Gilead Skul Lɛ Klas Ni Ji 124

Lɛ Naagbee Nifeemɔ Maŋsɛɛ Sanekpakpa Jajelɔi Tamɔ Baalabii

DAA nyɔji ekpaa lɛ, afeɔ Buu-Mɔɔ Biblia Gilead Skul lɛ naagbee nifeemɔ, ni afɔ̃ɔ Betel weku ni yɔɔ United States lɛ mli bii lɛ fɛɛ anine kɛyaa shishi. Yɛ March 8, 2008 lɛ, afɔ̃ mɛi anine kɛjɛ maji ni fa fe 30 mli kɛbafata Betel weku lɛ he kɛha Gilead Skul lɛ klas ni ji 124 lɛ naagbee nifeemɔ lɛ. Mɛi 6,411 ni ba nifeemɔ lɛ kɛ skulbii lɛ fɛɛ ná miishɛɛ yɛ nakai gbi ni bafee gbi krɛdɛɛ kɛha skulbii lɛ nɔ.

Nifeemɔ lɛ sɛinɔtalɔ ni ji Stephen Lett ni eji Nɔyeli Kuu lɛ mli nyo lɛ ha wiemɔ ni ji “Nyɛfataa Yehowa Mfonirifeemɔŋ Baalabii lɛ Ahe” kɛgbele nifeemɔ lɛ naa. Kpojiemɔ 9:1-4 lɛ kɛ Kristofoi akuu fioo ni afɔ amɛ mu ní kɛ ekãa bɔi Yehowa sɔɔmɔ ekoŋŋ yɛ afi 1919 lɛ to baalabii babaoo ní fã kpo he. Akai skulbii lɛ akɛ, akɛ “tooi krokomɛi” lɛ amɛkɛ amɛhe ebadɔmɔ nɛkɛ mfonirifeemɔ baalabii babaoo nɛɛ.—Yoh. 10:16.

Lon Schilling ni efata United States Nitsumɔhe Nine Ajinafoi Akuu lɛ he lɛ ha wiemɔ ni ji “Nyɛtsɔmɔa Hefatalɔi ni Sa” lɛ kɛtsa nɔ. Ewiemɔ lɛ kɔɔ Biblia mli nɔkwɛmɔnɔ ni Akwila kɛ Priska ni ji Kristofoi gbalashihilɛ mli hefatalɔi ni hi shi yɛ klɛŋklɛŋ afii 100 lɛ mli lɛ fee lɛ he. (Rom. 16:3, 4) Hii 28 ni yɔɔ klas lɛ ateŋ mɔ fɛɛ mɔ ŋa fata ehe. Akai amɛ akɛ ehe miihia ni amɛha amɛgbalashihilɛ tsakpãa lɛ mli awa bɔni afee ni amɛye omanye akɛ maŋsɛɛ sanekpakpa jajelɔi. Be fɛɛ be kɛ́ Biblia lɛ wie Akwila he lɛ, etsĩɔ eŋa Priska tã. No hewɔ lɛ, bɔfo Paulo kɛ asafo lɛ bu amɛ akɛ heloo kome. Nakai nɔŋŋ ŋmɛnɛ lɛ, esa akɛ maŋsɛɛ sanekpakpa jajelɔi ni amɛbote gbalashihilɛ mli lɛ kɛ amɛhefatalɔi lɛ afee ekome kɛtsu nii, amɛfee ekome kɛjá Yehowa, amɛfee ekome kɛtsu naagbai ni amɛkɛbaakpe yɛ hei ni amɛbaayasɔmɔ yɛ lɛ ahe nii, ní amɛye amɛbua amɛhe.—1 Mose 2:18.

Guy Pierce ni eji Nɔyeli Kuu lɛ mli nyo lɛ ha wiemɔ ni tsa nɔ ni ji “Ha Yehowa Ekpakpafeemɔ lɛ Aná Onɔ Hewalɛ.” Nyɛminuu Pierce tsɔɔ mli akɛ ekpakpafeemɔ biɔ babaoo fe efɔŋfeemɔ ní wɔɔkwa. Kɛ́ mɔ ko feɔ ekpakpa lɛ, no tsɔɔ akɛ efeɔ nibii kpakpai ni mɛi krokomɛi baaná he sɛɛ. Yehowa Nyɔŋmɔ ji ekpakpafeelɔ ni fe fɛɛ. Ekpakpa ni Nyɔŋmɔ feɔ kɛ suɔmɔ ni eyɔɔ lɛ baanyɛ atsirɛ wɔ koni wɔfee nibii kpakpai wɔha mɛi krokomɛi. Nyɛminuu Pierce jie skulbii lɛ ayi kɛmu ewiemɔ lɛ naa akɛ: “Nyɛfeɔ mɛi ekpakpa. Wɔyɛ nɔmimaa akɛ nyɛbaaya nɔ nyɛha ekpakpa ni Nyɔŋmɔ feɔ lɛ aná nyɛ nɔ hewalɛ kɛtsɔ ekpakpa ni nyɛaafee yɛ nitsumɔi fɛɛ ni Yehowa Nyɔŋmɔ kɛbaawo nyɛdɛŋ wɔsɛɛ ko lɛ amli lɛ nɔ.”

No sɛɛ lɛ, Michael Burnett ní tsutsu ko lɛ eji maŋsɛɛ sanekpakpa jajelɔ shi ahala lɛ nyɛsɛɛ nɛɛ akɛ etsɔɔ Gilead skulbii lɛ anii lɛ ha wiemɔ ni ji “Nyɛwoɔ Tamɔ Kaimɔbɔŋ yɛ Nyɛhiŋmɛii Ateŋ.” Esa akɛ Israelbii lɛ akai bɔ ni Yehowa tsɔ naakpɛɛ gbɛ nɔ ekpɔ̃ amɛ kɛjɛ Mizraim lɛ, ní amɛŋɔfee “kaimɔbɔŋ” loo hiɛnaataramɔ nii yɛ  amɛhiŋmɛi ateŋ. (2 Mose 13:16) Awo nikaselɔi lɛ hewalɛ ni amɛkai nibii babaoo ni amɛkase yɛ Gilead Skul lɛ ni amɛŋɔfee hiɛnaataramɔ nii yɛ amɛhiŋmɛi ateŋ. Nyɛminuu Burnett ma nɔ mi eha amɛ akɛ ehe miihia ni amɛba amɛhe shi ní amɛkabu amɛhe tuutu, ni kɛ́ gbeekpamɔ eyabaaa amɛ kɛ amɛnanemɛi maŋsɛɛ sanekpakpa jajelɔi loo mɛi krokomɛi ateŋ lɛ, esa akɛ amɛkɛ Biblia mli shishitoo mlai atsu he nii.—Mat. 5:23, 24.

Mark Noumair ni kɛ afii babaoo etsɔɔ nii yɛ Gilead Skul lɛ ha wiemɔ ni ji “Mɛɛ Lala Abaasɔ̃ yɛ Ohe?” Yɛ blema lɛ kɛ́ mɛi wu ta ni amɛye kunim lɛ amɛláa kunimyeli lala. Lalai nɛɛ ateŋ ekome ni alá lɛ wie Ruben, Dan, kɛ Asher akutsei lɛ ahe akɛ amɛsumɔɔɔ ni amɛkɛ amɛhe shãa afɔle, shi ajie Zebulon akutso lɛ yi akɛ amɛkɛ amɛhe shã afɔle. (Koj. 5:16-18) Taakɛ bɔ ni abaanyɛ ayɔse lala ko mli wiemɔi lɛ, nakai nɔŋŋ mɛi yɔseɔ bɔ ni Kristofonyo fɛɛ Kristofonyo baa  ejeŋ ehaa. Kɛ́ mɔ ko kɛ ekãa tsu Nyɔŋmɔ nitsumɔ lɛ, ni ekɛ Yehowa gbɛtsɔɔmɔi tsu nii lɛ, esaa Yehowa hiɛ, ni efeɔ nɔkwɛmɔnɔ kpakpa ehaa Nyɔŋmɔ tsuji krokomɛi. Kɛ́ mɛi ni yɔɔ asafo lɛ mli lɛ yɔse wɔnifeemɔi kpakpai ni bafeɔ tamɔ lala ko mli wiemɔi lɛ, ekanyaa amɛ koni amɛkase nakai nɔkwɛmɔnɔ lɛ.

Gilead klas ni ji 124 lɛ mli bii lɛ kɛ ŋmɛlɛtswai 3,000 tsu shiɛmɔ nitsumɔ lɛ, ni enɛ fata amɛtsɔsemɔ lɛ he. Sam Roberson ni tsuɔ nii yɛ Nitsumɔhe ni Kwɛɔ Teokrase Skul Srɔtoi Anɔ lɛ tsu saneyitso ni ji “Ha Mumɔ Krɔŋkrɔŋ lɛ Atsɔɔ Bo Gbɛ” lɛ he nii, ni eha skulbii lɛ gba lɛ niiashikpamɔi ni amɛná yɛ shiɛmɔ nitsumɔ lɛ mli lɛ, ni amɛfee ekomɛi ahe nɔkwɛmɔnɔ. Beni skulbii lɛ gba niiashikpamɔi ni woɔ mɔ hewalɛ nɛɛ amɛgbe naa lɛ, Patrick LaFranca ni eji United States Nitsumɔhe Nine Ajinafoi Akuu lɛ mli nyo lɛ bi mɛi ni eba Gilead skul lɛ eko ní amrɔ nɛɛ amɛmiisɔmɔ yɛ maji srɔtoi anɔ lɛ saji. Skulbii lɛ ná ŋaa kpakpa ni nyɛmimɛi hii nɛɛ wo amɛ lɛ he miishɛɛ waa.

Anthony Morris ni fata Nɔyeli Kuu lɛ he lɛ ji mɔ ni ha naagbee wiemɔ ni ji “Nyɛkaia akɛ Nii ni Anaa lɛ Hiɔ Shi Be Fioo Kɛkɛ” lɛ. Ŋmalɛ lɛ woɔ wɔ hewalɛ ni wɔgbala wɔjwɛŋmɔ kɛya jɔɔmɔi ni Yehowa kɛbaaba wɔsɛɛ lɛ anɔ moŋ fe nɔ ni wɔɔgbala wɔjwɛŋmɔ kɛya amrɔmrɔ amanehulu ni ekolɛ wɔkɛkpeɔ lɛ nɔ. (2 Kor. 4:16-18) Ŋmɛnɛ lɛ, ohia futaa, jalɛsane ni ayeee, yiwaa, hela, kɛ gbele ji nibii ni wɔ fɛɛ wɔnaa. Maŋsɛɛ sanekpakpa jajelɔi baanyɛ amɛkɛ shihilɛi ni jaraa nɛɛ ekomɛi akpe. Shi kɛ́ wɔkai akɛ nibii nɛɛ baahi shi be fioo ko kɛkɛ lɛ, no baaye abua wɔ ni wɔya nɔ wɔjá Nyɔŋmɔ ni wɔná hiɛnɔkamɔ.

Skulbii lɛ fɛɛ batara wiemɔ kpoku lɛ nɔ kɛbo naagbee saji ni Nyɛminuu Lett wie lɛ toi. Ewo amɛ hewalɛ ni amɛnijiaŋ akaje wui, ni ekɛɛ amɛ akɛ: “Kɛ́ Yehowa yɛ wɔsɛɛ lɛ, nɔ ko nɔ ko bɛ ni baaha wɔkpa lɛ sɔɔmɔ.” Ewo maŋsɛɛ sanekpakpa jajelɔi heei lɛ hewalɛ ni amɛfee amɛnii tamɔ baalabii, ni amɛya hiɛ yɛ Yehowa sɔɔmɔ mli, amɛfee ekãa, amɛye anɔkwa ni amɛbo Yehowa toi be fɛɛ be kɛya naanɔ.

[Akrabatsa ni yɔɔ baafa 30]

KLASBII LƐ AHE SAJI

Maji srɔtoi anɔ ni amɛjɛ kɛba: 7

Maji srɔtoi anɔ ni aha amɛ nitsumɔ yɛ: 16

Amɛyifalɛ: 56

Amɛfii lɛ mlijaa: 33.8

Afii abɔ ni amɛkɛhi anɔkwale lɛ mli lɛ mlijaa: 18.2

Afii abɔ ni amɛkɛhi be-fɛɛ sɔɔmɔ nitsumɔ lɛ mli lɛ mlijaa: 13.8

[Mfoniri ni yɔɔ baafa 31]

Buu-Mɔɔ Gilead Biblia Skul Klasbii ni Ji 124 ní Gbe Nikasemɔ Naa Lɛ

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Mfoniri ni yɔɔ baafa 32]

Watchtower Educational Center lɛ ji he ni Gilead Skul lɛ yɔɔ