Ha Nyɔŋmɔ Mumɔ Lɛ Akudɔ Bo, Shi Jeee Je Nɛŋ Mumɔ Lɛ
Ha Nyɔŋmɔ Mumɔ Lɛ Akudɔ Bo, Shi Jeee Je Nɛŋ Mumɔ Lɛ
“Wɔ lɛ, jeee je nɛŋ mumɔ lɛ wɔná, shi moŋ Mumɔ ni jɛ Nyɔŋmɔ mli lɛ, koni wɔle nii ni Nyɔŋmɔ eŋɔduro wɔ lɛ.”—1 KOR. 2:12.
1, 2. (a) Mɛɛ shishinumɔ naa anɔkwa Kristofoi wuɔ ta yɛ? (b) Mɛɛ sanebimɔi wɔbaasusu he?
ANƆKWA Kristofoi miiwu ta! Wɔhenyɛlɔ lɛ yɛ hewalɛ waa, ele ŋaa, ni ehe ekwakwao yɛ tawuu mli. Eyɛ tawuu nii ko ni tsuɔ nii jogbaŋŋ ní ekɛmiiye adesai babaoo anɔ. Shi esaaa akɛ wɔnuɔ he akɛ nɔ ko bɛ ni wɔbaanyɛ wɔfee loo bɔ fɛɛ bɔ ni fee lɛ ebaaye wɔnɔ kunim. (Yes. 41:10) Wɔyɛ tawuu nii ko ni baanyɛ adamɔ tutuamɔ fɛɛ tutuamɔ naa.
2 Wɔtawuu lɛ, jeee tawuu diɛŋtsɛ; eji mfonirifeemɔŋ tawuu. Satan Abonsam ji wɔhenyɛlɔ lɛ, ni tawuu nii tuuntu ni ekɛtsuɔ nii ji “je nɛŋ mumɔ lɛ.” (1 Kor. 2:12) Nyɔŋmɔ mumɔ lɛ ji tawuu nii titri ni wɔkɛdamɔɔ etutuamɔi lɛ anaa. Bɔni afee ni wɔhe awa yɛ mumɔŋ ni wɔkanyɔ yɛ ta nɛɛ mli lɛ, esa akɛ wɔbi Nyɔŋmɔ ni eha wɔ emumɔ lɛ koni wɔjie mumɔ lɛ yibii lɛ kpo yɛ wɔshihilɛ mli. (Gal. 5:22, 23) Belɛ, mɛni ji je nɛŋ mumɔ lɛ, ni te fee tɛŋŋ ni ená mɛi babaoo anɔ hewalɛ lɛ? Te wɔɔfee tɛŋŋ wɔna kɛji je nɛŋ mumɔ lɛ miiná wɔnɔ hewalɛ loo enáaa wɔnɔ hewalɛ? Ni mɛni wɔbaanyɛ wɔkase kɛjɛ Yesu ŋɔɔ yɛ bɔ ni wɔɔfee wɔha Nyɔŋmɔ mumɔ lɛ akudɔ wɔ kɛ bɔ ni wɔɔfee wɔte shi wɔwo je nɛŋ mumɔ lɛ he?
Je Nɛŋ Mumɔ lɛ —Mɛni Hewɔ Ehe Shi Waa Lɛ?
3. Mɛni ji je nɛŋ mumɔ lɛ?
3 Je nɛŋ mumɔ lɛ jɛɛhe ji Satan, mɔ ni ji “je nɛŋ lumɔ lɛ,” ni mumɔ nɛɛ teɔ shi ewoɔ Nyɔŋmɔ mumɔ krɔŋkrɔŋ lɛ. (Yoh. 12:31; 14:30; 1 Yoh. 5:19) Eji nɔ titri ni kudɔɔ je lɛ, ni enáa mɛi anifeemɔi anɔ hewalɛ. Hewalɛ nɛɛ haa adesai teɔ shi amɛwoɔ Nyɔŋmɔ suɔmɔnaa nii kɛ eyiŋtoo.
4, 5. Te fee tɛŋŋ ni mumɔ ni jɛ Satan ŋɔɔ nɛɛ ebahe shi waa lɛ?
4 Te fee tɛŋŋ ni mumɔ ni jɛ Satan ŋɔɔ nɛɛ ebahe shi waa lɛ? Klɛŋklɛŋ lɛ, Satan laka Hawa yɛ Eden abɔɔ lɛ mli. Elaka lɛ akɛ kɛ́ etse ehe kɛjɛ Nyɔŋmɔ he lɛ eshihilɛ baahi jogbaŋŋ. (1 Mose 3:13) Ebafee faŋŋ akɛ Satan ji amalelɔ. (Yoh. 8:44) No sɛɛ lɛ, etsɔ yoo lɛ nɔ eha Adam gbo Yehowa nɔ toi. Yɛ nɔ ni Adam fee nɛɛ hewɔ lɛ, ahɔɔ adesai awo esha mli, ni no eha amɛná su ni haa efeɔ mlɛo akɛ toigbele mumɔ ni jɛ Satan ŋɔɔ lɛ aaaná amɛnɔ hewalɛ lɛ.—Nyɛkanea Efesobii 2:1-3.
5 Satan ná ŋwɛi bɔfoi komɛi hu anɔ hewalɛ ni amɛbatsɔmɔ daimonioi. (Kpoj. 12:3, 4) Ŋwɛi bɔfoi nɛɛ tse Nyɔŋmɔ hiɛ atua dani Noa beaŋ Nu Afua lɛ ba. Nakai ŋwɛi bɔfoi lɛ hé amɛye akɛ ehi akɛ amɛaaŋmɛɛ gbɛhei ni amɛyɔɔ yɛ ŋwɛi lɛ he, ní amɛkɛ amɛhe ayawo shihilɛ ni jeee Nyɔŋmɔ to eha amɛ lɛ mli yɛ shikpɔŋ lɛ nɔ. (Yuda 6) Daimonioi nɛɛ ni amrɔ nɛɛ amɛbɛ heloo gbɔmɔtsei lɛ miiye miibua Satan ni ‘eeshishiu jeŋ muu lɛ fɛɛ.’ (Kpoj. 12:9) Dɔlɛ sane ji akɛ, adesai babaoo leee akɛ daimonioi lɛ náa mɛi anɔ hewalɛ.—2 Kor. 4:4.
Ani Je Nɛŋ Mumɔ lɛ Miiná Onɔ Hewalɛ?
6. Mɛɛ gbɛ kome pɛ nɔ je nɛŋ mumɔ lɛ baanyɛ aná wɔnɔ hewalɛ?
6 Mɛi babaoo leee akɛ Satan miiná mɛi anɔ hewalɛ, shi ehe ehiaaa ni aŋɔ eŋaatsɔi lɛ kɛtée anɔkwa Kristofoi. (2 Kor. 2:11) Yɛ anɔkwale mli lɛ, je nɛŋ mumɔ lɛ nyɛŋ aná wɔnɔ hewalɛ, ja wɔŋmɛ gbɛ dã. Nyɛhaa wɔsusua sanebimɔi ejwɛ ni baaha wɔna kɛji Nyɔŋmɔ mumɔ lɛ loo je nɛŋ mumɔ lɛ ni kudɔɔ wɔ lɛ he wɔkwɛa.
7. Mɛɛ gbɛ kome nɔ Satan tsɔɔ etseɔ wɔ kɛjɛɔ Yehowa he?
7 Mɛni nɔ ni mikɛjieɔ mihiɛtserɛ lɛ haa anaa yɛ mihe? (Nyɛkanea Yakobo 3:14-18.) Satan bɔɔ mɔdɛŋ koni eha wɔtse wɔhe kɛjɛ Nyɔŋmɔ he kɛtsɔ ka ni ekaa wɔ koni wɔná suɔmɔ kɛha yiwalɛ yɛ wɔtsui mli lɛ nɔ. Abonsam le akɛ Yehowa nyɛ̃ɔ mɛi ni sumɔɔ yiwalɛ lɛ. (Lala 11:5) No hewɔ lɛ, Satan tsɔɔ woji, sinii, lalai, kɛ kɔmpiuta nɔ shwɛmɔi—ni amɛteŋ ekomɛi haa mɛi ni kɛshwɛɔ lɛ feɔ amɛnii oookɛɛ amɛkɛ amɛhe miiwo bɔlɛnamɔ jeŋba sha loo awuiyeli mli lɛ—anɔ etéɔ wɔheloo lɛ akɔnɔi ashi. Kɛ́ wɔyɛ suɔmɔ kɛha nɔ ni ja shi wɔtsui lɛ fã ko sumɔɔ nɔ ni ejaaa ní Satan woɔ he hewalɛ lɛ, Satan náa miishɛɛ.—Lala 97:10.
8, 9. Mɛɛ sanebimɔi ni kɔɔ hiɛtserɛjiemɔ he esa akɛ wɔbi wɔhe?
8 Nɔ ni tamɔɔɔ nakai lɛ, mɛi ni haa Nyɔŋmɔ mumɔ lɛ kudɔɔ amɛ lɛ ahe tse, amɛhe jɔ, ni amɛyi obɔ kɛ mɔbɔnalɛ. Esa jogbaŋŋ akɛ wɔɔbi wɔhe akɛ: ‘Ani nibii ni mikɛjieɔ mihiɛtserɛ lɛ haa mijieɔ sui kpakpai akpo?’ Nilee ni jɛ ŋwɛi lɛ “efeee osato.” Mɛi ni Nyɔŋmɔ mumɔ lɛ kudɔɔ amɛ lɛ eshiɛɛɛ amɛhaaa amɛkutsoŋbii lɛ akɛ amɛhe atse, amɛhe ajɔ, kɛkɛ lɛ amɛyakwɛ mfonirii ni awuiyeli kɛ jeŋba sha nifeemɔ yɔɔ mli yɛ amɛ diɛŋtsɛ amɛshĩai amli.
9 Yehowa biɔ ni ajá ekome too pɛ. Shi taakɛ Satan bi ni Yesu afee lɛ, ebaasumɔ ni wɔkula shi wɔjá lɛ shikome pɛ po. (Luka 4:7, 8) Wɔbaanyɛ wɔbi wɔhe akɛ: ‘Ani nibii ni mikɛjieɔ mihiɛtserɛ lɛ haa mijáa Nyɔŋmɔ kome too pɛ? Ani ehaa ewaa loo efeɔ mlɛo kɛhaa mi akɛ mate shi mawo je nɛŋ mumɔ lɛ? Ani esa akɛ matsake nibii ni mikɛjieɔ mihiɛtserɛ lɛ?’
10, 11. (a) Mɛɛ su je nɛŋ mumɔ lɛ haa mɛi náa yɛ heloonaa nibii ahe? (b) Mɛɛ su Nyɔŋmɔ Wiemɔ ni ajɛ mumɔŋ aŋma lɛ woɔ he hewalɛ?
10 Mɛɛ su mijieɔ lɛ kpo yɛ heloonaa nibii ahe? (Nyɛkanea Luka 18:24-30.) “Hiŋmɛii lɛ asɛɛdii nii lɛ,” ni ji hiɛkɔɔ kɛ heloonaa nii asɛɛtiumɔ lɛ ji su ni je nɛŋ mumɔ lɛ haa mɛi náa. (1 Yoh. 2:16) Eha mɛi babaoo miitao nii pii aná. (1 Tim. 6:9, 10) Je nɛŋ mumɔ lɛ haa wɔheɔ wɔyeɔ akɛ heloonaa nii pii anaa ni wɔɔbua lɛ baaha wɔfee shweshweeshwe daa. (Abɛi 18:11) Shi, kɛ́ wɔsumɔɔ shika fe Nyɔŋmɔ lɛ, no baatsɔɔ akɛ Satan eye wɔnɔ kunim. Esa akɛ wɔbi wɔhe akɛ: ‘Ani nɔ̃ tuuntu ni mitiuɔ sɛɛ yɛ mishihilɛ mli ji heloonaa nibii ni baaha maná ogbɔjɔ shihilɛ?’
11 Nɔ ni tamɔɔɔ nakai lɛ, Nyɔŋmɔ Wiemɔ ni ajɛ mumɔŋ aŋma lɛ woɔ wɔ hewalɛ ni wɔná shika he jwɛŋmɔ ni ja ni wɔtsu nii dɛŋdɛŋ koni wɔ kɛ wɔweku lɛ aná wɔheloonaa hiamɔ nii. (1 Tim. 5:8) Mɛi ni Nyɔŋmɔ mumɔ lɛ kudɔɔ amɛ lɛ feɔ mɛi ejurɔ taakɛ Yehowa feɔ lɛ. Mɛi ni tamɔ nɛkɛ lɛ haa mɔ nɔ̃, shi jeee akɛ amɛyeɔ nii yɛ mɛi ahe. Amɛbuɔ gbɔmɛi akɛ amɛjara wa kwraa fe heloonaa nibii, ni kɛ́ eyɛ amɛhewalɛ mli lɛ, amɛjɛɔ amɛtsui mli fɛɛ amɛkɛ mɛi jaa nibii ni amɛyɔɔ lɛ. (Abɛi 3:27, 28) Ni amɛkɛ shikataomɔ yeee Nyɔŋmɔjamɔ hiɛ kɔkɔɔkɔ.
12, 13. Nɔ ni tamɔɔɔ je nɛŋ mumɔ lɛ, mɛɛ gbɛ nɔ Nyɔŋmɔ mumɔ lɛ baanyɛ aná wɔnɔ hewalɛ kpakpa?
12 Mɛɛ mumɔ náa mijeŋba nɔ hewalɛ? (Nyɛkanea Kolosebii 3:8-10, 13.) Je nɛŋ mumɔ lɛ haa mɛi jieɔ heloo lɛ nitsumɔi lɛ akpo. (Gal. 5:19-21) Jeee beni nibii miiya nɔ jogbaŋŋ lɛ akɛnaa mumɔ ni kudɔɔ wɔ, shi moŋ beni nibii eyaaa lɛ jogbaŋŋ, tamɔ beni nyɛmi nuu loo nyɛmi yoo Kristofonyo ko bɛŋkɛɛɛ wɔ, efee nɔ̃ ko ni edɔ wɔ, loo etɔ̃ wɔnɔ po lɛ. Kɛfata he lɛ, nɔ ni wɔfeɔ yɛ wɔshĩai amli lɛ ni baatsɔɔ nɔ̃ mumɔ ni kudɔɔ wɔ. Ekolɛ ehe baahia ni wɔpɛi wɔmli wɔkwɛ. Bi ohe akɛ: ‘Yɛ nyɔji ekpaa ni eho lɛ amli lɛ, ani mijie Kristo sui lɛ akpo babaoo loo mijie sui gbohii komɛi ni tsutsu lɛ miyɔɔ lɛ akpo ekoŋŋ?’
13 Nyɔŋmɔ mumɔ lɛ baanyɛ aye abua wɔ ni ‘wɔjie gbɔmɔ momo lɛ kɛ enitsumɔi lɛ wɔshwie,’ ni wɔwo “gbɔmɔ hee” lɛ. No baaye abua wɔ ni wɔjie suɔmɔ kɛ mlihilɛ kpo babaoo. Ebaaha wɔkɛfafaa wɔhe kɛ́ etamɔ nɔ ni wɔsane ja po. Ni ebaŋ lɛ kɔkɔɔkɔ akɛ wɔɔjie “mlijoomɔ kɛ mlila kɛ mlifu kɛ bolɔmɔ kɛ musubɔɔ” kpo kɛ́ wɔnu he akɛ aye wɔ sane ni ejaaa. Moŋ lɛ, wɔbaabɔ mɔdɛŋ ni ‘wɔmusuŋ atsɔ wɔ yɛ wɔhe.’—Efe. 4:31, 32.
14. Te mɛi babaoo ni yɔɔ je nɛŋ lɛ naa Nyɔŋmɔ Wiemɔ lɛ amɛhaa tɛŋŋ?
14 Ani miyɛ bulɛ kɛ suɔmɔ kɛha jeŋba he shishitoo mlai ni yɔɔ Biblia lɛ mli lɛ? (Nyɛkanea Abɛi 3:5, 6.) Je nɛŋ mumɔ lɛ haa mɛi kpoɔ Nyɔŋmɔ Wiemɔ lɛ. Mɛi ni mumɔ nɛɛ náa amɛnɔ hewalɛ lɛ kpoɔ Biblia lɛ mli fãi ni amɛsusuɔ akɛ ekɛ nitsumɔ wa tsɔ lɛ, ni amɛkɛ adesai akusumii kɛ nilee yeɔ najiaŋ. (2 Tim. 4:3, 4) Mɛi komɛi kpoɔ Nyɔŋmɔ Wiemɔ tso muu lɛ fɛɛ. Mɛi nɛɛ buɔ amɛhe akɛ nilelɔi, ni amɛkɛɔ akɛ Biblia lɛ be eho ni emli wiemɔi lɛ ejaaa hu. Amɛbaa emli shishitoo mlai krɔŋŋ ni kɔɔ gbalafitemɔ, hii kɛ hii loo yei kɛ yei ni kɛ amɛhe náa bɔlɛ, kɛ gbalamlitsemɔ he lɛ shi. Amɛbuɔ “efɔŋ akɛ ekpakpa kɛ ekpakpa hu akɛ efɔŋ.” (Yes. 5:20) Ani mumɔ nɛɛ ená wɔnɔ hewalɛ? Kɛ́ wɔkɛ naagbai kpe lɛ, ani wɔkɛ wɔhe fɔ̃ɔ adesai anilee ní wɔ diɛŋtsɛ wɔsusumɔi fata he lɛ anɔ? Aloo wɔbɔɔ mɔdɛŋ koni wɔkɛ Biblia mli ŋaawoo atsu nii?
15. Yɛ nɔ najiaŋ ni wɔkɛ wɔhe aaafɔ̃ wɔ diɛŋtsɛ wɔnilee nɔ lɛ, mɛni esa akɛ wɔfee?
15 Nyɔŋmɔ mumɔ lɛ haa wɔnáa bulɛ wɔhaa Biblia lɛ. Taakɛ eji yɛ lalatsɛ lɛ gbɛfaŋ lɛ, wɔnaa Nyɔŋmɔ Wiemɔ lɛ akɛ eji kane ha wɔnaji kɛ la hu yɛ wɔtempɔŋi lɛ anɔ. (Lala 119:105) Wɔkɛ wɔhe efɔ̃ɔɔ wɔ diɛŋtsɛ wɔnilee nɔ, moŋ lɛ wɔjɛɔ wɔtsui fɛɛ mli wɔkɛ wɔhe fɔ̃ɔ Nyɔŋmɔ Wiemɔ ni aŋma lɛ nɔ koni wɔnyɛ wɔkpa ekpakpa kɛ efɔŋ mli. Jeee bulɛ kɛkɛ wɔnáa wɔhaa Biblia lɛ, shi moŋ wɔnáa suɔmɔ hu kɛhaa Nyɔŋmɔ mla lɛ.—Lala 119:97.
Kasemɔ Yesu Nɔkwɛmɔnɔ Lɛ
16. Mɛni “Kristo jwɛŋmɔ” lɛ ní wɔɔná lɛ biɔ ni wɔfee?
16 Kɛ́ wɔbaaná Nyɔŋmɔ mumɔ lɛ, esa akɛ wɔkɛ “Kristo jwɛŋmɔ” lɛ aye wɔnɔ lɛ najiaŋ. (1 Kor. 2:16) ‘Jwɛŋmɔ ni tamɔ Kristo Yesu’ nɔ lɛ ni wɔɔná lɛ biɔ ni wɔle bɔ ni esusu nii ahe eha kɛ bɔ ni efee enii eha koni wɔkase lɛ. (Rom. 15:5; 1 Pet. 2:21) Ha wɔsusu gbɛi komɛi ni wɔbaanyɛ wɔtsɔ nɔ wɔfee nakai lɛ ahe wɔkwɛ.
17, 18. (a) Mɛni wɔkaseɔ kɛjɛɔ Yesu ŋɔɔ yɛ sɔlemɔ he? (b) Mɛni hewɔ esa akɛ ‘wɔya nɔ wɔbi’ lɛ?
17 Sɔlemɔ obi Nyɔŋmɔ mumɔ lɛ. Dani Yesu aaatsɔ shihilɛi ni jaraa amli lɛ, esɔle ni Nyɔŋmɔ mumɔ lɛ aye abua lɛ. (Luka 22:40, 41) Wɔ hu esa akɛ wɔbi Nyɔŋmɔ ni eha wɔ emumɔ krɔŋkrɔŋ lɛ. Yehowa kɛ mumɔ nɛɛ haa mɛi fɛɛ ni jɛɔ hemɔkɛyeli mli amɛbiɔ lɛ lɛ faa. (Luka 11:13) Yesu kɛɛ akɛ: “Nyɛyaa nɔ nyɛbia, ni aaaha nyɛ; nyɛyaa nɔ nyɛtaoa, ni nyɛaana; nyɛyaa nɔ nyɛshia, ni aaagbele aha nyɛ. Shi mɔ fɛɛ mɔ ni biɔ lɛ, aaaha lɛ; ni mɔ ni taoɔ lɛ, enaa; ni mɔ ni shiɔ lɛ, agbeleɔ ahaa lɛ.”—Mat. 7:7, 8, NW.
18 Kɛ́ wɔmiitao ni wɔná Yehowa mumɔ lɛ, ni agbɛnɛ hu Nyɔŋmɔ aye abua wɔ lɛ, esa akɛ wɔya nɔ wɔsɔle. Ehe miihia ni wɔfɔ sɔlemɔ ni wɔkɛ bei ni fa asɔle hu. Bei komɛi lɛ, dani Yehowa baaha mɛi ni biɔ lɛ nii lɛ asɔlemɔi ahetoo lɛ, eŋmɛɔ gbɛ koni mɛi nɛɛ atsɔɔ bɔ ni nii ni amɛbiɔ lɛ lɛ he hiaa amɛ waa ha kɛ bɔ ni amɛhemɔkɛyeli lɛ mli wa ha lɛ. *
19. Mɛni Yesu fee be fɛɛ be, ni mɛni hewɔ esa akɛ wɔkase lɛ lɛ?
19 Bo Yehowa toi kɛmɔ shi. Yesu fee nibii ni saa e-Tsɛ lɛ hiɛ be fɛɛ be. Kɛ́ hooo lɛ be ko lɛ, bɔ ni Yesu sumɔ akɛ etsu shihilɛ ko he nii lɛ fee srɔto yɛ nɔ ni e-Tsɛ lɛ taoɔ lɛ he. Shi ekɛ hekɛnɔfɔ̃ɔ kɛɛ e-Tsɛ lɛ akɛ: “Kɛlɛ jeee bɔ ni mi misumɔɔ lɛ, shi moŋ bɔ ni bo osumɔɔ.” (Luka 22:42) Bi ohe akɛ, ‘Ani miboɔ Nyɔŋmɔ toi kɛ́ nakai feemɔ wa kɛha mi po?’ Kɛ́ wɔbaaná wala lɛ, ehe miihia ni wɔbo Nyɔŋmɔ toi. Akɛni lɛ ji wɔ-Feelɔ, wɔwala Jɛɛhe kɛ wɔwala Yibaalɔ hewɔ lɛ, esa akɛ wɔbo lɛ toi kɛmɔ shi. (Lala 95:6, 7) Nɔ ko bɛ ni wɔbaanyɛ wɔkɛye toiboo najiaŋ. Kɛ́ wɔbooo Nyɔŋmɔ toi lɛ, wɔnyɛŋ wɔná ehiɛ duromɔ.
20. Mɛni ji nɔ titri ni hé Yesu jwɛŋmɔ fɛɛ yɛ eshihilɛ mli, ni te wɔɔfee tɛŋŋ wɔkase lɛ?
20 Kasemɔ Biblia lɛ jogbaŋŋ. Yesu tsɛ Ŋmalɛi ayisɛɛ ni ekɛte shi ewo kaa ni yɔɔ tɛ̃ɛ ni Satan kɛba ehemɔkɛyeli lɛ nɔ lɛ. (Luka 4:1-13) Kɛ́ Yesu miikpá jamɔŋ hiɛnyiɛlɔi ni te shi amɛwo lɛ lɛ he mama lɛ, ekɛ Nyɔŋmɔ Wiemɔ lɛ ni tsuɔ nii. (Mat. 15:3-6) Nyɔŋmɔ mla lɛ ni Yesu baakase kɛ mla lɛ nɔ ni eeeye kɛmɔ shi lɛ ji nɔ titri ni hé ejwɛŋmɔ fɛɛ yɛ eshihilɛ mli. (Mat. 5:17) Wɔ hu wɔmiisumɔ ni wɔya nɔ wɔkase Nyɔŋmɔ Wiemɔ ni wajeɔ wɔhemɔkɛyeli lɛ. (Fil. 4:8, 9) Ekolɛ ebaawa kɛha wɔteŋ mɛi komɛi akɛ wɔɔná be kɛfee aŋkro nikasemɔ kɛ weku nikasemɔ. Shi yɛ nɔ najiaŋ ni wɔɔtao be lɛ, ehe baahia ni wɔhé be.—Efe. 5:15-17.
21. Mɛɛ gbɛjianɔtoo wɔbaanyɛ wɔkɛtsu nii koni wɔnu Nyɔŋmɔ Wiemɔ lɛ shishi jogbaŋŋ ni wɔkɛba wɔjeŋ hu?
21 Gbɛjianɔ ni “tsulɔ anɔkwafo kɛ nilelɔ” lɛ eto kɛha gbɛkɛ Weku Jamɔ ni aaafee daa otsi lɛ yeɔ buaa wɔ koni wɔnyɛ wɔfee aŋkro nikasemɔ kɛ weku nikasemɔ. (Mat. 24:45) Ani okɛ gbɛjianɔtoo nɛɛ miitsu nii jogbaŋŋ? Bɔni afee ni oná Kristo jwɛŋmɔ lɛ, ani obaanyɛ osusu nibii ni Yesu tsɔɔ lɛ ahe fiofio kɛfata nibii ni okaseɔ lɛ ahe? Obaanyɛ okɛ Watch Tower Publications Index lɛ atsu nii kɛtao nibii ni okaseɔ yɛ Yesu he lɛ ahe saji. Ákɛ nɔkwɛmɔnɔ lɛ, kɛjɛ 2008 kɛyashi 2010 lɛ, aŋmala saji 12 ni yitso ji “Nɔ ni Wɔkaseɔ Kɛjɛɔ Yesu Ŋɔɔ” yɛ Buu-Mɔɔ ni akɛhaa maŋbii lɛ mli. Obaanyɛ okɛ saji nɛɛ afee aŋkro nikasemɔ kɛ weku nikasemɔ. Kɛjɛ afi 2006 kɛbaa lɛ, akɛ saji komɛi ni yitso ji “How Would You Answer?” (Te Obaaha Hetoo Ohaa tɛŋŋ?) wo Awake! lɛ mli. Ato sanebimɔi ni yɔɔ saji nɛɛ amli lɛ he gbɛjianɔ bɔ ni ebaaha wɔná Nyɔŋmɔ Wiemɔ lɛ mli nilee babaoo ni wɔnu shishi jogbaŋŋ hu. Mɛni hewɔ okɛ saji nɛɛ kɛ ekrokomɛi ni tamɔ nomɛi fataaa o-Weku Jamɔ lɛ he be kɛ beaŋ?
Wɔbaanyɛ Wɔye Je Nɛŋ nɔ Kunim
22, 23. Mɛni esa akɛ wɔfee koni wɔye je lɛ nɔ kunim?
22 Kɛ́ Nyɔŋmɔ mumɔ lɛ baakpala wɔ lɛ, esa akɛ wɔte shi wɔwo je nɛŋ mumɔ lɛ. Enɛ feemɔ bɛ mlɛo. Ebiɔ hiɛmiamɔ. (Yuda 3) Shi wɔbaanyɛ wɔye kunim! Yesu kɛɛ ekaselɔi lɛ akɛ: “Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli: miye je lɛ nɔ kunim.”—Yoh. 16:33.
23 Wɔ hu wɔbaanyɛ wɔye je lɛ nɔ kunim kɛji wɔte shi wɔwo emumɔ lɛ, ni wɔfee bɔ fɛɛ bɔ ni wɔɔnyɛ koni wɔná Nyɔŋmɔ mumɔ lɛ. Lɛɛlɛŋ, “kɛ́ Nyɔŋmɔ yɛ wɔ sɛɛ lɛ, namɔ aaate shi awo wɔ?” (Rom. 8:31) Kɛ́ wɔná Nyɔŋmɔ mumɔ lɛ, ni wɔkɛ egbɛtsɔɔmɔ ni yɔɔ Biblia lɛ mli lɛ tsu nii lɛ, wɔtsui baanyɔ wɔmli, wɔbaaná toiŋjɔlɛ kɛ miishɛɛ, ni wɔbaaná nɔmimaa akɛ wɔbaahi shi kɛya naanɔ yɛ je hee ni etsɛŋ ebaaba lɛ mli.
[Shishigbɛ niŋmaa]
^ kk. 18 Kɛ́ ootao enɛ he saji krokomɛi lɛ, kwɛmɔ Mɛni Biblia Lɛ Tsɔɔ Diɛŋtsɛ? wolo lɛ baafa 170-173 lɛ.
Ani Okaiɔ?
• Mɛni hewɔ je nɛŋ mumɔ lɛ ehe shi waa lɛ?
• Mɛɛ saji ejwɛ esa akɛ wɔbi wɔhe?
• Mɛɛ nibii etɛ wɔkaseɔ kɛjɛɔ Yesu ŋɔɔ yɛ bɔ ni wɔɔfee wɔha Nyɔŋmɔ mumɔ lɛ akudɔ wɔ lɛ he?
[Nikasemɔ lɛ he Sanebimɔi]
[Mfoniri ni yɔɔ baafa 8]
Te fee tɛŋŋ ni ŋwɛi bɔfoi komɛi tsɔmɔ daimonioi lɛ?
[Mfoniri ni yɔɔ baafa 10]
Satan kɛ je nɛŋ mumɔ lɛ kudɔɔ mɛi, shi wɔbaanyɛ wɔje je nɛŋ mumɔ lɛ kudɔmɔ shishi