Tsu Nɔ Ni Ohenilee Kɛɔ Bo Lɛ He Nii
Tsu Nɔ Ni Ohenilee Kɛɔ Bo Lɛ He Nii
“Mɛi ni he tse lɛ, nii fɛɛ he tse ha amɛ; shi mɛi ni he tseee kɛ mɛi ní heee yeee lɛ, nɔ ko nɔ ko bɛ ní he tse ha amɛ.” —TITO 1:15.
1. Mɛni Paulo fee kɛye bua asafoi ni yɔɔ Kreta lɛ?
BENI bɔfo Paulo gbe emaŋsɛɛ sanekpakpa shiɛmɔ he gbɛfãa ni ji etɛ lɛ naa lɛ, amɔ lɛ ni sɛɛ mli lɛ akɛ lɛ tee Roma ni ayawo lɛ tsuŋ afii enyɔ. Mɛni efee beni ajie lɛ kɛjɛ tsuŋwoohe lɛ? Eyasara Kreta ŋshɔkpɔ lɛ, ni Tito fata ehe kɛtee. Sɛɛ mli lɛ eŋma eha Tito akɛ: “Mishio yɛ Kreta, koni oto nibii ni eshwɛ lɛ gbɛjianɔ pɛpɛɛpɛ, ni owowoo onukpai.” (Tito 1:5) Nitsumɔ ni akɛwo Tito dɛŋ nɛɛ biɔ ni ekɛ mɛi ni amɛhenilee tsuuu nii jogbaŋŋ kɛ mɛi ni nɔ̃ tsuɔ nii jogbaŋŋ lɛ ashãra.
2. Mɛɛ naagba ehe bahia ni Tito atsu he nii yɛ Kreta ŋshɔkpɔ lɛ nɔ?
2 Paulo wo Tito ŋaa yɛ hesaai ni esa akɛ mɛi aná dani ahole amɛ akɛ asafoŋ onukpai lɛ he, ni no sɛɛ lɛ eha ele akɛ “mɛi pii yɛ ni ji yakayaka wielɔi kɛ shishiulɔi ni baaa amɛhe shi amɛhaaa mɔ ko.” Mɛi nɛɛ ji mɛi ni ‘butuɔ shiai muji fɛɛ ni amɛtsɔɔ nii ni ejaaa.’ Esa akɛ Tito aya nɔ ‘akã amɛhiɛ.’ (Tito 1:10-14; 1 Timoteo 4:7) Paulo kɛɛ akɛ amɛjwɛŋmɔi kɛ amɛhenilee fɛɛ “he tseee,” ni ekɛ wiemɔ ni tsɔɔ nɔ ko ni awo lɛ muji tsu nii, tamɔ klala fɛfɛo ni muji ebote mli. (Tito 1:15) Eeenyɛ efee akɛ hii nɛɛ ateŋ mɛikomɛi ji Yudafoi, ejaakɛ ‘amɛhiɛ ketiafoo sane lɛ mli kpɛŋŋ.’ Eyɛ mli akɛ ŋmɛnɛ lɛ hii ni hiɛ nakai susumɔ lɛ eko bɛ ni fiteɔ asafoi lɛ moŋ; shi kɛlɛ wɔbaanyɛ wɔkase nibii babaoo yɛ henilee he kɛjɛ ŋaawoo ni Paulo kɛha Tito lɛ mli.
Mɛi ni Amɛhenilee Ewo Muji
3. Mɛni Paulo ŋma kɛyaha Tito yɛ henilee he?
3 Kadimɔ shihilɛ ni no mli lɛ Paulo wieɔ he ni etsĩ henilee tã lɛ. “Mɛi ni he tse lɛ, nii fɛɛ he tse ha amɛ; shi mɛi ni he tseee kɛ mɛi ní heee yeee lɛ, nɔ ko nɔ ko bɛ ní he tse ha amɛ, shi moŋ amɛyitsoŋ kɛ amɛhenilee fɛɛ mli ewo muji. Amɛkɛɛ akɛ amɛle Nyɔŋmɔ, shi amɛkɛ amɛnitsumɔi kwaa lɛ.” Eyɛ faŋŋ akɛ, yɛ nakai beaŋ lɛ ehe bahia ni mɛi komɛi afee tsakemɔi bɔni afee ni “amɛhe awa yɛ hemɔkɛyeli lɛ mli.” (Tito 1:13, 15, 16) Ewa kɛha amɛ akɛ amɛaana srɔtofeemɔ ni yɔɔ nɔ ko ni he tse kɛ nɔ ni he tseee teŋ, ni enɛ jɛ amɛhenilee ni ewo muji lɛ hewɔ.
4, 5. Mɛɛ gbɔjɔmɔ mɛi komɛi ni hi asafoi lɛ amli lɛ yɔɔ, ni te enɛ ná amɛnɔ hewalɛ eha tɛŋŋ?
4 Nɔ ni fe afii nyɔŋma ni tsɔ hiɛ dani Paulo baaŋma Tito lɛ, no mli lɛ Kristofoi anɔyeli kuu lɛ emu sane naa momo akɛ ketiafoo he ehiaaa dɔŋŋ dani mɔ abatsɔ anɔkwa jálɔ, ni amɛha asafoi lɛ fɛɛ ele enɛ. (Bɔfoi lɛ Asaji 15:1, 2, 19-29) Kɛlɛ, mɛi ni yɔɔ Kreta lɛ ateŋ mɛi komɛi kã he ‘amɛhiɛ ketiafoo sane lɛ mli kpɛŋŋ.’ Amɛfee lɛ faŋŋ akɛ amɛkɛ nɔyeli kuu lɛ kpãaa gbee, ni “amɛtsɔɔ nii ni ejaaa.” (Tito 1:10, 11) Akɛni amɛná susumɔ ni ejaaa hewɔ lɛ, ekolɛ amɛwo Mla lɛ mli akpɔi ni kɔɔ niyenii kɛ kusumii ni he tse lɛ ahe hewalɛ. Ekolɛ amɛkɛ nibii krokomɛi po fata nɔ ni Mla lɛ kɛɔ lɛ he, tamɔ bɔ ni mɛi ni tsɔ amɛhiɛ ni hi shi yɛ Yesu gbii lɛ amli, kɛ agbɛnɛ hu mɛi ni woɔ Yudafoi adesãi kɛ gbɔmɛi akitai ahe hewalɛ lɛ fee lɛ.—Marko 7:2, 3, 5, 15; 1 Timoteo 4:3.
5 Nakai susumɔi lɛ ná amɛyiŋkpɛi kɛ amɛhenilee, ni ji bɔ ni amɛbuɔ nɔ ni ji ekpakpa kɛ efɔŋ amɛhaa lɛ nɔ hewalɛ yɛ gbɛ fɔŋ nɔ. Paulo ŋma akɛ: “Mɛi ni he tseee kɛ mɛi ní heee yeee lɛ, nɔ ko nɔ ko bɛ ní he tse ha amɛ.” Nɔ ni amɛhenilee lɛ kɛɔ amɛ lɛ batsɔ nɔ ni ejaaa aahu akɛ anyɛɛɛ amu afɔ̃ nɔ dɔŋŋ akɛ ebaanyɛ ekudɔ amɛnifeemɔi kɛ amɛyiŋkpɛi. Kɛfata he lɛ, amɛkojo amɛnanemɛi Kristofoi lɛ yɛ nibii ni kulɛ esa akɛ ashi aha mɔ aŋkro ni ekpɛ eyiŋ yɛ he, ni ji nibii ni esoro bɔ ni Kristofonyo fɛɛ Kristofonyo baakpɛ eyiŋ yɛ he lɛ ahe. Kretabii nɛɛ tsɔ enɛ feemɔ nɔ amɛbu nifeemɔi komɛi akɛ amɛhe tseee yɛ be mli ni jeee nakai sane lɛ ji diɛŋtsɛ. (Romabii 14:17; Kolosebii 2:16) Amɛkɛɔ akɛ amɛle Nyɔŋmɔ, shi amɛkɛ amɛnitsumɔi kwaa lɛ.—Tito 1:16.
“Mɛi ni He Tse lɛ, Nii Fɛɛ He Tse Ha Amɛ”
6. Mɛɛ gbɔmɛi akui enyɔ Paulo wie amɛhe?
6 Mɛɛ gbɛ nɔ wɔɔtsɔ wɔná nɔ ni Paulo ŋma kɛyaha Tito lɛ he sɛɛ? Ojogbaŋŋ, kadimɔ nibii ni kɛ amɛhe kpãaa gbee ni yɔɔ sane nɛɛ mli lɛ: “Mɛi ni he tse lɛ, nii fɛɛ he tse ha amɛ; shi mɛi ni he tseee kɛ mɛi ní heee yeee lɛ, nɔ ko nɔ ko bɛ ni he tse ha amɛ, shi moŋ amɛyitsoŋ kɛ amɛhenilee fɛɛ mli ewo muji.” (Tito 1:15) Ekã shi faŋŋ akɛ Paulo wiemɔ lɛ etsɔɔɔ akɛ nɔ fɛɛ nɔ he tse kɛha Kristofonyo ni baa ejeŋ jogbaŋŋ lɛ, ni ákɛ eyɛ hegbɛ akɛ efeɔ nɔ fɛɛ nɔ. Wɔbaanyɛ wɔkɛɛ nakai kɛ nɔmimaa, ejaakɛ Paulo etsɔ hiɛ efee lɛ faŋŋ yɛ wolo kroko ni eŋma lɛ mli akɛ mɛi ni kɛ amɛhe woɔ ajwamaŋbɔɔ, wɔŋjamɔ, mumɔi atsɛmɔ nifeemɔi, kɛ nibii krokomɛi ni tamɔ nakai amli lɛ ‘anine shɛŋ Nyɔŋmɔ maŋtsɛyeli lɛ nɔ.’ (Galatabii 5:19-21) No hewɔ lɛ, esa akɛ wɔmu sane naa akɛ Paulo miiwie anɔkwa sane ko ni kɔɔ gbɔmɛi akui enyɔ ahe, mɛi ni he tse yɛ jeŋba kɛ mumɔŋ fɛɛ kɛ mɛi hu ni he tseee yɛ nibii nɛɛ agbɛfaŋ.
7. Mɛni Hebribii 13:4 lɛ guɔ, shi mɛɛ sanebimɔ baanyɛ ate shi?
7 Jeee nibii ni Biblia lɛ guɔ tɛ̃ɛ lɛ pɛ ji nɔ ni esa akɛ anɔkwa Kristofonyo akpoo. Ákɛ nɔkwɛmɔnɔ lɛ, susumɔ sane ni mli kã shi faŋŋ nɛɛ he okwɛ: “Awo gbala hiɛ nyam yɛ nyɛ fɛɛ nyɛteŋ, ni akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” (Hebribii 13:4) Mɛi ni jeee Kristofoi kɛ mɛi ni leee Biblia lɛ he nɔ ko lɛ po baamu sane naa yɛ gbɛ ni ja nɔ akɛ, ŋmalɛ nɛɛ guɔ gbalafitemɔ. Eyɛ faŋŋ yɛ ŋmalɛ nɛɛ kɛ Biblia mli saji krokomɛi amli akɛ Nyɔŋmɔ guɔ bɔlɛnamɔ ni yaa nɔ yɛ nuu loo yoo ni ebote gbalashihilɛ mli kɛ mɔ kroko ni jeee ewu loo eŋa teŋ lɛ. Shi mɛni abaanyɛ akɛɛ yɛ nuutso ni akɛwoɔ daaŋ loo yoohe ni alɛmɔɔ ni mɛi enyɔ ni boteko gbalashihilɛ mli kɛ amɛhe woɔ mli lɛ he? Oblahii kɛ oblayei bibii pii kɛɔ akɛ tɔmɔ ko bɛ nifeemɔ nɛɛ he, ejaakɛ ejeee bɔlɛnamɔ. Ani Kristofonyo ko baanyɛ abu nuutso ni akɛwoɔ daaŋ loo yoohe ni alɛmɔɔ lɛ akɛ nifeemɔ ni he tse?
8. Yɛ sane ni kɔɔ nuutso ni akɛwoɔ daaŋ loo yoohe ni alɛmɔɔ lɛ he lɛ, mɛɛ gbɛ nɔ esoro Kristofoi yɛ je lɛŋ bii pii ahe?
8 Hebribii 13:4 kɛ 1 Korintobii 6:9 lɛ tsɔɔ akɛ Nyɔŋmɔ ekpɛlɛɛɛ gbalafitemɔ kɛ ajwamaŋbɔɔ (Hela wiemɔ mli lɛ, por·neiʹa) fɛɛ nɔ. Mɛni ajwamaŋbɔɔ tsɔɔ? Hela wiemɔ ni akɛtsu nii lɛ kɔɔ bɔlɛnamɔ ni ejaaa loo fɔmɔ nii lɛ ni akɛtsuɔ nii yɛ gbɛ ejaaa nɔ lɛ he. Ekɔɔ bɔlɛnamɔ nifeemɔi gbohii fɛɛ ni mɛi ni boteko gbalashihilɛ mli yɛ Ŋmalɛ naa lɛ kɛ amɛhe woɔ mli lɛ ahe. No hewɔ lɛ nuutso ni akɛwoɔ daaŋ loo yoohe ni alɛmɔɔ hu fata he, ekɔɔɔ he eko akɛ aha oblahii kɛ oblayei bibii pii ni yɔɔ je lɛŋ fɛɛ ele akɛ tɔmɔ ko bɛ enɛ he aloo akɛ amɛ diɛŋtsɛ amɛmu sane naa nakai. Anɔkwa Kristofoi haaa “yakayaka wielɔi kɛ shishiulɔi” asusumɔi akudɔ amɛjwɛŋmɔ kɛ amɛnifeemɔi. (Tito 1:10) Amɛhiɔ shi yɛ shishitoo mlai ni nɔ kwɔlɔ ni yɔɔ Ŋmalɛ Krɔŋkrɔŋ lɛ mli lɛ anaa. Yɛ nɔ̃ najiaŋ ni amɛaabɔ mɔdɛŋ akɛ amɛkɛ saji aaajie amɛnaa yɛ nuutso ni akɛwoɔ daaŋ loo yoohe ni alɛmɔɔ lɛ he lɛ, amɛnuɔ nifeemɔ nɛɛ shishi yɛ Ŋmalɛ naa akɛ eji ajwamaŋbɔɔ, ni ji por·neiʹa, ni amɛtsɔseɔ amɛhenilee lɛ koni ekakpɛlɛ nifeemɔ nɛɛ nɔ. *—Bɔfoi lɛ Asaji 21:25; 1 Korintobii 6:18; Efesobii 5:3.
Esoro Mɔ Fɛɛ Mɔ Henilee, Ni Esoro Mɔ Fɛɛ Mɔ Yiŋkpɛɛ
9. Kɛji “nii fɛɛ he tse” lɛ, belɛ mɛɛ gbɛfaŋnɔ henilee tsuɔ?
9 Shi mɛni ji nɔ ni Paulo tsɔɔ beni ekɛɛ akɛ “mɛi ni he tse lɛ, nii fɛɛ he tse ha amɛ” lɛ? No mli lɛ, Paulo miiwie Kristofoi ni eha amɛsusumɔ kɛ amɛjeŋba kɛ Nyɔŋmɔ shishitoo mlai ni wɔnaa yɛ e-Wiemɔ ni ajɛ mumɔŋ aŋma lɛ mli ekpã gbee lɛ ahe. Kristofoi nɛɛ yɔseɔ akɛ yɛ nibii ni Nyɔŋmɔ ebuuu lɛ fɔ́ tɛ̃ɛ lɛ ateŋ babaoo agbɛfaŋ lɛ, Kristofonyo fɛɛ Kristofonyo baanyɛ akpɛ lɛ diɛŋtsɛ eyiŋ yɛ nibii nɛɛ ahe. Yɛ nɔ̃ najiaŋ ni amɛaawie amɛshi nifeemɔi nɛɛ ekomɛi lɛ, amɛbuɔ nibii ni Nyɔŋmɔ ebuuu lɛ fɔ́ lɛ akɛ nibii ni “he tse.” Amɛkpaaa gbɛ akɛ mɔ fɛɛ mɔ baasusu shihilɛ mli nibii ni Biblia lɛ kɛ gbɛtsɔɔmɔ ni yɔɔ tɛ̃ɛ haaa yɛ he lɛ ahe tamɔ amɛsusuɔ he lɛ pɛpɛɛpɛ. Nyɛhaa wɔsusua enɛ he nɔkwɛmɔnii komɛi ahe wɔkwɛa.
10. Mɛɛ gbɛ nɔ yookpeemɔ (loo yarafeemɔ) baanyɛ ekɛ naagba aba?
10 Wekui babaoo yɛ ni gbalashihilɛ mli hefatalɔi lɛ ateŋ mɔ kome ebatsɔ Kristofonyo shi mɔ kroko lɛ jeee Kristofonyo. (1 Petro 3:1; 4:3) Ekolɛ enɛ baanyɛ ekɛ naagbai srɔtoi aba, tamɔ beni wekunyo ko miikpee yoo loo ená yara. Susumɔ sane ni kɔɔ ŋa ko ni ji Kristofonyo ni ewu kɛ lɛ bɛ jamɔ kome mli lɛ he okwɛ. Nuu lɛ wekunyo ko miibote gbalashihilɛ mli, ni nifeemɔ lɛ baaya nɔ yɛ Kristendombii asɔlemɔtsu ko mli. (Aloo ewekunyo ko, ekolɛ efɔlɔ egbo, ni abaafee yara lɛ yɛ sɔlemɔtsu ko mli.) Afɔ̃ nine atsɛ gbalashihilɛ mli hefatalɔi lɛ, ni nuu lɛ miisumɔ ni eŋa afata ehe kɛya. Mɛni ŋa lɛ henilee kɛɔ lɛ yɛ ya ni ebaaya lɛ he? Mɛni ebaafee? Susumɔ nibii enyɔ ni yɔɔ ni ebaanyɛ efee lɛ ahe okwɛ.
11. Tsɔɔmɔ bɔ ni ŋa ko ni ji Kristofonyo lɛ baanyɛ asusu nii ahe eha kɛji ebaaya yookpeemɔ ko ni abaafee yɛ sɔlemɔtsu ko mli loo eyaŋ, ni te ebaakpɛ eyiŋ eha tɛŋŋ?
11 Lois susu famɔ ni yɔɔ hiɛdɔɔ ni Biblia lɛ kɛhaa akɛ, ‘Nyɛjea Babilon Kpeteŋkpele’ ni ji apasa jamɔi fɛɛ ni yɔɔ je lɛ mli lɛ he. (Kpojiemɔ 18:2, 4) Be ko ni eho lɛ, no mli lɛ Lois ji sɔlemɔ ni yookpeemɔ lɛ baaya nɔ yɛ jɛmɛ lɛ mlinyo, ni ele akɛ beni nifeemɔ lɛ yaa nɔ lɛ abaabi ni mɛi fɛɛ ni yɔɔ jɛmɛ lɛ kɛ amɛhe awo jamɔŋ nifeemɔi tamɔ sɔlemɔ, lalai ni aláa, loo nifeemɔi krokomɛi amli. Etswa afai shi akɛ ekɛ ehe woŋ nifeemɔi nɛɛ amli, ni esumɔɔɔ po akɛ ebaaya jɛmɛ, koni no anyɛ enɔ ni eŋmɛɛ enɔkwayeli lɛ he. Lois buɔ ewu ni ji eyitso yɛ Ŋmalɛ naa lɛ waa, ni eesumɔ ni ekɛ lɛ afee ekome; shi kɛlɛ, esumɔɔɔ akɛ eŋmɛɔ Ŋmalɛ mli shishitoo mlai ni ebale lɛ ahe. (Bɔfoi lɛ Asaji 5:29) No hewɔ lɛ, etsɔ ŋaa gbɛ nɔ egbala mli etsɔɔ ewu lɛ akɛ kɛ́ lɛ, ni ji ewu lɛ kɛɛ ebaaya po lɛ, lɛ lɛ enyɛŋ eya. Lois baanyɛ agbala mli atsɔɔ ewu lɛ akɛ, kɛ́ ekɛ lɛ tee ni ekɛ ehe wooo nifeemɔi lɛ amli lɛ, ekolɛ no baawo lɛ, ni ji ewu lɛ hiɛgbele, no hewɔ lɛ kɛ́ eyaaa jɛmɛ moŋ lɛ no baahi jogbaŋŋ kɛha lɛ, ni ji ewu lɛ. Lois yiŋ ni ekpɛ lɛ ha ená henilee kpakpa.
12. Kɛ́ afɔ̃ mɔ ko nine kɛha yookpeemɔ yɛ sɔlemɔtsu ko mli lɛ, te ebaanyɛ esusu nii ahe eha tɛŋŋ?
12 Ruth hu kɛ nakai shihilɛ nɔŋŋ kpe. Eji mɔ ni buɔ ewu, ni etswa efai shi akɛ ebaaye Nyɔŋmɔ anɔkwa, ni eboɔ ehenilee ni Biblia lɛ etsɔse lɛ lɛ hu toi. Beni Ruth esusu otii ni Lois susu he lɛ ahe sɛɛ lɛ, ekɛ sɔlemɔ susu “Sanebimɔi ni Jɛ Kanelɔi Adɛŋ” ni je kpo yɛ May 15, afi 2002, Buu-Mɔɔ lɛ mli lɛ he. Ekai akɛ Hebribii etɛ lɛ bo famɔ akɛ amɛya he ni wɔŋjamɔ nifeemɔ lɛ baaya nɔ yɛ lɛ toi, kɛlɛ, amɛnyɛ amɛhiɛ amɛnɔkwayeli lɛ mli ni amɛkɛ amɛhe wooo wɔŋjamɔ nifeemɔ ko mli. (Daniel 3:15-18) Ruth kpɛ eyiŋ akɛ ekɛ ewu baaya, shi ekɛ ehe woŋ jamɔŋ nifeemɔi lɛ eko kwraa mli, ni eefee enii yɛ ehenilee lɛ kɛ gbeekpamɔ naa. Etsɔ ŋaa gbɛ nɔ egbala nɔ ni ehenilee baaŋmɛ lɛ gbɛ ni ekɛ ehe awo mli kɛ nɔ ni ehenilee eŋmɛŋ lɛ gbɛ ni efee lɛ mli faŋŋ eha ewu. Ruth hiɛnɔkamɔ ji akɛ ewu lɛ baana srɔtofeemɔ ni yɔɔ anɔkwa jamɔ kɛ apasa jamɔ teŋ.—Bɔfoi lɛ Asaji 24:16.
13. Mɛni hewɔ esaaa akɛ egbáa wɔnaa akɛ Kristofoi enyɔ baakpɛ amɛyiŋ yɛ gbɛ̀i srɔtoi anɔ lɛ?
13 Ani anɔkwale ni eji akɛ Kristofoi enyɔ baanyɛ akpɛ amɛyiŋ yɛ gbɛ̀i srɔtoi anɔ lɛ tsɔɔ akɛ yiŋ ni mɔ ko kpɛɔ lɛ kɔɔɔ he eko aloo no tsɔɔ akɛ mɛi enyɔ lɛ ateŋ mɔ kome henilee tsuuu nii jogbaŋŋ? Dabi. Akɛni Lois le akɛ be ko ni eho lɛ enyáa lalai kɛ nifeemɔi krokomɛi ni yaa nɔ yɛ sɔlemɔ lɛ mli lɛ ahe hewɔ lɛ, eyɔse akɛ ekolɛ kɛ́ etee jɛmɛ lɛ ebaafee oshara kɛha lɛ. Ni ekolɛ jamɔ he saji ni ekɛ ewu lɛ egba be ko ni eho lɛ baanyɛ aná ehenilee nɔ hewalɛ. No hewɔ lɛ, eyɛ nɔmimaa akɛ yiŋ ni ekpɛ lɛ hi kɛha lɛ.
14. Mɛni esaaa akɛ Kristofoi ahiɛ kpaaa nɔ yɛ saji ni esa akɛ mɔ aŋkro akpɛ eyiŋ yɛ he lɛ ahe?
14 Shi ani yiŋ ni Ruth kpɛ lɛ ejaaa? Mɔ ko mɔ ko bɛ hegbɛ akɛ ekojoɔ lɛ. Esaaa akɛ mɔ ko kojoɔ lɛ loo ewieɔ ehiɛ nyanyaanya akɛ ekpɛ eyiŋ akɛ ebaaya jɛmɛ shi ekɛ ehe woŋ jamɔŋ nifeemɔi lɛ eko kwraa mli. Ohiɛ akakpa ŋaawoo ni Paulo kɛha yɛ yiŋ ni mɔ aŋkro ko kpɛɔ yɛ niyenii ko ni ebaaye loo eyeŋ lɛ he. Eŋma akɛ: “Mɔ ni yeɔ lɛ akagbe mɔ ni yeee lɛ he guɔ, ni mɔ ni yeee lɛ akakojo mɔ ni yeɔ lɛ . . . Lɛ diɛŋtsɛ enuŋtsɔ edamɔɔ shi loo egbeeɔ shi ehaa; shi aaaha edamɔ shi, ejaakɛ Nyɔŋmɔ yɛ hewalɛ ni eeeha edamɔ shi.” (Romabii 14:3, 4) Ekã shi faŋŋ akɛ anɔkwa Kristofonyo ko sumɔŋ akɛ ewo mɔ ko hewalɛ ni eku ehiɛ eshwie ehenilee ni atsɔse lɛ lɛ nɔ, ejaakɛ nakai ní eeefee lɛ baafee tamɔ nɔ ni eetsĩ gbee ko ni baaha ele shɛɛ sane ko ni baahere eyiwala lɛ naa.
15. Mɛni hewɔ esa akɛ wɔkɛ hiɛdɔɔ asusu mɛi krokomɛi ahenilee kɛ amɛhenumɔi ahe lɛ?
15 Yɛ sane ni wɔsusuɔ he nɛɛ nɔtsamɔ mli lɛ, esa akɛ Kristofoi enyɔ lɛ fɛɛ asusu nibii krokomɛi hu ahe, ni nibii nɛɛ ekome ji bɔ ni amɛyiŋkpɛɛ lɛ baaná mɛi krokomɛi anɔ hewalɛ aha. Paulo wo ŋaa akɛ: “Nyɛkojoa, akɛ mɔ ko akato tɛmɔnɔ ko loo pampi ko eha enyɛmi.” (Romabii 14:13) Ekolɛ Lois le akɛ shihilɛi ni tamɔ nakai egbá mɛi anaa yɛ asafo ni eyɔɔ mli lɛ mli loo yɛ eweku lɛ mli, ni bɔ ni ekpɛɔ eyiŋ ehaa lɛ baanyɛ aná ebii lɛ anɔ hewalɛ waa. Nɔ ni tamɔɔɔ nakai lɛ, ekolɛ Ruth le akɛ mɛi komɛi kpɛ yiŋ ni tamɔ nakai, ni enɛ gbaaa asafo lɛ loo ekutsoŋbii lɛ anaa. Esa akɛ yei enyɔ lɛ—ni wɔ fɛɛ wɔfata he lɛ—ayɔse akɛ henilee ni atsɔse lɛ jogbaŋŋ lɛ hiɛ hiɔ ehe nɔ yɛ hewalɛ ni wɔnifeemɔi baanyɛ aná yɛ mɛi krokomɛi anɔ lɛ he. Yesu kɛɛ akɛ: “Mɔ ni tɔ̃tɔɔ bibii nɛɛ ateŋ mɔ kome ni heɔ minɔ yeɔ lɛ nane lɛ, faŋ nɔ ni akɛ teji-wiɛ ŋmɔ ekuɛ ni aŋɔ lɛ awo ŋshɔŋ.” (Mateo 18:6) Kɛ́ mɔ ko kũ ehiɛ eshwie nɔ akɛ enifeemɔ baanyɛ atɔ̃tɔ mɛi krokomɛi anaji lɛ, no lɛ ehenilee lɛ he baawo muji, taakɛ Kristofoi ni hi Kreta lɛ ateŋ mɛi komɛi ahenilee wo muji lɛ.
16. Beni be shwieɔ mli lɛ, mɛɛ tsakemɔi wɔbaanyɛ wɔkpa gbɛ akɛ Kristofonyo baafee?
16 Esa akɛ Kristofonyo aha wekukpãa ni kã ekɛ Nyɔŋmɔ teŋ lɛ aya nɔ emli awa, tamɔ bɔ ni esa akɛ eha bɔ ni eboɔ ehenilee toi ni etsuɔ he nii lɛ aya hiɛ lɛ nɔŋŋ. Nyɛhaa wɔsusua Mark, ni nyɛsɛɛ nɛɛ nɔŋŋ abaptisi lɛ lɛ he wɔkwɛa. Ehenilee kɛɔ lɛ akɛ etsi ehe kɛjɛ nifeemɔi komɛi ni kɛ ŋmalɛ lɛ kpãaa gbee, ekolɛ nibii ni kɔɔ amagai loo lá he, ni be ko ni eho lɛ ekɛ ehe wo mli lɛ ahe. (Bɔfoi lɛ Asaji 21:25) Yɛ anɔkwale mli lɛ, amrɔ nɛɛ ekwɛɔ ehe nɔ jogbaŋŋ yɛ nibii po ni miihe atamɔ nibii ni Nyɔŋmɔ guɔ lɛ ahe ni etsiɔ ehe kɛjɛɔ he. Yɛ gbɛ kroko nɔ lɛ, enuuu nɔ̃ hewɔ ni mɛi komɛi kpooɔ nibii komɛi tamɔ tɛlivishiŋ nɔ nifeemɔi komɛi ni enaa akɛ tɔmɔ ko bɛ he lɛ shishi.
17. Tsɔɔmɔ bɔ ni beni be shwieɔ mli ni wekukpãa ni kã Kristofonyo ko kɛ Nyɔŋmɔ teŋ lɛ mli waa lɛ, no baanyɛ aná ehenilee kɛ eyiŋkpɛi anɔ hewalɛ aha lɛ mli.
17 Beni be shwie mli lɛ, Mark nilee tee hiɛ ni ebɛŋkɛ Nyɔŋmɔ kpaakpa. (Kolosebii 1:9, 10) Mɛni jɛ mli kɛba? Ehenilee lɛ ná tsɔsemɔ babaoo. Amrɔ nɛɛ Mark efee klalo akɛ ebaabo ehenilee lɛ toi be fɛɛ be, ní esusu Ŋmalɛ naa shishitoo mlai lɛ ahe jogbaŋŋ. Yɛ anɔkwale mli lɛ, eyɔse akɛ nibii komɛi ni “miihe atamɔ nibii ni Nyɔŋmɔ guɔ lɛ” ni etsi ehe kɛjɛ he lɛ jeee nibii ni kɛ Nyɔŋmɔ susumɔ kpãaa gbee diɛŋtsɛ. Kɛfata he lɛ, akɛni Mark enu Biblia mli shishitoo mlai lɛ ashishi jogbaŋŋ ni eesumɔ hu akɛ ekɛ nɔ ni ehenilee ni atsɔse lɛ jogbaŋŋ lɛ kɛɔ lɛ lɛ atsu nii hewɔ lɛ, amrɔ nɛɛ ehenilee tsirɛɔ lɛ koni ekpoo tɛlivishiŋ nɔ nifeemɔi ni be ko ni eho lɛ enuɔ he akɛ tɔmɔ ko bɛ he lɛ. Hɛɛ, ehenilee miitsu nii jogbaŋŋ fe tsutsu lɛ.—Lala 37:31.
18. Mɛni hewɔ esa akɛ wɔná miishɛɛ lɛ?
18 Yɛ asafoi babaoo amli lɛ, ayɛ aŋkroaŋkroi ni esoro bɔ ni amɛteŋ mɔ fɛɛ mɔ etee hiɛ eha ákɛ Kristofonyo. Amɛteŋ mɛi komɛi ji mɛi heei yɛ asafo lɛ mli. Ekolɛ amɛhenilee lɛ kɛ amɛ ewieee yɛ saji komɛi ahe, shi enáa bɔ ni amɛkpɛɔ amɛyiŋ yɛ saji krokomɛi ahe lɛ nɔ hewalɛ waa. Ekolɛ ehe baahia ni aye abua mɛi nɛɛ koni beni be shwieɔ mli lɛ amɛnu Yehowa gbɛtsɔɔmɔ shishi jogbaŋŋ, ni amɛkɛ nɔ ni amɛ diɛŋtsɛ amɛhenilee ni atsɔse lɛ jogbaŋŋ lɛ kɛɔ amɛ lɛ atsu nii. (Efesobii 4:14, 15) Miishɛɛ sane ji akɛ yɛ nakai asafoi lɛ nɔŋŋ amli lɛ, ekolɛ ayɛ mɛi babaoo ni amɛnilee etee hiɛ, amɛkɛ Biblia mli shishitoo mlai lɛ etsu nii be saŋŋ, ni amɛhenilee kɛ Nyɔŋmɔ susumɔ kpãa gbee diɛŋtsɛ. Kwɛ miishɛɛ ni eji ákɛ wɔkɛ “mɛi ni he tse” ni tamɔ nɛkɛ ni buɔ nibii ni sa Nuŋtsɔ lɛ hiɛ lɛ akɛ nibii ni “he tse” yɛ jeŋba kɛ mumɔŋ lɛ aaabɔ! (Efesobii 5:10) Eba akɛ wɔ fɛɛ wɔkɛaafee oti ni ma wɔhiɛ akɛ wɔbaada kɛshɛ mumɔŋ dalɛ ni tamɔ nakai lɛ he, ni wɔya nɔ wɔhiɛ henilee ni tamɔ nɛkɛ ni kɛ anɔkwale lɛ he nilee krɔŋŋ kɛ Nyɔŋmɔjamɔ hetuu-kɛhamɔ kpãa gbee lɛ mli.—Tito 1:1.
[Shishigbɛ niŋmaa]
^ kk. 8 Blɔfo Buu-Mɔɔ ni je kpo yɛ March 15, afi 1983 lɛ baafa 30-31 lɛ kɛ saji ni esa akɛ asusu he ni kɔɔ gbalashihilɛ mli hefatalɔi ahe lɛ haa.
Te Obaaha Hetoo Oha Tɛŋŋ?
• Mɛni hewɔ Kristofoi ni hi shi yɛ Kreta lɛ ateŋ mɛi komɛi ahenileei ahe ewo muji lɛ?
• Mɛni hewɔ Kristofoi enyɔ ni yɔɔ henilee ni atsɔse lɛ jogbaŋŋ lɛ baanyɛ akpɛ amɛyiŋ yɛ gbɛ́i srɔtoi anɔ lɛ?
• Beni be shwieɔ mli lɛ, mɛni esa akɛ wɔhenilee lɛ anyɛ afee?
[Nikasemɔ lɛ he Sanebimɔi]
[Shikpɔŋ he mfoniri ni yɔɔ baafa 26]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Sicily
HELA
Kreta
ASIA BIBIOO
Kipro
MEDITERANEA ŊSHƆ
[Mfoniri ni yɔɔ baafa 28]
Ekolɛ Kristofoi enyɔ ni kɛ shihilɛ kome too lɛ nɔŋŋ miikpe lɛ baakpɛ amɛyiŋ yɛ gbɛ̀i srɔtoi anɔ