Nyiɛmɔ Yɛ Mumɔ Naa Ni Onyɛ Ohi Shi Yɛ Ohenɔjɔɔmɔ Lɛ Naa
Nyiɛmɔ Yɛ Mumɔ Naa Ni Onyɛ Ohi Shi Yɛ Ohenɔjɔɔmɔ Lɛ Naa
“Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii.”—GAL. 5:16.
1. Mɛɛ baptisimɔi srɔtoi tee nɔ yɛ Pentekoste gbi lɛ nɔ?
BENI akɛ mumɔ krɔŋkrɔŋ lɛ baptisi Yesu sɛɛnyiɛlɔi lɛ yɛ afi 33 Ŋ.B. Pentekoste gbi lɛ nɔ lɛ sɛɛ dani amɛwie wiemɔi srɔtoisrɔtoi lɛ. Amɛjie mumɔ lɛ naakpɛɛ duromɔ keenii lɛ ateŋ ekome kpo. (1 Kor. 12:4-10) Te duromɔ keenii nɛɛ kɛ wiemɔ ni bɔfo Petro ha lɛ ná mɛi anɔ hewalɛ tɛŋŋ? “Etsurɔ” mɛi babaoo ‘atsuiiaŋ.’ Petro wo amɛ hewalɛ koni amɛtsake amɛtsui ní amɛha abaptisi amɛ, ni amɛfee nakai. Abɔ sane nɛɛ he amaniɛ akɛ: ‘Mɛi ni hé ewiemɔ lɛ yɛ tsuijurɔ naa lɛ abaptisi amɛ, ni nakai gbi lɛ nɔ nɔŋŋ lɛ aŋɔ susumai aaafee akpei etɛ afata amɛhe.’ (Bɔf. 2:22, 36-41) Abaptisi mɛi nɛɛ yɛ nu mli yɛ Tsɛ lɛ, Bi lɛ, kɛ mumɔ krɔŋkrɔŋ lɛ gbɛ́i amli, taakɛ Yesu efã lɛ.—Mat. 28:19.
2, 3. (a) Tsɔɔmɔ srɔtofeemɔ ni yɔɔ mumɔ krɔŋkrɔŋ lɛ ni akɛbaptisiɔ mɔ kɛ baptisimɔ yɛ mumɔ krɔŋkrɔŋ lɛ gbɛ́i amli lɛ teŋ. (b) Mɛni hewɔ esa akɛ abaptisi mɛi fɛɛ ni batsɔmɔɔ anɔkwa Kristofoi ŋmɛnɛ lɛ yɛ nu mli lɛ?
2 Shi ani srɔtofeemɔ yɛ mumɔ krɔŋkrɔŋ lɛ ni akɛbaptisiɔ mɔ kɛ baptisimɔ yɛ mumɔ krɔŋkrɔŋ lɛ gbɛ́i amli lɛ teŋ? Hɛɛ. Afɔ́ɔ mɛi ni akɛ mumɔ krɔŋkrɔŋ lɛ baptisiɔ amɛ lɛ ekoŋŋ akɛ Nyɔŋmɔ bii ní akɛ mumɔ efɔ amɛ mu. (Yoh. 3:3) Afɔ amɛ mu koni amɛfata Kristo he kɛye maŋtsɛmɛi ní amɛsɔmɔ akɛ osɔfoi yɛ eshishi yɛ Nyɔŋmɔ ŋwɛi Maŋtsɛyeli lɛ mli, ni amɛji mɛi ni feɔ Kristo mumɔŋ gbɔmɔtso lɛ. (1 Kor. 12:13; Gal. 3:27; Kpoj. 20:6) No hewɔ lɛ, Yehowa kɛ mumɔ krɔŋkrɔŋ lɛ baptisi amɛ yɛ Pentekoste gbi lɛ nɔ, ni kɛjɛ no sɛɛ kɛbaa lɛ ekɛ mumɔ krɔŋkrɔŋ lɛ baptisiɔ aŋkroaŋkroi fɛɛ ni ehalaa koni amɛfata Kristo he akɛ nanemɛi niyelɔi lɛ. (Rom. 8:15-17) Ni baptisimɔ ni abaptisiɔ mɛi yɛ nu mli yɛ mumɔ krɔŋkrɔŋ lɛ gbɛ́i amli, ni ji nɔ ko ni afeɔ daa yɛ kpeei bibii kɛ kpeei wuji ni Yehowa webii feɔ ŋmɛnɛ lɛ ashishi lɛ hu?
3 Anɔkwa Kristofoi haa abaptisiɔ amɛ yɛ nu mli kɛfeɔ amɛhe nɔ ni amɛjɔɔ kwraa amɛha Yehowa Nyɔŋmɔ lɛ he okadi. Nakai eji yɛ mɛi ni ená ŋwɛi tsɛmɔ lɛ agbɛfaŋ. Shi esa akɛ hii kɛ yei babaoo ni yɔɔ ŋmɛnɛ ni amrɔ nɛɛ amɛhiɛnɔkamɔ ji akɛ amɛbaahi shi kɛya naanɔ yɛ shikpɔŋ lɛ nɔ lɛ hu aha abaptisi amɛ yɛ nu mli. Ekɔɔɔ he eko hiɛnɔkamɔ ni mɔ ko yɔɔ lɛ, esa akɛ eha abaptisi lɛ yɛ nu mli awo Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛ́i amli, bɔni afee ni Nyɔŋmɔ akpɛlɛ enɔ. Esa akɛ Kristofoi fɛɛ ni abaptisi amɛ yɛ nɛkɛ gbɛ nɔ lɛ ‘anyiɛ yɛ mumɔ naa.’ (Nyɛkanea Galatabii 5:16.) Ani oonyiɛ yɛ mumɔ naa kɛmiitsɔɔ akɛ oohi shi yɛ ohenɔjɔɔmɔ lɛ naa?
Nɔ ni ‘Nyiɛmɔ yɛ Mumɔ Naa’ lɛ Tsɔɔ
4. Mɛni ‘nyiɛmɔ yɛ mumɔ naa’ lɛ tsɔɔ diɛŋtsɛ?
4 Kɛ́ mɔ ko kpɛlɛ ni mumɔ krɔŋkrɔŋ lɛ tsu nii yɛ enɔ, ni tsɔɔ akɛ eŋmɛ gbɛ ni mumɔ krɔŋkrɔŋ lɛ ná enɔ hewalɛ lɛ, no tsɔɔ akɛ ‘eenyiɛ yɛ mumɔ naa.’ Wɔbaanyɛ wɔkɛɛ akɛ, mɔ lɛ haa mumɔ krɔŋkrɔŋ lɛ kudɔɔ nibii ni efeɔ daa gbi lɛ. Galatabii yitso 5 lɛ haa wɔnaa srɔtofeemɔ ni yɔɔ mɔ ni haa mumɔ krɔŋkrɔŋ lɛ náa enɔ hewalɛ kɛ mɔ ni heloo lɛ náa enɔ hewalɛ lɛ teŋ.—Nyɛkanea Galatabii 5:17, 18.
5. Mɛni mɛi ni haa mumɔ krɔŋkrɔŋ lɛ náa amɛnɔ hewalɛ lɛ tsiɔ amɛhe kɛjɛɔ he?
5 Kɛ́ mumɔ krɔŋkrɔŋ náa onɔ hewalɛ lɛ, obɔɔ mɔdɛŋ koni otsi ohe kɛjɛ heloo lɛ nitsumɔi lɛ ahe. Enɛɛmɛi ateŋ ekomɛi ji “ajwamaŋbɔɔ, muji nitsumɔ, nyenyeŋtswibɔɔ, wɔŋjamɔ, [mumɔi atsɛmɔ], nyɛɛ, béi, awuŋayelii, mlilawooi, bolɔmɔi, atuatsemɔi, mligbalamɔi, hiɛkɔɔi, awuyelii, dãatɔɔi, shwɛmɔ fɔŋ.” (Gal. 5:19-21) Yɛ gbɛ ko nɔ lɛ, okɛ “mumɔ gbeɔ heloo lɛ nitsumɔi lɛ.” (Rom. 8:5, 13) Ebaaye ebua bo ni okɛ ojwɛŋmɔ ama mumɔ lɛ nibii anɔ, ni yɛ nɔ najiaŋ ni oooŋmɛ heloo lɛ sɛɛdii nii lɛ gbɛ ni ená onɔ hewalɛ lɛ, obaaha mumɔ lɛ akpala bo.
6. Feemɔ nɔ ni esa akɛ mɔ ko afee bɔni afee ni ewo mumɔ lɛ yibii lɛ he nɔkwɛmɔnɔ.
6 Mumɔ krɔŋkrɔŋ lɛ ni ohaa etsuɔ nii yɛ onɔ lɛ haa ojieɔ Nyɔŋmɔ gbeyeishemɔ sui akpo, ni tsɔɔ akɛ owoɔ “mumɔ lɛ yibii” lɛ. (Gal. 5:22, 23) Shi ole akɛ ebiɔ ni obɔ mɔdɛŋ dani onyɛ owo yibii nɛɛ. Enɛ he nɔkwɛmɔnɔ nɛ: Okwaafonyo huɔ ŋmɔ. Kɛ́ dumɔ nii ni etɛo lɛ náaa hulu la kɛ nu lɛ, no lɛ enitsumɔ lɛ baafee yaka. Wɔbaanyɛ wɔkɛ mumɔ krɔŋkrɔŋ lɛ ato hulu la he. Ja wɔná mumɔ krɔŋkrɔŋ lɛ dani wɔbaanyɛ wɔwo mumɔ lɛ yibii lɛ. Shi kɛ́ okwaafonyo ko nijiaŋ ŋɔɔ lɛ lɛ, ani ebaakpa nɔ ko? (Abɛi 10:4) Yɛ anɔkwale mli lɛ, bɔ ni otsuɔ okadifeemɔŋ sũ ni ji otsui lɛ he nii ohaa lɛ ni baatsɔɔ kɛji obaawo mumɔ krɔŋkrɔŋ lɛ yibii lɛ jogbaŋŋ loo owoŋ lɛ jogbaŋŋ. No hewɔ lɛ, bi ohe akɛ, ‘Ani mihaa mumɔ krɔŋkrɔŋ lɛ kpalaa mi bɔni afee ni mawo eyibii lɛ?’
7. Mɛni hewɔ nikasemɔ kɛ sanenɔjwɛŋmɔ he miihia waa kɛ́ ooonyɛ owo mumɔ krɔŋkrɔŋ lɛ yibii lɛ?
7 Esa akɛ okwaafoi ashwie amɛdumɔ nii lɛ anɔ nu hu bɔni afee ni amɛkpa nii babaoo. Bɔni afee ni owo mumɔ lɛ yibii lɛ, esa akɛ oná Biblia mli anɔkwalei ni akɛ nu feɔ he okadi ní ŋmɛnɛ lɛ atsɔɔ Kristofoi asafo lɛ nɔ akɛhaa lɛ. (Yes. 55:1) Eeenyɛ efee akɛ oshiɛ oha mɛi babaoo akɛ ajɛ mumɔ krɔŋkrɔŋ lɛ mli aŋma Ŋmalɛ Krɔŋkrɔŋ lɛ. (2 Tim. 3:16) Kɛfata he lɛ, tsulɔ anɔkwafo kɛ nilelɔ kuu lɛ yeɔ ebuaa wɔ ni wɔnuɔ Biblia mli anɔkwalei ni tamɔ nu krɔŋŋ lɛ ashishi. (Mat. 24:45-47) Nɔ ni enɛ tsɔɔ lɛ mli kã shi faŋŋ. Kɛ́ mumɔ krɔŋkrɔŋ lɛ baaná wɔnɔ hewalɛ lɛ, esa akɛ wɔkane Nyɔŋmɔ Wiemɔ lɛ, ní wɔjwɛŋ nɔ. Kɛ́ ofeɔ nakai lɛ, no tsɔɔ akɛ ookase gbalɔi ni “tao” saji ni akɛha amɛ lɛ “sɛɛgbɛ, ni amɛtao mli fitsofitso” lɛ anɔkwɛmɔnɔ kpakpa lɛ. Esa kadimɔ waa akɛ ŋwɛi bɔfoi lɛ tete po bɔɔ mɔdɛŋ waa akɛ amɛaale anɔkwalei ni kɔɔ shiwoo Seshi lɛ kɛ Kristofoi asafo ni afɔ emlibii lɛ amu lɛ he lɛ.—Nyɛkanea 1 Petro 1:10-12.
Mɛɛ Gbɛ nɔ Mumɔ Krɔŋkrɔŋ lɛ Náa Mɔ Nɔ Hewalɛ?
8. Mɛni hewɔ ehe miihia waa ni obi Yehowa ni eha bo emumɔ lɛ?
8 Jeee Ŋmalɛi lɛ ni oookase ni ojwɛŋ nɔ lɛ pɛ kɛkɛ baaha mumɔ lɛ aná onɔ hewalɛ. Esa akɛ oya nɔ obi Yehowa ni eye ebua bo ni etsɔɔ bo gbɛ. Ebaanyɛ efee “kɛteke nɔ babaoo fe nii fɛɛ ni wɔkpaa he fai loo wɔjwɛŋɔ.” (Efe. 3:20; Luka 11:13) Shi mɛɛ hetoo obaaha, kɛ́ mɔ ko bi bo akɛ, “Kɛji Nyɔŋmɔ le ‘nii ni hiaa mi dani mibiɔ lɛ’ lɛ, mɛni hewɔ esa akɛ maya nɔ mabi?” (Mat. 6:8) Ojogbaŋŋ, nɔ̃ kome ji akɛ, kɛ́ osɔleɔ kɛbiɔ mumɔ krɔŋkrɔŋ lɛ, okɛ no tsɔɔ akɛ okɛ ohe fɔ̃ɔ Yehowa nɔ. Ákɛ nɔkwɛmɔnɔ lɛ, kɛ́ mɔ ko ba oŋɔɔ koni oye obua lɛ lɛ, obaafee bɔ fɛɛ bɔ ni ooonyɛ koni oye obua lɛ. Yiŋtoo kome hewɔ ji akɛ onuɔ he akɛ mɔ lɛ yɛ hekɛnɔfɔɔ yɛ omli, ni no hewɔ eba oŋɔɔ lɛ. (Nyɛkɛtoa Abɛi 3:27 lɛ he.) Nakai nɔŋŋ Yehowa náa he miishɛɛ akɛ obiɔ lɛ ni eha bo emumɔ lɛ, ni ekɛbaaha bo hu.—Abɛi 15:8.
9. Mɛɛ gbɛ nɔ Kristofoi akpeeiyaa baaye abua bo koni Nyɔŋmɔ mumɔ lɛ aná onɔ hewalɛ?
9 Ole jogbaŋŋ hu akɛ kɛ́ wɔtee asafoŋ kpeei, kpeei bibii kɛ kpeei wuji lɛ, Nyɔŋmɔ mumɔ lɛ náa wɔnɔ hewalɛ. Ehe miihia waa ni obɔ mɔdɛŋ oya kpeei srɔtoi nɛɛ fɛɛ, ní ofee toi jogbaŋŋ oha nifeemɔi fɛɛ ni baaya nɔ yɛ jɛmɛ lɛ. Kɛ́ ofee nakai lɛ, no baaye abua bo ni onu “Nyɔŋmɔ nibii ni mli kwɔlɔ” lɛ ashishi. (1 Kor. 2:10) Kɛ́ ohaa saji ahetoo yɛ asafoŋ kpeei ashishi lɛ, obaaná no hu he sɛɛ. Okɛ ojwɛŋmɔ aya kpeei srɔtoi ni otee yɛ otsii ejwɛ ni eho lɛ amli lɛ anɔ okwɛ. Shii enyiɛ owo onine nɔ, ni oha sane hetoo kɛjie ohemɔkɛyeli kpo? Ani onaa akɛ esa akɛ obɔ enɛ he mɔdɛŋ fe tsutsu lɛ? Kɛ́ nakai ni lɛ, kpɛɛ oyiŋ yɛ nɔ ni obaafee yɛ enɛ he yɛ otsii ni baaba lɛ amli. Yehowa baana akɛ oosumɔ ni oha saji ahetoo, ni ebaaha bo emumɔ krɔŋkrɔŋ lɛ bɔni afee ni oná kpeei srɔtoi ni oyaa lɛ ahe sɛɛ babaoo fe tsutsu lɛ.
10. Mɛɛ ninefɔɔ mumɔ lɛ naa ni wɔnyiɛɔ yɛ lɛ biɔ ni wɔkɛha mɛi?
10 Kɛ́ wɔhere ninefɔɔ ni yɔɔ Kpojiemɔ 22:17 lɛ nɔ lɛ, no hu tsɔɔ akɛ wɔmiinyiɛ yɛ mumɔ lɛ naa. Ekɛɔ akɛ: “Mumɔ lɛ kɛ ayemforo lɛ kɛɔ akɛ: Ba! Ni mɔ ni nuɔ lɛ, ha ni ekɛɛ: Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” Mumɔ lɛ tsɔɔ ayemforo kuu ni afɔ amɛ mu lɛ nɔ efɔ̃ɔ mɛi nine koni amɛbanu wala nu. Kɛ́ okpɛlɛ ninefɔɔ akɛ “ba!” lɛ nɔ lɛ, ani bo hu otswa ofai shi akɛ obaakɛɛ akɛ, “Ba!”? Eji hegbɛ kpele ni wɔná akɛ wɔmiitsu nitsumɔ ni hereɔ mɛi ayiwala nɛɛ eko!
11, 12. Mɛɛ gbɛ nɔ mumɔ krɔŋkrɔŋ lɛ náa shiɛmɔ nitsumɔ lɛ nɔ hewalɛ?
11 Amrɔ nɛɛ aatsu nitsumɔ ni he hiaa waa nɛɛ yɛ mumɔ krɔŋkrɔŋ lɛ gbɛtsɔɔmɔ naa. Wɔnaa yɛ Ŋmalɛi lɛ amli akɛ mumɔ krɔŋkrɔŋ lɛ ye ebua maŋsɛɛ shiɛlɔi lɛ yɛ klɛŋklɛŋ afii 100 lɛ mli ni amɛna hei ni ashiɛko sanekpakpa lɛ yɛ. ‘Mumɔ krɔŋkrɔŋ lɛ tsi’ bɔfo Paulo kɛ ehefatalɔi lɛ ‘agbɛ akɛ amɛkawie wiemɔ lɛ amɛtsɔɔ yɛ Asia’; ni asaŋ eŋmɛɛɛ amɛ gbɛ koni amɛya Bitinia. Wɔleee gbɛ pɔtɛɛ ni mumɔ lɛ tsɔ nɔ etsi amɛ gbɛ koni amɛkaya hei nɛɛ, shi eyɛ faŋŋ akɛ mumɔ lɛ kpala Paulo kɛtee Yuropa ni ji shikpɔŋkuku agbo lɛ nɔ. Paulo na nuu Makedonianyo ko yɛ ninaa mli akɛ eekpa lɛ fai ni ebaye ebua amɛ.—Bɔf. 16:6-10.
12 Ŋmɛnɛ lɛ, nakai nɔŋŋ hu Yehowa mumɔ lɛ kudɔɔ jeŋ fɛɛ shiɛmɔ nitsumɔ lɛ. Yehowa tsɔɔɔ ninai anɔ ekudɔɔɔ nitsumɔ nɛɛ; shi moŋ etsɔɔ mɛi ni afɔ amɛ mu lɛ gbɛ kɛtsɔ mumɔ krɔŋkrɔŋ lɛ nɔ. Agbɛnɛ hu, mumɔ lɛ kanyaa nyɛmimɛi hii kɛ yei koni amɛfee bɔ fɛɛ bɔ ni amɛaanyɛ kɛshiɛ ní amɛtsɔɔ mɛi anii. Ŋwanejee ko bɛ he akɛ ootsu nitsumɔ ni he hiaa waa nɛɛ eko. Ani obaanyɛ oha miishɛɛ ni okɛtsuɔ nitsumɔ ni kanyaa mɔ nɛɛ afa fe tsutsu lɛ?
13. Mɛni kɛ́ ofee lɛ no tsɔɔ akɛ ooŋmɛ mumɔ krɔŋkrɔŋ lɛ gbɛ ni ekudɔ bo? Okɛ enɛ he nɔkwɛmɔnɔ aha.
13 Kɛ́ okɛ gbɛtsɔɔmɔi ni akɛhaa Nyɔŋmɔ webii lɛ tsuɔ nii lɛ, no tsɔɔ akɛ ooŋmɛ gbɛ koni mumɔ krɔŋkrɔŋ lɛ akudɔ bo. Susumɔ oblayoo ko ni atsɛɔ lɛ Mihoko ni jɛ Japan lɛ he okwɛ. Beni eje gbɛgbamɔ nitsumɔ lɛ shishi ehee lɛ, enu he akɛ ehe esako kɛ sɛɛkuu-kɛsaramɔ feemɔ; enu he akɛ eleee bɔ ni eeefee etée shĩatsɛmɛi lɛ amiishɛɛ shi. Shi yɛ nakai be lɛ mli nɔŋŋ lɛ, akɛ ŋaawoi kpakpai ni tsɔɔ gbɛ nɔ ni aaatsɔ afee sɛɛkuu-kɛsaramɔi kukuji ha yɛ Wɔ Maŋtsɛyeli Sɔɔmɔ lɛ mli. Kɛkɛ ni ajie wolo ni ji Shihilɛ ni Yɔɔ Miishɛɛ—Bɔ ni Aaafee Aná lɛ kpo. Ehe ba sɛɛnamɔ waa titri lɛ kɛha Japanbii. Mihoko kɛ ŋaawoi ni tsɔɔ bɔ ni esa ákɛ akɛ wolo nɛɛ atsu nii aha, titri lɛ nɔ ni kɔɔ gbɛ nɔ ni aaatsɔ afee sɛɛkuu-kɛsaramɔi kukuji lɛ he lɛ tsu nii. Etsɛɛɛ kwraa ni ekɛ mɛi ni kulɛ amɛkpɛlɛŋ ni akɛ amɛ akase nii lɛ bɔi nikasemɔ. Ekɛɛ akɛ, “Miná Biblia mli nikasemɔi babaoo—mɛi ni naa shɛɔ 12 sɔŋŋ yɛ be kome mli—aahu akɛ mikɛɛ amɛteŋ mɛi komɛi koni amɛmɛ dã!” Eji anɔkwale akɛ, kɛ́ onyiɛɔ yɛ mumɔ naa lɛ, ni tsɔɔ akɛ okɛ gbɛtsɔɔmɔi ni akɛhaa Yehowa tsuji lɛ tsuɔ nii lɛ, obaawo yibii babaoo.
Okɛ Ohe Afɔ̃ Nyɔŋmɔ Mumɔ lɛ Nɔ
14, 15. (a) Te adesai ni yeee emuu lɛ aaafee tɛŋŋ amɛhi shi yɛ amɛhenɔjɔɔmɔ lɛ naa? (b) Te ooofee tɛŋŋ oná nanemɛi kpakpai?
14 Akɛni Nyɔŋmɔ ehala bo akɛ esɔɔlɔ hewɔ lɛ, oyɛ sɔɔmɔ nitsumɔ ko ni esa akɛ otsu. (Rom. 10:14) Ekolɛ onuɔ he akɛ osaaa mɔ ni tereɔ sɔ̃ nɛɛ. Shi taakɛ eji yɛ mɛi ni afɔ amɛ mu lɛ agbɛfaŋ lɛ, Nyɔŋmɔ ji mɔ ni haa wɔfeɔ mɛi ni sa kɛha nitsumɔ nɛɛ. (Nyɛkanea 2 Korintobii 3:5.) Kɛ́ ofee bɔ fɛɛ bɔ ni ooonyɛ, ni okɛ ohe fɔ̃ Nyɔŋmɔ mumɔ lɛ nɔ lɛ, obaanyɛ ohi shi yɛ ohenɔjɔɔmɔ lɛ naa.
15 Eji anɔkwale akɛ, akɛni wɔji adesai ni yeee emuu hewɔ lɛ, ebɛ mlɛo kwraa akɛ wɔɔhi shi yɛ wɔhe nɔ ni wɔjɔɔ wɔha wɔ-Nyɔŋmɔ ni eye emuu ni ji Yehowa lɛ naa. Nɔ̃ kome ni haa efeɔ nɔ ni wa ji akɛ, ekolɛ mɛi ni okɛbɔɔ tsutsu ko lɛ ateŋ mɛi komɛi ahiɛ baafee amɛ yaa yɛ shihilɛ gbɛ hee ni okɔ lɛ hewɔ, ni amɛbaanyɛ ‘amɛwie’ ohe ‘musubɔɔ wiemɔi.’ (1 Pet. 4:4) Shi kaaha ohiɛ kpa nɔ akɛ kɛjɛ nakai beaŋ kɛbaa nɛɛ, oná nanemɛi hei, ni Yehowa kɛ Yesu Kristo ji onanemɛi nɛɛ ateŋ mɛi ni he hiaa fe fɛɛ. (Nyɛkanea Yakobo 2:21-23.) Agbɛnɛ hu, ehe miihia waa ni ole nyɛmimɛi hii kɛ yei ni yɔɔ osafo lɛ mli lɛ jogbaŋŋ, ejaakɛ amɛfata ‘onyɛmimɛi’ ni yɔɔ jeŋ fɛɛ lɛ ahe. (1 Pet. 2:17; Abɛi 17:17) Yehowa baaye abua bo kɛtsɔ emumɔ lɛ nɔ koni oná nanemɛi ni baaya nɔ aná onɔ hewalɛ kpakpa.
16. Mɛni hewɔ ‘omii baanyɛ ashɛ yɛ gbedeefeemɔi amli’ taakɛ Paulo fee lɛ?
16 Kɛ́ oyɛ nanemɛi ni náa onɔ hewalɛ kpakpa po yɛ asafo lɛ mli lɛ, ekolɛ ebaawa eha bo lolo akɛ ooodamɔ naagbai ni okɛkpeɔ daa gbi lɛ anaa. Ekolɛ shihilɛi ni okɛkpeɔ lɛ baaha onu he akɛ ofee shwɛm oookɛɛ onaagbai lɛ miisu bo. Kɛ́ onu he nakai lɛ, ehe miihia waa ni otsi obɛŋkɛ Yehowa ni obi lɛ ni eha bo emumɔ krɔŋkrɔŋ lɛ. Bɔfo Paulo ŋma akɛ: “Kɛ́ mifee gbedee lɛ, no moŋ mináa hewalɛ.” (Nyɛkanea 2 Korintobii 4:7-10; 12:10.) Paulo le akɛ ekɔɔɔ he eko bɔ ni wɔfãtɔɔ ko ji lɛ, Nyɔŋmɔ mumɔ lɛ baanyɛ aha wɔná hewalɛ kɛye nɔ. Belɛ, be fɛɛ be ni obaanu he akɛ ofee gbedee ni yelikɛbuamɔ he miihia bo lɛ, Nyɔŋmɔ mumɔ krɔŋkrɔŋ lɛ baanyɛ awaje bo. Paulo ŋma akɛ, ‘emii baanyɛ ashɛ yɛ gbedeefeemɔi amli.’ Kɛ́ Paulo fee gbedee lɛ, no moŋ haa enuɔ he akɛ mumɔ krɔŋkrɔŋ lɛ miitsu nii yɛ enɔ. Bo hu obaanyɛ onu he nakai nɔŋŋ!—Rom. 15:13.
17. Mɛɛ gbɛ nɔ mumɔ krɔŋkrɔŋ baanyɛ aye abua bo koni oyashɛ he ni oyaa lɛ?
17 Dani wɔɔnyɛ wɔhi shi akɛ mɛi ni ejɔɔ amɛwala nɔ amɛha Nyɔŋmɔ lɛ, ehe miihia ni wɔná emumɔ lɛ. Ŋɔɔ lɛ akɛ oji lɛlɛ ko kudɔlɔ. Oti ni ma ohiɛ ji ni osɔmɔ Yehowa kɛya naanɔ. Mumɔ krɔŋkrɔŋ lɛ tamɔ kɔɔyɔɔ ni oosumɔ akɛ oye bɔni afee ni oyashɛ he ni oyaa lɛ shweshweeshwe lɛ. Osumɔŋ akɛ Satan je lɛ mumɔ lɛ akpala bo kɛya kɛba. (1 Kor. 2:12) Esa akɛ otao kɔɔyɔɔ kpakpa lɛ koni oye. No ji mumɔ krɔŋkrɔŋ lɛ. Mumɔ krɔŋkrɔŋ lɛ baatsɔ Nyɔŋmɔ Wiemɔ lɛ kɛ Nyɔŋmɔ asafo ni mumɔ kudɔɔ lɛ lɛ nɔ ekpala bo kɛya he ni sa.
18. Amrɔ nɛɛ, mɛni otswa ofai shi akɛ obaafee, ni mɛni hewɔ?
18 Kɛ́ Yehowa Odasefoi kɛbo miikase nii, ni okɛ asafo lɛ bɔɔ, shi ofeko nibii ni he hiaa waa ni ji ohe nɔ ni ooojɔɔ ni no sɛɛ lɛ okɛ ohe aha koni abaptisi bo lɛ, esa akɛ obi ohe akɛ, ‘Mɛni mimɛɔ?’ Kɛ́ okpɛlɛɔ nɔ ni Yehowa tsɔɔ mumɔ krɔŋkrɔŋ lɛ nɔ etsuɔ bɔni afee ni afee Yehowa suɔmɔnaa nii lɛ nɔ, ni ohiɛ sɔɔ enɛ lɛ, belɛ esa akɛ ojɔɔ ohe nɔ, ni oha abaptisi bo, ejaakɛ okase akɛ nakai feemɔ ja. Yehowa baajɔɔ bo waa. Ekɛ emumɔ krɔŋkrɔŋ lɛ baaha bo faa. Kɛ́ afii komɛi nɛ loo afii nyɔŋmai abɔ nɛ ni abaptisi bo lɛ, no lɛ ŋwanejee ko bɛ he akɛ mumɔ krɔŋkrɔŋ lɛ náa onɔ hewalɛ. Onaa, ni onuɔ he akɛ Nyɔŋmɔ kɛ emumɔ lɛ wajeɔ bo. Enɛ baanyɛ aya nɔ—hɛɛ, kɛya naanɔ. Belɛ, tswaa ofai shi akɛ obaaya nɔ onyiɛ yɛ mumɔ krɔŋkrɔŋ lɛ naa.
Ani Okaiɔ?
• Mɛni ‘nyiɛmɔ yɛ mumɔ naa’ tsɔɔ?
• Mɛni baanyɛ aye abua bo ni oya nɔ ‘onyiɛ yɛ mumɔ naa’?
• Te ooofee tɛŋŋ ohi shi yɛ ohenɔjɔɔmɔ lɛ naa?
[Nikasemɔ lɛ he Sanebimɔi]
[Mfoniri ni yɔɔ baafa 15]
Ebiɔ mɔdɛŋbɔɔ dani obaanyɛ otsu okadifeemɔŋ sũ ni ji otsui lɛ he nii
[Mfonirii ni yɔɔ baafa 16, 17]
Ani Nyɔŋmɔ mumɔ lɛ náa onɔ hewalɛ?