Wala Shihilɛ He Sane

Yehowa Ye Ebua Mi Ni Mina Lɛ

TAAKƐ FLORENCE CLARK GBA

Mimɔ miwu ni he yeɔ waa lɛ nine mli. Ákɛ Anglican Sɔlemɔ lɛ mlinyo lɛ, misɔle miha Nyɔŋmɔ koni eha miwu lɛ he awa lɛ, ni miwo Nyɔŋmɔ shi akɛ kɛ́ miwu lɛ yi ná wala lɛ, matao E-sɛɛ gbɛ aahu kɛyashi beni mana lɛ. Ni no sɛɛ lɛ, masɔmɔ lɛ.

AFƆ́ mi yɛ September 18, 1937 yɛ Oombulgurri Shikwɛ̃ɛbii Akutso lɛ mli yɛ Kimberley gɔŋ kɛ eyiteŋ tɛtrɛɛ ni etse ehe banee ni yɔɔ Australia Anaigbɛ kpokpaa lɛ nɔ lɛ nɔ, ni gbɛi ni akɛwo mi ji Florence Chulung.

Mikɛ mlifilimɔ kaiɔ migbekɛbiiashi gbii ni yɔɔ miishɛɛ ni nɔ ko jeee mihe sane ko lɛ. Mikase Nyɔŋmɔ kɛ Biblia lɛ he shishijee nibii fioo komɛi yɛ sɔlemɔ lɛ mli, shi minyɛ ji mɔ ni kɛ Kristofoi ashishitoo mlai tsɔse mi. Ekaneɔ Biblia lɛ ehaa mi daa, ni miná mumɔŋ nibii ahe miishɛɛ kɛjɛ migbekɛbiiashi tɔ̃ɔ. No mli lɛ, misumɔɔ minyɛkwɛ̃ ko ni eji amɛsɔlemɔ lɛ maŋsɛɛ shiɛlɔ lɛ sane waa hu. Ni mile yɛ mitsui mli akɛ miisumɔ ni manyiɛ enanemaahei lɛ asɛɛ.

No mli lɛ, atsɛ́ɔ akutso ni wɔyɔɔ mli lɛ akɛ Forrest River Mission, ni klas 1 kɛyashi klas 5 skul he gbɛjianɔtoo pɛ yɔɔ jɛmɛ. Ni miyaa skul ŋmɛlɛtswai enyɔ pɛ daa leebi. Enɛ hewɔ lɛ, miskulyaa faaa kwraa, ni eji nɔ ko ni gbá mitsɛ naa. Akɛni eesumɔ koni ebii lɛ aná wolokasemɔ kpakpa hewɔ lɛ, ekpɛ eyiŋ akɛ ekɛ eweku lɛ baashi Oombulgurri kɛya Wyndham maŋ lɛ mli. Gbi ni wɔshi lɛ, mimii shɛɛɛ mihe kwraa, shi minyɛ mikɛ be ni fa babaoo tee skul yɛ Wyndham, yɛ afii ejwɛ ni nyiɛ sɛɛ kɛba lɛ mli, kɛjɛ afi 1949 kɛyashi afi 1952. Eŋɔɔ minaa waa akɛ mitsɛ ha miná wolokasemɔ ni tamɔ nɛkɛ.

No mli lɛ, Awo tsuɔ nii ehaa datrɛfonyo ni yɔɔ jɛmɛ lɛ, ni beni miye afii 15 ni migbe skul  naa lɛ, nɛkɛ datrɛfonyo nɛɛ ha mi nitsumɔ akɛ helatsɛmɛi akwɛlɔ yɛ Wyndham helatsamɔhe lɛ. Mikɛ miishɛɛ kpɛlɛ nɔ, ejaakɛ nitsumɔ námɔ wa yɛ no beaŋ.

Afii komɛi asɛɛ lɛ, mikɛ Blɔfonyo ko ni atsɛɔ lɛ Alec, ní lɛɔ kooloi lɛ kpe. Wɔbote gbalashihilɛ mli yɛ afi 1964 yɛ Derby maŋ lɛ mli, ni miyaa Anglican Sɔlemɔ ni yɔɔ jɛmɛ lɛ daa. Gbi ko lɛ, Yehowa Odasefoi komɛi ba mishĩa lɛ. Mikɛɛ amɛ akɛ mibɛ amɛwiemɔ lɛ he miishɛɛ kwraa ni no hewɔ lɛ amɛkaba biɛ dɔŋŋ. Yɛ fɛɛ sɛɛ lɛ, minya nɔ ko ni amɛkɛɛ mi lɛ he waa—ni ji akɛ, Nyɔŋmɔ gbɛi diɛŋtsɛ ji Yehowa.

“Bo Diɛŋtsɛ Onyɛɛɛ Osɔle?”

Kɛjɛ afi 1965 kɛbaa lɛ, shihilɛ lɛ mli bawa waa kɛha mi. Miwu kɛ osharai etɛ komɛi ni naa wa waa kpe—ekpɔŋɔ lɛ tsi lɛ egbee shi shii enyɔ ni ekɛ elɔle lɛ hu ná oshara shikome. Eyɛ mli akɛ epila moŋ, shi heniianaa lɛ, ehe bawa lɛ, ni ebɔi nitsumɔ ekoŋŋ. Shi kɛlɛ, no sɛɛ etsɛɛɛ kwraa lɛ, ekpɔŋɔ lɛ tsi lɛ egbee shi ekoŋŋ. Ni yɛ be nɛɛ mli lɛ, eyitso tswa shi waa. Beni mitee helatsamɔhe lɛ, datrɛfonyo lɛ kɛɛ mi akɛ miwu lɛ baagbo. Mifee basaa. Helatsɛmɛi akwɛlɔ ko kɛɛ osɔfo ko ní ebana mi, shi osɔfo lɛ kɛɛ akɛ: “Jeee bianɛ. Maba wɔ́!”

Mikɛɛ jamɔŋ yoo mɔ kome shihilɔ ni yɔɔ jɛmɛ lɛ akɛ miisumɔ ni osɔfo lɛ aba ni ekɛ mi abasɔle. Ekɛɛ akɛ: “Mɛni gbaa onaa? Bo diɛŋtsɛ onyɛɛɛ osɔle?” Enɛ hewɔ lɛ, misɔle miha amagai ni yɔɔ sɔlemɔtsu lɛ mli lɛ kɛha yelikɛbuamɔ—shi nɔ ko nɔ ko jɛɛɛ mli kɛbaaa. Etamɔ nɔ ni miwu lɛ wala miihe aje edɛŋ. Sanebimɔ ni ba mijwɛŋmɔ mli ji akɛ, ‘Te mafee tɛŋŋ kɛ́ miwu gbo?’ Agbɛnɛ hu misusu mibii etɛ lɛ ahe—ni amɛji Christine, Nanette, kɛ Geoffrey. Te amɛshihilɛ baatamɔ aha tɛŋŋ kɛ́ amɛtsɛ gbo? Miishɛɛ sane ji akɛ, yɛ gbii etɛ sɛɛ lɛ, miwu hiɛ tserɛ lɛ, ni ajie lɛ kɛjɛ helatsamɔhe lɛ yɛ December 6, 1966.

Eyɛ mli akɛ miwu lɛ ná hewalɛ saŋŋ moŋ, shi ená jwɛŋmɔ mli naagba. Enyɛɛɛ nii ekai, ni agbɛnɛ hu ehiɛ bafee laŋlaŋ, ni nɔ ko fioo nɔŋŋ kɛkɛ lɛ emli efu loo ená miishɛɛ. Enyɛɛɛ ekɛ gbekɛbii lɛ ahi shi kɛ miishɛɛ, ni kɛji akɛ amɛfeee amɛnii tamɔ onukpai lɛ, ekɛ mlifu ni naa wa tutuaa amɛ. Ekwɛmɔ bawa. Kɛ hooo kwraa lɛ, ehe bahia ni mafee nɔ fɛɛ nɔ maha lɛ. Misaa mitsɔɔ lɛ nikanemɔ kɛ niŋmaa po ekoŋŋ. Shĩa nitsumɔi krokomɛi ni mitsu kɛfata ekwɛmɔ he lɛ ha ebatɔ mi waa aahu akɛ minyɛɛɛ naa madamɔ dɔŋŋ, ni enɛ ha miná jwɛŋmɔŋ nɔnyɛɛ. Oshara ni nina miwu lɛ sɛɛ afii kpawo lɛ, wɔkpɛlɛ nɔ akɛ mayahi he kroko be kukuoo ko bɔni afee ni no aha mihe awa mi ekoŋŋ.

Mikɛ gbekɛbii lɛ fã kɛtee Perth maŋtiase ni yɔɔ wuoyigbɛ lɛ mli. Dani wɔɔfã kɛya lɛ, no mli lɛ Yehowa Odasefoi eje shishi amɛkɛ minyɛmi yoo lɛ miikase Biblia lɛ yɛ Kununurra ni ji maŋ bibioo ko ni yɔɔ Australia Anaigbɛ lɛ mli. Ekɛ shikpɔŋ nɔ paradeiso ni awo he shi yɛ Biblia lɛ mli lɛ he mfoniri ni yɔɔ Anɔkwale ni kɛ mɔ yaa Naanɔ Wala Mli Lɛ * wolo lɛ mli lɛ tsɔɔ mi. Ejɛ wolo lɛ mli hu etsɔɔ mi akɛ Nyɔŋmɔ gbɛi ji Yehowa, ni minya enɛ he waa. Akɛni atsĩko enɛɛmɛi atã atsɔɔko mi pɛŋ yɛ misɔlemɔ lɛ mli hewɔ lɛ, mikpɛ miyiŋ akɛ kɛ́ miyahi Perth nɔŋŋ pɛ lɛ, matswa Yehowa Odasefoi lɛ tɛlifoŋ.

Shi kɛlɛ, mishashao shi fioo akɛ matswa amɛ. Kɛkɛ ni gbi ko gbɛkɛ lɛ, atswa shinaa lɛ naa ŋmɛlɛ lɛ. Mibinuu lɛ tee shinaa lɛ naa koni eyakwɛ mɔ ni ji, ni ekɛ oyaiyeli ku esɛɛ ebakɛɛ mi akɛ, “Mama, mɛi ni okɛɛ obaatswa amɛ tɛlifoŋ lɛ eba biɛ.” Mihiɛ fee mi yaa fioo, ni mikɛɛ lɛ akɛ, “Kɛɛmɔ amɛ akɛ mibɛ biɛ!” Shi eto he eha mi akɛ, “Mama, bɛ ole akɛ esaaa akɛ mimaleɔ?” Akɛni mihiɛ gbo hewɔ lɛ, miyagbele shinaa lɛ. Beni miŋa amɛ lɛ, miyɔse akɛ amɛhiɛ efee amɛ yaa. Kulɛ amɛba koni amɛbatao mɔ ko yɛ shĩa lɛ mli, shi mɔ lɛ efã. Miha amɛ sɛi, ni mibibii amɛ saji babaoo kɛtsara nɔ, ni amɛjɛ Biblia lɛ mli amɛha mi hetooi ni sa.

 Enɔ otsi lɛ, Odasefoi lɛ kɛ mi bɔi Biblia lɛ kasemɔ daa kɛtsɔ wolo ni ji Anɔkwale ni kɛ mɔ yaa Naanɔ Wala Mli Lɛ kasemɔ nɔ. Nikasemɔ lɛ ha misaa miná suɔmɔ akɛ makase Nyɔŋmɔ he nii ekoŋŋ. Otsii enyɔ sɛɛ lɛ, mitee Kristo Yesu gbele lɛ Kaimɔ lɛ. Mibɔi kpeei yaa daa Hɔgbaa, ni etsɛɛɛ ni mibɔi otsi teŋ kpeei lɛ hu yaa. Mikɛ mɛi krokomɛi gba nibii ni mikaseɔ lɛ hu ahe sane. Mibayɔse akɛ, akɛni mikɛ yelikɛbuamɔ haa mɛi krokomɛi koni amɛkase Biblia mli anɔkwalei lɛ hewɔ lɛ, eha mijwɛŋmɔŋ nɔnyɛɛ lɛ ba shi ni mibɔi miishɛɛnamɔ. Nyɔji ekpaa sɛɛ lɛ, abaptisi mi yɛ kpokpaa wulu nɔ kpee ko ni afee yɛ Perth lɛ shishi.

Yɛ be mli ni miyaa hiɛ yɛ mumɔŋ lɛ, mibanu bɔ ni Yehowa buɔ gbalashihilɛ akɛ eji nɔ ni yɔɔ krɔŋkrɔŋ lɛ shishi, ni nɔ ni fata he ji Biblia mli shishitoo mla ni yɔɔ 1 Korintobii 7:13 lɛ, nɔ ni kɛɔ akɛ: “Kɛ́ yoo ko hu yɛ wu ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekafɔ̃ɔ lɛ gbala.” Ŋmalɛ nɛɛ ha miku misɛɛ kɛtee Alec ŋɔɔ ekoŋŋ.

Miku Misɛɛ Kɛtee Derby

Beni mishi miwu lɛ nɔ ni fa fe afii enumɔ sɛɛ lɛ, miku misɛɛ kɛtee Derby yɛ June 21, 1979. Yɛ anɔkwale mli lɛ, mijwɛŋmɔ fee mi enyɔnyɔɔnyɔ, ni misusu bɔ ni ebaafee enii eha kɛ́ miku misɛɛ mitee eŋɔɔ lɛ he. Naakpɛɛ sane ji akɛ, emii shɛ ehe waa akɛ miku misɛɛ miba eŋɔɔ ekoŋŋ, eyɛ mli moŋ akɛ ewie akɛ Yehowa Odasefonyo ni mibatsɔ lɛ eha enijiaŋ eje wui. Oyá nɔŋŋ kɛkɛ ni ekɛɛ mi akɛ mifata ehe kɛya esɔlemɔ lɛ, ni no ji sɔlemɔ ni kulɛ miyaa dani mishi kɛtee Perth lɛ. Migbála mli mitsɔɔ lɛ akɛ minyɛŋ nakai mafee. Mibɔ mɔdɛŋ waa akɛ mikɛ bulɛ aha eyitsoyeli lɛ, ni mifee bɔ fɛɛ bɔ ni manyɛ ni mahi shi ákɛ ŋa Kristofonyo. Mika akɛ mawie Yehowa kɛ E-shiwoi kpakpai kɛha wɔsɛɛ lɛ ahe sane matsɔɔ lɛ, shi ebooo toi.

Shi sɛɛ mli lɛ, Alec kpɛlɛ mishihilɛ gbɛ hee lɛ nɔ, ni eyeɔ ebuaa mi hu yɛ shika gbɛfaŋ bɔni afee ni manyɛ maya kpeei bibii kɛ kpeei wuji, kɛ agbɛnɛ hu daa otsi kpeei ni afeɔ lɛ. Mihiɛ sɔ waa diɛŋtsɛ beni ehé lɔle—nɔ ko ni sɛɛnamɔ yɔɔ he babaoo diɛŋtsɛ yɛ Australia akrowa ni etse ehe banee nɛɛ mli lɛ—eha mi bɔni afee ni matá mli kɛyatsu Kristofoi asɔɔmɔ nitsumɔ lɛ. Bei pii lɛ, nyɛmimɛi hii kɛ yei, ní kpokpaa nɔkwɛlɔ lɛ fata he lɛ, bawɔɔ wɔshĩa lɛ yɛ be kɛ beaŋ. Enɛ ye ebua Alec ni ele Odasefoi lɛ ateŋ mɛi babaoo, ni etamɔ nɔ ni esumɔɔ koni ekɛ amɛ abɔ naanyo.

Mifee Minii Tamɔ Ezekiel

Mibaná nyɛmimɛi hii kɛ yei lɛ asaramɔi lɛ ahe miishɛɛ, shi mikɛ naagba ko kpe. Mikome too pɛ ji Odasefonyo ni yɔɔ Derby maŋ lɛ mli. Asafo ni bɛŋkɛ fe fɛɛ lɛ yɛ Broome, ni jɛmɛ kɛ he ni miyɔɔ lɛ jɛkɛmɔ ji kilomitai 220. No hewɔ lɛ, mikpɛ miyiŋ akɛ mafee bɔ fɛɛ bɔ ni manyɛ ni mikɛgbɛ sanekpakpa lɛ mashwã. Yɛ Yehowa dɛŋ yelikɛbuamɔ naa lɛ, mito gbɛjianɔ ni mibɔi odaseyeli yɛ shĩa kɛ shĩa. Nitsumɔ nɛɛ wa ha mi moŋ, shi mihaa bɔfo Paulo wiemɔi lɛ hiɔ mijwɛŋmɔŋ be fɛɛ be, nɔ ni kɛɔ akɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.”—Filipibii 4:13.

Osɔfoi ni yɔɔ jɛmɛ lɛ naaa minitsumɔ lɛ he miishɛɛ, titri lɛ odase ni miyeɔ nanemɛi Shikwɛ̃ɛbii lɛ. Amɛbɔ mɔdɛŋ ni amɛwo mihe gbeyei koni mafɔ̃ɔ mishiɛmɔ nitsumɔ lɛ. Shi shitee-kɛ-woo ni amɛkɛba minɔ lɛ ha mitswa mifai shi babaoo moŋ akɛ maya nɔ mashiɛ, ni misɔleɔ mihaa Yehowa daa koni eye ebua mi. Bei pii lɛ, mikaiɔ hewalɛwoo wiemɔi ni akɛha Ezekiel lɛ akɛ: “Naa, miha ohiɛ ewa yɛ amɛhiɛ, ni ohiɛŋtso hu ewa ewo amɛhiɛŋtsei; naa,  miha ohiɛŋtso efee tamɔ diamente ní wa fe tswrɛbo lɛ. Kaashe amɛ gbeyei, ni otsui akafã yɛ amɛhiɛ.”—Ezekiel 3:8, 9.

Hii enyɔ komɛi ni amɛji sɔlemɔ kuu ko mli bii lɛ banina mi shii abɔ be mli ni miiye jara. Amɛkɛ gbeewalɛ kɛ hoofeemɔ ye mihe fɛo, ni amɛbɔ mɔdɛŋ koni amɛgbala jarayelɔi krokomɛi ajwɛŋmɔ kɛba minɔ. Shi, mifooo amɛdaaŋ. Gbi ko beni miku misɛɛ kɛtee koni miyasara mɔ ko ni yɔɔ wiemɔ lɛ he miishɛɛ lɛ, sɔlemɔ ni yɔɔ jɛmɛ lɛ mli osɔfo lɛ ba ni ebafolɔ minaa akɛ miheee Yesu nɔ miyeee. Eshɔ̃ Biblia lɛ yɛ midɛŋ, ni ehwanya Biblia lɛ yɛ mihiɛ, ni esaa etsi yisɛɛ ewo midɛŋ ekoŋŋ. Mikwɛ ehiɛ tɛ̃ɛ, ni mikɛ mlijɔlɛ kɛ shiŋŋfeemɔ tsɛ́ Yohane 3:16 lɛ yisɛɛ, ni mima nɔ mi miha lɛ akɛ miheɔ Yesu nɔ miyeɔ. Nɔmimaa ni mikɛha lɛ hetoo lɛ ha enaa kpɛ ehe waa, ni etsɔ ehe etee ni etswaaa esɛŋ po.

Miná shiɛmɔ ni mishiɛɔ mihaa Shikwɛ̃ɛbii ni yɔɔ Derby akutso lɛ mli lɛ he miishɛɛ. Osɔfo ko ni yɔɔ akutso ko mli lɛ bɔ mɔdɛŋ ni etsĩ minaa koni mikashiɛ miha mɛi ni yɔɔ jɛmɛ lɛ, shi ajie lɛ kɛtee he kroko. No hewɔ lɛ, minyɛ mikɛ Biblia mli shɛɛ sane lɛ yaha amɛ. Mishwe be fɛɛ be akɛ matsɔ maŋsɛɛ shiɛlɔ, taakɛ minyɛkwɛ̃ lɛ ji lɛ, shi amrɔ nɛɛ naa mi ni miitsu maŋsɛɛ sanekpakpa shiɛmɔ nitsumɔ lɛ, ni miiye miibua mɛi krokomɛi ni amɛkase Nyɔŋmɔ Wiemɔ lɛ. Shikwɛ̃ɛbii lɛ ateŋ mɛi babaoo bo mishiɛmɔ lɛ toi, ni mije Biblia mli nikasemɔi babaoo ashishi.

Mihiɛ yɛ Mimumɔŋ Hiamɔ Nii Anɔ

Mikɛ afii enumɔ sɔŋŋ hi shi ní mikome too pɛ ji Yehowa Odasefonyo ni yɔɔ Derby. Akɛni mináaa hewalɛwoo kɛjɛɛɛ kpeei ni akɛ nanemɛi jálɔi aaaya daa lɛ mli hewɔ lɛ, ebafee nɔ ni wa kɛha mi akɛ mahi shi akɛ mɔ ni yɔɔ mumɔŋ hewalɛ be fɛɛ be. Gbi ko beni minu he akɛ mihao waa lɛ, miwo lɔle lɛ koni miyashara shi.  Beni je miihe ana ní miku misɛɛ kɛba shĩa lɛ, mibanina nyɛmi yoo ko kɛ ebii kpawo ni amɛmiimɛ mi. Amɛkɛ woji jɛ asafo ni yɔɔ Broome lɛ mli kɛbaha mi, ni jɛmɛ kɛ he ni mishĩa yɔɔ lɛ jɛkɛ. Kɛjɛ no beaŋ kɛbaa lɛ, nyɛmi yoo nɛɛ ni atsɛ́ɔ lɛ Betty Butterfield lɛ to gbɛjianɔ ni ebaa Derby shikome daa nyɔŋ nɔ, ni ebayeɔ otsi lɛ naagbee lɛ yɛ miŋɔɔ. Wɔfeɔ ekome kɛyaa shiɛmɔ, ni yɛ no sɛɛ lɛ wɔkaseɔ Buu-Mɔɔ lɛ kutuu yɛ mishĩa lɛ. Enɛ hewɔ lɛ, mi hu miyaa Broome shikome daa nyɔŋ nɔ.

Nyɛmimɛi ni yɔɔ Broome lɛ yeɔ amɛbuaa mi waa diɛŋtsɛ ni yɛ bei komɛi amli lɛ amɛnyɛɔ amɛfãa gbɛ kakadaŋŋ lɛ kɛbaa Derby koni amɛkɛ mi aya shiɛmɔ. Amɛwo nyɛmimɛi hii loo yei fɛɛ ni yɔɔ maji krokomɛi amli ní batsɔɔ Derby kɛhoɔ lɛ hewalɛ koni kɛ́ amɛshɛ jɛmɛ lɛ, amɛbi mishi ni amɛfata mihe kɛya shiɛmɔ. Nyɛmimɛi ni fãa gbɛ kɛbaa nɛɛ kɛ maŋshiɛmɔi ni amɔmɔ awo kpãa nɔ lɛ hu bahaa mi. Amɛteŋ mɛi komɛi hu fataa mihe kɛkaseɔ Buu-Mɔɔ lɛ. Saramɔ ni amɛbasaraa mi kpitiokpitio nɛɛ wo mi hewalɛ waa.

Minine Shɛ Yelikɛbuamɔi Krokomɛi Babaoo Hu Nɔ

Mitee nɔ mikɛ afii babaoo ná hewalɛwoo lolo beni Arthur Willis kɛ eŋa Mary ni amɛjɛ Australia Anaigbɛ lɛ wuoyigbɛ ba amɛbaye amɛbua mi nyɔji etɛ yɛ fɛ̃i be lɛ mli lɛ, ni amɛji mɛi ni eba nitsumɔ mli hejɔɔmɔ. Nyɛminuu Willis kwɛ kpeei lɛ ateŋ babaoo nɔ, ni ekwɛɔ shiɛmɔ nitsumɔ lɛ hu nɔ. Wɔ fɛɛ wɔfãa gbɛ kɛyaa Kimberley gɔŋ kɛ eyiteŋ tɛtrɛɛ lɛ nɔ hei ni etse amɛhe banee lɛ, ni wɔyashiɛɔ yɛ tsinai alɛɛhei ni yɔɔ hei ni yɔɔ shɔŋŋ nɛɛ. Be fɛɛ be ni Nyɛminuu kɛ Nyɛmiyoo Willis aaashi mi kɛya amɛmaŋ lɛ, minuɔ shoofeemɔ ni naa wa waa he.

Yɛ naagbee beni eshwɛ gbii fioo ni afi 1983 aaaho lɛ, minu miishɛɛ sane ko akɛ weku ko—ni ji Danny kɛ Denise Sturgeon kɛ amɛbihii ejwɛ lɛ—miiba koni amɛbahi Derby. Beni amɛbashɛ shi lɛ, wɔnyɛɔ wɔfeɔ kpeei daa otsi, ni wɔfeɔ ekome kɛyaa shiɛmɔ. Yɛ afi 2001 lɛ, ato asafo. Amrɔ nɛɛ asafo ni yɔɔ Derby kɛ emli Maŋtsɛyeli shiɛlɔi 24 lɛ yɛ ekãa waa, ni onukpai enyɔ kɛ asafoŋ sɔɔlɔ kome ni yɔɔ mli lɛ yeɔ amɛbuaa wɔ jogbaŋŋ yɛ mumɔŋ. Bei komɛi lɛ, aaafee mɛi 30 baa wɔkpeei lɛ.

Kɛ misusu afii ni eho lɛ ahe lɛ, bɔ ni Yehowa ye ebua mi koni masɔmɔ lɛ lɛ haa mimli filiɔ mi waa. Eyɛ mli akɛ miwu lɛ fatako mihe lolo yɛ hemɔkɛyeli lɛ mli moŋ, shi eyaa nɔ eyeɔ ebuaa mi yɛ gbɛ̀i srɔtoi anɔ. Abaptisi miweku lɛ mli bii enumɔ ni amɛbatsɔmɔ Odasefoi—mibiyei enyɔ, minabiyei enyɔ, kɛ minyɛmi yoo biyoo. Agbɛnɛ hu, Yehowa webii lɛ miitsɔɔ miwekumɛi lɛ ateŋ mɛi babaoo Biblia lɛ mli saji.

Miida Yehowa shi waa akɛ eye ebua mi ni mina lɛ. Mitswa mifai shi akɛ maya nɔ masɔmɔ lɛ daa kɛya naanɔ.—Lala 65:3.

[Shishigbɛ niŋmaa]

[Shikpɔŋ he mfoniri/Mfonirii ni yɔɔ baafa 15]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

AUSTRALIA

Wyndham

Kimberley gɔŋ kɛ eyiteŋ tɛtrɛɛ

Derby

Broome

Perth

[He ni Sane lɛ Jɛ]

Kangaroo and lyrebird: Lydekker; koala: Meyers

[Mfoniri ni yɔɔ baafa 14]

Miitsu nii akɛ helatsɛmɛi akwɛlɔ yɛ Wyndham helatsamɔhe lɛ, yɛ afi 1953

[Mfoniri ni yɔɔ baafa 15]

Derby Asafo, yɛ afi 2005