Mɛɛ Gbɛ Nɔ Oootsɔ Oná Nyɔŋmɔ He Nilee?

Ekolɛ Mɛi Komɛi Heee Amɛyeee Akɛ Nyɔŋmɔ Yɛ He Miishɛɛ Diɛŋtsɛ Akɛ Eeeha Adesai Ale Lɛ. Kɛ́ Eesumɔ Koni Amɛle Lɛ Lɛ, Belɛ Mɛni Efee Bɔni Afee Ni Amɛnyɛ Amɛfee Nakai?

PROTESTANTNYO Jamɔ Hiɛtsakelɔ John Calvin ni hi shi yɛ afi 1500 afii lɛ amli lɛ mu sane naa yɛ gbɛ ni ja nɔ akɛ, bɔ ni Nyɔŋmɔ jieɔ ehe shi etsɔɔ adesai lɛ anɔ kɛkɛ amɛbaanyɛ amɛtsɔ amɛle lɛ, shi jeee kɛtsɔ amɛ diɛŋtsɛ amɛmɔdɛŋbɔi anɔ. Shi ekolɛ, mɛi komɛi ayiŋ etɛ̃ɛɛ amɛ kɛji Nyɔŋmɔ yɛ he miishɛɛ diɛŋtsɛ akɛ eeeha adesai ale lɛ. Shi sane lɛ ji kɛ́ eesumɔ ni amɛle lɛ lɛ, belɛ mɛni efee bɔni afee ni amɛnyɛ amɛfee nakai?

Yehowa ni ji ‘Bɔlɔ Kpeteŋkpele’ lɛ efeee nɔ ko yaka. Kɛfata he lɛ, ákɛ “Nyɔŋmɔ Ofe lɛ,” enyɛɔ etsuɔ eyiŋtoi ahe nii kɛmɔɔ shi. (Jajelɔ 12:1; 2 Mose 6:3) Wɔbaanyɛ wɔná nɔmimaa akɛ eesumɔ ni eha adesai ale eyiŋtoi lɛ, ejaakɛ ekɛ emumɔ lɛ tsirɛ egbalɔ Amos ni eŋma akɛ: “Nuŋtsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ, dã.” Shi kadimɔ akɛ, mɛi pɛ ni akɛɛ Nyɔŋmɔ jieɔ eyiŋtoi akpo etsɔɔ ji etsuji ni ji mɛi ni kɛ tsui krɔŋŋ sumɔɔ lɛ lɛ. Ani nilee bɛ enɛ mli? Namɔ okɛyeɔ oyitsoŋ sane? Ani mɔ fɛɛ mɔ kɛkɛ, aloo onanemɛi ni osumɔɔ amɛsane jogbaŋŋ lɛ?—Amos 3:7; Yesaia 40:13, 25, 26.

Ŋaalee kɛ nilee ni Nyɔŋmɔ yɔɔ lɛ haa adesai heshibalɔi lɛ anaa kpɛɔ amɛhe, ni tɔmɔ bɛ he akɛ ebaalɛ nakai. Kɛlɛ, kɛji ŋaalee kɛ nilee ni Nyɔŋmɔ haa anáa lɛ he aaaba sɛɛnamɔ kɛha wɔ ákɛ aŋkroaŋkroi lɛ, no lɛ ebaabi ni wɔfee babaoo fe wɔnaa kɛkɛ ni aaakpɛ wɔhe yɛ eŋaalee kɛ nilee lɛ hewɔ. Biblia lɛ maa nɔ mi akɛ ehe miihia ni wɔba wɔhe shi bɔni afee ni wɔnyɛ wɔle Nyɔŋmɔ susumɔi lɛ. Ekɛɛ akɛ: ‘Mɔ miwiemɔi lɛ amli. Ba otoi shi oha nilee. Okɛ otsui aha sanesɛɛkɔmɔ; Bolɔmɔ otsɛ́ sɛɛyoomɔ, ni owó ogbee nɔ oha saneshishinumɔ. Taomɔ esɛɛ gbɛ tamɔ jwiɛtɛi.’—Abɛi 2:1-4.

Yɛ anɔkwale mli lɛ, mɔ ni baa ehe shi ní ebɔɔ mɔdɛŋ yɛ gbɛ ni tamɔ nɛkɛ nɔ lɛ baale Nyɔŋmɔ. Nakai ŋmalɛ ni jeɔ kpo yɛ Abɛi awolo lɛ mli lɛ kɛfata he akɛ: “Yehowa haa aleɔ nii, edaaŋ nilee kɛ sanesɛɛkɔmɔ jɛɔ.” Hɛɛ, mɛi ni kɛ tsui krɔŋŋ taoɔ anɔkwale lɛ “[baa]nu jalɛ kɛ kojomɔ kɛ nɔ ni ja, gbɛ kpakpa fɛɛ gbɛ kpakpa shishi.”—Abɛi 2:6-9.

Anɔkwale lɛ Taomɔ

Wolo ni ji The Encyclopedia of Religion lɛ wie akɛ: “Yɛ adesai ashihilɛ mli lɛ, amɛsumɔɔ ni kɛ́ nibii enyɔ jwere shi lɛ, amɛna emli nɔ ni hi kɛ nɔ ni ehiii, nɔ ni yɔɔ hewalɛ kɛ nɔ ni bɛ hewalɛ, ŋmiiŋmi kɛ nɔ ni afutu mli, ni kɛ́ saji enyɔ ni lɛ, amɛsumɔɔ ni amɛle emli nɔ ni ji anɔkwale kɛ amale, nɔ ni shishinumɔ yɔɔ faŋŋ kɛ nɔ ni futuɔ mɔ yiŋ, kɛ agbɛnɛ hu he ni kɛ́ mɔ fee nii kɛshɛ ni abaanyɛ akɛɛ akɛ ehi kɛ nɔ ni no lɛ, abaanyɛ akɛɛ akɛ efee fe nine.” Blema tɔ̃ɔ mɛi bɔi anɔkwale lɛ taomɔ bɔni afee ni amɛna saji nɛɛ anaa. Anɔkwale ni amɛtaoɔ nɛɛ eha amɛgbala amɛjwɛŋmɔ kɛtee Yehowa ní lalatsɛ lɛ wie ehe akɛ “Nyɔŋmɔ anɔkwafo” lɛ nɔ ákɛ amɛaanyɛ amɛle anɔkwalei ni kɔɔ ehe lɛ lo, ni amɛye omanye babaoo yɛ anɔkwale nɛɛ ni amɛtaoɔ lɛ mli.—Lala 31:6.

Hebri gbɛi ni atsɔɔ shishi akɛ Yehowa lɛ shishi diɛŋtsɛ ji “Ehaa Ebaa Mli.” (1 Mose 2:4)  No hewɔ lɛ, Nyɔŋmɔ gbɛi lɛ shishinumɔ diɛŋtsɛ gbalaa jwɛŋmɔ kɛyaa Bɔlɔ ni eji kɛ eyiŋtoi lɛ anɔ. Yɛ anɔkwale mli lɛ, nɔ kome ni akɛkadiɔ anɔkwa jamɔ ji akɛ, emlibii lɛ le gbɛi ni ji Yehowa lɛ, ni amɛkɛtsuɔ nii hu. Yesu le enɛ jogbaŋŋ. Beni esɔleɔ yɛ ekaselɔi lɛ ahe lɛ, ekɛɛ Nyɔŋmɔ akɛ: “Mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛsumɔ mi lɛ ahi amɛmli, ni mi hu mahi amɛmli.”—Yohane 17:26.

Beni ehe bahia ni Hebrinyo ni atsɛɔ lɛ Yosef ni hi shi yɛ blema lɛ atsɔɔ lamɔi komɛi ashishi lɛ, akɛni eshieŋtsɛ ji Nyɔŋmɔ hewɔ lɛ, ekɛ nɔmimaa bi akɛ: “Ani shishitsɔɔmɔ lɛ jeee Nyɔŋmɔ nɔ̃ŋ?”—1 Mose 40:8; 41:15, 16.

Afii babaoo komɛi asɛɛ lɛ, Babilon Maŋtsɛ Nebukadnezar la lamɔ ko, ni enilelɔi lɛ nyɛɛɛ shishi atsɔɔ. Gbalɔ Daniel kɛɛ maŋtsɛ lɛ akɛ: “Nyɔŋmɔ ko yɛ ŋwɛi ní jieɔ teemɔŋ saji ashi, ni eeetsɔɔ maŋtsɛ Nebukadnezar nɔ ni baaba wɔsɛɛ.”—Daniel 2:28.

Yosef kɛ Daniel sane lɛ haa wɔnaa akɛ, Nyɔŋmɔ kɛ eŋaalee kɛ enilee lɛ duroɔ mɛi pɛ ni sɔmɔɔ Yehowa Nyɔŋmɔ lɛ. Yɛ anɔkwale mli lɛ, Nyɔŋmɔ hiɛ duromɔ ni wɔɔná lɛ baabi ni ekolɛ wɔŋmɛɛ susumɔi komɛi ni wɔhiɛ be ko lɛ ahe wɔshwie shi. Ehe bahia ni Yudafoi ni hi shi yɛ klɛŋklɛŋ afii 100 lɛ mli ní batsɔmɔ Kristofoi lɛ afee nakai. Akɛni atsɔse amɛ koni amɛbu mlai ni akɛha Yudafoi lɛ ni asaŋ amɛhi shi yɛ naa hewɔ lɛ, ehe bahia koni amɛná be kɛkpɛlɛ Yesu nɔ akɛ lɛ ji Mesia lɛ. Lɛ ebawo Mose Mla ni ji “nii kpakpai ni baaba lɛ asusuma” lɛ obɔ̃ lɛ. (Hebribii 10:1; Mateo 5:17; Luka 24:44, 45) Akɛ “Kristo mla” ní nɔ kwɔ kwraa fe Mose Mla lɛ baye Mose nɔ̃ lɛ najiaŋ.—Galatabii 6:2; Romabii 13:10; Yakobo 2:8.

Afɔ́ wɔ fɛɛ awo jeŋ ko ni emlibii lɛ etsi amɛhe kɛjɛ Nyɔŋmɔ he lɛ mli. Yɛ esha ni wɔná kɛjɛ klɛŋklɛŋ adesai enyɔ lɛ adɛŋ hewɔ lɛ, afɔ́ wɔ akɛ mɛi ni nyɛ̃ɛ kã wɔkɛ Nyɔŋmɔ teŋ, ni wɔbɛ eyiŋtoi lɛ ahe anɔkwa nilee. Kɛfata he lɛ, wɔtsui hu eyi tɔ kɛ kutumpɔo. (Yeremia 17:9; Efesobii 2:12; 4:18; Kolosebii 1:21) Bɔni afee ni wɔtsɔmɔ Nyɔŋmɔ shieŋtsɛmɛi lɛ, esa akɛ wɔsusu nii ahe taakɛ Nyɔŋmɔ feɔ lɛ. Enɛ feemɔ bɛ mlɛo.

Ekolɛ ebaawa kɛha wɔ akɛ wɔɔŋmɛɛ apasa jamɔ susumɔi kɛ nifeemɔi komɛi ahe, titri lɛ, kɛ́ wɔgbekɛbiiashi tɔ̃ɔ ajɛ adũ enɛɛmɛi awo wɔmli. Shi ani nilee yɛ mli akɛ wɔɔya nɔ wɔnyiɛ nakai gbɛ fɔŋ lɛ nɔ? Ekã shi faŋŋ akɛ dabi! Yɛ anɔkwale mli lɛ, nilee yɛ mli akɛ mɔ aaafee tsakemɔi yɛ bɔ ni esusuɔ nii ahe ehaa lɛ mli bɔni afee ni ená Nyɔŋmɔ hiɛ duromɔ.

 Yɔsemɔ Gbɛ̀i Anɔ ni Nyɔŋmɔ Tsɔɔ Ekɛ Tsɔsemɔ Haa Lɛ

Namɔ baaye ebua wɔ ni wɔnu anɔkwa Wiemɔ lɛ shishi ni asaŋ wɔhi shi yɛ naa? Yɛ blema Israel lɛ, Nyɔŋmɔ kɛ nitsumɔ wo aŋkroaŋkroi komɛi ni yeɔ anɔkwa ní anyɛɔ akɛ he fɔ̃ɔ amɛnɔ lɛ adɛŋ koni amɛnyiɛ maŋ lɛ hiɛ. Nakai nɔŋŋ Kristo ni ji Kristofoi asafo ni yɔɔ ŋmɛnɛ lɛ Yitso lɛ nyiɛɔ mɛi ni kɛ tsui krɔŋŋ taoɔ anɔkwale lɛ ahiɛ. Etsuɔ enɛ he nii kɛtsɔ esɛɛnyiɛlɔi anɔkwafoi ni anyɛɔ akɛ he fɔ̃ɔ amɛnɔ lɛ anɔ, ni amɛnɔ atsɔɔ akɛ gbɛtsɔɔmɔ kɛ hebuu haa mɛi ni kɛ hiɛdɔɔ taoɔ anɔkwale lɛ. (Mateo 24:45-47; Kolosebii 1:18) Shi te aaafee tɛŋŋ ni mɔ aaayɔse gbɛ ni Nyɔŋmɔ tsɔɔ nɔ ekɛ tsɔsemɔ haa lɛ?

Anɔkwa Kristofoi bɔɔ mɔdɛŋ koni amɛjie sui ni Yesu Kristo jie lɛ kpo beni eji adesa lɛ ekomɛi akpo. Sui nɛɛ ni haa wekukpãa kpakpa hiɔ mɔ kɛ Nyɔŋmɔ teŋ ní amɛjieɔ lɛ kpo yɛ jeŋ ni efɔŋfeemɔ yaa nɔ emli woɔ wu nɛɛ mli lɛ haa esoroɔ amɛ, ni enɛ hewɔ lɛ, ewaaa kwraa akɛ aaayɔse amɛ. (Kwɛmɔ akrabatsa ni yɔɔ baafa 6 lɛ mli.) Ani nyɛjamɔ lɛ mlibii kɛ agbɛnɛ hu jamɔi ni okutsoŋbii lɛ yɔɔ mli lɛ amlibii jieɔ sui nɛɛ akpo? Ooofee jogbaŋŋ akɛ okɛ Biblia lɛ aaatsu nii kɛtao sane nɛɛ mli.

Wɔmiiwo bo hewalɛ koni ofee nakai kɛtsɔ Biblia lɛ ni oooha akɛ bo akase lɛ nɔ. Kɛ́ aja mli lɛ, yɛ nyɛsɛɛ afi lɛ mli lɛ, mɛi fe 6,000,000 ni yɔɔ shikpɔji 235 nɔ lɛ kpɛlɛ ni Yehowa Odasefoi kɛ amɛ kase Biblia lɛ. Nyɔŋmɔ he nilee kɛ eŋaalee ní mɔ aaaná lɛ ji nifeemɔ ko ni yɔɔ miishɛɛ ni haa mɔ tsui hu nyɔɔ emli. Eji nifeemɔ ko ni atsuɔ he nii daa. Mɛni hewɔ okɛ ohe wooo nifeemɔ ni baaha oná Nyɔŋmɔ he nilee kɛ eŋaalee lɛ eko lɛ mli? Oshwaŋ ohe kɔkɔɔkɔ akɛ okɛ ohe wo nifeemɔ ni tamɔ nakai mli. Hɛɛ, wɔbaanyɛ wɔle Nyɔŋmɔ!

[Akrabatsa ni yɔɔ baafa 6]

GBƆMƐI NI AMƐNIFEEMƆI SAA NYƆŊMƆ HIƐ LƐ . . . 

kɛ amɛhe wooo tai ni awuɔ yɛ maŋkwramɔŋ saji ahewɔ lɛ amli.—Yesaia 2:4.

woɔ yibii kpakpai kɛtsɔ Nyɔŋmɔ suɔmɔnaa nifeemɔ nɔ.—Mateo 7:13-23.

jieɔ suɔmɔ diɛŋtsɛ kpo amɛtsɔɔ amɛhe. —Yohane 13:35; 1 Yohane 4:20.

wieɔ kɛ gbee kome yɛ he fɛɛ he. —Mika 2:12.

ekaseee mɛi ni yɔɔ je lɛŋ lɛ anifeemɔi kɛ jeŋba gbohii lɛ.—Yohane 17:16.

yeɔ anɔkwale lɛ he odase ni amɛfeɔ kaselɔi.—Mateo 24:14; 28:19, 20.

kpeeɔ daa koni amɛwowoo amɛhe hewalɛ.—Hebribii 10:25.

jɛ maji srɔtoi anɔ ni amɛkɛ gbee kome jieɔ Nyɔŋmɔ yi.—Kpojiemɔ 7:9, 10.

[Mfonirii ni yɔɔ baafa 7]

Mɔ nine shɛɔ Nyɔŋmɔ he nilee nɔ kɛtsɔ aŋkroaŋkroi, wekui, kɛ asafo lɛ nɔ