Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Ákɛ Kristofonyo lɛ, kɛ́ osuɔlɔ ko kpa Yehowa sɔɔmɔ lɛ, mɛni baanyɛ aye abua bo ni onyɛ dɔlɛ lɛ naa odamɔ?

Ebaabi ni oha bo kɛ oweku lɛ mlibii krokomɛi ni kã he amɛmiisɔmɔ Yehowa lɛ anane amɔ shi. Okɛ ohe awo Nyɔŋmɔjamɔ nifeemɔi amli kɛmɔ shi. Okɛ ohe aha kɛye obua mɛi krokomɛi. Ná hiɛnɔkamɔ akɛ ekolɛ osuɔlɔ ni eshi anɔkwale lɛ baaku esɛɛ eba ekoŋŋ. Kaashwa bo diɛŋtsɛ ohe. Ná bulɛ oha Nyɔŋmɔ tsɔsemɔ gbɛjianɔtoo lɛ, ni oha onanemɛi ale bɔ ni onuɔ he ohaa.—9/1, baafa 18-21.

• Mɛni ji gbɛ̀i enyɔ nɔ ní Ŋmalɛi lɛ yeɔ buaa wɔ ni wɔnaa akɛ wɔyɛ “naagbee gbii lɛ” amli?

Biblia lɛ gba nibii komɛi ni baaya nɔ yɛ “je nɛŋ naagbee” lɛ ahe sane efɔ̃ shi. (Mateo 24:3, 7, 8; Luka 21:11) Kɛfata he lɛ, ewieɔ bɔ ni mɛi ni baahi “naagbee gbii lɛ” amli lɛ ajeŋba kɛ nifeemɔi baatsake aha lɛ he. (2 Timoteo 3:1-5) Nɔ ni sa kadimɔ ji akɛ, abaashiɛ maŋtsɛyeli lɛ he sanekpakpa lɛ hu atsɔɔ yɛ nakai be lɛ mli.—9/15, baafa 4-6.

• Kɛ́ Kristofonyo miikudɔ tsɔne ni eyaná oshara ní mɔ ko gbo lɛ, mɛni esa akɛ asafo lɛ afee?

Ekolɛ asafoŋ onukpai ni bote sane lɛ mli lɛ baana akɛ ayeko láyisɔ̃ ejaakɛ nɔ ko bɛ ni tsɔne kudɔlɔ lɛ baanyɛ afee yɛ oshara ni kɛ gbele lɛ ba lɛ he. Shi kɛ́ aye láyisɔ̃ ni mɔ ni eye láyisɔ̃ lɛ shwa ehe lɛ, no lɛ abaajɛ Ŋmalɛi lɛ amli akɛ kãmɔ ni sa aha lɛ, ni abaatsĩ enaa yɛ hegbɛi komɛi ni yɔɔ asafo lɛ mli lɛ he.—9/15, baafa 30.

• Mɛni hewɔ naanɔ wala námɔ damɔɔɔ hiɛyaa ni aaaná yɛ adebɔɔ nibii ahe nikasemɔ mli lɛ nɔ lɛ?

Nilelɔi ni kaseɔ nibii ni wala yɔɔ amɛmli lɛ ahe nii lɛ miibɔ mɔdɛŋ akɛ amɛaanyɛ amɛha adesai awala sɛɛ atsɛ fe bɔ ni eyɔɔ amrɔ nɛɛ loo kɛtsɔ mɔdɛŋ ni amɛbɔɔ akɛ amɛha shii abɔ ni wala yibii lɛ yaa nɔ amɛfeɔ ehee lɛ sɛɛ akafo lɛ nɔ, kɛ agbɛnɛ hu kɛtsɔ wala yibii lɛ eko ni amɛjieɔ kɛfeɔ mlɛbo, sabai, loo tsuii ní kɛ helatsɛmɛi lɛ anɔ̃ baaye egbɔ pɛpɛɛpɛ koni kɛ́ helatsɛmɛi lɛ anɔ̃ lɛ fite lɛ, amɛkɛ nɔ ni amɛfee lɛ aye najiaŋ lɛ nɔ. Shi Biblia lɛ tsɔɔ akɛ, Yesu kpɔmɔnɔ lɛ pɛ nɔ adesai baanyɛ atsɔ amɛná naanɔ wala.—10/1, baafa 3-5.

• Ani Yudafoi akusum naa hejuu kɛ Kristofoi abaptisimɔ ba?

Hetoo lɛ ji dabi. Yudafoi lɛ diɛŋtsɛ ni tsuuɔ amɛhe. Kɛlɛ, yɛ baptisimɔ ni Yohane tsu he nii lɛ gbɛfaŋ lɛ, jeee mɛi lɛ diɛŋtsɛ baptisiɔ amɛhe. Mose Mla ni kɔɔ hetsuumɔ he lɛ biɔ ni be fɛɛ be ni jálɔ ko kɛ ehe baawo nifeemɔ ko ni he tseee mli lɛ, etsuu ehe, shi shikome pɛ abaptisiɔ Kristofonyo.—10/15, baafa 12-13.

• Mɛni ji Sɔɔlɔi Atsɔsemɔ Skul lɛ?

Eji skul ko ni akɛ otsii kpaanyɔ feɔ, ni mɛi ni afeɔ ahaa ji asafoŋ onukpai kɛ sɔɔlɔi ni boteko gbalashihilɛ mli ní abaanyɛ aha amɛyasɔmɔ yɛ hei ni hiamɔ lɛ da yɛ. Abaanyɛ aha amɛsɔmɔ yɛ asafoi ni amɛyɔɔ mli lɛ amli, loo amɛyasɔmɔ yɛ amɛmaŋ lɛ mli he kroko, aloo yɛ maŋ kroko mli.—11/15, baafa 10-11.

• Namɔ loo mɛni ji antikristo ni atsĩ ta yɛ 1 Yohane 2:18; 4:3 lɛ?

Yɛ shishinumɔ ni mli lɛɛ naa lɛ, wiemɔ “antikristo” lɛ kɔɔ mɛi fɛɛ ni teɔ shi woɔ Kristo, mɛi fɛɛ ni kwaa amɛtsɛ́ɔ amɛhe Kristo loo mɛi fɛɛ ni kwaa amɛfeɔ amɛhe Kristo najiaŋdamɔlɔi lɛ ahe. Nɔ ni Yesu kɛ Yohane fɛɛ wie lɛ feɔ lɛ faŋŋ akɛ jeee mɔ kome pɛ feɔ antikristo lɛ, shi moŋ eji kuu ni aŋkroaŋkroi babaoo yɔɔ mli ní gbɛɔ jamɔŋ amalei amɛshwãa ni asaŋ amɛkpoɔ Nyɔŋmɔ Maŋtsɛyeli lɛ.—12/1, baafa 4-6.