Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Ani abaatee abifao ni gbo yɛ enyɛ musuŋ dani afɔ lɛ lɛ shi?

Wala jeɔ shishi yɛ hɔŋɔɔ mli. Ekɔɔɔ he eko he ni mɔ ko da kɛshɛ dani egbo lɛ, Yehowa baanyɛ atee lɛ shi, ejaakɛ “aaanyɛ nii fiaa afee yɛ Nyɔŋmɔ gbɛfaŋ.” (Mar. 10:27) Shi Biblia lɛ ekɛko nɔ ko tɛ̃ɛ ni tsɔɔ akɛ Nyɔŋmɔ baatee gbekɛbii ni gboi yɛ amɛnyɛmɛi amusuŋ lɛ ashi loo eteŋ amɛ shi.—4/15, baafa 12, 13.

• Mɛni hewɔ kɛ́ wɔkwɛ tsatsubii, afutuɔkɔi, baalabii, kɛ tsũnyɛ lɛ wɔbaanyɛ wɔkase nii kɛjɛ amɛŋɔɔ lɛ?

Kooloi ejwɛ nɛɛ le nii pam kɛjɛ amɛbɔɔ mli. No hewɔ lɛ amɛhaa anaa akɛ Nyɔŋmɔ nilee lɛ mli kwɔ. (Abɛi 30:24-28)—4/15, baafa 16-19.

• Ani Yesu ji Nyɔŋmɔ Ofe lɛ?

Bɔfo Paulo kaiɔ wɔ akɛ, “Kristo yitso ji Nyɔŋmɔ.” (1 Korintobii 11:3) Biblia lɛ kɛɔ akɛ wɔsɛɛ “beni aŋɔ nii fɛɛ ato bi lɛ shishi lɛ, no lɛ lɛ diɛŋtsɛ hu eeeŋɔ ehe eto mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.” (1 Kor. 15:28) Eyɛ faŋŋ akɛ, Yesu jeee Nyɔŋmɔ Ofe. No hewɔ ni etsɛ́ e-Tsɛ lɛ akɛ “mi-Nyɔŋmɔ” lɛ. (Kpoj. 3:2, 12; 2 Kor. 1:3,4)—4/1, baafa 7.

• Mɛni hewɔ Biblia lɛ wie dioofeemɔ he yɛ gbɛ kpakpa nɔ lɛ?

Biblia lɛ tsɔɔ akɛ dioofeemɔ ji bulɛ kpojiemɔ he okadi, eyeɔ ebuaa kɛha sane nɔjwɛŋmɔ, ni eyeɔ odase akɛ wɔyɛ hiɛshikamɔ kɛ sɛɛyoomɔ. (Lala 37:7; 63:7; Abɛi 11:12)—5/15, baafa 3-5.

• Mɛɛ yiŋtoi komɛi ahewɔ esa akɛ wɔshe Nyɔŋmɔ gbeyei shi jeee gbɔmɔ lɛ?

Yiŋtoi nɛɛ ekomɛi ji akɛ Yehowa ji Ofe ni ebaaye ebua wɔ ni ebu wɔhe. Agbɛnɛ hu Nyɔŋmɔ sumɔɔ mɛi ni tsiɔ amɛbɛŋkɛɔ lɛ lɛ. Wɔmiisumɔ akɛ wɔjie hiɛsɔɔ kpo yɛ nibii kpakpai ni efee ehaa wɔ lɛ ahewɔ. (Yak. 1:17; Lala 40:6) Kɛ́ wɔfi shi shiŋŋ lɛ mɛi ni teɔ shi woɔ wɔ lɛ ateŋ mɛi komɛi baanyɛ atsake. (1 Tim. 1:13)—4/1, baafa 13, 14.

• Yuda maŋtsɛmɛi enyiɛ ahiɛ dɔ Nyɔŋmɔ we lɛ he?

Maŋtsɛmɛi 19 ye wuoyigbɛ maŋtsɛyeli ni yɔɔ Yuda lɛ nɔ, ni amɛteŋ mɛi 4 ní hiɛ dɔ Nyɔŋmɔ we lɛ he lɛ ji Asa, Yehoshafat, Hezekia, kɛ Yosia.—6/15, baafa 7-11.

• Ani Kristofoi ni afɔ amɛ mu ni yɔɔ shikpɔŋ lɛ nɔ lɛ fɛɛ náa gbɛfaŋnɔ yɛ mumɔŋ niyenii lɛ kɛhamɔ mli?

Dabi. Mɛi ni akɛ Nyɔŋmɔ mumɔ lɛ efɔ amɛ mu lɛ ji mɛi ni feɔ tsulɔ anɔkwafo kɛ nilelɔ kuu lɛ, shi amɛteŋ mɛi ni yɔɔ Nɔyeli Kuu lɛ mli lɛ pɛ ji mɛi ni kɛ mumɔŋ niyenii lɛ haa.—6/15, baafa 22-24.

• Te ooofee tɛŋŋ osaa obi oblanyo loo oblayoo oto naagbai ni ekɛbaakpe beni eetsɔɔ onukpa lɛ?

Bɔni afee ni osaa obi oblanyo loo oblayoo oto kɛha onukpatsɔmɔ lɛ, esa akɛ oye obua lɛ ni lɛ diɛŋtsɛ enyɛ ekɛ ‘ejwɛŋmɔ’ atsu nii kɛkpɛ yiŋ kpakpai. (Abɛi 1:4) Obaanyɛ okɛ Biblia mli shishitoo mlai lɛ atsu nii jogbaŋŋ kɛye obua lɛ koni efee nɔ ni ja, ekpɛ yiŋ ni ja beni ebatsɔ onukpa lɛ, ni ekafee nibii gbohii ni baaha ená naagbai. (Fili. 4:5; Gal. 6:7; Kol. 3:21) Biblia mli shishitoo mlai ji shishitoo nɔ ni hi jogbaŋŋ ni obaanyɛ otswa oweku lɛ oma nɔ koni miishɛɛ ahi mli.—7/1, baafa 29, 30.

• Mɛni hewɔ abaanyɛ akɛɛ akɛ suɔmɔ kpo ni Yesu jie lɛ ha esoro lɛ kwraa yɛ jamɔŋ hiɛnyiɛlɔi lɛ ahe lɛ?

Jamɔŋ hiɛnyiɛlɔi lɛ ebuuu mɛi ni bɛ gbɛnaa ko lɛ, beaŋ moŋ ni kulɛ esa akɛ amɛná suɔmɔ amɛha amɛ lɛ. Agbɛnɛ hu amɛsumɔɔɔ Nyɔŋmɔ. Yesu sumɔɔ e-Tsɛ lɛ, ni emusuŋ tsɔ lɛ yɛ mɛi lɛ ahewɔ. (Mat. 9:36) Ejie mɔ hedɔɔ, musuŋtsɔlɛ, kɛ mlihilɛ kpo etsɔɔ amɛ.—7/15, baafa 15.

• Ani eji mɔ aŋkro yiŋkpɛɛ akɛ afɔ lɛ ehee?

Yesu wiemɔi ni yɔɔ Yohane 3:7 lɛ tsɔɔ akɛ mɔ aŋkro diɛŋtsɛ nyɛŋ ahala akɛ afɔ lɛ ehee. Ejaakɛ Hela wiemɔ ni atsɔɔ shishi akɛ ‘ajɛ ŋwɛi afɔ lɛ’ lɛ tsɔɔ akɛ fɔmɔ hee lɛ jɛɔ ‘Tsɛ lɛ ŋɔɔ.’ (1 Yohane 3:9; Yakobo 1:17) Taakɛ bɔ ni ofɔlɔi hala akɛ amɛbaafɔ bo shi jeee bo diɛŋtsɛ oyiŋkpɛɛ ni lɛ, nakai nɔŋŋ ja wɔŋwɛi Tsɛ lɛ efɔ wɔ ehee dani wɔbaanyɛ wɔbatsɔmɔ mɛi ni afɔ amɛ ehee. (Yohane 1:13; 1 Petro 1:3)—7/1, baafa 5, 6.