Mɛni Ji “Naagbee Gbii Lɛ”?

ANI osusuɔ bɔ ni bo kɛ osuɔlɔi ashihilɛ baaji aha wɔsɛɛ lɛ he? Mɛi pii boɔ adafitswai srɔtoi atoi bɔni afee ni amɛkɛna bɔ ni nibii ni yaa nɔ yɛ je lɛŋ lɛ baanyɛ asa amɛshihilɛ he aha. Kɛlɛ, Nyɔŋmɔ Wiemɔ ni atsɔ emumɔ lɛ nɔ aŋma lɛ toi ni wɔɔbo lɛ baaha wɔnu nibii ashishi diɛŋtsɛ. Nɔ hewɔ ji akɛ, blema tɔ̃ɔ Biblia lɛ jɛ egba nibii ni yaa nɔ amrɔ nɛɛ kɛ nɔ ni baaba wɔsɛɛ lɛ ahe sane efɔ̃ shi.

Ákɛ nɔkwɛmɔnɔ lɛ, beni Yesu Kristo yɔɔ shikpɔŋ nɔ lɛ, ewie nibii babaoo yɛ Nyɔŋmɔ Maŋtsɛyeli lɛ he. (Luka 4:43) Taakɛ eji lɛ, mɛi ni nu saji ni ewie lɛ tao koni amɛle be ni nakai Maŋtsɛyeli ni nɔ̃ bɛ lɛ baaba. Yɛ anɔkwale mli lɛ, beni eshwɛ gbii etɛ dani abaagbe Yesu yɛ gbɛ ni ejaaa nɔ lɛ, ekaselɔi lɛ yabi lɛ akɛ: “Mɛni ji obaa [yɛ Maŋtsɛyeli mli] lɛ kɛ je nɛŋ naagbee lɛ he okadi?” (Mateo 24:3) Yesu ha amɛle akɛ Yehowa Nyɔŋmɔ pɛ le be tuuntu ni Maŋtsɛyeli lɛ baakpele shikpɔŋ nɔ fɛɛ. (Mateo 24:36; Marko 13:32) Shi kɛlɛ, Yesu kɛ mɛi krokomɛi gba nibii komɛi ni baaya nɔ yɛ shikpɔŋ lɛ nɔ ní baaha ana akɛ Kristo ebɔi Maŋtsɛyeli.

Shi dani wɔɔsusu nibii ni yaa nɔ ni wɔkɛ wɔhiŋmɛi miina ní yeɔ odase akɛ wɔyɛ je nɛɛ “naagbee gbii lɛ” amli lɛ ahe lɛ, klɛŋklɛŋ nyɛhaa wɔsusua sane ko ni he hiaa waa ni tee nɔ yɛ mumɔi ashihilɛhe lɛ yɛ ŋwɛi lɛ ahe kuku wɔkwɛa. (2 Timoteo 3:1) Awó Yesu Kristo Maŋtsɛ yɛ ŋwɛi yɛ afi 1914. * (Daniel 7:13, 14) Beni akɛ Maŋtsɛyeli wo Yesu dɛŋ nɔŋŋ kɛkɛ ni etsu nifeemɔ ko he nii. Biblia lɛ bɔɔ wɔ amaniɛ akɛ: “Ta te shi yɛ ŋwɛi: Mikael kɛ ebɔfoi lɛ fã drako lɛ nɔ ta. Ni drako lɛ bɔfoi lɛ fata ehe kɛwu.” (Kpojiemɔ 12:7) “Bɔfonukpa Mikael” lɛ ji Yesu Kristo, ni no mli lɛ enine eshɛ hegbɛ ni eyɔɔ yɛ ŋwɛi lɛ nɔ. * (Yuda 9; 1 Tesalonikabii 4:16) Drako lɛ ji Satan Abonsam. Nɛgbɛ Satan kɛ bɔfoi fɔji ni nyiɛ esɛɛ ní atsɛ́ɔ amɛ daimonioi lɛ wu ta lɛ kɛyashi? Aye amɛnɔ kunim ni ashwie amɛ kɛjɛ ŋwɛi loo ‘ashɛrɛ amɛ ashwie’ shikpɔŋ lɛ nɔ. (Kpojiemɔ 12:9) No hewɔ ni ‘ŋwɛi kɛ mɛi ni yɔɔ jɛi’ ni ji Nyɔŋmɔ mumɔŋ bii anɔkwafoi lɛ amli fili amɛ lɛ. Kɛlɛ, jeee nakai ebalɛ yɛ adesai agbɛfaŋ. Biblia lɛ gba akɛ: “Kpóo ha mɛi ni yɔɔ shikpɔŋ lɛ nɔ . . . lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”—Kpojiemɔ 12:12.

Satan mli efũ, ni no eha ekɛ haomɔi—amanehulu kɛ nɔnaa—miigba mɛi ni yɔɔ shikpɔŋ nɔ lɛ anaa. Shi kɛlɛ, “be fioo kɛkɛ” haomɔi nɛɛ baaye. Biblia lɛ wieɔ be fioo nɛɛ he akɛ “naagbee gbii.” Wɔmli baanyɛ afili wɔ akɛ etsɛŋ ni abaajie Abonsam kɛjɛ shikpɔŋ nɔ kwraa. Shi mɛɛ nibii tsɔɔ akɛ wɔyɛ naagbee gbii lɛ amli?

[Shishigbɛ niŋmai]

 [Hei ni Mfonirii ni yɔɔ baafa 2 lɛ Jɛ]

COVER: Foreground: © Chris Stowers/​Panos Pictures; background: FAROOQ NAEEM/​AFP/​Getty Images