Yaa Nɔ Oshi Kpe Taakɛ Yeremia Fee Lɛ
Yaa Nɔ Oshi Kpe Taakɛ Yeremia Fee Lɛ
“[Mi Yehowa] miishi kpe yɛ miwiemɔ lɛ he ní mafee!”—YER. 1:12.
1, 2. Mɛni hewɔ akɛ bɔ ni Yehowa ‘yaa nɔ eshiɔ kpe’ lɛ to almond tso he lɛ?
TSEI ni gbáa afofro mra yɛ Lebanon kɛ Israel gɔji lɛ anɔ lɛ ateŋ ekome ji ŋmɛ tso ko ni atsɛɔ lɛ almond lɛ. Enɔ fɔfɔi etsuji kɛ eyɛji fɛfɛji lɛ gbáa mra yɛ January naagbee kɛmiimɔ February shishijee gbɛ. Gbɛ́i ni akɛtsɛɔ tso nɛɛ yɛ Hebri wiemɔ mli lɛ shishi ji “mɔ ni hiɛ tsɛ̃ɔ.”
2 Beni Yehowa wó Yeremia gbalɔ lɛ, ekɛ almond tso nɛɛ fee sane ko ni he hiaa waa he nɔkwɛmɔnɔ. Beni Yeremia je egbalɛ nitsumɔ lɛ shishi lɛ, ajie tso nɛɛ he mfoniri yɛ ninaa mli atsɔɔ lɛ. Mɛni he mfoniri tso lɛ fee? Yehowa tsɔɔ mli akɛ: “Miishi kpe yɛ miwiemɔ lɛ he ní mafee!” (Yer. 1:11, 12) Taakɛ almond tso ‘hiɛ tsɛ̃ɔ’ mra lɛ, nakai nɔŋŋ Yehowa ‘teɔ shi leebi maŋkpa’ yɛ mfonirifeemɔŋ ni etsuɔ egbalɔi lɛ koni amɛyabɔ ewebii lɛ kɔkɔ yɛ nɔ ni jɛɔ toigbele mli kɛbaa lɛ he. (Yer. 7:25) Ejɔŋ ehe—‘ebaaya nɔ eshi kpe’—kɛyashi egbalɛ wiemɔ lɛ baaba mli. Yɛ afi 607 D.Ŋ.B. lɛ, Yehowa gbala Yuda maŋ ni amɛkwa lɛ lɛ toi yɛ be ni eto lɛ naa pɛpɛɛpɛ.
3. Mɛni wɔbaanyɛ wɔná nɔmimaa akɛ bɔ fɛɛ bɔ ni fee lɛ Yehowa baafee?
3 Ŋmɛnɛ hu lɛ, Yehowa miishi kpe koni etsu eyiŋtoo he nii. Bɔ fɛɛ bɔ ni fee lɛ ebaaha ewiemɔ lɛ aba mli. Mɛɛ gbɛ nɔ Yehowa kpeshii lɛ kɔɔ ohe? Ani oheɔ oyeɔ akɛ yɛ afi ni wɔyɔɔ mli ni ji afi 2011 nɛɛ mli lɛ, Yehowa “miishi kpe” lolo koni ekɛha eshiwoi lɛ aba mli? Kɛ́ wɔyiŋ etɛ̃ɛɛ wɔ yɛ Yehowa shiwoi ni bɔ fɛɛ bɔ ni fee lɛ ebaaba mli lɛ ahe lɛ, amrɔ nɛɛ ji be ni esa akɛ wɔhiɛ atsɛ̃ kɛjɛ mumɔŋ wɔdɔiwɔɔ mli. (Rom. 13:11) Ákɛ Yehowa gbalɔ lɛ, Yeremia tee nɔ eshi kpe. Kɛ́ wɔpɛi bɔ ni Yeremia tee nɔ eshi kpe koni etsu nitsumɔ ni Nyɔŋmɔ kɛwo edɛŋ lɛ, kɛ nɔ hewɔ ni efee nakai lɛ mli lɛ, ebaaye ebua wɔ ni wɔna bɔ ni wɔɔfee wɔfi shi yɛ nitsumɔ ni Yehowa kɛwo wɔdɛŋ lɛ mli.
Shɛɛ sane ko ni yɔɔ Hiɛdɔɔ
4. Mɛni ha ewa kɛha Yeremia akɛ eeejaje eshɛɛ sane lɛ, ni mɛni hewɔ eshɛɛ sane lɛ ji hiɛdɔɔ sane lɛ?
4 Eeenyɛ efee akɛ beni Yehowa kɛ nitsumɔ wo Yeremia dɛŋ akɛ bulɔ lɛ, no mli lɛ eye aaafee afii 25. (Yer. 1:1, 2) Shi ena ehe tamɔ gbekɛ ko kwraa, ni tsɔɔ akɛ esaaa mɔ ni kɛ maŋ onukpai lɛ, mɛi ni edara yɛ afii amli ni yɔɔ hegbɛi lɛ wieɔ. (Yer. 1:6) Esa akɛ ejaje fɔbuu ni naa wa kɛ kojomɔi ni yɔɔ gbeyei, titri lɛ kɛshi osɔfoi lɛ, amale gbalɔi lɛ, kɛ nɔyelɔi lɛ, kɛ agbɛnɛ kɛshi mɛi ni wó “ŋmɔi” loo amɛkɔ gbɛ ni mɔ fɛɛ mɔ ekɔ lɛ “ni amɛka mli kwraa” lɛ. (Yer. 6:13; 8:5, 6) Abaawule Maŋtsɛ Salomo sɔlemɔtsu ni yɔɔ nyam ni akɛ afii ni miihe ashɛ afii 400 ejá anɔkwa Nyɔŋmɔ lɛ yɛ jɛmɛ lɛ. Yerusalem kɛ Yuda baatsɔ amaŋfɔ, ni abaaŋɔ emlibii lɛ nom. Ekã shi faŋŋ akɛ, shɛɛ sane ni akɛwo Yeremia dɛŋ ni ejaje lɛ ji hiɛdɔɔ sane!
5, 6. (a) Ŋmɛnɛ lɛ, mɛɛ gbɛ nɔ Yehowa kɛ Yeremia kuu lɛ tsuɔ nii? (b) Mɛni he wɔbaasusu yɛ nikasemɔ nɛɛ mli?
5 Ŋmɛnɛ hu lɛ, Yehowa ejɛ suɔmɔ mli ehala Kristofoi ni afɔ amɛ mu akuu ko koni amɛtsu nii akɛ mfonirifeemɔŋ bulɔi kɛbɔ adesai fɛɛ kɔkɔ yɛ kojomɔ ni ekɛbaaba jeŋ nɛɛ nɔ lɛ he. Yeremia kuu nɛɛ kɛ afii nyɔŋmai abɔ ebɔ mɛi akɔkɔ ní amɛhiɛ ahi bei ni wɔyɔɔ mli lɛ nɔ. (Yer. 6:17) Biblia lɛ maa nɔ mi akɛ, Yehowa ni ji Bei Bulɔ Kpeteŋkpele lɛ bɛ shɔ̃ɔ. Egbi lɛ baaba yɛ be naa pɛpɛɛpɛ, yɛ ŋmɛlɛtswaa ni adesai kpaaa gbɛ lɛ nɔ.—Zef. 3:8; Mar. 13:33; 2 Pet. 3:9, 10.
6 Esa akɛ wɔha ehi wɔjwɛŋmɔ mli akɛ Yehowa miishi kpe ni ekɛ ejalɛ jeŋ hee lɛ baaba yɛ be naa. Esa akɛ anɔkwa sane nɛɛ akanya Yeremia kuu lɛ kɛ amɛnanemɛi ni ejɔɔ amɛhe nɔ amɛha Yehowa lɛ koni amɛhiɛ ahi amɛhe nɔ yɛ bɔ ni amɛshɛɛ sane lɛ ji hiɛdɔɔ sane lɛ he. Mɛɛ gbɛ nɔ enɛ kɔɔ ohe? Yesu ha efee faŋŋ akɛ esa akɛ mɔ fɛɛ mɔ akpɛ eyiŋ kɛji ebaafi Nyɔŋmɔ Maŋtsɛyeli lɛ sɛɛ loo efeŋ nakai. Nyɛhaa wɔsusua sui etɛ ni ye bua Yeremia ni no ha ehiɛ hi enitsumɔ lɛ nɔ lɛ he, ni no baaye abua wɔ koni wɔ hu wɔfee nakai.
Suɔmɔ Kɛha Mɛi
7. Yɛ bɔ ni ewa kɛha Yeremia akɛ eshiɛ lɛ fɛɛ sɛɛ lɛ, tsɔɔmɔ bɔ ni suɔmɔ tsirɛ lɛ ní efee nakai lɛ mli.
7 Yɛ bɔ ni ewa kɛha Yeremia akɛ eshiɛ lɛ fɛɛ sɛɛ lɛ, mɛni tsirɛ lɛ koni eshiɛ? Ená suɔmɔ kɛha mɛi. Yeremia le akɛ naagbai ni mɛi lɛ kɛkpeɔ lɛ titri jɛ apasa tookwɛlɔi lɛ. (Yer. 23:1, 2) Anɔkwa sane nɛɛ ni ele lɛ ha ekɛ suɔmɔ kɛ musuŋtsɔlɛ tsu enitsumɔ lɛ. Eesumɔ ni emaŋbii lɛ anu Nyɔŋmɔ wiemɔ lɛ koni amɛná wala. Amɛsane kã etsui nɔ aahu akɛ eye ŋkɔmɔ yɛ sane fɔŋ ni miiba amɛnɔ lɛ hewɔ. (Nyɛkanea Yeremia 8:21; 9:1.) Yeremia Yaafo wolo lɛ haa efeɔ faŋŋ akɛ Yeremia yɛ suɔmɔ ni mli kwɔ kɛha Yehowa gbɛ́i lɛ kɛ ewebii lɛ, ni ákɛ amɛsane kã etsui nɔ jogbaŋŋ. (Yaafo 4:6, 9) Ŋmɛnɛ lɛ, kɛ́ ona mɛi ni “etɔ amɛ ni amɛfee yuyaa tamɔ tooi ni bɛ kwɛlɔ lɛ,” ani onáaa shwelɛ lɛ akɛ obaashiɛ Nyɔŋmɔ Maŋtsɛyeli lɛ he sane ni shɛjeɔ mɔ mii lɛ otsɔɔ amɛ?—Mat. 9:36.
8. Mɛni tsɔɔ akɛ nɔnaa haaa Yeremia mli ajoo?
8 Mɛi ni Yeremia taoɔ ni eye ebua amɛ lɛ fee lɛ niseniianii, shi no haaa etɔ ehe owele loo emli ajoo yɛ amɛnɔ. Eto etsui shi ni ejie mlihilɛ kpo, ejie sui nɛɛ akpo etsɔɔ Maŋtsɛ Zedekia ni jeŋba ekpɔtɔ lɛ po! Beni Zedekia kpɛlɛ ni agbe Yeremia lɛ sɛɛ lɛ, Yeremia tee nɔ ekpa lɛ fai koni ebo Yehowa gbee toi. (Yer. 38:4, 5, 19, 20) Ani suɔmɔ ni wɔyɔɔ kɛha mɛi lɛ mli wa tamɔ Yeremia nɔ̃ lɛ?
Ekãa ni Jɛ Nyɔŋmɔ Ŋɔɔ
9. Te wɔfeɔ tɛŋŋ wɔleɔ akɛ ekãa ni Yeremia jie lɛ kpo lɛ jɛ Nyɔŋmɔ ŋɔɔ lɛ?
9 Beni Yehowa kɛ Yeremia wie klɛŋklɛŋ kwraa lɛ, Yeremia bɔ mɔdɛŋ akɛ ebaajie enaa. Enɛ haa wɔnaa akɛ ekãa kɛ shifimɔ ni ejie kpo yɛ sɛɛ mli lɛ jeee sui ni akɛfɔ lɛ. Yeremia hiɛ ni ekɛfɔ̃ Nyɔŋmɔ nɔ kwraa lɛ ji nɔ ni ha efee ekãa babaoo beni esɔmɔɔ akɛ gbalɔ lɛ. Hɛɛ, Yehowa kɛ gbalɔ lɛ yɛ “tamɔ ekãalɔ ní he wa,” ejaakɛ efĩ Yeremia sɛɛ ni ewaje lɛ koni enyɛ etsu nitsumɔ ni ekɛwo edɛŋ lɛ. (Yer. 20:11) Abale Yeremia akɛ ekãalɔ aahu akɛ beni Yesu sɔmɔɔ yɛ shikpɔŋ lɛ nɔ lɛ, mɛi komɛi susu akɛ Yesu ji Yeremia ni eku sɛɛ eba wala mli ekoŋŋ!—Mat. 16:13, 14.
10. Mɛni hewɔ wɔbaanyɛ wɔkɛɛ ákɛ akɛ mɛi ni afɔ amɛ mu lɛ ateŋ mɛi ni eshwɛ lɛ ‘eto jeŋmaji lɛ kɛ maŋtsɛyelii lɛ anɔ’ lɛ?
10 Ákɛ “jeŋmaji amaŋtsɛ” lɛ, Yehowa fã Yeremia koni ekɛ kojomɔ shɛɛ sane ayaha jeŋmaji kɛ maŋtsɛyelii. (Yer. 10:6, 7) Shi mɛɛ shishinumɔ naa akɛ mɛi ni afɔ amɛ mu lɛ ateŋ mɛi ni eshwɛ lɛ ‘eto jeŋmaji lɛ kɛ maŋtsɛyelii lɛ anɔ’ lɛ? (Yer. 1:10) Jeŋ muu fɛɛ Maŋtsɛ lɛ kɛ nitsumɔ ko ewo Yeremia kuu nɛɛ dɛŋ taakɛ efee gbalɔ ni hi shi yɛ blema lɛ. No hewɔ lɛ akɛ nitsumɔ ewo Nyɔŋmɔ tsuji ni afɔ amɛ muu lɛ adɛŋ akɛ amɛjaje shɛɛ saji amɛshi jeŋmaji kɛ maŋtsɛyelii yɛ jeŋ fɛɛ. Hegbɛ ni Nyɔŋmɔ Ofe lɛ kɛha Yeremia kuu lɛ hewɔ lɛ ejajeɔ akɛ yɛ be ni sa mli lɛ Nyɔŋmɔ diɛŋtsɛ baafãmɔ jeŋmaji kɛ maŋtsɛyelii ni yɔɔ ŋmɛnɛ lɛ ni efite amɛ, ni etsɔɔ wiemɔi ni mli kã shi faŋŋ ni yɔɔ Nyɔŋmɔ Wiemɔ ni ajɛ mumɔŋ aŋma lɛ nɔ efeɔ nakai. (Yer. 18:7-10; Kpoj. 11:18) Yeremia kuu lɛ etswa efai shi akɛ eŋmɛŋ nitsumɔ ni Nyɔŋmɔ kɛwo edɛŋ akɛ ejaje Yehowa kojomɔ shɛɛ saji yɛ shikpɔŋ lɛ nɔ fɛɛ lɛ he.
11. Kɛ́ wɔkɛ shihilɛi ni mli wawai kpe lɛ, mɛni baaye abua wɔ koni wɔshiɛ ni wɔkafɔ̃ɔ?
11 Bei komɛi lɛ kɛ́ wɔkɛ shiteekɛwoo kpe, mɛi booo wɔ toi, loo wɔkɛ shihilɛi ni mli wawai kpe lɛ wɔnijiaŋ jeɔ wui. (2 Kor. 1:8) Shi taakɛ Yeremia fee lɛ, nyɛhaa wɔyaa nɔ wɔfia shi. Kaaha onijiaŋ je wui. Be mli ni wɔkwɛɔ Nyɔŋmɔ gbɛ kɛha yelikɛbuamɔ lɛ, nyɛhaa wɔteŋ mɔ fɛɛ mɔ aya nɔ atutɔ Nyɔŋmɔ, wɔkɛ wɔhiɛ afɔ̃ enɔ, ni “wɔná ekãa.” (1 Tes. 2:2) Akɛni wɔji anɔkwa jálɔi hewɔ lɛ, esa akɛ wɔya nɔ wɔha wɔhiɛ ahi sɔ̃i ni Nyɔŋmɔ kɛfɔ̃ wɔnɔ lɛ anɔ. Esa akɛ wɔtswa wɔfai shi akɛ wɔbaaya nɔ wɔshiɛ Kristendom hiɛkpatamɔ ni akɛ hiɛkpatamɔ ni ba Yerusalem ni yeee anɔkwa lɛ nɔ lɛ fee he mfoniri lɛ ni wɔfɔ̃ɔɔ. Jeee “Yehowa duromɔ afi” lɛ kɛkɛ Yeremia kuu lɛ shiɛɔ, shi moŋ eshiɛɔ “wɔ-Nyɔŋmɔ lɛ oweletɔɔ gbi” lɛ hu.—Yes. 61:1, 2; 2 Kor. 6:2.
Tsuiŋ Miishɛɛ
12. Mɛni hewɔ wɔbaanyɛ wɔmu sane naa akɛ Yeremia haaa emiishɛɛ atã lɛ, ni mɛni ji nɔ tuuntu ni ha efee nakai lɛ?
12 Yeremia nitsumɔ lɛ ha ená miishɛɛ. Ekɛɛ Yehowa akɛ: “Kɛ́ mina owiemɔi lɛ miyeɔ; owiemɔi lɛ ji mimiishɛɛ kɛ mitsui mlifilimɔ; ejaakɛ aŋɔ ogbɛi awo mi, Yehowa.” (Yer. 15:16) Yɛ Yeremia gbɛfaŋ lɛ, eji hegbɛ ni ená akɛ esɔmɔ akɛ anɔkwa Nyɔŋmɔ lɛ najiaŋdamɔlɔ, ni eshiɛ ewiemɔ lɛ. Nɔ ni sa kadimɔ ji akɛ, kɛ́ Yeremia gbala ejwɛŋmɔ kɛtee ehe fɛo ni emaŋbii lɛ yeɔ lɛ nɔ lɛ, emiishɛɛ lɛ tãa. Shi kɛ́ egbala ejwɛŋmɔ kɛtee bɔ ni eshɛɛ sane lɛ he hiaa kɛ bɔ ni eji sanekpakpa lɛ nɔ lɛ, enáa miishɛɛ ekoŋŋ.—Yer. 20:8, 9.
13. Mɛni hewɔ ehe miihia ni wɔkɛ mumɔŋ anɔkwalei ni mli kwɔlɔ lɛ alɛ̀ wɔhe koni wɔná miishɛɛ daa lɛ?
13 Ŋmɛnɛ hu lɛ, kɛ́ wɔbaaya nɔ wɔná miishɛɛ yɛ shiɛmɔ nitsumɔ lɛ, belɛ esa akɛ wɔkɛ “niyenii kpakpa,” ni ji Nyɔŋmɔ Wiemɔ lɛ mli anɔkwalei ni mli kwɔlɔ lɛ alɛ̀ wɔhe. (Heb. 5:14) Kɛ́ wɔkase nii jogbaŋŋ lɛ ebaatswa wɔhemɔkɛyeli lɛ ema shi. (Kol. 2:6, 7) Ehaa wɔnaa bɔ ni wɔnifeemɔi náa Yehowa tsui lɛ nɔ hewalɛ ehaa. Kɛ́ ewa kɛha wɔ akɛ wɔɔná be kɛkane Biblia lɛ ni wɔkase lɛ, esa akɛ wɔsaa wɔpɛi bɔ ni wɔto wɔbe he gbɛjianɔ wɔha lɛ mli ekoŋŋ. Kɛ́ wɔkɛ minitii fioo pɛ po kaseɔ Biblia lɛ ni wɔjwɛŋɔ nɔ daa gbi lɛ, ebaaha wɔbɛŋkɛ Yehowa kpaakpa, ni ebaaha ‘wɔmiishɛɛ kɛ wɔtsui mlifilimɔ’ lɛ afá, taakɛ eba lɛ yɛ Yeremia gbɛfaŋ lɛ.
14, 15. (a) Akɛni Yeremia tsu nitsumɔ ni akɛwo edɛŋ lɛ jogbaŋŋ kɛmɔ shi hewɔ lɛ, mɛni jɛ mli kɛba? (b) Ŋmɛnɛ lɛ, mɛni Nyɔŋmɔ webii lɛ le yɛ shiɛmɔ nitsumɔ lɛ he?
14 Yeremia jaje Yehowa kɔkɔbɔi kɛ kojomɔ shɛɛ sane lɛ ni efɔ̃ɔɔ, shi nitsumɔ ni akɛwo edɛŋ akɛ ‘emamɔ ní etɛo’ lɛ hu kã etsui nɔ. (Yer. 1:10) Nitsumɔ ni akɛwo edɛŋ akɛ emamɔ ni etɛo lɛ wo yibii. Beni akpata Yerusalem hiɛ yɛ afi 607 D.Ŋ.B. lɛ, abaa Yudafoi komɛi kɛ mɛi komɛi hu ni jeee Israelbii ayi. Amɛteŋ mɛi komɛi ji Rekabbii lɛ, Ebed-Melek, kɛ Baruk. (Yer. 35:19; 39:15-18; 43:5-7) Yeremia nanemɛi anɔkwafoi ni sheɔ Nyɔŋmɔ gbeyei nɛɛ feɔ mɛi ni ŋmɛnɛ lɛ amɛyɔɔ hiɛnɔkamɔ akɛ amɛbaahi shikpɔŋ lɛ nɔ ni kɛ Yeremia kuu lɛ bɔɔ naanyo lɛ ahe mfoniri. Yeremia kuu lɛ tswaa “asafo babaoo” nɛɛ emaa shi kɛ miishɛɛ babaoo. (Kpoj. 7:9) Nakai nɔŋŋ mɛi ni afɔ amɛ mu lɛ nanemɛi anɔkwafoi nɛɛ tsui nyɔɔ amɛmli babaoo akɛ amɛmiiye amɛmiibua mɛi ni hiɛ tsui kpakpa lɛ koni amɛle anɔkwale lɛ.
15 Nyɔŋmɔ webii lɛ le akɛ jeee akɛ mɛi ni nuɔ sanekpakpa lɛ ni ashiɛɔ lɛ náa he sɛɛ kɛkɛ, shi moŋ eji gbɛ kome hu ni wɔtsɔɔ nɔ wɔjáa wɔ-Nyɔŋmɔ lɛ. Kɛji mɛi bo wɔ toi jio, amɛbooo wɔ toi jio lɛ, jamɔ ni wɔjáa Yehowa kɛtsɔ wɔshiɛmɔ nitsumɔ lɛ nɔ lɛ haa wɔnáa miishɛɛ naakpa.—Lala 71:23; nyɛkanea Romabii 1:9.
Ha Ohiɛ Ahi Osɔɔmɔ Nitsumɔ lɛ Nɔ!
16, 17. Mɛɛ gbɛ nɔ Kpojiemɔ 17:9, 10 lɛ kɛ Habakuk 2:3 lɛ haa wɔnaa akɛ, be ni wɔyɔɔ mli nɛɛ jeee be ni afeɔ anyagba lɛ?
16 Kɛ́ wɔjwɛŋ gbalɛ ni yɔɔ Kpojiemɔ 17:9, 10 ni ajɛ mumɔŋ akɛha lɛ nɔ lɛ, wɔnaa akɛ be ni wɔyɔɔ mli nɛɛ jeee be ni afeɔ anyagba. Maŋtsɛ ni ji kpawo nɔ, ni ji Anglo-Amerika Jeŋ Hewalɛ lɛ miiye nɔ. Aŋma yɛ maŋtsɛ nɛɛ he akɛ: “Kɛ́ [jeŋ hewalɛ ni ji kpawo nɔ lɛ] ba lɛ, ja ehi shi fioo.” Amrɔ nɛɛ eshwɛ fioo ni nakai be “fioo” lɛ baaba naagbee. Gbalɔ Habakuk wiemɔi ni nyiɛ sɛɛ nɛɛ haa wɔnáa nɔmimaa yɛ nibii agbɛjianɔtoo fɔŋ nɛɛ naagbee lɛ he akɛ: “Shi ninaa lɛ yɛ ha be ní ato lɛ kɛ̃ . . . Kɛ́ eshashao shi hu jiŋŋ, mɛɛ lɛ kɛ̃; ejaakɛ ebaaba lɛɛlɛŋ, ekpeŋ sɛɛ!”—Hab. 2:3.
17 Bi ohe akɛ: ‘Ani bɔ ni mihiɔ shi mihaa lɛ tsɔɔ akɛ mikɛ hiɛdɔɔ tsuɔ wɔbe nɛɛ he nii? Ani bɔ ni mihiɔ shi mihaa lɛ tsɔɔ akɛ miikpa gbɛ akɛ naagbee lɛ baaba nɔŋŋ? Aloo miyiŋkpɛi kɛ nibii ni mikɛyeɔ klɛŋklɛŋ gbɛhe lɛ tsɔɔ akɛ mikpaaa gbɛ akɛ naagbee lɛ baaba nɔŋŋ loo mibɛ nɔmimaa po akɛ ebaaba?’
18, 19. Mɛni hewɔ amrɔ nɛɛ jeee be ni afeɔ shɔ̃ɔ lɛ?
18 Nitsumɔ ni bulɔ kuu lɛ tsuɔ lɛ bako naagbee. (Nyɛkanea Yeremia 1:17-19.) Kwɛ bɔ ni wɔnáa miishɛɛ akɛ mɛi ni afɔ amɛ mu lɛ ateŋ mɛi ni eshwɛ lɛ miidamɔ shi shiŋŋ tamɔ “dade akulashiŋ,” kɛ agbɛnɛ tamɔ “maŋ ní atswa gbogbo awo he”! ‘Amɛkɛ anɔkwale efĩ amɛhɛ,’ ni tsɔɔ akɛ amɛhaa Nyɔŋmɔ Wiemɔ lɛ wajeɔ amɛ kɛyashi amɛaagbe nitsumɔ ni akɛwo amɛdɛŋ lɛ naa. (Efe. 6:14) Nakai nɔŋŋ asafo babaoo lɛ mlibii lɛ kɛ ekãa fĩɔ Yeremia kuu lɛ sɛɛ koni amɛtsu nitsumɔ ni Nyɔŋmɔ kɛwo amɛdɛŋ lɛ.
19 Jeee be ni afeɔ shɔ̃ɔ yɛ Maŋtsɛyeli nitsumɔ lɛ he nɛ, shi moŋ eji be ni esa akɛ akɛsusu nɔ ni Yeremia 12:5 lɛ tsɔɔ lɛ he. (Nyɛkanea.) Wɔ fɛɛ wɔkɛ shihilɛi ni mli wawai ni esa akɛ wɔdamɔ naa kpeɔ. Abaanyɛ akɛ shihilɛi ni haa anaa bɔ ni wɔhemɔkɛyeli lɛ mli wa ha nɛɛ ato “najiatsɛmɛi” ni esa akɛ wɔ kɛ amɛ ada foi lɛ he. Fɛɛ sɛɛ lɛ, beni “amanehulu babaoo” lɛ bɛŋkɛɔ nɛɛ, wɔbaanyɛ wɔkpa gbɛ akɛ wɔkɛ shihilɛi ni mli wawai babaoo baakpe. (Mat. 24:21) Abaanyɛ akɛ bɔ ni wɔɔfee wɔdamɔ shihilɛi ni mli wawai fe nɔ ni wɔkɛkpeɔ amrɔ nɛɛ ni wɔbaanyɛ wɔkɛkpe wɔsɛɛ naa lɛ ato ‘okpɔŋɔi ni wɔkɛaada foi’ he. Dani mɔ ko baanyɛ ekɛ okpɔŋɔi ada foi lɛ ebaabi ni ená hewalɛ babaoo bɔ ni baaha enyɛ efi shi ni ekakpa foi lɛ damɔ yɛ gbɛteŋ. No hewɔ lɛ, esa akɛ wɔdamɔ shihilɛi ni mli wawai ni wɔkɛkpeɔ amrɔ nɛɛ naa koni no asaa wɔ ato ni wɔnyɛ wɔdamɔ nɔ ni ka wɔhiɛ lɛ naa.
20. Mɛni otswa ofai shi akɛ obaafee?
20 Wɔ fɛɛ wɔbaanyɛ wɔkase Yeremia koni wɔnyɛ wɔtsu shiɛmɔ nitsumɔ ni akɛwo wɔdɛŋ lɛ jogbaŋŋ kɛmɔ shi! Sui tamɔ suɔmɔ, ekãafeemɔ, kɛ miishɛɛ ni tsirɛ Yeremia ni enyɛ ekɛ afii 67 tsu esɔɔmɔ nitsumɔ lɛ jogbaŋŋ kɛmɔ shi. Bɔ ni almond tso lɛ gbáa floŋŋ kɛ fɛo lɛ kaiɔ wɔ akɛ Yehowa ‘baaya nɔ eshi kpe’ yɛ ewiemɔ lɛ he koni eha eba mli. Belɛ wɔyɛ yiŋtoo kpakpa hewɔ ni esa akɛ wɔ hu wɔfee nakai. Yeremia ‘tee nɔ eshi kpe,’ ni wɔ hu wɔbaanyɛ wɔfee nakai.
Ani Okaiɔ?
• Mɛɛ gbɛ nɔ suɔmɔ ni Yeremia yɔɔ lɛ ha ‘etee nɔ eshi kpe’ yɛ nitsumɔ ni akɛwo edɛŋ lɛ he lɛ?
• Mɛni hewɔ ehe miihia ni wɔná ekãa ni jɛ Nyɔŋmɔ ŋɔɔ lɛ?
• Mɛni ye bua Yeremia ni etee nɔ ekɛ miishɛɛ tsu enitsumɔ lɛ?
• Mɛni hewɔ oosumɔ ni ‘oya nɔ oshi kpe’ lɛ?
[Nikasemɔ lɛ he Sanebimɔi]
[Mfonirii ni yɔɔ baafa 31]
Ani obaaya nɔ oshiɛ, ekɔɔɔ he eko shiteekɛwoo ni okɛbaakpe lɛ?