“Gbaa Wɔ Babaoo Ofata He!”

NƆTSAMƆ Skul ko ni yɔɔ Nezlobnaya yɛ Russia lɛ klasbii komɛi ni kaseɔ adesãi ahe saji lɛ miikase woji ni Russianyo Mikhail Bulgakov eŋmala lɛ ahe nii. Eniŋmaai lɛ mli adesã ko wieɔ Yesu Kristo he yɛ gbɛ ni ejaaa nɔ, ni ejieɔ Satan yi moŋ akɛ mɔ ni yɔɔ ekãa. Beni klasbii lɛ susu adesã nɛɛ lɛ mli saji ahe amɛgbe naa sɛɛ lɛ, tsɔɔlɔ lɛ kɛ adesã nɛɛ mli saji fee klasbii lɛ niŋmaa kaa. Shi kɛlɛ, nikaselɔi lɛ ateŋ mɔ kome ni eji Yehowa Odasefonyo ni eye afii 16 ni atsɛ́ɔ lɛ Andrey lɛ kɛ heshibaa bi koni akaha efee niŋmaa kaa lɛ akɛni ehenilee eŋmɛɛɛ lɛ gbɛ ni ekase adesã wolo ni tamɔ nɛkɛ lɛ hewɔ. Yɛ no najiaŋ lɛ, ebi koni aha eŋma sane ko ni baatsɔɔ nɔ̃ gbɔmɔ ni esusuɔ akɛ Yesu Kristo ji. Tsɔɔlɔ lɛ kpɛlɛ nɔ.

Andrey tsɔɔ mli yɛ eniŋmaa kaa lɛ mli akɛ, eyɛ mli akɛ ekɛ bulɛ haa mɛi krokomɛi asusumɔi moŋ, shi nɔ ni eyɔse ji akɛ gbɛ ni hi fe fɛɛ ni aaatsɔ nɔ akase Yesu he nii ji ní akane Sanekpakpai ejwɛ lɛ ateŋ ekome. Kɛtsɔ nakai feemɔ nɔ lɛ, “obaakase Yesu shihilɛ kɛ etsɔɔmɔi lɛ ahe nii taakɛ mɛi ni kɛ amɛhiŋmɛii na nɔ ni tee nɔ lɛ ŋmala lɛ.” Andrey kɛfata he akɛ: “Naagba kroko hu ji bɔ ni atsɔɔ akɛ Satan ji lɛ. Ekolɛ ebaaŋɔɔ mɛi komɛi anaa akɛ amɛaakane wolo ko ni tsɔɔ akɛ Satan ji mɔ ni yɔɔ ekãa, shi mi lɛ, eŋɔɔɔ minaa.” Etsɔɔ mli faŋŋ akɛ Satan ji mumɔŋ bɔɔ nɔ̃ fɔŋ ko ni yɔɔ hewalɛ ni tsí ehe kɛjɛ Nyɔŋmɔ he, ní kɛ efɔŋfeemɔ, nɔnaa, kɛ amanehulu ba adesai aweku lɛ nɔ. Andrey mu eniŋmaa kaa lɛ naa akɛ: “Miheee miyeee akɛ adesã wolo nɛɛ kanemɔ he baaba sɛɛnamɔ kɛha mi. Yɛ anɔkwale mli lɛ, mibɛ Bulgakov he jwɛŋmɔ fɔŋ ko. Shi yɛ mi diɛŋtsɛ migbɛfaŋ lɛ, masumɔ moŋ akɛ makane Biblia lɛ koni male anɔkwa yinɔsaji ni kɔɔ Yesu Kristo he lɛ.”

Andrey tsɔɔlɔ lɛ ná niŋmaa kaa lɛ he miishɛɛ aahu akɛ ebi koni esaa ehe ni ebawie Yesu Kristo he etsɔɔ amɛ. Andrey kpɛlɛ nɔ oyá. Andrey kane sane ni eŋma lɛ etsɔɔ klasbii lɛ fɛɛ yɛ amɛ-adesãi ahe saji ahe nikasemɔ ni nyiɛ sɛɛ lɛ mli. Etsɔɔ nɔ hewɔ ni esusuɔ akɛ Yesu ji gbɔmɔ ni fe mɔ fɛɛ mɔ ni ehi shi pɛŋ lɛ mli. No sɛɛ lɛ, ekane Biblia mli wolo ni ji Mateo lɛ yitso ko ni wieɔ Yesu gbele lɛ he lɛ. Akɛni be falɛ ni akɛha Andrey ni ekɛkane esane lɛ miitã hewɔ lɛ, etao koni emu sane lɛ naa, shi eklasbii lɛ tee nɔ amɛkɛɛ lɛ akɛ: “Gbaa wɔ babaoo ofata he! Mɛni ba yɛ no sɛɛ?” Enɛ hewɔ lɛ etee nɔ ekane Yesu shitee lɛ he sane kɛjɛ Mateo wolo lɛ mli.

Beni Andrey gbe naa lɛ, eklasbii lɛ bi lɛ Yesu kɛ Yehowa he saji babaoo. Andrey kɛɛ akɛ: “No mli lɛ, mísɔle miha Yehowa momo koni eha mi nilee, ni ebo misɔlemɔ lɛ toi. Minyɛ miha amɛsanebimɔi lɛ fɛɛ ahetoo!” Beni klas nikasemɔ lɛ ba naagbee lɛ, Andrey ha etsɔɔlɔ lɛ Gbɔmɔ ni Fe Mɔ Fɛɛ Mɔ ni Ehi Shi Pɛŋ * wolo lɛ ekome, ni etsɔɔlɔ lɛ kɛ miishɛɛ hé wolo lɛ. Andrey wie akɛ: “Tsɔɔlɔ lɛ ha mi yibɔ ni fa waa kɛjie miyi yɛ sane ni miŋma lɛ hewɔ, ni ejie miyi akɛ mihiɛ gbooo akɛ mawie mi diɛŋtsɛ mihemɔkɛyelii ni miyɔɔ lɛ ahe. Ekɛɛ hu akɛ ekɛ mi kpãa gbee yɛ mihemɔkɛyelii lɛ ekomɛi ahe.”

Andrey mii shɛ ehe akɛ ekpɛ eyiŋ akɛ ekɛ ehenilee ni Biblia etsɔse lɛ lɛ tsu nii, ni ekaneee sane ni gbeɔ Yehowa kɛ e-Bi Yesu Kristo he guɔ lɛ. Shidaamɔ ni tamɔ nɛkɛ ni ekɔ lɛ bu ehe kɛjɛ susumɔi ni damɔɔɔ ŋmalɛ nɔ lɛ ahe, ni eha ená hegbɛ kpele hu ni egba mɛi krokomɛi Biblia mli anɔkwalei lɛ ahe sane.

[Shishigbɛ niŋmaa]