“Mɛni Afaseo Okadi Lɛ Tsɔɔ?”

NUU ko ni tsuɔ nii yɛ maŋ nitsumɔhe ni kwɛɔ kojomɔ saji anɔ yɛ Seoul, Republic of Korea lɛ ŋma akɛ: “Gbii fioo komɛi nɛ ní Yehowa Odasefonyo ko ha mi Buu-Mɔɔ wolo tɛtrɛɛ lɛ eko.” Etsa nɔ akɛ: “Beni mikane lɛ, mibale anɔkwalei komɛi ni kɔɔ Yehowa Odasefoi ni awa amɛyi yɛ Nazi kɛ Komunist nɔyelii lɛ ashishi lɛ ahe. Shi, miitao mabi sane ko. Kɛ́ okwɛ mfoniri ni yɔɔ wolo lɛ sɛɛ lɛ, obaana Yehowa Odasefoi komɛi ni akɛ afaseo okadi ko ekpɛtɛ amɛtadei lɛ ahiɛ yɛ amɛbɛkugbɛ. Misane lɛ ji, mɛni afaseo okadi lɛ tsɔɔ?”

Beni Nazibii yeɔ nɔ yɛ Germany lɛ, Yehowa Odasefoi ni yɔɔ jɛmɛ lɛ kpoo akɛ amɛkɛ woo ni Hitler biɔ ni esaaa lɛ lɛ aaaha lɛ, ni amɛkɛ amɛhe wooo maŋkwramɔŋ saji kɛ asraafoi anitsumɔi amli. No hewɔ lɛ, Nazibii lɛ kɛ yitsoŋwalɛ wa Odasefoi lɛ ayi, ni amɛkɛ amɛteŋ mɛi 12,000 yawo tsuŋ kɛ yiwalɛ nsrai amli. Amɛteŋ mɛi 2,000 gboi, ni agbe ohai abɔ hu.

Mɛni afaseo okadi ni yɔɔ amɛtadei lɛ ahiɛ lɛ tsɔɔ? Wolo ni ji Anatomy of the SS State lɛ tsɔɔ mli akɛ: “Ajara gboklɛfoi ni yɔɔ [Nazi] yiwalɛ nsarai lɛ amli lɛ awo kui srɔtoi amli, ni kuu fɛɛ kuu mlibii yɛ kadimɔ nii krɛdɛɛ ko ni akɛyɔseɔ amɛ. Dani ta lɛ baaje shishi lɛ, no mli lɛ akpɛɔ kadimɔ nii akpɛtɛɔ gboklɛfoi lɛ atadei lɛ ahiɛ, ni kuu mli ni gboklɛfonyo yɔɔ lɛ kɛ ekadimɔ nii: mɛi ni awoɔ amɛ tsuŋ yɛ maŋkwramɔŋ saji ahewɔ lɛ akadimɔ nii ji etsuru; Yehowa Odasefoi lɛ anɔ̃ ji afaseo; mɛi ni awoɔ amɛ tsuŋ yɛ nɔyeli lɛ ni amɛkɛfeee ekome hewɔ lɛ anɔ̃ ji ediŋ; mlatɔ̃lɔi anɔ ji baaŋmɔŋ; hii ni kɛ hii náa bɔlɛ ni awoɔ amɛ tsuŋ lɛ akadimɔ nii lɛ etsuuu tsɔ, ni mɛi ni amɛjeee maŋbii ni awoɔ amɛ tsuŋ lɛ anɔ̃ ji bluu. Yɛ Yudafoi lɛ agbɛfaŋ lɛ, akpɛɔ nɔ ni ale lɛ akɛ David Ŋulami he okadi lɛ akpɛtɛɔ amɛtadei lɛ ahiɛ, ni no akɛkadiɔ amɛ.”

Nilelɔ kpanaa John K. Roth ŋma yɛ ewolo ni ji Holocaust Politics lɛ mli akɛ: “Kɛ́ jeŋ fɛɛ baakai nibii ni akaseɔ kɛjɛɔ afaseo okadi lɛ mli lɛ, no lɛ no baanyɛ abu wɔhe koni wɔkɛ wɔhe akawo nifeemɔi ni bɛ hiŋmɛi nɔ lɛ amli, ni ebaaye ebua wɔ hu koni wɔkɛ mɛi krokomɛi aye yɛ gbɛ kpakpa nɔ tamɔ gbɔmɛi.” Ahã Yehowa Odasefoi jweremɔ nɔ̃ yɛ vidio ni ji Jehovah’s Witnesses Stand Firm Against Nazi Assault (Yehowa Odasefoi Kɛ Shiŋŋfeemɔ Damɔ Nazi Tutuamɔi Anaa) ní amɛfee lɛ hewɔ. Bi Yehowa Odasefoi lɛ ateŋ mɔ ko koni eha onine ashɛ vidio nɛɛ eko nɔ ni oyakwɛ.