‘Mumɔ Lɛ Kɛ Ayemforo Lɛ Yaa Nɔ Amɛkɛɔ Akɛ: Ba!’
‘Mumɔ Lɛ Kɛ Ayemforo Lɛ Yaa Nɔ Amɛkɛɔ Akɛ: Ba!’
‘Mumɔ lɛ kɛ ayemforo lɛ yaa nɔ amɛkɛɔ akɛ: Ba! Mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.’—KPOJ. 22:17.
1, 2. Mɛɛ gbɛhe esa akɛ wɔha Maŋtsɛyeli lɛ he nibii lɛ aye yɛ wɔshihilɛ mli, ni mɛni hewɔ?
MƐƐ gbɛhe esa akɛ wɔha Maŋtsɛyeli lɛ he nibii lɛ aye yɛ wɔshihilɛ mli? Yesu wo esɛɛnyiɛlɔi lɛ hewalɛ ni ‘amɛya nɔ amɛtao maŋtsɛyeli lɛ tsutsu,’ ni ema nɔ mi eha amɛ akɛ kɛ́ amɛfee nakai lɛ, Nyɔŋmɔ baaha amɛ amɛhiamɔ nibii. (Mat. 6:25-33) Ekɛ Nyɔŋmɔ Maŋtsɛyeli lɛ to adiagba ko he, ni adiagba nɛɛ jara wa aahu akɛ beni guɔyelɔ ko yana lɛ, “eyahɔ̃ɔ nii fɛɛ ni eyɔɔ lɛ, ni ekɛhé.” (Mat. 13:45, 46) Aso esaaa akɛ wɔbuɔ Maŋtsɛyeli shiɛmɔ kɛ kaselɔfeemɔ nitsumɔ lɛ akɛ nitsumɔ ni he hiaa fe fɛɛ?
2 Taakɛ wɔna yɛ nikasemɔi enyɔ ni tsɔ hiɛ lɛ amli lɛ, kɛ́ wɔshiɛ kɛ ekãa ni wɔkɛ Nyɔŋmɔ Wiemɔ lɛ tsu nii jogbaŋŋ yɛ wɔshiɛmɔ nitsumɔ lɛ mli lɛ, no tsɔɔ akɛ Nyɔŋmɔ mumɔ lɛ kudɔɔ wɔ. Mumɔ nɛɛ hu yeɔ ebuaa wɔ waa koni wɔnyɛ wɔtsu Maŋtsɛyeli shiɛmɔ nitsumɔ lɛ daa. Nyɛhaa wɔkwɛa gbɛ nɔ ni etsɔɔ efeɔ nakai.
Aafɔ̃ Mɛi Fɛɛ Nine!
3. Mɛɛ nu afɔ̃ɔ adesai fɛɛ nine koni ‘amɛba’ ni amɛbanu lɛ?
3 Aatsɔ mumɔ krɔŋkrɔŋ lɛ nɔ aafɔ̃ adesai fɛɛ nine. (Nyɛkanea Kpojiemɔ 22:17.) Aafɔ̃ amɛ nine koni ‘amɛba’ ni amɛkɛ nu krɛdɛɛ ko abagbe amɛkumai. Enɛ jeee nu folo ko kɛkɛ. Eyɛ mli akɛ nu he miihia kɛha wala yibaamɔ yɛ shikpɔŋ lɛ nɔ moŋ, shi beni Yesu kɛ Samaria yoo lɛ wie yɛ nubu lɛ he lɛ, jeee nu diɛŋtsɛ he ewie lɛ. Ekɛɛ akɛ: “Mɔ ni nuɔ nu ni mi maha lɛ lɛ eko lɛ, kumai yeŋ lɛ dɔŋŋ kɛaatee naanɔ; shi moŋ, nu ni maha lɛ lɛ, aaatsɔ nu hiŋmɛi ni baa kɛyaa naanɔ wala mli yɛ emli.” (Yoh. 4:14) Nu ni nɔ bɛ ní afɔ̃ɔ adesai nine koni amɛbanu lɛ haa mɔ naanɔ wala.
4. Mɛni hewɔ ehe bahia ni aná wala nu lɛ, ni mɛni nu nɛɛ damɔ shi kɛha?
4 Beni Adam yafata eŋa Hawa he kɛgbo Yehowa Nyɔŋmɔ ni ji amɛ-Bɔlɔ lɛ nɔ toi lɛ, ehe bahia ni aná nakai nu lɛ. (1 Mose 2:16, 17; 3:1-6) Ashwie klɛŋklɛŋ nuu kɛ yoo lɛ kɛjɛ amɛshĩa ni ji abɔɔ lɛ mli ‘bɔni afee ni Adam akakpã enine mli, ni etse wala tso lɛ yibii lɛ hu eko, ni eye, ni ehiɛ miikã kɛmiiya naanɔ.’ (1 Mose 3:22) Akɛni Adam nɔ tsɔ ni adesai fɛɛ ba shihilɛ mli hewɔ lɛ, nɔ ni efee lɛ ha gbele tsɛŋe gbɔmɛi fɛɛ. (Rom. 5:12) Wala nu lɛ damɔ shi kɛha gbɛjianɔi fɛɛ ni Nyɔŋmɔ eto koni ekɛkpɔ̃ adesai ni boɔ lɛ toi lɛ kɛjɛ esha kɛ gbele mli koni eha amɛ naanɔ wala yɛ Paradeiso yɛ shikpɔŋ lɛ nɔ lɛ. Yesu Kristo kpɔmɔ afɔleshaa lɛ nɔ Nyɔŋmɔ tsɔɔ etoɔ nibii nɛɛ ahe gbɛjianɔ.—Mat. 20:28; Yoh. 3:16; 1 Yoh. 4:9, 10.
5. Namɔ to ninefɔɔ akɛ aba ni ‘abayɛ wala nu lɛ yaka’ lɛ shishi? Tsɔɔmɔ mli.
5 Namɔ to ninefɔɔ akɛ aba ni ‘abayɛ wala nu lɛ yaka’ lɛ shishi? Akɛ gbɛjianɔi ni atsɔɔ Yesu nɔ atoɔ kɛyeɔ abuaa adesai koni amɛná wala lɛ fɛɛ baatsu nii kɛmɔ shi yɛ Kristo Afii Akpe Nɔyeli lɛ mli, ni afee enɛɛmɛi ahe mfoniri akɛ “wala nu faa krɔŋŋ ni mli tse tamɔ kristalo ashwishwɛ.” Faa nɛɛ tueɔ ‘kɛjɛɔ Nyɔŋmɔ kɛ toobi lɛ maŋtsɛsɛi lɛ mli.’ (Kpoj. 22:1) No hewɔ lɛ, Yehowa ni ji Wala Halɔ lɛ ji Mɔ ŋɔɔ ni nu ni nibii ni haa wala yɔɔ mli lɛ jɛɔ. (Lala 36:10) Lɛ ji Mɔ ni tsɔɔ “toobi lɛ” ni ji Yesu Kristo nɔ ehaa adesai anine shɛɔ nu nɛɛ nɔ. (Yoh. 1:29) Yehowa baatsɔ okadifeemɔŋ faa nɛɛ nɔ ejie shihilɛi gbohii fɛɛ ni Adam toigbele lɛ eha adesai kɛkpeɔ lɛ. Hɛɛ, Yehowa Nyɔŋmɔ ji Mɔ ni to ninefɔɔ ni akɛtsɛɔ mɛi akɛ ‘amɛba’ lɛ shishi.
6. Mɛɛ be “wala nu faa” lɛ bɔi hoo?
6 Eyɛ mli akɛ “wala nu faa” lɛ baaho kɛmɔ shi jogbaŋŋ yɛ Kristo Afii Akpe Nɔyeli lɛ mli moŋ, shi ebɔi hoo yɛ “Nuŋtsɔ lɛ gbi lɛ” ni je shishi beni awó “toobi lɛ” maŋtsɛ yɛ ŋwɛi yɛ afi 1914 lɛ nɔ. (Kpoj. 1:10) No hewɔ lɛ, kɛjɛ nakai beaŋ kɛbaa lɛ, akɛ gbɛjianɔtoi komɛi ni baaha adesai aná wala lɛ bɔi nitsumɔ. Enɛɛmɛi kɛ Nyɔŋmɔ Wiemɔ ni ji Biblia lɛ yɛ tsakpaa, ejaakɛ atsɛɔ emli shɛɛ sane lɛ akɛ “nu.” (Efe. 5:26) Aafɔ̃ mɛi fɛɛ nine koni ‘amɛbanu wala nu’ kɛtsɔ Maŋtsɛyeli lɛ he sanekpakpa lɛ toi ni amɛaabo kɛ ehe nii ni amɛaatsu lɛ nɔ. Shi namɛi tuuntu fɔ̃ɔ mɛi nine yɛ Nuŋtsɔ lɛ gbi lɛ nɔ lɛ?
“Ayemforo lɛ Kɛɔ akɛ: Ba!”
7. Namɛi tsutsu fɔ̃ mɛi nine yɛ “Nuŋtsɔ lɛ gbi lɛ” nɔ akɛ “ba,” ni namɛi nine amɛfɔ̃?
7 Ayemforo kuu lɛ mlibii, ni ji Kristofoi ni akɛ mumɔ efɔ amɛ mu lɛ, ji mɛi tsutsu ni fɔ̃ɔ mɛi nine akɛ ‘amɛba.’ Namɛi nine amɛfɔ̃ɔ lɛ? Ekã shi faŋŋ akɛ ayemforo lɛ efɔ̃ɔɔ lɛ diɛŋtsɛ ehe nine akɛ: “Ba!” Eefɔ̃ mɛi ni yɔɔ hiɛnɔkamɔ akɛ kɛ́ awu “Nyɔŋmɔ Ofe lɛ gbi wulu lɛ nɔ ta lɛ” agbe naa lɛ, amɛbaaná naanɔ wala yɛ shikpɔŋ lɛ nɔ lɛ nine.—Nyɛkanea Kpojiemɔ 16:14, 16.
8. Mɛni tsɔɔ akɛ Kristofoi ni afɔ amɛ mu lɛ haa mɛi anine shɛɔ Yehowa ninefɔɔ lɛ nɔ kɛjɛ afi 1918 lɛ tɔ̃ɔ?
8 Kristo sɛɛnyiɛlɔi ni afɔ amɛ mu lɛ bɔi mɛi nine fɔ̃ɔ kɛjɛ afi 1918 tɔ̃ɔ. Yɛ nakai afi lɛ mli lɛ, maŋshiɛmɔ ko ni aha ni yitso ji “Ekolɛ Mɛi Akpekpei Abɔ ni Yɔɔ Bianɛ lɛ Gboiŋ Kɔkɔɔkɔ” lɛ ha aná hiɛnɔkamɔ akɛ kɛ́ awu Harmagedon ta lɛ agbe naa lɛ, mɛi babaoo baaná wala yɛ shikpɔŋ ni etsɔ paradeiso nɔ. Biblia Kaselɔi lɛ fee kpee wulu ko yɛ Cedar Point, Ohio, U.S.A. yɛ afi 1922 lɛ, ni wiemɔ ko ni aha yɛ shishi lɛ wo mɛi ni bo toi lɛ hewalɛ koni ‘amɛtswa Maŋtsɛ lɛ kɛ emaŋtsɛyeli lɛ he adafi.’ Enɛ ye ebua ayemforo kuu lɛ mlibii ni eshwɛ lɛ ni amɛfɔ̃ mɛi babaoo nine. Yɛ afi 1929 lɛ, aŋma sane ko ni yitso ji “Ninefɔɔ ni Ji Duromɔ” yɛ March 15 Blɔfo Buu-Mɔɔ lɛ mli, ni sane nɛɛ damɔ Kpojiemɔ 22:17 lɛ nɔ. Sane lɛ fã ko kɛɛ akɛ: “Shwɛɛnii anɔkwafoi akuu lɛ fataa [Ŋwɛinyo lɛ] he ni amɛkɛ ninefɔɔ ni ji duromɔ lɛ haa mɛi, ni amɛkɛɔ akɛ, ‘Ba.’ Esa akɛ ajaje shɛɛ sane nɛɛ aha mɛi ni sumɔɔ jalɛ kɛ anɔkwale lɛ. Esa akɛ afee enɛ bianɛ.” Ayemforo kuu lɛ etee nɔ efɔ̃ mɛi nine nɛɛ aahu kɛbashi ŋmɛnɛ.
“Mɔ ni Nuɔ lɛ, Ha ni Ekɛɛ: Ba!”
9, 10. Mɛɛ gbɛ nɔ afɔ̃ɔ mɛi ni nuɔ ninefɔɔ akɛ “Ba!” lɛ nine koni amɛ hu amɛkɛɛ “Ba”?
9 Mɛni esa akɛ mɛi ni nuɔ ninefɔɔ akɛ “ba” lɛ afee? Afɔ̃ɔ amɛ nine koni amɛ hu amɛkɛɛ, “Ba!” Ákɛ nɔkwɛmɔnɔ lɛ, aŋma yɛ August 1, 1932 Blɔfo Buu-Mɔɔ lɛ baafa 232 lɛ mli akɛ: “Esa akɛ mɛi ni afɔ amɛ mu lɛ awo mɛi fɛɛ ni miisumɔ akɛ amɛfata he ni ashiɛ maŋtsɛyeli lɛ he sanekpakpa lɛ hewalɛ. Ehe ehiaaa ni amɛtsɔmɔ mɛi ni Nuŋtsɔ lɛ efɔ amɛ mu dani amɛshiɛ Nuŋtsɔ lɛ shɛɛ sane lɛ. Yehowa odasefoi náa he tsui waa akɛ amrɔ nɛɛ lɛ, amɛná amɛle akɛ aŋmɛɔ amɛ gbɛ koni amɛkɛ wala nu lɛ ayaha gbɔmɛi akuu ko ni baanyɛ afo Harmagedon ní aha amɛ naanɔ wala yɛ shikpɔŋ lɛ nɔ lɛ.”
10 August 15, 1934 Blɔfo Buu-Mɔɔ lɛ baafa 249 lɛ tsɔɔ sɔ̃ ni kã mɛi ni nuɔ ninefɔɔ ni ji “Ba!” lɛ anɔ lɛ mli akɛ: “Eyɛ mli akɛ Yonadab kuu lɛ jeee Yehowa odasefoi ni afɔ amɛ mu moŋ, shi esa akɛ amɛfata Yehu kuu ni damɔ shi kɛha mɛi ni afɔ amɛ mu lɛ ahe kɛtswa maŋtsɛyeli shɛɛ sane lɛ he adafi.” Yɛ afi 1935 lɛ, abayɔse mɛi ni ji “asafo babaoo” ni atsĩ amɛtã yɛ Kpojiemɔ 7:9-17 lɛ faŋŋ. Enɛ ha akɛ ekãa babaoo tsu Nyɔŋmɔ nitsumɔ ni akɛfɔ̃ɔ mɛi nine lɛ. Kɛjɛ nakai beaŋ kɛbaa nɛɛ, anɔkwa jálɔi ní amrɔ nɛɛ amɛyi fa fe akpekpei kpawo, ni ji asafo babaoo ni amɛyibɔ lɛ miiya nɔ eefa lɛ, ekpɛlɛ ninefɔɔ nɛɛ nɔ. Akɛni amɛnu shɛɛ sane lɛ, ni amɛhiɛ esɔ enɛ waa hewɔ lɛ, amɛjɔɔ amɛhe nɔ amɛha Nyɔŋmɔ, abaptisi amɛ, ni amɛfataa ayemforo kuu lɛ he ni amɛkɛ ekãa fɔ̃ɔ mɛi krokomɛi nine koni ‘amɛba ni amɛbanu wala nu lɛ yaka.’
“Mumɔ lɛ” Kɛɔ akɛ, “Ba!”
11. Te mumɔ krɔŋkrɔŋ lɛ ná shiɛmɔ nitsumɔ lɛ nɔ hewalɛ eha tɛŋŋ yɛ klɛŋklɛŋ afii 100 Ŋ.B.?
11 Beni Yesu shiɛɔ yɛ kpeehe ko ni yɔɔ Nazaret lɛ, egbele gbalɔ Yesaia wolokpo lɛ ni ekane akɛ: “Nuŋtsɔ [Yehowa] Mumɔ lɛ yɛ minɔ, no hewɔ lɛ efɔ mi mu, koni mijaje sanekpakpa lɛ mitsɔɔ ohiafoi; etsu mi koni mibatsá mɛi ní amɛtsui ekumɔ lɛ, koni mishiɛ heyeli mitsɔɔ nomii lɛ, kɛ hiŋmɛigbelemɔ ha shwilafoi, koni miŋmɛɛ pilafoi lɛ ahe ní amɛye amɛhe, ní mishiɛ afi ko ni sa Nuŋtsɔ [Yehowa] hiɛ.” No sɛɛ lɛ, Yesu kɛɛ akɛ: “Ŋmɛnɛ ŋmalɛ nɛɛ eba mli yɛ nyɛtoiiaŋ,” ni ekɛtsɔɔ akɛ nakai wiemɔi lɛ kɔɔ ehe. (Luka 4:17-21) Dani Yesu baashi kɛya ŋwɛi lɛ, ekɛɛ ekaselɔi lɛ akɛ: “Kɛ Mumɔ krɔŋkrɔŋ lɛ ná ba nyɛnɔ lɛ, nyɛaaná hewalɛ ni nyɛaatsɔmɔ midasefoi . . . kɛyashi shikpɔŋ lɛ naagbeehei lɛ.” (Bɔf. 1:8) Mumɔ krɔŋkrɔŋ lɛ ná shiɛmɔ nitsumɔ ni atsu yɛ klɛŋklɛŋ afii 100 lɛ mli lɛ nɔ hewalɛ waa.
12. Te Nyɔŋmɔ mumɔ lɛ náa nine ni afɔ̃ɔ adesai ŋmɛnɛ lɛ nɔ hewalɛ tɛŋŋ?
12 Te Nyɔŋmɔ mumɔ krɔŋkrɔŋ lɛ náa nine ni afɔ̃ɔ adesai ŋmɛnɛ lɛ nɔ hewalɛ tɛŋŋ? Mumɔ krɔŋkrɔŋ lɛ jɛ Yehowa ŋɔɔ. Ekɛ mumɔ lɛ tsuɔ nii kɛgbeleɔ ayemforo kuu lɛ mlibii lɛ atsuiiaŋ kɛ amɛjwɛŋmɔŋ koni amɛnu e-Wiemɔ ni ji Biblia lɛ shishi. Mumɔ lɛ kanyaa amɛ koni amɛfɔ̃ mɛi anine ní amɛgbála Ŋmalɛ mli anɔkwalei lɛ amli amɛha mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ Paradeiso yɛ shikpɔŋ lɛ nɔ lɛ. Ni te mumɔ lɛ náa mɛi ni kpɛlɛɔ ninefɔɔ lɛ nɔ ní amɛbatsɔmɔɔ Yesu Kristo kaselɔi ní amɛ hu amɛfɔ̃ɔ mɛi krokomɛi nine lɛ nɔ hewalɛ tɛŋŋ? Mumɔ lɛ náa amɛ hu amɛnɔ hewalɛ. Akɛni abaptisi amɛ yɛ “Mumɔ krɔŋkrɔŋ lɛ gbɛ́i amli” hewɔ lɛ, amɛkpɛlɛɔ ni mumɔ lɛ tsɔɔ amɛ gbɛ, ni amɛkɛ amɛhe fɔ̃ɔ nɔ kɛha yelikɛbuamɔ. (Mat. 28:19) Susumɔ shɛɛ sane ni mɛi ni afɔ amɛ mu lɛ kɛ asafo babaoo ni yi faa daa lɛ shiɛɔ lɛ hu he okwɛ. Shɛɛ sane lɛ jɛ Biblia lɛ, ni ji wolo ni Nyɔŋmɔ mumɔ lɛ tsirɛ mɛi koni amɛŋma lɛ mli. Belɛ, amɛtsɔɔ mumɔ krɔŋkrɔŋ lɛ nɔ amɛfɔ̃ɔ mɛi nine. Yɛ anɔkwale mli lɛ, mumɔ lɛ kudɔɔ wɔ. Te esa akɛ enɛ aná bɔ ni wɔtsuɔ ninefɔɔ nitsumɔ lɛ wɔhaa lɛ nɔ hewalɛ eha tɛŋŋ?
‘Amɛyaa Nɔ Amɛkɛɔ akɛ: Ba!’
13. Mɛni wiemɔ ni ji “mumɔ lɛ kɛ ayemforo lɛ yaa nɔ amɛkɛɔ akɛ: ‘Ba!’” lɛ tsɔɔ?
13 “Mumɔ lɛ kɛ ayemforo lɛ” ekɛɛɛ kɛkɛ akɛ, “Ba!” Hela wiemɔ ni akɛtsu nii lɛ tsɔɔ nɔ ko ni ayaa nɔ afeɔ daa. No hewɔ ni New World Translation lɛ kɛɛ akɛ: “Mumɔ lɛ kɛ ayemforo lɛ yaa nɔ amɛkɛɔ akɛ: ‘Ba!’” lɛ. Enɛ tsɔɔ akɛ esa akɛ wɔya nɔ wɔtsu ninefɔɔ nitsumɔ ni Nyɔŋmɔ kɛwo wɔdɛŋ lɛ daa. Ni mɛi ni nuɔ ní amɛkpɛlɛɔ ninefɔɔ lɛ nɔ lɛ hu? Amɛ hu amɛkɛɔ akɛ, “Ba!” Awie anɔkwa jálɔi ni ji asafo babaoo lɛ he akɛ ‘amɛjáa Yehowa nyɔɔŋ kɛ shwane yɛ esɔlemɔtsu lɛ mli.’ (Kpoj. 7:9, 15) Mɛɛ shishinumɔ naa ‘amɛjáa Yehowa nyɔɔŋ kɛ shwane?’ (Nyɛkanea Luka 2:36, 37; Bɔfoi lɛ Asaji 20:31; 2 Tesalonikabii 3:8.) Nɔ ni gbalɔ yoo Hana ni egbɔ naakpa lɛ kɛ bɔfo Paulo fee yɛ amɛshihilɛ mli lɛ haa wɔnaa akɛ ‘Yehowa ni aaajá nyɔɔŋ kɛ shwane’ lɛ biɔ ni aya nɔ akɛ mɔdɛŋbɔɔ atsu sɔɔmɔ nitsumɔ lɛ daa.
14, 15. Mɛɛ gbɛ nɔ Daniel tsɔ eha ana akɛ ehe miihia ni aya nɔ ajá Nyɔŋmɔ daa?
14 Gbalɔ Daniel hu ha ana akɛ ehe miihia ni aya nɔ ajá Nyɔŋmɔ daa. (Nyɛkanea Daniel 6:5-11, 17.) Etsakeee bɔ ni efeɔ ejáa Nyɔŋmɔ lɛ nyɔɔŋ kome po—esɔleɔ ehaa Nyɔŋmɔ “shii etɛ daa gbi”—eyɛ mli moŋ akɛ nakai feemɔ baaha ashɛ lɛ afɔ̃ jatai abu mli. Enifeemɔi ha efee faŋŋ kɛha mɛi akɛ Yehowa ni aaajá daa lɛ he miihia fe nɔ fɛɛ nɔ!—Mat. 5:16.
15 Beni Daniel ye jenamɔ yɛ jatai abu lɛ mli lɛ, maŋtsɛ lɛ diɛŋtsɛ tee bu lɛ naa ni ewó enaa nɔ ekɛɛ akɛ: “Daniel, Nyɔŋmɔ hiɛkalɔ lɛ tsulɔ, ani o-Nyɔŋmɔ lɛ ní osɔmɔɔ lɛ daa lɛ, enyɛo ejie yɛ jatai lɛ adɛŋ lo?” Kɛkɛ ni Daniel here nɔ ekɛɛ: “Maŋtsɛ, oyi aná wala kɛya naanɔ! Mi-Nyɔŋmɔ lɛ etsu ebɔfo, ni ebaŋamɔ jatai lɛ anaabui, ni amɛyeko mi awui ko, ejaakɛ ehiɛ lɛ ana akɛ miye bem, ni bo maŋtsɛ hu ohiɛ lɛ mifeko efɔŋ ko.” Yehowa jɔɔ Daniel akɛni esɔmɔ lɛ “daa” lɛ hewɔ.—Dan. 6:20-23.
16. Mɛɛ saji esa akɛ Daniel nɔkwɛmɔnɔ lɛ aha wɔbi wɔhe yɛ bɔ ni wɔkɛ wɔhe woɔ shiɛmɔ nitsumɔ lɛ mli lɛ he?
16 Daniel miisumɔ ni egbo moŋ fe nɔ ni eeefo jamɔ ni ejáa Nyɔŋmɔ daa lɛ mli. Ni wɔ hu? Mɛɛ nibii wɔkɛshãa afɔle loo wɔsumɔɔ akɛ wɔkɛshã afɔle bɔni afee ni wɔnyɛ wɔya nɔ wɔjaje Nyɔŋmɔ Maŋtsɛyeli lɛ he sanekpakpa lɛ daa? Esaaa kwraa akɛ wɔhaa nyɔɔŋ kome hoɔ ní wɔshiɛko Yehowa he sane wɔhako mɛi! Kɛ́ eeehi lɛ, esa akɛ wɔbɔ mɔdɛŋ wɔkɛ wɔhe awo shiɛmɔ nitsumɔ lɛ mli daa otsi, aloo jeee nakai? Kɛ́ wɔhe miiye waa loo wɔgbɔ kotokoto ni minitii 15 pɛ wɔbaanyɛ wɔkɛshiɛ yɛ nyɔɔŋ lɛ mli po lɛ, esa akɛ wɔbu enɛ he akɔntaa. Mɛni hewɔ? Ejaakɛ wɔmiisumɔ ni wɔfata mumɔ lɛ kɛ ayemforo lɛ he kɛya nɔ wɔkɛɛ akɛ, “Ba!” Hɛɛ, wɔmiisumɔ ni wɔfee bɔ fɛɛ bɔ ni wɔɔnyɛ koni wɔya nɔ wɔshiɛ Maŋtsɛyeli lɛ daa.
17. Mɛɛ hegbɛi ni wɔnáa akɛ wɔɔha mɛi nine ashɛ Yehowa ninefɔɔ lɛ nɔ esaaa akɛ wɔhaa eŋmɛɔ wɔ?
17 Esa akɛ wɔbɔ mɔdɛŋ wɔkɛ hegbɛ fɛɛ hegbɛ ni wɔbaaná lɛ atsu nii ni wɔkɛha mɛi anine ashɛ Yehowa ninefɔɔ lɛ nɔ, ni jeee be ni wɔkɛyaa shiɛmɔ lɛ pɛ kɛkɛ esa akɛ wɔfee nakai? Eji hegbɛ kpele ni wɔná akɛ wɔɔfɔ̃ mɛi ni kumai yeɔ amɛ lɛ nine koni ‘amɛba ni amɛbayɛ wala nu lɛ yaka’ yɛ bei krokomɛi amli, tamɔ kɛ́ wɔtee jara nɔ, wɔmiifã gbɛ, wɔtee hejɔɔmɔ, wɔmiitsu nii, loo wɔmiiya skul! Kɛ́ maŋ nɔyelɔi lɛ tsĩ shiɛmɔ nitsumɔ lɛ naa po lɛ, wɔyaa nɔ wɔkɛ hiɛshikamɔ shiɛɔ—ekolɛ wɔshiɛŋ yɛ shĩa fɛɛ shĩa ni yɔɔ shikpɔŋkuku ko mli lɛ mli yɛ gbi kome mli, loo wɔbaaye trukaa odase babaoo fe tsutsu lɛ.
Yaa Nɔ Kɛɔ akɛ, “Ba!”
18, 19. Mɛni ofeɔ kɛtsɔɔ akɛ obuɔ hegbɛ ni oná akɛ oji Nyɔŋmɔ hefatalɔ nitsulɔ lɛ waa?
18 Kɛbashi amrɔ nɛɛ, mumɔ lɛ kɛ ayemforo lɛ kɛ nɔ ni fa fe afii 90 ekɛɛ mɛi ni wala nu kumai yeɔ amɛ lɛ akɛ, “Ba!” Ani okpɛlɛ amɛninefɔɔ ni yɔɔ miishɛɛ lɛ nɔ? Belɛ, wɔmiiwo bo hewalɛ ni bo hu ofɔ̃ mɛi krokomɛi nine.
19 Wɔleee be ni Yehowa ninefɔɔ ni tsɔɔ suɔmɔ lɛ baaba naagbee, shi ninefɔɔ lɛ nɔ ni wɔkpɛlɛɔ kɛtsɔ kɛɛmɔ ni wɔkɛɔ akɛ, “Ba!” lɛ nɔ lɛ haa wɔbatsɔmɔɔ Nyɔŋmɔ hefatalɔi nitsulɔi. (1 Kor. 3:6, 9) Eji hegbɛ kpele diɛŋtsɛ! Nyɛhaa wɔtsɔa akɛ wɔbuɔ nakai hegbɛ lɛ waa, ní ‘wɔkɛ yijiemɔ afɔle aha Nyɔŋmɔ daa’ kɛtsɔ shiɛmɔ ni wɔɔshiɛ daa lɛ nɔ. (Heb. 13:15) Nyɛhaa wɔ mɛi ni wɔyɔɔ hiɛnɔkamɔ akɛ wɔbaahi shikpɔŋ lɛ nɔ lɛ afata ayemforo kuu lɛ he kɛya nɔ kɛkɛɛ akɛ, “Ba!” Ni eba akɛ mɛi babaoo ‘aaabanu wala nu lɛ yaka’!
Mɛni Okase?
• Namɛi afɔ̃ɔ amɛ nine akɛ “ba” lɛ?
• Mɛni hewɔ abaanyɛ akɛɛ akɛ Yehowa ni to ninefɔɔ akɛ “ba” lɛ shishi lɛ?
• Mɛɛ gbɛ nɔ mumɔ krɔŋkrɔŋ lɛ yeɔ ebuaa ni anyɛɔ afɔ̃ɔ mɛi nine akɛ “ba”?
• Mɛni hewɔ esa akɛ wɔbɔ mɔdɛŋ ni wɔkɛ wɔhe awo shiɛmɔ nitsumɔ lɛ mli daa lɛ?
[Nikasemɔ lɛ he Sanebimɔi]
[Akrabatsa/Mfonirii ni yɔɔ baafa 16]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Yaa Nɔ Kɛɔ akɛ, “Ba!”
1914
Shiɛlɔi 5,100
1918
Mɛi babaoo baaná wala yɛ Paradeiso yɛ shikpɔŋ lɛ nɔ
1922
“Nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi”
1929
Shwɛɛnii anɔkwafoi lɛ kɛɔ akɛ, “Ba!”
1932
Akɛɛ mɛi krokomɛi ni jeee mɛi ni afɔ amɛ mu akɛ amɛkɛɛ akɛ, “Ba!”
1934
Afɔ̃ Yonadab kuu lɛ nine ni amɛshiɛ
1935
Ayɔse mɛi ni ji “asafo babaoo” lɛ
2009
Shiɛlɔi 7,313,173