Hetoo Ní Yehowa Ha Sɔlemɔ Ko Ni Jɛ Tsuiŋ Lɛ
Hetoo Ní Yehowa Ha Sɔlemɔ Ko Ni Jɛ Tsuiŋ Lɛ
“Koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”—LALA 83:19.
1, 2. Mɛɛ niiashikpamɔ mɛi pii ená, ni mɛɛ saji wɔbaanyɛ wɔbi?
AFII komɛi ni eho nɛ lɛ, yoo ko haoɔ waa yɛ oshara ko ni ba ekutso mli lɛ hewɔ. Akɛni afɔ́ lɛ awo Roma Katolik sɔlemɔ lɛ mli hewɔ lɛ, etee amɛsɔfo lɛ ŋɔɔ kɛha yelikɛbuamɔ, shi osɔfo lɛ emiii nɔ akɛ ekɛ lɛ aaawie po. No hewɔ lɛ, esɔle eha Nyɔŋmɔ akɛ: “Mileee mɔ ni oji . . . , shi mile akɛ oyɛ. Ofainɛ, ha male bo!” No sɛɛ etsɛɛɛ lɛ, Yehowa Odasefoi tee eŋɔɔ, ni amɛshɛje emii ni amɛtsɔɔ lɛ nɔ ni etaoɔ ele lɛ. Amɛtsɔɔ lɛ nibii babaoo, ni eko ji akɛ Nyɔŋmɔ yɛ gbɛi, ni no ji Yehowa. Enɛ ni ená ele lɛ ta etsuiŋ waa. Ekɛɛ akɛ: “Mɛɛ naakpɛɛ sane nɛ, Nyɔŋmɔ nɛɛ ji mɔ ni mishwe kɛjɛ migbekɛbiiashi tɔŋŋ akɛ male lɛ lɛ!”
2 Mɛi pii ená niiashikpamɔ ni tamɔ nɛkɛ. Bei pii lɛ, klɛŋklɛŋ be ni amɛna Yehowa gbɛi lɛ ji beni amɛkane Lala 83:19 lɛ kɛjɛ Biblia lɛ mli lɛ. Jɛmɛ kaneɔ akɛ: “Koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” Shi ani osusu nɔ hewɔ ni aŋma Lala 83 lɛ he pɛŋ? Mɛɛ nifeemɔi baaha mɔ fɛɛ mɔ akpɛlɛ nɔ akɛ Yehowa pɛ ji anɔkwa Nyɔŋmɔ? Mɛni wɔbaanyɛ wɔkase kɛjɛ lala nɛɛ mli? Wɔbaasusu sanebimɔi nɛɛ ahe yɛ nikasemɔ nɛɛ mli. *
Atee Yehowa Webii Ayi Nɔ Apam
3, 4. Namɔ fo Lala 83 lɛ, ni mɛɛ hegbeyeiwoo he ewie?
3 Lala 83:1 lɛ tsɔɔ akɛ Lala 83 lɛ ji “Asaf lala ní ela.” Eeenyɛ efee akɛ Levinyo Asaf ni ji lalafolɔ kpanaa ní hi shi yɛ Maŋtsɛ David nɔyeli beaŋ lɛ seshinyo ji mɔ ni fo lala nɛɛ. Lalatsɛ lɛ kpa Yehowa fai yɛ lala lɛ mli akɛ etsu saji ahe nii ní ekɛha E-nɔyeli lɛ adamɔ shi shiŋŋ, ní eha ale E-gbɛi lɛ. Ekã shi faŋŋ akɛ afo lala nɛɛ yɛ Salomo gbele sɛɛ. Mɛni hewɔ wɔkɛɔ nakai? Ejaakɛ yɛ David kɛ Salomo nɔyeli beaŋ lɛ, Tiro maŋtsɛ lɛ jeee Israelbii lɛ ahenyɛlɔ. Beni afo Lala 83 lɛ, no mli lɛ Tirobii lɛ etsɔmɔ amɛhiɛ amɛwo Israelbii lɛ, ni amɛkɛ Israelbii lɛ ahenyɛlɔi eyafee ekome.
4 Lalatsɛ lɛ tsĩ maji nyɔŋma ní amɛtee Nyɔŋmɔ webii lɛ ayinɔ apam koni amɛkpãta amɛhiɛ lɛ atã. Nakai maji ní nyɛ̃ɔ Israelbii lɛ bɛŋkɛ Israel maŋ lɛ, ni amɛji: “Edom buui lɛ kɛ Ishmaelbii lɛ, Moab kɛ Hagarbii lɛ, Gebal kɛ Amon kɛ Amalek, Filistia kɛ Tirobii lɛ hu; Ashur hu fata amɛhe.” (Lala 83:7-9) Mɛɛ yinɔsane mli nifeemɔi ahe lala lɛ wieɔ lɛ? Mɛi komɛi kɛɔ akɛ lala lɛ miiwie ekome ni Amon, Moab, kɛ Seir Gɔŋ lɛ nɔ bii lɛ fee koni amɛtutua Israel yɛ Yehoshafat gbii lɛ amli lɛ he. (2 Kron. 20:1-26) Mɛi krokomɛi hu kɛɔ akɛ lala lɛ miiwie shiteekɛwoo ni Israelbii lɛ kɛkpe kɛjɛ maji ni ebɔle amɛ lɛ adɛŋ yɛ yinɔsane be fɛɛ mli lɛ he.
5. Ŋmɛnɛ, mɛɛ sɛɛ Kristofoi náa kɛjɛɔ Lala 83 lɛ mli?
5 Bɔ fɛɛ bɔ ni sane lɛ ji lɛ, eyɛ faŋŋ akɛ Yehowa Nyɔŋmɔ ha ajɛ mumɔŋ aŋma lala nɛɛ beni emaŋ lɛ eyaje oshara mli. Lala lɛ hu woɔ Nyɔŋmɔ tsuji ni yɔɔ ŋmɛnɛ ní henyɛlɔi ní etswa amɛfai shi akɛ amɛbaakpata amɛhiɛ lɛ etutua amɛ yɛ be fɛɛ mli lɛ hewalɛ. Ni ekã shi faŋŋ akɛ ebaawaje wɔ yɛ wɔsɛɛ be mli beni Gog ni yɔɔ Magog lɛ buaa etai lɛ anaa koni amɛka nɔ ni ji naagbee nɔ̃ akɛ amɛkpãta mɛi fɛɛ ni jáa Nyɔŋmɔ yɛ mumɔ kɛ anɔkwale mli lɛ ahiɛ lɛ.—Nyɛkanea Ezekiel 38:2, 8, 9, 16.
Nɔ̃ Titri ni Kã Lalatsɛ lɛ Tsui Nɔ
6, 7. (a) Mɛni ji nibii ni lalatsɛ lɛ sɔle yɛ he yɛ Lala 83:2-4, 6 lɛ? (b) Mɛni ji nɔ̃ titri ni kã lalatsɛ lɛ tsui nɔ?
6 Bo nɔ ni lalatsɛ lɛ jɛ etsui mli esɔle ekɛɛ lɛ toi: “Naanyɔŋmɔ, kaafee dioo, kaabu onaa ni kaafee kpoo, Mawu! Ejaakɛ ohenyɛlɔi lɛ miifee hoo, ni mɛi ni he tsɛ̃ɔo lɛ ehole amɛyitsei anɔ. Amɛyaa omaŋ lɛ yinɔ ajina yɛ ŋaa mli . . . Ejaakɛ amɛkɛ gbee kome etee ajina, ni amɛkpaŋ oyi nɔ.”—Lala 83:2-4, 6.
7 Mɛni ji nɔ̃ titri ni kã lalatsɛ lɛ tsui nɔ? Eji anɔkwale akɛ, ehao waa yɛ bɔ ni ekɛ eweku lɛ aaafee amɛhi shi shweshweeshwe lɛ he. Ni kɛlɛ, nɔ̃ titri hewɔ ni esɔle lɛ kɔɔ ahora ni abɔɔ Yehowa gbɛi lɛ, kɛ Yehowa maŋ lɛ ní henyɛlɔi miitao amɛkpãta hiɛ lɛ he. Nyɛhaa wɔ fɛɛ wɔnáa jwɛŋmɔ ni tamɔ nakai nɔŋŋ be mli ni wɔmiaa wɔhiɛ yɛ jeŋ nɛɛ naagbee gbii ni jaraa nɛɛ mli.—Nyɛkanea Mateo 6:9, 10.
8. Mɛni hewɔ jeŋmaji lɛ kpaŋ Israelbii lɛ ayi nɔ lɛ?
8 Lalatsɛ lɛ tsɔɔ akɛ Israel henyɛlɔi lɛ kɛɔ akɛ: “Nyɛbaa, ni wɔbatua amɛ ní amɛkafee maŋ dɔŋŋ, ni akakai Israel gbɛi lɛ dɔŋŋ!” (Lala 83:5) Eyɛ faŋŋ akɛ nakai jeŋmaji lɛ ahe tsɛ̃ɔ Nyɔŋmɔ webii ni ehala lɛ! Shi yiŋtoo kroko hu hewɔ amɛkpaŋ amɛyi nɔ lɛ. Amɛhiɛ kɔ̃ Israel shikpɔŋ lɛ nɔ, ni amɛshi amɛtsitsi akɛ: “Nyɛhaa wɔŋɔa Nyɔŋmɔ shihilɛhei lɛ wɔfea wɔnii!” (Lala 83:13) Ani nɔ ko ni tamɔ nakai etee nɔ yɛ wɔbei nɛɛ amli? Hɛɛ!
“Oshihilɛhe Krɔŋkrɔŋ Lɛ”
9, 10. (a) Yɛ blema lɛ, mɛni ji Nyɔŋmɔ shihilɛhe krɔŋkrɔŋ lɛ? (b) Mɛɛ jɔɔmɔi mɛi ni afɔ amɛ mu lɛ ateŋ shwɛɛnii lɛ kɛ “tooi krokomɛi” lɛ náa ŋmɛnɛ?
9 Yɛ blema lɛ, atsɛɔ Shiwoo Shikpɔŋ lɛ akɛ Nyɔŋmɔ shihilɛhe krɔŋkrɔŋ. Kaimɔ kunimyeli lala ni Israelbii lɛ lá beni akpɔ̃ amɛ kɛjɛ Mizraim lɛ: “Omlihilɛ naa okpala nɛkɛ maŋ ni okpɔ̃ nɛɛ, okɛ ohewalɛ lɛ tsɔɔ amɛ gbɛ kɛtee oshihilɛhe krɔŋkrɔŋ lɛ.” (2 Mose 15:13) Sɛɛ mli lɛ, Yerusalem batsɔ ‘shihilɛhe’ nɛɛ maŋtiase, ni amã sɔlemɔtsu ní osɔfoi sɔmɔɔ yɛ mli yɛ jɛmɛ, ni maŋtsɛmɛi ni jɛ David weku lɛ mli lɛ ta Yehowa sɛi lɛ nɔ amɛye maŋtsɛ. (1 Kron. 29:23) No hewɔ ni Yesu tsɛ́ Yerusalem akɛ “maŋtsɛ agbo lɛ maŋ” lɛ.—Mat. 5:35.
10 Ni yɛ wɔbei nɛɛ amli hu? Yɛ afi 33 Ŋ.B. lɛ, ato maŋ hee ni ji “Nyɔŋmɔ Israel lɛ.” (Gal. 6:16) Nɛkɛ maŋ nɛɛ ní damɔ shi kɛha Yesu Kristo nyɛmimɛi ni afɔ amɛ mu lɛ enyɛ amɛye Nyɔŋmɔ gbɛi lɛ he odase, eyɛ mli akɛ heloonaa Israel nyɛɛɛ afee nakai. (Yes. 43:10; 1 Pet. 2:9) Yehowa wo amɛ shi tamɔ bɔ ni ewo blema Israel shi lɛ nɔŋŋ akɛ: “Matsɔ amɛ-Nyɔŋmɔ, ni amɛ hu amɛaatsɔ mimaŋ.” (2 Kor. 6:16; 3 Mose 26:12) Yɛ afi 1919 lɛ, Yehowa ha wekukpaa kpakpa bakã ekɛ “Nyɔŋmɔ Israel” shwɛɛnii lɛ ateŋ, ni amɛnine shɛ “shikpɔŋ” ko ni damɔ shi kɛha nitsumɔ ní Nyɔŋmɔ kɛwo amɛdɛŋ ni ha amɛbaje mumɔŋ paradeiso mli lɛ nɔ. (Yes. 66:8) Kɛjɛ afi 1930 afii lɛ amli kɛbaa nɛɛ, “tooi krokomɛi” akpekpei abɔ kɛ amɛhe ebadɔmɔ amɛ. (Yoh. 10:16) Anɔkwale ni eji akɛ ŋmɛnɛŋmɛnɛ beaŋ Kristofoi nɛɛ yɛ miishɛɛ ni Yehowa miiha amɛmiishwere ni eebu amɛhe lɛ maa nɔ mi akɛ enɔyeli lɛ ja. (Nyɛkanea Lala 91:1, 2.) Enɛ eha Satan mli ewo la naakpa!
11. Mɛni ji Nyɔŋmɔ henyɛlɔi lɛ ayiŋtoo titri lolo?
11 Yɛ naagbee be nɛɛ mli fɛɛ lɛ, Satan kanyaa esɔɔlɔi ni yɔɔ shikpɔŋ lɛ nɔ lɛ koni amɛte shi amɛwo mɛi ni afɔ amɛ mu lɛ ateŋ shwɛɛnii lɛ kɛ amɛnanemɛi tooi krokomɛi lɛ. Shiteekɛwoo nɛɛ eko ba yɛ Europa Anaigbɛ yɛ Nazi nɔyeli beaŋ, kɛ Europa Bokagbɛ yɛ Komunist nɔyeli beaŋ yɛ Soviet Union. Eba lɛ nakai hu yɛ maji krokomɛi babaoo anɔ, ni ebaaba ekoŋŋ, titri lɛ beni Gog ni yɔɔ Magog lɛ tutuaa Nyɔŋmɔ webii lɛ nɔ ni ji naagbee nɔ̃ lɛ. Yɛ nakai tutuamɔ lɛ mli lɛ, ekolɛ shiteekɛwolɔi kɛ hiɛjoomɔ baashɔ̃ nibii ni Yehowa webii lɛ yɔɔ lɛ yɛ amɛdɛŋ, taakɛ henyɛlɔi fee yɛ blema lɛ. Shi oti ni ma Satan hiɛ be fɛɛ be ji ni eha wɔ fɛɛ wɔkpa Yehowa jamɔ bɔni afee ni akakai Nyɔŋmɔ gbɛi ni kã wɔ nɔ lɛ dɔŋŋ. Te Yehowa baatsu shi ní ateɔ awoɔ enɔyeli nɛɛ he nii eha tɛŋŋ? Susumɔ lalatsɛ lɛ wiemɔi lɛ ahe ekoŋŋ okwɛ.
Odaseyeli ni Tsɔɔ akɛ Yehowa Baaye Kunim
12-14. Mɛɛ kunim srɔtoi enyɔ ní Israelbii lɛ ye yɛ he ko ni bɛŋkɛ Megido lɛ lalatsɛ lɛ wie he?
12 Kadimɔ hemɔkɛyeli ni mli wa ni lalatsɛ lɛ yɔɔ akɛ Yehowa baanyɛ aha jeŋmaji ni nyɛ̃ɔ ewebii lɛ ayiŋtoi afee yaka lɛ. Ewie kunim srɔtoi enyɔ ni Israelbii lɛ ye yɛ amɛhenyɛlɔi lɛ anɔ yɛ blema Megido maŋ lɛ masɛi lɛ he. Atsɛɔ jɔɔ kplenee ko hu ni yɔɔ jɛmɛ lɛ akɛ Megido. Yɛ hulutsoo beaŋ lɛ, Kishon Faa ni kã jɔɔ kplenee lɛ mli lɛ gbiɔ. Shi kɛ́ nugbɔ nɛ yɛ no sɛɛ lɛ, faa lɛ yiɔ, kɛkɛ lɛ esram nɔ ewo jɔɔ kplenee lɛ mli fɛɛ. Ekolɛ enɛ hewɔ ni atsɛɔ faa lɛ akɛ “Megido nui lɛ.”—Koj. 4:13; 5:19.
13 Yɛ Kojolɔ Gideon gbii lɛ amli lɛ, Midianbii, Amalekbii, kɛ Bokagbɛbii asraafoi ni efee ekome lɛ bua amɛhe naa yɛ More gɔŋkpɔ lɛ he yɛ Megido jɔɔ lɛŋ, ni jɛmɛ kɛ Megido teŋ jekɛmɔ aaafee kilomitai 15. (Koj. 7:1, 12) Yɛ Yehowa yelikɛbuamɔ naa lɛ, Gideon kɛ hii 300 pɛ ye henyɛlɔi asraafoi babaoo lɛ anɔ kunim butuu. Mɛɛ gbɛ nɔ amɛtsɔ amɛfee nakai? Yɛ Nyɔŋmɔ gbɛtsɔɔmɔ naa, amɛbɔle amɛhenyɛlɔi lɛ nsra lɛ kpula nyɔɔŋ, ni amɛhiɛ kpuji ni kɔtii hɔlɔ mli. Beni Gideon kpa etɛtrɛmaŋtɛrɛ lɛ, ewebii lɛ jwara amɛkpuji lɛ, ni kɔtii ni aŋɔto mli lɛ bɔi kpɛmɔ. Ni amɛkpã amɛtɛtrɛmaŋtɛrɛi lɛ ni amɛbɔ oshe akɛ: “Yehowa kɛ Gideon klante!” Henyɛlɔi lɛ jijaa, ni amɛteŋ mɔ fɛɛ mɔ dɔ eklante eto enaanyo nɔ; amɛteŋ mɛi ni gboiii lɛ jo foi kɛfo Yordan Faa lɛ. Agbɛnɛ Israelbii babaoo bafata he ni atiu henyɛlɔi lɛ. Henyɛlɔi tabilɔi fɛɛ ni akpãta amɛhiɛ lɛ ji 120,000.—Koj. 7:19-25; 8:10.
14 Tabor Gɔŋ lɛ yɛ More gɔŋkpɔ lɛ sɛɛ aaafee kilomitai ekpaa yɛ Megido jɔɔ lɛŋ. Mra mli lɛ, Kojolɔ Barak bua Israel tabilɔi 10,000 anaa ni amɛkɛ Kanaanbii amaŋ Hazor maŋtsɛ ni atsɛɔ lɛ Yabin lɛ asraafoi ni tatsɛ Sisera nyiɛ amɛhiɛ lɛ wu yɛ jɛmɛ. Kanaan asraafoi nɛɛ yɛ dade shwiilii 900 ni akɛ dadei ní naa bala ewo shwiilii lɛ anaji ahe. Beni Israel tabilɔi ni amɛwulako kɛ tawuu nibii pii lɛ bua amɛhe naa yɛ Tabor Gɔŋ lɛ nɔ lɛ, no ha Sisera asraafoi lɛ ba jɔɔ lɛŋ. Kɛkɛ ni “Yehowa ha Sisera kɛ eshwiilii kɛ ta muu lɛ fɛɛ jijaa.” Ekã shi faŋŋ akɛ nugbɔ ko nɛ trukaa ni eha Kishon Faa lɛ yi ni esram nɔ, enɛ ha ta shwiilii lɛ fũ yɛ ŋmɔtɔ lɛ mli. Israelbii lɛ gbe Sisera asraafoi lɛ fɛɛ.—Koj. 4:13-16; 5:19-21.
15. (a) Mɛni lalatsɛ lɛ sɔle ebi ni Yehowa afee? (b) Mɛni gbɛi ni akɛtsɛɔ naagbee ta ni Nyɔŋmɔ baawu lɛ haa wɔkaiɔ?
15 Lalatsɛ lɛ kpa Yehowa fai ni efee nakai nɔŋŋ yɛ jeŋmaji ni taoɔ akɛ amɛkpata Israel maŋ lɛ hiɛ yɛ egbii lɛ amli lɛ agbɛfaŋ. Esɔle akɛ: “Feemɔ amɛ tamɔ bɔ ni ofee Midian kɛ Sisera kɛ Yabin hu yɛ Kishon faa lɛ naa lɛ! Mɛi ni hiɛ kpãta yɛ Endor, ni amɛtsɔmɔ tumu amɛha shikpɔŋ lɛ.” (Lala 83:10, 11) Esa jogbaŋŋ akɛ atsɛɔ naagbee ta ni Nyɔŋmɔ baafã eshi Satan je lɛ akɛ Harmagedon (“eshishi ji Megido Gɔŋ”). Gbɛi nɛɛ haa wɔ kaiɔ tai ni awu yɛ he ko ni bɛŋkɛ Megido ni akɛye henyɛlɔi lɛ anɔ kunim butuu lɛ. Kunim ni Yehowa ye yɛ tai nɛɛ amli yɛ blema lɛ haa wɔnáa nɔmimaa akɛ ebaaye kunim yɛ Harmagedon ta lɛ mli.—Kpoj. 16:13-16.
Sɔlemɔ Koni Abu Yehowa Nɔyeli lɛ Bem
16. Mɛɛ gbɛ nɔ shiteekɛwolɔi lɛ ‘ahiɛaŋ eyimɔ obɔ̃bɔ̃ kɛ hiɛgbele’ ŋmɛnɛ?
16 Yehowa eha ŋaa srɔtoi ni atsɔ̃ koni akɛbule ewebii lɛ ashishi lɛ fɛɛ efee yaka yɛ “naagbee gbii” nɛɛ amli fɛɛ. (2 Tim. 3:1) Enɛ eha shiteekɛwolɔi lɛ ahiɛ egboi. Lala 83:17 lɛ gba enɛ efɔ̃ shi ekɛɛ akɛ: “Ha amɛhiɛaŋ ayimɔ obɔ̃bɔ̃ kɛ hiɛgbele, koni amɛtao bo, Yehowa, ogbɛi lɛ sɛɛgbɛ!” Yɛ maji fɛɛ ni ate shi awo Yehowa Odasefoi lɛ amli lɛ, shiteekɛwolɔi lɛ yeko omanye. Yɛ nakai maji lɛ amli lɛ, bɔ ni anɔkwa Nyɔŋmɔ kome lɛ jálɔi fi shi shiŋŋ, ní amɛmia amɛhiɛ lɛ ebafee odaseyeli kɛha mɛi ni hiɛ tsui ni ja lɛ, ni mɛi nɛɛ ateŋ mɛi babaoo ‘etao Yehowa sɛɛgbɛ.’ Yɛ maji babaoo ni tsutsu ko lɛ awa Yehowa Odasefoi ayi waa yɛ mli lɛ amli lɛ, amrɔ nɛɛ mɛi akpei nyɔŋmai abɔ, ni yɛ hei komɛi po lɛ akpei ohai abɔ kɛ miishɛɛ miijie Yehowa yi. Eji kunimyeli diɛŋtsɛ kɛha Yehowa! Ni kwɛ bɔ ni enɛ eha ehenyɛlɔi lɛ ahiɛ egboi kpɔtɔɔ!—Nyɛkanea Yeremia 1:19.
17. Mɛɛ jaramɔ shihilɛ adesai kɛbaakpe, ni mɛɛ wiemɔi etsɛŋ ni wɔbaakai?
17 Eji anɔkwale akɛ wɔle akɛ shiteekɛwolɔi baaya nɔ amɛwa wɔ yi. Ni wɔbaaya nɔ wɔshiɛ sanekpakpa lɛ wɔtsɔɔ mɛi fɛɛ ni shiteekɛwolɔi lɛ po fata he. (Mat. 24:14, 21) Shi etsɛŋ ni hegbɛ ní yɔɔ amrɔ nɛɛ kɛha shiteekɛwolɔi lɛ akɛ amɛtsake koni amɛyi aná wala lɛ baaba naagbee. Yehowa gbɛi lɛ hetsemɔ he miihia kwraa fe adesai ayiwalaheremɔ. (Nyɛkanea Ezekiel 38:23.) Beni jeŋmaji lɛ aaafee ekome kɛbua amɛhe naa koni amɛkpãta Nyɔŋmɔ webii ahiɛ taakɛ agba afɔ̃ shi lɛ, wɔbaakai lalatsɛ lɛ sɔlemɔ nɛɛ mli wiemɔi lɛ akɛ: “Amɛhiɛ agboi ni amɛhe akpokpo daadaa, amɛbɔ amɛhe ahora ni amɛhao daa nɛɛ.”—Lala 83:18.
18, 19. (a) Mɛni baaba mɛi ni etswa amɛfai shi akɛ amɛbaate shi amɛwo Yehowa nɔyeli lɛ anɔ? (b) Mɛɛ hewalɛ Yehowa nɔyeli lɛ bem ni abaabu kɛya naanɔ lɛ ní miibɛŋkɛ lɛ náa yɛ onɔ?
18 Abaakpãta mɛi ni etswa amɛfai shi akɛ amɛbaate shi amɛwo Yehowa nɔyeli lɛ ahiɛ. Nyɔŋmɔ Wiemɔ haa wɔleɔ akɛ mɛi ni ‘booo sanekpakpa lɛ toi’—ní no baaha agbe amɛ yɛ Harmagedon—lɛ baaná “naanɔ hiɛkpatamɔ.” (2 Tes. 1:7-9) Nɛkɛ mɛi nɛɛ ahiɛkpatamɔ kɛ mɛi ni jáa Yehowa yɛ anɔkwale mli lɛ ayiwalaheremɔ lɛ baaha aná faŋŋ akɛ Yehowa ji anɔkwa Nyɔŋmɔ kome pɛ. Hiɛ kpaŋ nakai kunimyeli kpele lɛ nɔ kɔkɔɔkɔ yɛ jeŋ hee lɛ mli. ‘Jalɔi kɛ mɛi ni ejaaa ni abaatee amɛ shi’ lɛ baakase Yehowa nitsumɔ kpele lɛ he nii. (Bɔf. 24:15) Yɛ jeŋ hee lɛ mli lɛ, amɛbaana faŋŋ akɛ nilee yɛ mli akɛ aaahi Yehowa nɔyeli lɛ shishi. Amɛteŋ mɛi ni he jɔ lɛ baaná nɔmimaa oya nɔŋŋ akɛ Yehowa ji anɔkwa Nyɔŋmɔ kome pɛ.
19 Mɛɛ wɔsɛɛ be ni yɔɔ miishɛɛ po wɔŋwɛi Tsɛ ni yɔɔ suɔmɔ lɛ esaa eto ejálɔi anɔkwafoi lɛ! Ani enɛ tsirɛɛɛ bo ni osɔle ni Yehowa aha sɔlemɔ ni lalatsɛ lɛ sɔle eha Yehowa lɛ hetoo nɔ ni ji naagbee nɔ̃ akɛ: “[Ohenyɛlɔi lɛ] amɛhiɛ agboi ni amɛhe akpokpo daadaa, amɛbɔ amɛhe ahora ni amɛhao daa nɛɛ, koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ”?—Lala 83:18, 19.
[Shishigbɛ niŋmaa]
Ani Obaanyɛ Otsɔɔ Mli?
• Mɛɛ shihilɛ Israelbii lɛ kɛkpeɔ beni aŋma Lala 83 lɛ?
• Mɛni ji nɔ̃ titri ni kã mɔ ni ŋma Lala 83 lɛ tsui nɔ?
• Namɛi Satan nyɛ̃ɔ amɛ ŋmɛnɛ?
• Mɛɛ gbɛ nɔ Yehowa baatsɔ eha lalatsɛ sɔlemɔ ni yɔɔ Lala 83:19 lɛ hetoo yɛ naagbee kwraa?
[Nikasemɔ lɛ he Sanebimɔi]
[Shikpɔŋ he mfoniri ni yɔɔ baafa 15]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Te tai ni awu yɛ he ni bɛŋkɛ blema Megido lɛ kɔɔ wɔwɔsɛɛ be he ehaa tɛŋŋ?
Kishon Faa
Haroshet
Karmel Gɔŋ
Yezreel Jɔɔ
Megido
Taanak
Gilboa Gɔŋ
Harod Nubu
More
En-Dor
Tabor Gɔŋ
Galilea Ŋshɔ
Yordan Faa
[Mfoniri ni yɔɔ baafa 12]
Mɛni tsirɛ lalatsɛ ko ni eŋma sɔlemɔ ko ni jɛ etsuiŋ lɛ?