Mɛni Hewɔ Esa akɛ Ale Antikristo Lɛ?

Akɛ mumɔ tsirɛ bɔfo Yohane ni eŋma akɛ: “Nyɛnu akɛ antikristo lɛ miiba.” (1 Yohane 2:18) Kwɛ bɔ ni wiemɔi nɛɛ mɔɔ mɔ jwɛŋmɔ ha! Adesai kɛ afii ohai abɔ esusu nɔ ni wiemɔi nɛɛ tsɔɔ lɛ he. Namɔ ji antikristo lɛ? Mɛɛ be ebaaba? Kɛ́ eba lɛ mɛni ebaafee?

ATSƐ́ mɛi pii akɛ antikristo yɛ afii ni eho lɛ amli. Mɛi ni atsɛ amɛ akɛ “antikristo” yɛ blema lɛ ateŋ mɛi komɛi ji Yudafoi, Katolik paapai, kɛ Roma nɔyelɔi. Ákɛ nɔkwɛmɔnɔ lɛ, beni Maŋtsɛ Frederick II (1194-1250) kpoo akɛ ekɛ ehe aaawo ta ni sɔlemɔ lɛ wuɔ yɛ Kristo gbɛi amli lɛ mli lɛ, Paapa Gregory IX tsɛ́ lɛ akɛ antikristo, ni eshwie lɛ kɛjɛ sɔlemɔ lɛ mli. Innocent IV ní ye Paapa yɛ Gregory sɛɛ lɛ sáa eshwie Maŋtsɛ lɛ kɛjɛ sɔlemɔ lɛ mli ekoŋŋ. Enɛ hewɔ lɛ, Frederick tsɛ́ Innocent akɛ antikristo.

Bɔfo Yohane pɛ ji Biblia ŋmalɔ ni kɛ wiemɔ “antikristo” lɛ tsu nii. Wiemɔ nɛɛ je kpo shii enumɔ yɛ woji ni egbɛi kã nɔ lɛ enyɔ mli, ni ekɔɔ mɔ kome kɛ mɛi pii ahe. Ato ŋmalɛi ni ekɛ wiemɔ nɛɛ tsu nii yɛ mli lɛ anaa yɛ akrabatsa ni yɔɔ baafa ni nyiɛ sɛɛ lɛ mli. Ŋmalɛi nɛɛ tsɔɔ akɛ antikristo lɛ ji amalelɔ kɛ shishiulɔ, ni etswa efai shi akɛ ebaafite wekukpaa ni kã anɔkwa Kristofoi kɛ Kristo kɛ Nyɔŋmɔ teŋ lɛ. No hewɔ lɛ, bɔfo lɛ wo enanemɛi Kristofoi lɛ hewalɛ akɛ: “Suɔmɔmɛi, nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo; ejaakɛ amale gbalɔi pii eje kpo kɛba je lɛ mli.”—1 Yohane 4:1.

Yesu hu bɔ kɔkɔ yɛ shishiulɔi loo osato gbalɔi ahe, ni ekɛɛ akɛ: “Amɛŋɔɔ too wolo amɛhàa amɛhe kɛbaa nyɛŋɔɔ, shi amɛmligbɛ lɛ klaji fulɔi ji amɛ. Amɛyibii [loo amɛnitsumɔi] lɛ nyɛkɛaale amɛ.” (Mateo 7:15, 16) Ani Yesu miibɔ esɛɛnyiɛlɔi lɛ kɔkɔ yɛ antikristo lɛ he? Nyɛhaa wɔkwɛa bɔ ni wɔɔfee wɔyɔse yiwalɔ kɛ shishiulɔ nɛɛ.