Anɔkwa Jamɔ Haa Mɛi Feɔ Ekome
Anɔkwa Jamɔ Haa Mɛi Feɔ Ekome
“Maŋɔ amɛ mato he kome tamɔ tooi ní yɔɔ tsu mli.”—MIKA 2:12.
1. Mɛɛ gbɛ nɔ adebɔɔ mli nibii haa anaa Nyɔŋmɔ nilee?
LALATSƐ ko jaje akɛ: “Yehowa, kwɛ bɔ ni onitsumɔi lɛ fá ha! Nilee okɛfee fɛɛ; shikpɔŋ lɛ nɔ eyi tɔ́ kɛ onibɔɔ nii lɛ!” (Lala 104:24) Anaa Nyɔŋmɔ nilee lɛ yɛ bɔ ni adebɔɔ mli nibii srɔtoi akpekpei abɔ tamɔ tsei, filikilɔi, kooloi, kɛ muawai tsuɔ nii yɛ ekomefeemɔ mli koni wala aya nɔ ahi shikpɔŋ lɛ nɔ lɛ mli. Agbɛnɛ hu, ogbɔmɔtso lɛ henii wuji kɛ bibii lɛ fɛɛ tsuɔ nii yɛ ekomefeemɔ mli koni oná gbɔmɔtsoŋ hewalɛ kpakpa.
2. Taakɛ mfoniri ni yɔɔ baafa 13 lɛ tsɔɔ lɛ, mɛni hewɔ ekolɛ ekomefeemɔ ni yɔɔ Kristofoi ateŋ lɛ ha mɛi anaa kpɛ amɛhe lɛ?
2 Yehowa bɔ adesai koni amɛye amɛbua amɛhe. Adesai yɛ hewolonɔ sui, subaŋi, kɛ hesai srɔtoi babaoo. Kɛfata he lɛ Nyɔŋmɔ bɔ klɛŋklɛŋ adesai lɛ kɛ E-sui koni amɛhi shi yɛ ekomefeemɔ mli ni amɛye amɛbua amɛhe. (1 Mose 1:27; 2:18) Shi amrɔ nɛɛ, adesai ateŋ tsiimɔ ji mɛi kpɔji yɛ Nyɔŋmɔ hiɛ, ni amɛnyɛko amɛhi shi yɛ ekomefeemɔ mli. (1 Yoh. 5:19) No hewɔ lɛ, akɛni mɛi srɔtoi, tamɔ tsuji ni hi shi yɛ Efeso, yei hiɛnaanɔbii ni ji Helabii, Yudafoi hii ni le woloŋ, kɛ mɛi ni tsutsu ko lɛ amɛji wɔŋjalɔi ni fee klɛŋklɛŋ afii 100 lɛ mli Kristofoi asafo lɛ mlibii hewɔ lɛ, ekolɛ bɔ ni amɛfee ekome lɛ ha mɛi anaa kpɛ amɛhe.—Bɔf. 13:1; 17:4; 1 Tes. 1:9; 1 Tim. 6:1.
3. Biblia lɛ kɛ Kristofoi a-ekomefeemɔ toɔ mɛni he, ni mɛni he wɔbaasusu yɛ nikasemɔ nɛɛ mli?
3 Tamɔ bɔ ni wɔgbɔmɔtso lɛ henii lɛ tsuɔ nii yɛ ekomefeemɔ mli lɛ, nakai nɔŋŋ anɔkwa jamɔ yeɔ ebuaa mɛi ni amɛkɛ amɛhe hiɔ shi yɛ ekomefeemɔ mli. (Nyɛkanea 1 Korintobii 12:12, 13.) Ekomefeemɔ nɛɛ he sanebimɔi komɛi ni wɔbaasusu he yɛ nikasemɔ nɛɛ mli ji: Mɛɛ gbɛ nɔ anɔkwa jamɔ haa mɛi feɔ ekome? Mɛni hewɔ Yehowa pɛ ji mɔ ni baanyɛ aha mɛi akpekpei abɔ ni jɛ jeŋmaji fɛɛ anɔ lɛ afee ekome lɛ? Mɛɛ ekomefeemɔ he gbɛtsii nii Yehowa yeɔ ebuaa wɔ koni wɔye nɔ? Ni mɛɛ gbɛ nɔ anɔkwa Kristojamɔ yɔɔ srɔto yɛ Kristendom he yɛ ekomefeemɔ gbɛfaŋ?
Mɛɛ gbɛ nɔ Anɔkwa Jamɔ Haa Mɛi Feɔ Ekome?
4. Mɛɛ gbɛ nɔ anɔkwa jamɔ haa mɛi feɔ ekome?
4 Anɔkwa jálɔi kpɛlɛɔ nɔ akɛ Yehowa ji mɔ ni bɔ nibii fɛɛ, ni lɛ ji mɔ ni sa akɛ eyeɔ nɔ akɛ jeŋ muu fɛɛ Nɔyelɔ. (Kpoj. 4:11) No hewɔ lɛ, eyɛ mli akɛ anɔkwa Kristofoi yɛ maji srɔtoi anɔ ni esoro shihilɛ ni amɛteŋ mɔ fɛɛ mɔ yɔɔ mli moŋ, shi amɛ fɛɛ amɛyeɔ Nyɔŋmɔ mlai kome too lɛ anɔ, ni amɛhiɔ shi yɛ Biblia mli shishitoo mlai kome too lɛ anaa. Eja gbɛ akɛ anɔkwa jálɔi fɛɛ tsɛɔ Yehowa akɛ ‘Tsɛ.’ (Yes. 64:7; Mat. 6:9) No hewɔ lɛ, nyɛmimɛi ji amɛ fɛɛ, ni amɛhiɔ shi yɛ ekomefeemɔ ni nɔ bɛ mli taakɛ lalatsɛ lɛ la akɛ: “Kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi lɛ!”—Lala 133:1.
5. Mɛɛ su haa anɔkwa jálɔi feɔ ekome?
5 Eyɛ mli akɛ anɔkwa Kristofoi yeee emuu moŋ, shi ɛmɛfeɔ ekome kɛjáa Nyɔŋmɔ ejaakɛ amɛkase bɔ ni akɛ mɛi hiɔ shi yɛ suɔmɔ mli. Yehowa pɛ ji mɔ ni baanyɛ atsɔse amɛ ni amɛjie suɔmɔ kpo. (Nyɛkanea 1 Yohane 4:7, 8.) Ewiemɔ lɛ kɛɔ akɛ: “Nyɛwoa musuŋtsɔ̃lɛ, mlihilɛ, heshibaa jwɛŋmɔ, kpoofeemɔ, tsuishitoo. Ni kɛji mɔ ko kɛ mɔ ko ná sane ko lɛ, nyɛnanaa nyɛhãa nyɛhe ni nyɛkɛfafaa nyɛhe; tamɔ bɔ ni [“Yehowa,” NW] hu kɛfa nyɛ lɛ, nakai nyɛ hu nyɛfea. Shi enɛɛmɛi fɛɛ sɛɛ lɛ nyɛwoa suɔmɔ ni ji kpãa ni fiɔ nibii fɛɛ feɔ lɛ ekome ni ehãa eyeɔ emuu lɛ.” (Kol. 3:12-14, Ga Biblia hee) Suɔmɔ ni ji kpãa ni fiɔ nibii fɛɛ feɔ lɛ ekome ni ehãa eyeɔ emuu lɛ ji su titri ni akɛkadiɔ anɔkwa Kristofoi. Ani onako yɛ bo diɛŋtsɛ oniiashikpamɔ mli akɛ ekomefeemɔ nɛɛ haa esoroɔ anɔkwa jamɔ kwraa?—Yoh. 13:35.
6. Mɛɛ gbɛ nɔ Maŋtsɛyeli lɛ he hiɛnɔkamɔ lɛ haa wɔfeɔ ekome?
6 Hiɛnɔkamɔ ni anɔkwa jálɔi yɔɔ akɛ Nyɔŋmɔ Maŋtsɛyeli lɛ pɛ ni baanyɛ ahere adesai lɛ hu haa amɛfeɔ ekome. Amɛle akɛ etsɛŋ ni akɛ Nyɔŋmɔ Maŋtsɛyeli lɛ baaye adesai anɔyelii fɛɛ anajiaŋ, ni ebaaha adesai ni feɔ toi ahi shi yɛ anɔkwa toiŋjɔlɛ mli kɛya naanɔ. (Yes. 11:4-9; Dan. 2:44) No hewɔ lɛ, Kristofoi kɛ nɔ ni Yesu kɛɛ esɛɛnyiɛlɔi lɛ akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ” tsuɔ nii. (Yoh. 17:16) Anɔkwa Kristofoi kɛ amɛhe wooo béi ni yaa nɔ yɛ je lɛŋ lɛ mli; no hewɔ lɛ ekomefeemɔ hiɔ amɛteŋ, kɛ́ mɛi ni ebɔle amɛ lɛ po kɛ amɛhe miiwu ta.
He Kome Pɛ Ajɛɔ Atsɔseɔ Wɔ
7, 8. Mɛɛ gbɛ nɔ Biblia mli tsɔsemɔ haa wɔfeɔ ekome?
7 Akɛni Kristofoi fɛɛ ni hi shi yɛ klɛŋklɛŋ afii 100 lɛ mli lɛ ná hewalɛwoo kɛjɛ he kome pɛ hewɔ lɛ amɛhi shi yɛ ekomefeemɔ mli. Amɛkpɛlɛ nɔ akɛ Yesu miitsɔɔ asafo lɛ nii, ni ekɛ gbɛtsɔɔmɔ miiha asafo lɛ kɛtsɔ bɔfoi kɛ onukpai ni yɔɔ Yerusalem, ni feɔ nɔyeli kuu lɛ nɔ. Hii anɔkwafoi nɛɛ damɔɔ Nyɔŋmɔ Wiemɔ lɛ nɔ amɛkpɛɔ amɛyiŋ ni amɛtsuɔ nɔkwɛlɔi gbɛfalɔi koni amɛkɛ nɔyeli kuu lɛ gbɛtsɔɔmɔi lɛ ayaha asafoi lɛ yɛ maji pii anɔ. Biblia lɛ wie nɔkwɛlɔi nɛɛ ekomɛi ahe akɛ: “Beni amɛkpaa maji lɛ anɔ lɛ, amɛkɛ mlai ní bɔfoi lɛ kɛ onukpai lɛ ní yɔɔ Yerusalem lɛ wo lɛ ha amɛ, koni amɛye nɔ.”—Bɔf. 15:6, 19-22; 16:4.
8 Ŋmɛnɛ hu lɛ, Nɔyeli Kuu lɛ, ni emlibii ji Kristofoi ni akɛ mumɔ efɔ amɛ mu lɛ haa Kristofoi asafoi fɛɛ ni yɔɔ jeŋ fɛɛ lɛ feɔ ekome. Nɔyeli Kuu lɛ feɔ woji yɛ wiemɔi babaoo mli ni ekɛwoɔ nyɛmimɛi lɛ hewalɛ. Adamɔɔ Nyɔŋmɔ Wiemɔ lɛ nɔ atoɔ mumɔŋ niyenii nɛɛ he gbɛjianɔ. No hewɔ lɛ, tsɔsemɔ ni akɛhaa lɛ jɛɛɛ gbɔmɛi adɛŋ, shi moŋ ejɛ Yehowa ŋɔɔ.—Yes. 54:13.
9. Mɛɛ gbɛ nɔ nitsumɔ ni Nyɔŋmɔ kɛwo wɔdɛŋ lɛ haa wɔfeɔ ekome?
9 Asafoŋ nɔkwɛlɔi hu haa ekomefeemɔ hiɔ wɔteŋ kɛtsɔ nɔkwɛmɔnɔ kpakpa ni amɛfeɔ yɛ shiɛmɔ nitsumɔ lɛ mli lɛ nɔ. Naanyobɔɔ ni yaa nɔ yɛ mɛi ni feɔ ekome kɛtsuɔ nii yɛ Nyɔŋmɔ sɔɔmɔ lɛ mli lɛ ateŋ lɛ mli wa kwraa fe naanyobɔɔ ni yaa nɔ yɛ je lɛ mli lɛ. Jeee naanyobɔɔ kɛkɛ hewɔ ato Kristofoi asafo lɛ shishi, shi moŋ ato shishi koni akɛwo Yehowa hiɛ nyam ni akɛtsu nitsumɔ ko—sanekpakpa lɛ shiɛmɔ, kaselɔfeemɔ nitsumɔ lɛ, kɛ agbɛnɛ hu koni akɛha asafoŋbii lɛ anane amɔ shi. (Rom. 1:11, 12; 1 Tes. 5:11; Heb. 10:24, 25) No hewɔ ni bɔfo Paulo baanyɛ awie yɛ Kristofoi ahe akɛ: “Nyɛdamɔ shi yɛ mumɔ kome mli, ni nyɛkɛ jwɛŋmɔ kome miipele sanekpakpa lɛ hemɔkɛyeli lɛ he.”—Fil. 1:27.
10. Mɛni ji nibii komɛi ni haa wɔfeɔ ekome akɛ Nyɔŋmɔ webii?
10 No hewɔ lɛ, akɛ Yehowa webii lɛ, Yehowa nɔyeli lɛ nɔ ni wɔkpɛlɛɔ, suɔmɔ ni yɔɔ wɔteŋ, Nyɔŋmɔ Maŋtsɛyeli lɛ he hiɛnɔkamɔ lɛ, kɛ bulɛ ni wɔyɔɔ kɛha mɛi ni Nyɔŋmɔ ehala koni amɛnyiɛ wɔhiɛ lɛ eha wɔfee ekome. Yehowa yeɔ ebuaa wɔ koni wɔye sui komɛi ni wɔyɔɔ akɛ mɛi ni yeee emuu ni kulɛ ebaanyɛ efite ekomefeemɔ ni yɔɔ wɔteŋ lɛ nɔ.—Rom. 12:2.
Bɔ ni Wɔɔfee Wɔye Henɔwomɔ kɛ Awuŋayeli Nɔ
11. Mɛni hewɔ henɔwomɔ kɛ mligbalamɔ baa lɛ, ni mɛɛ gbɛ nɔ Yehowa yeɔ ebuaa wɔ koni wɔye nɔ?
11 Henɔwomɔ kɛ mligbalamɔ baa. Mɔ ni woɔ ehe nɔ lɛ buɔ akɛ enɔ kwɔ fe mɛi krokomɛi, ni bei pii lɛ, enáa miishɛɛ ni esaaa kɛjɛɔ shwãa mli. Shi bei pii lɛ su nɛɛ kɛ mligbalamɔ baa; mɛi ni naa bɔ ni eshwãa lɛ baanyɛ aye ehe awuŋa. Kaselɔ Yakobo kɛɔ wɔ faŋŋ akɛ: “Nɛkɛ shwãa nɛɛ fɛɛ lɛ, efɔŋ ni.” (Yak. 4:16) Ejeee nɔ ni suɔmɔ yɔɔ mli akɛ wɔbaabu mɛi krokomɛi akɛ wɔnɔ kwɔ fe amɛ. Nɔ ni sa kadimɔ waa ji akɛ, Yehowa baa ehe shi akɛni ekɛ wɔ ni wɔji mɛi ni yeee emuu lɛ bɔɔ lɛ hewɔ. David ŋma akɛ: “Omlihilɛ [loo “oheshibaa,”NW] lɛ ehã mitsɔ agbo.” (2 Sam. 22:36) Nyɔŋmɔ Wiemɔ lɛ yeɔ ebuaa wɔ koni wɔye henɔwomɔ nɔ kɛtsɔ tsɔsemɔ ni etsɔseɔ wɔ ni wɔsusu nii ahe jogbaŋŋ lɛ nɔ. Akɛ mumɔ tsirɛ Paulo ni ebi akɛ: “Namɔ ha esoro bo? Ni asaŋ mɛni oyɔɔ ni jeee ha ahao? Shi kɛji ha ahao lɛ, mɛɛba oshwãa tamɔ nɔ ni jeee ha ahao lɛ?”—1 Kor. 4:7.
12, 13. (a) Mɛni hewɔ ewaaa akɛ wɔbaaye awuŋa lɛ? (b) Kɛ́ wɔna mɛi krokomɛi taakɛ Yehowa naa amɛ lɛ, mɛni baajɛ mli kɛba?
12 Awuŋayeli ji su kroko ni kɛ mligbalamɔ baa. Akɛni afɔ wɔ akɛ mɛi ni yeee emuu hewɔ lɛ, wɔ fɛɛ ‘wɔhiɛ baanyɛ akɔ̃ nii anɔ,’ ni Kristofoi ni kɛ afii babaoo esɔmɔ po baanyɛ aye mɛi krokomɛi ashihilɛ, nibii ni mɛi yɔɔ, hegbɛi loo hesai ni mɛi yɔɔ lɛ he awuŋa. (Yak. 4:5) Ákɛ nɔkwɛmɔnɔ lɛ, ekolɛ nyɛmi nuu ko ni yɔɔ ŋa kɛ bii baaye sɔɔmɔ hegbɛi ni be fɛɛ sɔɔlɔ ko yɔɔ lɛ he awuŋa ni eyɔseee akɛ be fɛɛ sɔɔlɔ lɛ hu baanyɛ aye awuŋa fioo yɛ bii ni nyɛmi nuu lɛ yɔɔ lɛ he. Te wɔɔfee tɛŋŋ wɔtsĩ awuŋayeli nɛɛ naa ni ekafite ekomefeemɔ ni yɔɔ wɔteŋ lɛ?
13 Bɔni afee ni wɔkaye awuŋa lɛ, kaimɔ akɛ Biblia lɛ kɛ mɛi ni afɔ amɛ mu ni yɔɔ Kristofoi asafo lɛ mli lɛ to adesa gbɔmɔtso lɛ henii lɛ he. (Nyɛkanea 1 Korintobii 12:14-18.) Ákɛ nɔkwɛmɔnɔ lɛ, eyɛ mli akɛ anaa ohiŋmɛi, ni anaaa otsui moŋ, shi ani fɛɛ he bɛ sɛɛnamɔ kɛha bo? Nakai nɔŋŋ Yehowa buɔ mɛi fɛɛ ni yɔɔ asafo lɛ mli lɛ akɛ amɛhe yɛ sɛɛnamɔ, eyɛ mli akɛ bei komɛi lɛ abaana mɛi komɛi anitsumɔ fe mɛi krokomɛi anɔ. No hewɔ lɛ, nyɛhaa wɔnaa wɔnyɛmimɛi lɛ tamɔ bɔ ni Yehowa naa amɛ lɛ. Yɛ nɔ najiaŋ ni wɔbaaye mɛi krokomɛi ahe awuŋa lɛ, wɔbaanyɛ wɔha amɛna akɛ wɔsusuɔ amɛhe ni wɔsumɔɔ amɛ. Kɛ́ wɔfee nakai lɛ wɔhaa anaa srɔtofeemɔ ni yɔɔ anɔkwa Kristofoi kɛ mɛi ni yɔɔ Kristendom sɔlemɔi lɛ amli lɛ ateŋ lɛ faŋŋ.
Mligbalamɔ Yɛ Kristendombii lɛ Ateŋ
14, 15. Te fee tɛŋŋ ni apasa Kristofoi amli gbála?
14 Ekomefeemɔ yɛ anɔkwa Kristofoi ateŋ, shi mligbalamɔ eyi Kristendom sɔlemɔi lɛ amli obɔ. Beni shɛɔ afi 300 afii lɛ amli lɛ, apasa Kristofoi lɛ ajamɔi egbɛ eshwã aahu akɛ Roma nɔyelɔ ko ni eji wɔŋjalɔ lɛ po kpɛlɛ nɔ, ni ebɔi amɛ kudɔmɔ ni no ha Kristendom shwere babaoo. Kɛkɛ ni maji babaoo tse amɛhe kɛjɛ Roma he, ni amɛtse amɛ diɛŋtsɛ amɛ-Maŋ sɔlemɔi.
15 Nakai maji lɛ babaoo kɛ amɛhe wu ta afii ohai abɔ. Yɛ afi 1600 afii lɛ amli kɛmiimɔ afi 1700 afii lɛ amli lɛ, mɛi ni yɔɔ Britain, France, kɛ United States lɛ wo maŋbii krokomɛi lɛ hewalɛ ni amɛdɔ amɛ-Maŋ lɛ he, ni no ha maŋhedɔɔ batsɔ tamɔ jamɔ. Yɛ afi 1800 afii lɛ amli kɛmɔ afi 1900 afii lɛ amli lɛ, maŋhedɔɔ bɔi shihemɔ yɛ adesai babaoo ajwɛŋmɔ mli. Naagbee lɛ Kristendom sɔlemɔi lɛ amli gbala kɛwo kui babaoo amli, ni kui nɛɛ babaoo kpɛlɛ maŋhedɔɔ nɔ. Sɔlemɔ kome too lɛ mlibii kɛ amɛsɔlemɔ lɛ mlibii krokomɛi ni yɔɔ maŋ kroko nɔ lɛ wu ta. Ŋmɛnɛ lɛ, maŋhedɔɔ kɛ jamɔ mli tsɔɔmɔi haaa Kristendombii ni yɔɔ maji srɔtoi anɔ lɛ afee ekome.
16. Mɛɛ saji haa mligbalamɔ baa Kristendombii lɛ ateŋ?
16 Yɛ afi 1900 afii lɛ amli lɛ, Kristendom jamɔ mli kui ohai abɔ lɛ ateŋ mɛi komɛi bɔ mɔdɛŋ koni amɛha ekomefeemɔ aba amɛteŋ. Shi yɛ afii nyɔŋmai abɔ ni amɛkɛ bɔ mɔdɛŋ lɛ fɛɛ sɛɛ lɛ, sɔlemɔi fioo komɛi pɛ nyɛ amɛtsa kɛfee ekome, ni saji tamɔ sutsakemɔ, hɔjiemɔ, hii kɛ hii loo yei kɛ yei ni kɛ amɛhe náa bɔlɛ, kɛ yei ni aholeɔ amɛ osɔfoi lɛ eha sɔlemɔyalɔi lɛ amli egbala. Kristendom sɔlemɔi komɛi amli hiɛnyiɛlɔi lɛ bɔɔ mɔdɛŋ akɛ amɛbaaha mɛi ni yɔɔ kui srɔtoi amli afee ekome kɛtsɔ kɛɛmɔ ni amɛkɛɔ akɛ tsɔɔmɔi komɛi ni haaa amɛfee ekome lɛ ahe ehiaaa lɛ nɔ. Shi enɛ gbɔjɔɔ mɛi babaoo ahemɔkɛyeli, ni eka shi faŋŋ akɛ ehaaa Kristendom kui srɔtoi ni mli egbala lɛ afee ekome.
Maŋhedɔɔ Bɛ Anɔkwa Jamɔ Mlibii Amli
17. Te agba akɛ anɔkwa jamɔ baaha mɛi afee ekome yɛ “naagbee gbii lɛ amli” aha tɛŋŋ?
17 Eyɛ mli akɛ ŋmɛnɛ lɛ adesai amli egbala waa fe bei fɛɛ ni eho moŋ, shi ekomefeemɔ ni yɔɔ anɔkwa jálɔi ateŋ lɛ haa esoroɔ amɛ kwraa. Nyɔŋmɔ gbalɔ Mika gba akɛ: “Maŋɔ amɛ mato he kome tamɔ tooi ní yɔɔ tsu mli.” (Mika 2:12) Mika gba bɔ ni ebaasoro anɔkwa jamɔ yɛ jamɔi krokomɛi fɛɛ, kɛji eji apasa nyɔŋmɔi ajamɔ loo eji Maŋ jamɔ lɛ efɔ̃ shi. Eŋma akɛ: “Aaaba mli akɛ naagbee gbii lɛ amli lɛ Yehowa we gɔŋ lɛ aaama shi yɛ gɔji lɛ ayiteaŋ, ni aaawó enɔ fe gɔŋkpɔi lɛ; ni majimaji aaaho kɛaaba he. Ejaakɛ majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛi amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!”—Mika 4:1, 5.
18. Mɛɛ tsakemɔi anɔkwa jamɔ eye ebua wɔ ni wɔfee?
18 Mika gba hu akɛ anɔkwa jamɔ baaha mɛi ni kulɛ amɛji henyɛlɔi lɛ afee ekome. “Jeŋmaji pii [amlibii] aaatee ayakɛɛ akɛ: Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ní wɔnyiɛ etempɔŋi lɛ anɔ! . . . Ni amɛkɛ amɛklantei aaasɔ̃ kɔii, ni amɛkɛ amɛkpɔlɔi lɛ hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!” (Mika 4:2, 3) Mɛi ni kulɛ amɛji wɔŋjalɔi loo amɛdɔɔ amɛmaŋ he ni amrɔ nɛɛ amɛmiijá Yehowa lɛ efee ekome yɛ jeŋ fɛɛ. Nyɔŋmɔ tsɔseɔ amɛ koni amɛsumɔ amɛhe.
19. Mɛni mɛi akpekpei abɔ ni anɔkwa jamɔ efee amɛ ekome lɛ tsɔɔ faŋŋ?
19 Ekomefeemɔ ni yɔɔ anɔkwa Kristofoi ni yɔɔ jeŋ fɛɛ lɛ ateŋ ŋmɛnɛ lɛ nɔ bɛ, ni eji odaseyeli ni mli ka shi faŋŋ ni tsɔɔ akɛ Yehowa miiya nɔ eetsɔse ewebii lɛ kɛtsɔ emumɔ lɛ nɔ. Aafee mɛi ni jɛ jeŋmaji fɛɛ mli lɛ ekome yɛ gbɛ ni anako enɔ dã yɛ yinɔsane mli. Enɛ ji nɔ ni Kpojiemɔ 7:9, 14 lɛ tsɔɔ lɛ mlibaa ni yɔɔ miishɛɛ waa, ni etsɔɔ akɛ etsɛŋ ni Nyɔŋmɔ bɔfoi lɛ baaŋmɛɛ “kɔɔyɔi” ni baakpata jeŋ fɔŋ nɛɛ hiɛ lɛ he. (Nyɛkanea Kpojiemɔ 7: 1-4, 9, 10, 14.) Ani ejeee hegbɛ kpele ni wɔná akɛ wɔfata nyɛmimɛi ni yɔɔ jeŋ fɛɛ ni efee ekome lɛ he? Te wɔteŋ mɔ fɛɛ mɔ aaafee tɛŋŋ eha nakai ekomefeemɔ lɛ aya nɔ ahi shi? Abaasusu enɛ he yɛ nikasemɔ ni nyiɛ sɛɛ lɛ mli.
Te Obaaha Hetoo Oha Tɛŋŋ?
• Mɛɛ gbɛ nɔ anɔkwa jamɔ haa mɛi feɔ ekome?
• Te wɔɔfee tɛŋŋ wɔtsĩ awuŋayeli naa koni ekafite ekomefeemɔ ni yɔɔ wɔteŋ lɛ?
• Mɛni hewɔ maŋhedɔɔ bɛ anɔkwa jálɔi ateŋ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 13]
Klɛŋklɛŋ afii 100 lɛ mli Kristofoi lɛ jɛ shihilɛi srɔtoi amli
[Mfonirii ni yɔɔ baafa 15]
Mɛɛ gbɛ nɔ yelikɛbuamɔ ni okɛhaa yɛ Maŋtsɛyeli Asai ahe nitsumɔ mli lɛ haa ekomefeemɔ hiɔ shi?