Mɛi Heei ni Akɛbafata Nɔyeli Kuu lɛ He

YƐ Shɔ leebi August 24, afi 2005 lɛ, atsɔ vidio nɔ akɛ adafitswaa ko ni yɔɔ miishɛɛ ha United States kɛ Canada Betel wekui lɛ. Ni no ji akɛ, kɛjɛ September 1, afi 2005 kɛyaa lɛ, mɛi heei enyɔ ni ji Geoffrey W. Jackson kɛ Anthony Morris III lɛ baasɔmɔ akɛ Yehowa Odasefoi a-Nɔyeli Kuu lɛ mlibii.

Nyɛminuu Jackson kɛ ehe wo gbɛgbamɔ nitsumɔ lɛ mli yɛ February afi 1971 mli yɛ Tasmania ni yɔɔ Australia ŋshɔkpɔ lɛ nɔ lɛ. Ekɛ Jeanette (Jenny) bote gbalashihilɛ mli yɛ June afi 1974 mli. Yɛ no sɛɛ etsɛɛɛ ni akpɛlɛ amɛnɔ koni amɛsɔmɔ akɛ gbɛgbalɔi krɛdɛɛi. Amɛsɔmɔ akɛ maŋsɛɛ sanekpakpa shiɛlɔi yɛ Tuvalu, Samoa, kɛ Fiji ŋshɔkpɔi ni yɔɔ Pasifik Ŋshɔ lɛ Wuoyigbɛ lɛ anɔ kɛjɛ afi 1979 kɛyashi afi 2003. Beni Nyɛminuu kɛ Nyɛmiyoo Jackson sɔmɔɔ yɛ ŋshɔkpɔi lɛ anɔ lɛ, amɛye amɛbua babaoo hu kɛtsɔɔ Biblia kasemɔ woji ashishi. Nyɛminuu Jackson bɔi sɔɔmɔ akɛ Nitsumɔhe ni yɔɔ Samoa lɛ Ajinafoi Akuu lɛ mlinyo kɛjɛ afi 1992 mli, ni yɛ afi 1996 lɛ, ebɔi sɔɔmɔ akɛ Fiji Nitsumɔhe Nine lɛ Ajinafoi Akuu lɛ mlinyo. Yɛ April afi 2003 lɛ, ekɛ Jenny bafata United States Betel weku lɛ he, ni etsu nii yɛ Nitsumɔhe ni Kwɛɔ Wiemɔi Ashishitsɔɔmɔ Nɔ lɛ. No sɛɛ etsɛɛɛ lɛ, ahala Nyɛminuu Jackson koni eye ebua Nɔyeli Kuu lɛ mli Nitsɔɔmɔ Ajinafoi Akuu lɛ.

Nyɛminuu Morris hu je gbɛgbamɔ nitsumɔ lɛ shishi yɛ afi 1971 mli yɛ United States. Ekɛ Susan bote gbalashihilɛ mli yɛ December nakai afi lɛ mli, ni amɛtee nɔ amɛsɔmɔ akɛ gbɛgbalɔi nɔ ni miihe ashɛ afii ejwɛ kɛyashi amɛfɔ́ amɛkromɔbi ni ji Jesse. Sɛɛ mli lɛ, amɛfɔ́ binuu kroko, ni egbɛi ji Paul. Nyɛminuu Morris kɛ ehe wo be-fɛɛ sɔɔmɔ nitsumɔ lɛ mli ekoŋŋ yɛ afi 1979 mli ákɛ daa gbɛgbalɔ. Beni amɛbii lɛ bɔi skulyaa lɛ, eŋa bafata ehe. Weku lɛ yasɔmɔ yɛ United States maji ni ji Rhode Island kɛ North Carolina, he ni hiamɔ lɛ da yɛ lɛ. Nyɛminuu Morris sɔmɔ yɛ North Carolina akɛ kpokpaa nɔkwɛlɔ sɛɛ mɔ, ni ebii lɛ kɛ amɛhe wo daa gbɛgbamɔ nitsumɔ lɛ mli. Afɔ̃ nine atsɛ́ Jesse kɛ Paul kɛtee United States nitsumɔhe lɛ beni amɛteŋ mɔ fɛɛ mɔ ná afii 19. No beaŋ Nyɛminuu Morris je kpokpaa nɔkwɛmɔ nitsumɔ lɛ shishi. Kɛkɛ ni yɛ afi 2002 mli lɛ, afɔ̃ ekɛ Susan nine kɛba Betel, ni amɛje amɛnitsumɔ lɛ shishi yɛ August gbi 1 lɛ nɔ. Nyɛminuu Morris tsu nii yɛ Nitsumɔhe ni Kwɛɔ Sɔɔmɔ Nitsumɔ lɛ Nɔ yɛ Patterson, ni sɛɛ mli lɛ aha eye ebua Nɔyeli Kuu lɛ mli Sɔɔmɔ Ajinafoi Akuu lɛ.

Nɔyeli Kuu lɛ mli bii krokomɛi lɛ ji C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; kɛ D. Sydlik. Nɔyeli Kuu nɛɛ mlibii lɛ fɛɛ ji Kristofoi ni afɔ amɛ mu.