko kɛha amɛ lɛ?
BƆFO Paulo wo asafo ni yɔɔ Filipi lɛ hewalɛ akɛ, ‘amɛba amɛjeŋ bɔ ni sa sanekpakpa lɛ.’ (Nyɛkanea Filipibii 1:27.) Abaanyɛ atsɔɔ Hela wiemɔ ni Paulo kɛtsu nii akɛ “nyɛbaa nyɛjeŋ bɔ ni sa” lɛ shishi hu akɛ, “nyɛfea nyɛnii akɛ maŋbii.” Nakai wiemɔ lɛ hiɛ shishinumɔ krɛdɛɛ ko kɛha asafo ni yɔɔ Filipi lɛ. Mɛni hewɔ? Ejaakɛ Filipi fata maji ni Roma Nɔyeli lɛ hala ni amɛha amɛ hegbɛ krɛdɛɛ ko akɛ Romabii lɛ ahe. Filipibii lɛ kɛ hegbɛ ni aha amɛ akɛ Romabii lɛ shiɔ amɛtsitsi, ni nakai mɛi fɛɛ ni yɔɔ hegbɛ nɛɛ eko lɛ feɔ, ejaakɛ Roma mla lɛ ha amɛná hebuu krɛdɛɛ ko ni maji krokomɛi náaa.
2 Filipi asafo lɛ mli bii lɛ yɛ yiŋtoo kpakpa kroko hu ni amɛaadamɔ nɔ amɛshi amɛtsitsi. Paulo kai nakai Kristofoi ni afɔ amɛ mu lɛ akɛ: “Wɔ lɛ wɔmaŋ lɛ ŋwɛi eyɔɔ.” (Fil. 3:20) Amɛji Nyɔŋmɔ Maŋtsɛyeli lɛ mli bii, shi jeee adesa nɔyeli ko mli bii. Enɛ hewɔ lɛ, amɛnáa hebuu kɛ jɔɔmɔi ni nɔ bɛ.—Efe. 2:19-22.
3. (a) Namɛi baanyɛ atsɔmɔ Maŋtsɛyeli lɛ mli bii? (b) Mɛni he wɔbaasusu yɛ nikasemɔ nɛɛ mli?
3 Paulo ŋaawoo akɛ, “nyɛbaa nyɛjeŋ bɔ ni sa” lɛ kɔɔ mɛi ni kɛ Kristo baaye nɔ yɛ ŋwɛi lɛ ahe titri. (Fil. 3:20) Shi wiemɔ nɛɛ baanyɛ akɔ mɛi ni baahi Nyɔŋmɔ Maŋtsɛyeli lɛ shishi yɛ shikpɔŋ lɛ nɔ lɛ hu he. Mɛni hewɔ? Ejaakɛ Kristofoi ni ejɔɔ amɛhe nɔ lɛ fɛɛ miisɔmɔ Maŋtsɛ kome, ni ji Yehowa, ni esa akɛ wɔ fɛɛ wɔhi shi yɛ taomɔ nii kome too lɛ nɔŋŋ naa. (Efe. 4:4-6) Ŋmɛnɛ lɛ, mɛi bɔɔ mɔdɛŋ waa koni amɛtsɔmɔ maŋ ko ni etee hiɛ waa lɛ mli bii. Shi hegbɛ ni wɔná akɛ wɔɔtsɔmɔ Maŋtsɛyeli lɛ mli bii lɛ nɔ kwɔ kwraa fe no! Bɔni afee ni wɔna akɛ enɛ ji hegbɛ kpele lɛ, nyɛhaa wɔkɛ nibii komɛi ni ataoɔ yɛ mɔ ko ni miitao etsɔ maŋ ko mli nyo lɛ dɛŋ lɛ atoa nibii ni ataoɔ yɛ mɔ ko ni miitao etsɔ Nyɔŋmɔ Maŋtsɛyeli lɛ mli nyo lɛ dɛŋ lɛ he. No sɛɛ lɛ, wɔbaasusu nibii etɛ komɛi ni esa akɛ wɔfee koni wɔya nɔ wɔhiɛ hegbɛ ni wɔná akɛ Maŋtsɛyeli lɛ mli bii lɛ mli lɛ ahe.
TAOMƆ NII KƐHA MAŊ KO MLI NYO TSƆMƆ
4. Mɛni ji wiemɔ krɔŋŋ lɛ, ni te wɔwieɔ lɛ wɔhaa tɛŋŋ?
4 Kasemɔ amɛwiemɔ lɛ. Nɔyelɔi komɛi biɔ ni mɛi ni taoɔ atsɔ amɛmaŋ lɛ mli bii lɛ akase wiemɔ titri ni awieɔ yɛ maŋ lɛ mli lɛ. Mɛi komɛi yɛ ni kɛ́ aha amɛ hegbɛ akɛ maŋ ko mli nyo po lɛ, eheɔ amɛ afii abɔ dani amɛnyɛɔ amɛwieɔ maŋ lɛ nɔ wiemɔ lɛ jogbaŋŋ. Ekolɛ amɛbaakase wiemɔ lɛ he mlai lɛ oya, shi ebaahe amɛ be fioo dani amɛbaanyɛ amɛtsɛ wiemɔi lɛ jogbaŋŋ. Nakai nɔŋŋ abiɔ ni mɔ ni miitao atsɔ Nyɔŋmɔ Maŋtsɛyeli lɛ mli nyo lɛ akase wiemɔ ni Biblia lɛ tsɛɔ lɛ “naabu krɔŋŋ” lɛ. (Nyɛkanea Zefania 3:9.) Mɛni ji wiemɔ nɛɛ? No ji anɔkwale ni yɔɔ Biblia lɛ mli ni kɔɔ Nyɔŋmɔ kɛ eyiŋtoi lɛ ahe lɛ. Kɛ́ wɔbaa wɔjeŋ yɛ Nyɔŋmɔ mlai kɛ eshishitoo mlai lɛ anaa lɛ, belɛ wɔmiiwie wiemɔ krɔŋŋ lɛ. Ekolɛ Nyɔŋmɔ Maŋtsɛyeli lɛ mli bii lɛ baakase Biblia mli shishijee tsɔɔmɔi lɛ oya ni amɛbaaha abaptisi amɛ. Shi yɛ amɛbaptisimɔ sɛɛ po lɛ, esa akɛ amɛmia amɛhiɛ ni amɛwie wiemɔ krɔŋŋ lɛ jogbaŋŋ. Yɛ mɛɛ gbɛ nɔ? Esa akɛ wɔteŋ mɔ fɛɛ mɔ aya nɔ ekɛ nibii ni ekaseɔ yɛ Biblia lɛ mli lɛ atsu nii yɛ eshihilɛ mli.
5. Mɛni hewɔ esa akɛ wɔkase Yehowa gbɛjianɔtoo lɛ he nɔ fɛɛ nɔ ni esa akɛ wɔle lɛ?
5 Kasemɔ amɛyinɔsane. Kɛ́ mɔ ko miitao etsɔ maŋ ko mli nyo lɛ, ekolɛ ehe baahia ni ekase nakai maŋ lɛ nɔyeli lɛ he yinɔsane. Nakai nɔŋŋ esa akɛ mɛi ni miisumɔ ni amɛtsɔmɔ Maŋtsɛyeli lɛ mli bii lɛ akase Nyɔŋmɔ Maŋtsɛyeli lɛ he nɔ fɛɛ nɔ ni esa akɛ amɛle. Susumɔ nɔkwɛmɔnɔ ni Korabii ni sɔmɔ yɛ blema Israel lɛ fee lɛ he okwɛ. Amɛsumɔ Yerusalem maŋ lɛ kɛ he ni amɛjáa Nyɔŋmɔ yɛ lɛ waa, ni amɛmiisumɔ ni amɛgba eyinɔsane lɛ amɛtsɔɔ. Jeee maŋ lɛ fɛo hewɔ amɛsumɔɔ lɛ lɛ, shi moŋ nɔ ni maŋ lɛ kɛ he ni amɛjáa Nyɔŋmɔ yɛ lɛ damɔ shi kɛha lɛ hewɔ. Yerusalem ji Yehowa, ni ji “Maŋtsɛ agbo lɛ maŋ,” ni no mli lɛ jɛmɛ ajáa lɛ yɛ. Jɛmɛ ji he ni atsɔɔ Yehowa Mla lɛ yɛ. Yehowa jie suɔmɔ ni sɛɛ efooo kpo etsɔɔ mɛi ni Yerusalem Maŋtsɛ lɛ yeɔ amɛnɔ lɛ. (Nyɛkanea Lala 48:2, 3, 10, 13, 14.) Taakɛ Korabii lɛ fee lɛ, ani bo hu oyɛ shwelɛ akɛ obaakase Yehowa gbɛjianɔtoo lɛ fã ni yɔɔ shikpɔŋ nɔ lɛ he yinɔsane ni ogba mɛi? Babaoo ni okaseɔ Nyɔŋmɔ gbɛjianɔtoo lɛ kɛ bɔ ni Yehowa yeɔ ebuaa ewebii lɛ he sane lɛ, babaoo ni Nyɔŋmɔ Maŋtsɛyeli lɛ baafee nɔ ko ni yɔɔ diɛŋtsɛ kɛha bo. Enɛ baaha shwelɛ ni oyɔɔ akɛ ojaje Maŋtsɛyeli lɛ he sanekpakpa lɛ mli awa.—Yer. 9:24; Luka 4:43.
6. Mɛni hewɔ nilee yɔɔ mli akɛ Yehowa baakpa gbɛ akɛ wɔkase Maŋtsɛyeli lɛ mlai kɛ shishitoo mlai lɛ ni wɔye nɔ lɛ?
6 Le amɛmlai lɛ. Nɔyelɔi kpaa gbɛ akɛ amɛmaŋbii lɛ akase maŋ lɛ mlai lɛ, ní amɛye nɔ. Belɛ nilee yɛ mli mɔ akɛ Yehowa baakpa gbɛ akɛ wɔkase mlai kɛ shishitoo mlai ni kudɔɔ Maŋtsɛyeli lɛ mli bii lɛ fɛɛ lɛ, ni wɔye nɔ. (Yes. 2:3; Yoh. 15:10; 1 Yoh. 5:3) Bei pii lɛ, mlai ni adesai woɔ lɛ yeee emuu, ni akɛ ekomɛi hu tsuɔ nii yɛ gbɛ ni ejaaa nɔ. Nɔ ni tamɔɔɔ nakai lɛ, “Yehowa mla lɛ hi kɛwula shi.” (Lala 19:8) Ani wɔmii shɛɔ Nyɔŋmɔ mla lɛ he, ni wɔkaneɔ e-Wiemɔ lɛ daa gbi? (Lala 1:1, 2) Gbɛ kome pɛ ni wɔbaanyɛ wɔtsɔ nɔ wɔle Nyɔŋmɔ mla lɛ ji, ni wɔ diɛŋtsɛ wɔbaakase. Mɔ ko mɔ ko nyɛŋ afee enɛ aha wɔ.
MAŊTSƐYELI LƐ MLI BII LƐ SUMƆƆ NYƆŊMƆ MLAI LƐ
7. Mɛni hewɔ Maŋtsɛyeli lɛ mli bii lɛ yeɔ Nyɔŋmɔ mlai anɔ lɛ?
7 Kɛ́ wɔbaaya nɔ wɔhi shi akɛ Maŋtsɛyeli lɛ mli bii lɛ, esa akɛ wɔle Nyɔŋmɔ mlai lɛ, ni wɔsumɔ hu. Maŋbii pii kɛɔ akɛ amɛkpɛlɛɔ maŋ ni amɛyɔɔ mli lɛ mlai anɔ. Shi kɛ́ amɛna akɛ mla lɛ eko nɔyeli wa kɛha amɛ lɛ, amɛkuɔ nakai mla lɛ mli kɛ́ mɔ ko kwɛɛɛ amɛ. Bei pii lɛ, mɛi nɛɛ ji “mɛi ni taoɔ gbɔmɛi ahiɛnyam.” (Kol. 3:22) Maŋtsɛyeli lɛ mli bii lɛ yeɔ Nyɔŋmɔ mlai lɛ anɔ yɛ yiŋtoo kroko hewɔ. Kɛ́ adesa ko kwɛɛɛ wɔ po lɛ, wɔyɛ he miishɛɛ akɛ wɔɔye Nyɔŋmɔ mlai lɛ anɔ. Mɛni hewɔ? Ejaakɛ wɔsumɔɔ Mlawolɔ lɛ.—Yes. 33:22; nyɛkanea Luka 10:27.
8, 9. Te ooofee tɛŋŋ ole akɛ osumɔɔ Nyɔŋmɔ mlai lɛ lɛɛlɛŋ?
8 Te ooofee tɛŋŋ ona akɛ osumɔɔ Nyɔŋmɔ mlai lɛ lɛɛlɛŋ lɛ? Susumɔ bɔ ni ofeɔ onii ohaa kɛ́ awo bo ŋaa yɛ nɔ ko ni awoko mla pɔtɛɛ ko yɛ he lɛ he okwɛ—tamɔ hesaamɔ kɛ atadewoo nɛkɛ. Dani obatsɔ Maŋtsɛyeli lɛ mli nyo lɛ, ekolɛ osaa ohe yɛ gbɛ ni teɔ mɛi abɔlɛnamɔ akɔnɔ shi lɛ nɔ. Beni suɔmɔ ni oyɔɔ kɛha Nyɔŋmɔ lɛ mli waa lɛ, obɔi ohe saamɔ yɛ gbɛ ni baawo ehiɛ nyam nɔ. (1 Tim. 2:9, 10; 1 Pet. 3:3, 4) Amrɔ nɛɛ, ekolɛ onaaa akɛ naagba ko yɛ ohesaamɔ he. Shi kɛ́ asafoŋ onukpa ko tsɛ otoi sɛɛ akɛ bɔ ni osaa ohe ohaa lɛ miigba nyɛmimɛi pii anaa yɛ asafo lɛ mli lɛ, te obaafee onii yɛ he oha tɛŋŋ? Ani obaajie onaa, omli baafu, aloo obaakpiliŋ otsui? Mla ko ni he hiaa waa ji akɛ, esa akɛ Maŋtsɛyeli lɛ mli bii lɛ fɛɛ akase Kristo. (1 Pet. 2:21) Yɛ Yesu nɔkwɛmɔnɔ lɛ naa lɛ, bɔfo Paulo wie akɛ: “Wɔteŋ mɔ fɛɛ mɔ asa enaanyo hiɛ, koni ahi aha lɛ ni enane amɔ shi. Ejaakɛ Kristo hu haaa ehe asa ehiɛ.” (Rom. 15:2, 3) Bɔni afee ni toiŋjɔlɛ ahi asafo lɛ mli lɛ, esa akɛ Kristofonyo ni eda yɛ mumɔŋ lɛ aná shwelɛ lɛ akɛ ebaafee nibii ni gbaŋ mɛi krokomɛi ahenilee naa.—Rom. 14:19-21.
9 Agbɛnɛ nyɛhaa wɔsusua nibii enyɔ krokomɛi ni he hiaa waa lɛ ahe wɔkwɛa: bɔ ni wɔnaa bɔlɛnamɔ kɛ gbalashihilɛ wɔhaa. Ekolɛ mɛi ni jeee Nyɔŋmɔ Maŋtsɛyeli lɛ mli bii lɛ baasusu akɛ naagba ko bɛ nuu kɛ nuu loo yoo kɛ yoo teŋ bɔlɛnamɔ, nibii ni teɔ bɔlɛnamɔ akɔnɔ shi lɛ akwɛmɔ, toiboo kɛ ekanemɔ, kɛ agbɛnɛ gbalafitemɔ, loo gbalatsemɔ he. Maŋtsɛyeli lɛ mli bii lɛ susuɔ nɔ ni baajɛ amɛnifeemɔi amli kɛba, kɛ bɔ ni ebaasa mɛi krokomɛi ahe lɛ he. Eyɛ mli akɛ amɛteŋ mɛi pii kɛ amɛhe wo jeŋba sha mli dani amɛbale anɔkwale lɛ moŋ, shi amrɔ nɛɛ amɛnaa bɔlɛnamɔ kɛ gbalashihilɛ akɛ Nyɔŋmɔ dɛŋ nikee nii. Amɛsumɔɔ Yehowa mlai lɛ waa, ni amɛle akɛ mɛi ni yaa nɔ amɛkɛ amɛhe woɔ bɔlɛnamɔ jeŋba sha mli lɛ nyɛŋ atsɔ Nyɔŋmɔ Maŋtsɛyeli lɛ mli bii. (1 Kor. 6:9-11) Agbɛnɛ hu, amɛle akɛ tsui lɛ ji kutumpɔfo. (Yer. 17:9) Enɛ hewɔ lɛ, amɛyɛ he miishɛɛ waa ákɛ akɛ kɔkɔbɔi ni sa haa amɛ koni no aye abua amɛ ni amɛhi shi yɛ jeŋba he mlai ni nɔ kwɔlɔ naa.
MAŊTSƐYELI LƐ MLI BII LƐ NYAA KƆKƆBƆI AHE
10, 11. Mɛɛ kɔkɔbɔi ni yɔɔ ebe naa Nyɔŋmɔ Maŋtsɛyeli lɛ kɛhaa wɔ, ni te onaa kɔkɔbɔi nɛɛ ohaa tɛŋŋ?
10 Ekolɛ nɔyelɔi baabɔ amɛmaŋbii lɛ kɔkɔ yɛ niyenii kɛ tsofai komɛi ahe. Eji anɔkwale akɛ, jeee niyenii kɛ tsofai fɛɛ ehiii. Shi kɛ́ niyenii loo tsofa ko baanyɛ ekɛ naagba aba lɛ, ekolɛ nɔyeli lɛ baabɔ emaŋbii lɛ kɔkɔ koni ekɛbu amɛhe. Kɛji efeee nakai lɛ, abaashwa lɛ akɛ etsuuu esɔ̃ he nii. Nakai nɔŋŋ Nyɔŋmɔ Maŋtsɛyeli lɛ kɛ kɔkɔbɔi ni kɔɔ jeŋba kɛ mumɔŋ osharai ahe lɛ haa yɛ be naa. Ákɛ nɔkwɛmɔnɔ lɛ, atsɔɔ Intanɛt lɛ nɔ akɛ mɛi sharaa, akaseɔ nii, ni ajieɔ hiɛtserɛ. Nyɔŋmɔ gbɛjianɔtoo lɛ kɛ Intanɛt lɛ tsuɔ nibii kpakpai babaoo ahe nii. Kɛlɛ, hei babaoo yɛ Intanɛt lɛ nɔ ni baanyɛ afite wɔjeŋba kɛ wekukpaa ni kã wɔ kɛ Nyɔŋmɔ teŋ lɛ. Wɛb saitii ni nibii ni teɔ bɔlɛnamɔ akɔnɔ shi eyi nɔ obɔ lɛ baanyɛ ekɛ Maŋtsɛyeli lɛ mli bii lɛ amumɔŋ shidaamɔ awo oshara mli. Tsulɔ anɔkwafo kuu lɛ kɛ afii nyɔŋmai abɔ ebɔ wɔ kɔkɔ yɛ Wɛb saitii nɛɛ ahe. Wɔhiɛ sɔɔ mumɔŋ kɔkɔbɔi nɛɛ waa!
11 Nyɛsɛɛ nɛɛ, Wɛb saitii komɛi ebahe shi waa—ni kɛ́ akɛtsu nii yɛ gbɛ kpakpa nɔ lɛ, ehe baanyɛ aba sɛɛnamɔ. Shi nɛkɛ Wɛb saitii nɛɛ ni atsɛɔ amɛ social network lɛ hu baanyɛ ekɛ wɔ awo oshara mli. Ebaanyɛ eha mɔ ko kɛ nanemɛi gbohii abɔ. (1 Kor. 15:33) Ebɛ naakpɛɛ mɔ akɛ Nyɔŋmɔ gbɛjianɔtoo lɛ kɛ kɔkɔbɔi ni sa eha wɔ yɛ bɔ ni esa akɛ wɔkɛ Wɛb saitii nɛɛ atsu nii aha lɛ he. Ani okane saji fɛɛ ni tsulɔ anɔkwafo lɛ ekala nyɛsɛɛ nɛɛ ni kɔɔ bɔ ni esa ákɛ akɛ social network saitii atsu nii aha lɛ he lɛ? Ebafeŋ nɔ ni nilee yɔɔ mli akɛ wɔkɛ Wɛb saitii nɛɛ aaatsu nii beni wɔkaneko saji nɛɛ! * Kɛ́ wɔfee nakai lɛ, ebaafee tamɔ nɔ ni wɔmiinu tsofa ko ni naa wa beni wɔkaneko ehe saji ni aŋmala yɛ tɔ lɛ he lɛ.
12. Mɛni hewɔ eji kwashiai asane akɛ wɔɔkpoo kɔkɔbɔi lɛ?
12 Mɛi ni booo kɔkɔbɔi ni tsulɔ anɔkwafo lɛ kɛhaa lɛ toi lɛ kɛ amɛ diɛŋtsɛ amɛhe, kɛ amɛsuɔlɔi woɔ oshara mli. Mfonirii ni teɔ bɔlɛnamɔ akɔnɔ shi lɛ akwɛmɔ eka mɛi komɛi ahe loo eha amɛkɛ amɛhe eyawo bɔlɛnamɔ jeŋba sha mli, ni amɛsusuɔ akɛ Yehowa enaaa nɔ ni amɛfeɔ lɛ. Kwɛ bɔ ni eji kwashiai asane akɛ mɔ ko aaasusu akɛ ebaanyɛ efee nɔ ko kɛtee Yehowa! (Abɛi 15:3; nyɛkanea Hebribii 4:13.) Nyɔŋmɔ miisumɔ ni eye ebua mɛi nɛɛ, ni etsɔɔ asafoŋ onukpai, ni ji enajiaŋdamɔlɔi yɛ shikpɔŋ lɛ nɔ lɛ anɔ eyeɔ ebuaa amɛ. (Gal. 6:1) Shi taakɛ nɔyelɔ ko baanyɛ ahe hegbɛ ni ekɛha mɔ ko akɛ maŋnyo lɛ yɛ edɛŋ kɛ́ efee nɔ fɔŋ ko lɛ, Yehowa hu baahe hegbɛ ni ekɛha mɔ ko akɛ Maŋtsɛyeli lɛ mli nyo lɛ yɛ edɛŋ kɛ́ etee nɔ efee esha ni etsakeee etsui. * (1 Kor. 5:11-13) Fɛɛ sɛɛ lɛ, enaa mɔbɔ. Mɛi ni tsakeɔ amɛtsui ni amɛbaa amɛjeŋ jogbaŋŋ lɛ baanyɛ amɛtsɔmɔ Yehowa nanemɛi ekoŋŋ, ni amɛbaaya nɔ amɛhi shi akɛ Maŋtsɛyeli lɛ mli bii. (2 Kor. 2:5-8) Kwɛ hegbɛ ni wɔná akɛ wɔɔsɔmɔ Maŋtsɛ ni yɔɔ suɔmɔ tamɔ nɛkɛ!
MAŊTSƐYELI LƐ MLI BII LƐ SUMƆƆ NI ATSƆƆ AMƐ NII
13. Mɛɛ gbɛ nɔ Maŋtsɛyeli lɛ mli bii lɛ tsɔɔ akɛ amɛnyaa nii ni atsɔɔ amɛ lɛ he?
13 Nɔyelɔi babaoo bɔɔ mɔdɛŋ waa akɛ amɛtsɔɔ amɛmaŋbii lɛ anii. Amɛtoɔ skul srɔtoi ahe gbɛjianɔ koni mɛi ale nikanemɔ kɛ niŋmaa, kɛ ninenaa nitsumɔ hu. Maŋtsɛyeli lɛ mli bii lɛ yɛ skul srɔtoi nɛɛ ahe miishɛɛ, ni amɛbɔɔ mɔdɛŋ amɛkaseɔ nikanemɔ, niŋmaa, kɛ ninenaa nitsumɔ. Shi amɛnyaa nibii ni Yehowa tsɔɔ egbɛjianɔtoo lɛ nɔ etsɔɔ amɛ lɛ ahe waa. Yehowa tsɔɔ Kristofoi asafo lɛ nɔ etsɔɔ wɔ nikanemɔ kɛ niŋmaa. Awoɔ fɔlɔi hewalɛ ni amɛkane nii amɛha amɛbii bibii lɛ. Daa nyɔɔŋ lɛ, tsulɔ anɔkwafo lɛ kalaa saji ni damɔ Biblia lɛ nɔ yɛ Buu-Mɔɔ kɛ Awake! woji tɛtrɛbii lɛ amli. Kɛ́ okaneɔ baafai fioo komɛi daa gbi lɛ, obaanyɛ ogbe fɛɛ naa yɛ nyɔɔŋ kome mli, ni no baaha oná Maŋtsɛyeli lɛ nitsɔɔmɔi lɛ ahe sɛɛ jogbaŋŋ.
14. (a) Mɛɛ tsɔsemɔ wɔnáa? (b) Te gbɛtsɔɔmɔi ni kɔɔ gbɛkɛ Weku Jamɔ he lɛ ateŋ nɔ ni okɛtsu nii lɛ?
14 Daa otsi lɛ, atsɔseɔ Maŋtsɛyeli lɛ mli bii lɛ yɛ amɛsafoŋ kpeei lɛ ashishi. Ákɛ nɔkwɛmɔnɔ lɛ, nɔ ni fe afii 60 nɛ lɛ, Teokrase Sɔɔmɔ Skul lɛ eye ebua mɛi babaoo ni amɛbatsɔmɔ Nyɔŋmɔ Wiemɔ lɛ he tsɔɔlɔi ni he esa. Ani okɛ ohe ewo skul nɛɛ mli? Yɛ nyɛsɛɛ afii nɛɛ amli lɛ, tsulɔ anɔkwafo lɛ etee nɔ ewo wɔ ŋaa ni wɔfee gbɛkɛ Weku Jamɔ lɛ daa otsi. Gbɛjianɔtoo nɛɛ eha wekui babaoo efee ekome. Ani onyɛ okɛ gbɛtsɔɔmɔi ni akɛha nyɛsɛɛ nɛɛ yɛ wɔwoji lɛ amli lɛ etsu nii? *
15. Mɛɛ hegbɛ kpele ko wɔná?
15 Maŋbii ni fĩɔ nɔyeli ko sɛɛ lɛ sumɔɔ akɛ amɛwo mɛi krokomɛi hewalɛ ni amɛ hu amɛfĩ nakai nɔyeli lɛ sɛɛ, ni amɛyaa shinai anaa po amɛyafeɔ nakai. Maŋtsɛyeli lɛ mli bii lɛ hu kɛ ekãa fĩɔ Nyɔŋmɔ Maŋtsɛyeli lɛ sɛɛ yɛ gbɛjegbɛi ahe kɛ shinai anaa yɛ jeŋ fɛɛ. Yɛ anɔkwale mli lɛ, taakɛ atsi tã yɛ nikasemɔ ni tsɔ hiɛ lɛ mli lɛ, Buu-Mɔɔ lɛ, ni tswaa Yehowa Maŋtsɛyeli lɛ he adafi lɛ ji wolo tɛtrɛɛ ni aja fe fɛɛ yɛ shikpɔŋ lɛ nɔ! Eji hegbɛ kpele ni wɔná akɛ wɔɔgba mɛi Nyɔŋmɔ Maŋtsɛyeli lɛ he sane. Ani okɛ ekãa miishiɛ?—Mat. 28:19, 20.
16. Te ooofee tɛŋŋ otsɔɔ akɛ oji Nyɔŋmɔ Maŋtsɛyeli lɛ mli nyo kpakpa?
16 Etsɛŋ, nɔyeli pɛ ni baaye shikpɔŋ lɛ nɔ ji Nyɔŋmɔ Maŋtsɛyeli lɛ. Ebaakudɔ wɔshihilɛ gbɛi fɛɛ. Ani obaafee Nyɔŋmɔ Maŋtsɛyeli lɛ mli nyo kpakpa yɛ nakai beaŋ? Amrɔ nɛɛ ji be ni esa akɛ otsɔɔ akɛ obaafee nakai. Yɛ yiŋ ni okpɛɔ daa gbi lɛ mli lɛ, feemɔ nɔ fɛɛ nɔ kɛwo Yehowa hiɛ nyam, ni okɛtsɔɔ akɛ ooba ojeŋ akɛ Nyɔŋmɔ Maŋtsɛyeli lɛ mli nyo kpakpa.—1 Kor. 10:31.
[Shishigbɛ niŋmai]
^ kk. 11 Ákɛ nɔkwɛmɔnɔ lɛ, kwɛmɔ July 2011 Awake! lɛ baafa 24-27; August 2011 Awake! lɛ baafa 10-13; kɛ February 2012 Awake! lɛ baafa 3-9 lɛ.
^ kk. 14 Kwɛmɔ August 15, 2011 Buu-Mɔɔ lɛ baafa 6-7 lɛ, kɛ January 2011 Wɔ Maŋtsɛyeli Sɔɔmɔ lɛ baafa 3-6 lɛ.
[Nikasemɔ lɛ he Sanebimɔi]
[Wiemɔ ni akɔ ni akɛmiitsu nii ni yɔɔ baafa 14]
Ani oboɔ Biblia mli kɔkɔbɔi ni kɔɔ Intanɛt lɛ he lɛ toi?
[Mfoniri ni yɔɔ baafa 12]
Taakɛ Korabii lɛ fee lɛ, ani oyɛ anɔkwa jamɔ kɛ eyinɔsane he miishɛɛ?
[Mfoniri ni yɔɔ baafa 15]
Gbɛkɛ Weku Jamɔ ni nyɛfeɔ lɛ baanyɛ aye abua bo kɛ oweku lɛ ni nyɛtsɔmɔ Maŋtsɛyeli lɛ mli bii kpakpai
